Devi Bhagavata Purana · Chapter 5.34

atha catustriṃśo'dhyāyaḥ
rājovāca/
bhagavanbrūhi me samyaktasyā ārādhane vidhim /
pūjāvidhiṃ ca mantrāṃśca tathā homavidhiṃ vada // १ /
ṛṣiruvāca/
śṛṇu rājanpravakṣyāmi tasyāḥ pūjāvidhiṃ śubham /
kāmadaṃ mokṣadaṃ nṝṇāṃ jñānadaṃ duḥkhanāśanam

ādau snānavidhiṃ kṛtvā śuciḥ śuklāṃbaro naraḥ /
ācamya prayataḥ kṛtvā śubhamāyatanaṃ nijam

tato'valiptabhūmyāṃ tu saṃsthāpyāsanamuttamam /
tatropaviśya vidhivattrirācamya mudānvitaḥ

pūjādravyaṃ susaṃsthāpya yathāśaktyanusārataḥ /
prāṇāyāmaṃ tataḥ kṛtvā bhūtaśuddhiṃ vidhāya ca

kuryātprāṇapratiṣṭhāṃ tu saṃbhāraṃ prokṣya maṃtrataḥ /
kālajñānaṃ tataḥ kṛtvā nyāsaṃ kuryādyathāvidhi

śubhe tāmramaye pātre caṃdanena sitena ca /
ṣaṭkoṇaṃ vilikhedyaṃtraṃ cāṣṭakoṇaṃ tato bahiḥ

navākṣarasya maṃtrasya bījāni vilikhettataḥ /
kṛtvā yaṃtrapratiṣṭhāṃ ca vedoktāṃ saṃvidhāya ca

arcāṃ vā dhātavīṃ kuryātpūjāmaṃtraiḥ śivoditaiḥ /
pūjanaṃ pṛthivīpāla bhagavatyāḥ prayatnataḥ

kṛtvā vā vidhivatpūjāmāgamoktāṃ samāhitaḥ /
japennavākṣaraṃ maṃtraṃ satataṃ dhyānapūrvakam

homaṃ daśāṃśataḥ kuryāddaśāṃśena ca tarpaṇam /
bhojanaṃ brāhmaṇānāṃ ca taddaśāṃśena kārayet

caritratrayapāṭhaṃ ca nityaṃ kuryādvisarjayet /
navarātravrataṃ caiva vidheyaṃ vidhipūrvakam

āśvine ca tathā caitre śukle pakṣe narādhipa /
navarātro(trā)pavāso vai kartavyaḥ śubhamicchatā

homaḥ suvipula: kāryo japyamaṃtraiḥ supāyasaiḥ /
śarkarāghṛtamiśraiśca madhuyuktaiḥ susaṃskṛtaiḥ

chāgamāṃsena vā kāryoṃ bilvapatraistathā śubhaiḥ /
hayārikusumai raktaistilairvā śarkarāyutaiḥ

aṣṭamyāṃ ca caturdaśyāṃ navamyāṃ ca viśeṣataḥ /
kartavyaṃ pūjanaṃ devyā brāhmaṇānāṃ ca bhojanam

nirdhano dhanamāpnoti rogī rogātpramucyate /
aputro labhate putrāñchubhāṃśca vaśavartinaḥ

rājyabhraṣṭo nṛpo rājyaṃ prāpnoti sārvabhaumikam /
śatrubhiḥ pīḍito haṃti ripuṃ māyāprasādataḥ

vidyārthī pūjanaṃ yastu karoti niyateṃdriyaḥ /
anavadyāṃ śubhāṃ vidyāṃ viṃdate nātra saṃśayaḥ

brāhmaṇaḥ kṣatriyo vaiśyaḥ śūdro vā bhaktisaṃyutaḥ /
pūjayejjagatāṃ dhātrīṃ sa sarvasukhabhāgbhavet

navarātravrataṃ kuryānnaranārīgaṇaśca yaḥ /
vāṃchitaṃ phalamāpnoti sarvadā bhaktitatparaḥ

āśvine śuklapakṣe tu navarātravrataṃ śubham /
karoti bhāvasaṃyuktaḥ sarvānkāmānavāpnuyāt

vidhivanmaṃḍalaṃ kṛtvā pūjāsthānaṃ prakalpayet /
kalaśaṃ sthāpayettatra vedamaṃtravidhānataḥ

yaṃtraṃ suruciraṃ kṛtvā sthāpayetkalaśopari /
vāpayitvā yavāṃścārūnpārśvataḥ parivartitān

kṛtvopari vitānaṃ ca puṣpamālāsamāvṛtam /
dhūpadīpasusaṃyuktaṃ kartavyaṃ caṇḍikāgṛham

trikālaṃ tatra kartavyā pūjā śaktyanusārataḥ /
vittaśāṭhyaṃ na kartavyaṃ caṇḍikāyāśca pūjane

dhūpairdīpaiḥ sunaivedyaiḥ phalapuṣpairanekaśaḥ /
gītavādyaiḥ stotrapāṭhairvedapārāyaṇaistathā

utsavastatra kartavyo nānāvāditrasaṃyutaiḥ /
kanyakānāṃ pūjanaṃ ca vidheyaṃ vidhipūrvakam

candanairbhūṣaṇairvastrairbhakṣyaiśca vividhaistathā /
sugandhatailamālyaiśca manaso rucikārakaiḥ

evaṃ sampūjanaṃ kṛtvā homaṃ mantravidhānataḥ /
aṣṭamyāṃ vā navamyāṃ vā kārayedvidhipūrvakam

brāhmaṇānbhojayetpaścātpāraṇaṃ daśamīdine /
kartavyaṃ śaktito dānaṃ deyaṃ bhaktiparairnṛpaiḥ

evaṃ yaḥ kurute bhaktyā navarātravrataṃ naraḥ /
nārī vā sadhavā bhaktyā vidhavā vā pativratā

iha loke sukhaṃ bhogānprāpnoti manasepsitān /
dehānte paramaṃ sthānaṃ prāpnoti vratatatparaḥ

janmāntare'mbikābhaktirbhavatyavyabhicāriṇī/
janmottamakule prāpya sadācāro bhaveddhi saḥ

navarātravrataṃ proktaṃ vratānāmuttamaṃ vratam /
ārādhanaṃ śivāyāstu sarvasaukhyakaraṃ param

anena vidhinā rājansamārādhaya caṇḍikām /
jitvā ripūnaskhalitaṃ rājyaṃ prāpsyatyanuttamam

sukhaṃ ca paramaṃ bhūpa dehe'sminsvagṛhe punaḥ /
putradārānsamāsādya lapsyase nātra saṃśayaḥ

vaiśyottama tvamevādya samārādhaya kāmadām /
devīṃ viśveśvarīṃ māyāṃ sṛṣṭisaṃhārakāriṇīm

svajanānāṃ ca mānyastvaṃ bhaviṣyasi gṛhe gataḥ /
sukhaṃ sāṃsārikaṃ prāpya yathābhilaṣitaṃ punaḥ

devīloke śubhe vāso bhavitā te na saṃśayaḥ /
nārādhitā bhagavatī yaiste narakabhāginaḥ

iha loke'tiduḥkhārtā nānārogaiḥ prapīḍitāḥ /
bhavaṃti mānavā rājañchatrubhiśca parājitāḥ

niṣkalatrā hyaputrāśca tṛṣṇārtāḥ stabdhabuddhayaḥ /
bilbīdalaiḥ karavīraiḥ śatapatraiśca campakaiḥ

arcitā jagatāṃ dhātrī yaiste'tīva vilāsinaḥ /
bhavaṃti kṛtapuṇyāste śaktibhaktiparāyaṇāḥ

dhanavibhavasukhāḍhyā mānavā mānavaṃtaḥ sakalaguṇagaṇānāṃ bhājanaṃ bhāratīśāḥ /
nigamapaṭhitamantraiḥ pūjitā yairbhavānī nṛpatitilakamukhyāste bhavaṃtīha loke

iti śrīdevībhāgavate mahāpurāṇe pañcamaskandhe catustriṃśo'dhyāyaḥ