Devi Bhagavata Purana · Chapter 6.1

triśirasastapobhaṅgāya devarājendradvārā nānopāyacintanavarṇanam
ṛṣaya ūcuḥ
sūta sūta mahābhāga miṣṭaṃ te vacanāmṛtam /
na tṛptāḥ smo vayaṃ pītvā dvaipāyanakṛtaṃ śubham

punastvāṃ praṣṭumicchāmaḥ kathāṃ paurāṇikīṃ śubhām /
vede'pi kathitāṃ ramyāṃ prasiddhāṃ pāpanāśinīm

vṛtrāsura iti khyāto vīryavāṃstvaṣṭurātmajaḥ /
sa kathaṃ nihataḥ saṃkhye vāsavena mahātmanā

tvaṣṭā vai surapakṣīyastatputro balavattaraḥ /
śakreṇa ghātitaḥ kasmād‌brahmayonirmahābalaḥ

devāḥ sattvaguṇotpanā mānuṣā rājasāḥ smṛtāḥ /
tiryañcastāmasāḥ proktāḥ purāṇāgamavādibhiḥ

virodho'tra mahān bhāti nūnaṃ śatamakhena ha /
chalena balavān vṛtraḥ śakreṇa vinipātitaḥ

viṣṇuḥ prerayitā tatra sa tu sattvadharaḥ paraḥ /
praviṣṭaḥ pavimadhye sa chadmanā bhagavān prabhuḥ

sandhiṃ vidhāya sa hyevaṃ mantrito'sau mahābalaḥ /
haribhyāṃ satyamutsṛjya jalaphenena śātitaḥ

kṛtamindreṇa hariṇā kimetatsūta sāhasam /
mahānto'pi ca mohena vañcitāḥ pāpabuddhayaḥ

anyāyavartino'tyarthaṃ bhavanti surasattamāḥ /
sadācāreṇa yuktena devāḥ śiṣṭatvamāgatāḥ

evaṃ viśiṣṭadharmeṇa śiṣṭatvaṃ kīdṛśaṃ punaḥ /
hatvā vṛtraṃ tu viśvastaṃ śakreṇa chadmanā punaḥ

prāptaṃ pāpaphalaṃ no vā brahmahatyāsamud‌bhavam /
kiṃ ca tvayā purā proktaṃ vṛtrāsuravadhaḥ kṛtaḥ

śrīdevyā iti taccāpi cittaṃ mohayatīha naḥ /
sūta uvāca
śṛṇvantu munayo vṛttaṃ vṛtrāsuravadhāśrayam

yathendreṇa ca samprāptaṃ duḥkhaṃ hatyāsamud‌bhavam /
evameva purā pṛṣṭo vyāsaḥ satyavatīsutaḥ

pārīkṣitena rājñāpi sa yadāha ca tad‌bruve /
janamejaya uvāca
kathaṃ vṛtrāsuraḥ pūrvaṃ hato maghavatā mune

sahāyaṃ viṣṇumāsādya chadmanā sāttvikena ha /
kathaṃ ca devyā nihato daityo'sau kena hetunā

kathamekavadho dvābhyāṃ kṛtaḥ syānmunipuṅgava /
tadetacchrotumicchāmi paraṃ kautūhalaṃ hi me

mahatāṃ caritaṃ śṛṇvan ko virajyeta mānavaḥ /
kathayāmbāvaibhavaṃ tvaṃ vṛtrāsuravadhāśritam

vyāsa uvāca
dhanyo'si rājaṃstava buddhirīdṛśī
jātā purāṇaśravaṇe'tisādarā /
pītvāmṛtaṃ devavarāstu sarvathā
pāne vitṛṣṇāḥ prabhavanti vai punaḥ

dine dine te'dhikabhaktibhāvaḥ
kathāsu rājan mahanīyakīrteḥ /
śrotā yadaikapravaṇaḥ śṛṇoti
vaktā tadā prītamanā bravīti

yuddhaṃ purā vāsavavṛtrayoryad‌
vede prasiddhaṃ ca tathā purāṇe /
duḥkhaṃ surendreṇa tathaiva labdhaṃ
hatvā ripuṃ tvāṣṭramapāpameva

citraṃ kimatra nṛpate harivajrabhṛd‌bhyāṃ
yacchadmanā vinihatastriśiro'tha vṛtraḥ /
māyābalena munayo'pi vimohitāste
cakruśca nindyamaniśaṃ kila pāpabhītāḥ

viṣṇuḥ sadaiva kapaṭena jaghāna daityān
sattvātmamūrtirapi mohamavāpya kāmam /
ko'nyo'sti tāṃ bhagavatīṃ manasāpi jetuṃ
śaktaḥ samastajanamohakarīṃ bhavānīm

matsyādiyoniṣu sahasrayugeṣu sadyaḥ
sākṣād‌bhavatyapi yayā viniyojito'tra /
nārāyaṇo narasakho bhagavānanantaḥ
kāryaṃ karoti vihitāvihitaṃ kadācit

dehaṃ dhanaṃ gṛhamidaṃ svajanā madīyaṃ
putrāḥ kalatramiti mohamupetya sarvaḥ /
puṇyaṃ karotyatha ca pāpacayaṃ karoti
māyāguṇairatibalairvikalīkṛto yat

na jātu mohaṃ kṣapituṃ naraḥ kṣamaḥ
kaścid‌bhaved‌bhūpa parāvarārthavit /
vimohitastaistribhireva mūlato
vaśīkṛtātmā jagatītale bhṛśam

atha tau māyayā viṣṇuvāsavau mohitau bhṛśam /
jaghnatuśchadmanā vṛtraṃ svārthasādhanatatparau

tadahaṃ sampravakṣyāmi vṛttāntamavanīpate /
kāraṇaṃ pūrvavairasya vṛtravāsavayormithaḥ

tvaṣṭā prajāpatirhyāsīddevaśreṣṭho mahātapāḥ /
devānāṃ kāryakartā ca nipuṇo brāhmaṇapriyaḥ

sa putraṃ vai triśirasamindradveṣātkilāsṛjat /
viśvarūpeti vikhyātaṃ nāmnā rūpeṇa mohanam

tribhiḥ sa vadanaiḥ śreṣṭhairvyarocata manoharaiḥ /
tribhirbhinnāni kāryāṇi mukhaiḥ samakaronmuniḥ

vedānekena so'dhīte surāṃ caikena so'pibat /
tṛtīyena diśaḥ sarvā yugapacca nirīkṣate

triśirā bhogamutsṛjya tapaścakre suduṣkaram /
tapasvī sa mṛdurdānto dharmameva samāśritaḥ

pañcāgnisādhanaṃ kāle pādapāgre niveśanam /
jalamadhye nivāsaṃ ca hemante śiśire tathā

nirāhāro jitātmāsau tyaktasarvaparigrahaḥ /
tapaścacāra medhāvī duṣkaraṃ mandabuddhibhiḥ

taṃ ca dṛṣṭvā tapasyantaṃ khedamāpa śacīpatiḥ /
viṣādamagamattatra śakro'yaṃ māsmabhūditi

dṛṣṭvā tasya tapo vīryaṃ satyaṃ cāmitatejasaḥ /
cintāṃ ca mahatīṃ prāpa hyaniśaṃ pākaśāsanaḥ

vivardhamānastriśirā māmayaṃ śātayiṣyati /
nopekṣyaḥ sarvathā śatrurvardhamānabalo budhaiḥ

tasmādupāyaḥ kartavyastaponāśāya sāmpratam /
kāmastu tapasāṃ śatruḥ kāmānnaśyati vai tapaḥ

tathaivādya prakartavyaṃ bhogāsakto bhavedyathā /
iti sañcintya manasā buddhimānbalamardanaḥ

ājñāpayatso'psarasastvāṣṭraputrapralobhane /
urvaśīṃ menakāṃ rambhāṃ ghṛtācīṃ ca tilottamām

samāhūyābravīcchakrastāstadā rūpagarvitāḥ /
priyaṃ kurudhvaṃ me sarvāḥ kārye'dya samupasthite

yatto me'dya mahāñchatrustapastapati durjayaḥ /
kāryaṃ kuruta gacchadhvaṃ pralobhayata māciram

śṛṅgāraveṣairvividhairhāvairdehasamud‌bhavaiḥ /
pralobhayata bhadraṃ vaḥ śamayadhvaṃ jvaraṃ mama

asvastho'haṃ mahābhāgāstasya jñātvā tapobalam /
balavānāsanaṃ me'dya grahīṣyatyavilambitaḥ

bhayaṃ me samupāyātaṃ kṣipraṃ nāśayatābalāḥ /
upakurvantu sahitāḥ kārye'dya samupasthite

tacchrutvā vacanaṃ nārya ūcustaṃ praṇatāḥ puraḥ /
mā bhayaṃ kuru deveśa yatiṣyāmaḥ pralobhane

yathā na syād‌bhayaṃ tasmāttathā kāryaṃ mahādyute /
nṛtyagītavihāraiśca munestasya pralobhane

kaṭākṣairaṅgabhedaiśca mohayitvā muniṃ vibho /
lolupaṃ vaśamasmākaṃ kariṣyāmo niyantritam

vyāsa uvāca
ityābhāṣya hariṃ nāryo yayustriśiraso'ntikam /
kurvantyo vividhānbhāvānkāmaśāstrocitānapi

gāyantyastālabhedaistā nṛtyantyaḥ purato muneḥ /
taṃ pralobhayituṃ cakrurnānābhāvānvarāṅganāḥ

nāpaśyatsa taporāśiraṅganānāṃ viḍambanam /
indriyāṇi vaśe kṛtvā mūkāndhabadhiraḥ sthitaḥ

dināni katicittasthurnāryastasyāśrame vare /
kurvantyo gānanṛtyādiprapañcānatimohadān

na cacāla yadā kāmaṃ dhyānācca triśirā muniḥ /
parāvṛtya tadā devyaḥ punaḥ śakramupasthitāḥ

kṛtāñjalipuṭāḥ sarvā devarājamathābruvan /
śrāntā dīnā bhayatrastā vivarṇavadanā bhṛśam

devadeva mahārāja yat‍naśca paramaḥ kṛtaḥ /
na sa śakyo durādharṣo dhairyāccālayituṃ vibho

upāyo'nyaḥ prakartavyaḥ sarvathā pākaśāsana /
nāsmākaṃ balametasmiṃstāpase vijitendriye

diṣṭyā vayaṃ na śaptāḥ sma yadanena mahātmanā /
muninā vahnitulyena tapasā dyotitena hi

visṛjyāpsarasaḥ śakraścintayāmāsa mandadhīḥ /
tasyaiva ca vadhopāyaṃ pāpabuddhirasāmpratam

visṛjya lokalajjāṃ sa tathā pāpabhayaṃ bhṛśam /
cakāra pāpabuddhiṃ tu tadvadhāya mahīpate