દેવી ભાગવત પુરાણ · અધ્યાય 5.34

અથ ચતુસ્ત્રિંશોઽધ્યાયઃ
રાજોવાચ।
ભગવન્બ્રૂહિ મે સમ્યક્તસ્યા આરાધને વિધિમ્ ।
પૂજાવિધિં ચ મન્ત્રાંશ્ચ તથા હોમવિધિં વદ ॥ ૧ ।
ઋષિરુવાચ।
શૃણુ રાજન્પ્રવક્ષ્યામિ તસ્યાઃ પૂજાવિધિં શુભમ્ ।
કામદં મોક્ષદં નૄણાં જ્ઞાનદં દુઃખનાશનમ્

આદૌ સ્નાનવિધિં કૃત્વા શુચિઃ શુક્લાંબરો નરઃ ।
આચમ્ય પ્રયતઃ કૃત્વા શુભમાયતનં નિજમ્

તતોઽવલિપ્તભૂમ્યાં તુ સંસ્થાપ્યાસનમુત્તમમ્ ।
તત્રોપવિશ્ય વિધિવત્ત્રિરાચમ્ય મુદાન્વિતઃ

પૂજાદ્રવ્યં સુસંસ્થાપ્ય યથાશક્ત્યનુસારતઃ ।
પ્રાણાયામં તતઃ કૃત્વા ભૂતશુદ્ધિં વિધાય ચ

કુર્યાત્પ્રાણપ્રતિષ્ઠાં તુ સંભારં પ્રોક્ષ્ય મંત્રતઃ ।
કાલજ્ઞાનં તતઃ કૃત્વા ન્યાસં કુર્યાદ્યથાવિધિ

શુભે તામ્રમયે પાત્રે ચંદનેન સિતેન ચ ।
ષટ્કોણં વિલિખેદ્યંત્રં ચાષ્ટકોણં તતો બહિઃ

નવાક્ષરસ્ય મંત્રસ્ય બીજાનિ વિલિખેત્તતઃ ।
કૃત્વા યંત્રપ્રતિષ્ઠાં ચ વેદોક્તાં સંવિધાય ચ

અર્ચાં વા ધાતવીં કુર્યાત્પૂજામંત્રૈઃ શિવોદિતૈઃ ।
પૂજનં પૃથિવીપાલ ભગવત્યાઃ પ્રયત્નતઃ

કૃત્વા વા વિધિવત્પૂજામાગમોક્તાં સમાહિતઃ ।
જપેન્નવાક્ષરં મંત્રં સતતં ધ્યાનપૂર્વકમ્

હોમં દશાંશતઃ કુર્યાદ્દશાંશેન ચ તર્પણમ્ ।
ભોજનં બ્રાહ્મણાનાં ચ તદ્દશાંશેન કારયેત્

ચરિત્રત્રયપાઠં ચ નિત્યં કુર્યાદ્વિસર્જયેત્ ।
નવરાત્રવ્રતં ચૈવ વિધેયં વિધિપૂર્વકમ્

આશ્વિને ચ તથા ચૈત્રે શુક્લે પક્ષે નરાધિપ ।
નવરાત્રો(ત્રા)પવાસો વૈ કર્તવ્યઃ શુભમિચ્છતા

હોમઃ સુવિપુલ: કાર્યો જપ્યમંત્રૈઃ સુપાયસૈઃ ।
શર્કરાઘૃતમિશ્રૈશ્ચ મધુયુક્તૈઃ સુસંસ્કૃતૈઃ

છાગમાંસેન વા કાર્યોં બિલ્વપત્રૈસ્તથા શુભૈઃ ।
હયારિકુસુમૈ રક્તૈસ્તિલૈર્વા શર્કરાયુતૈઃ

અષ્ટમ્યાં ચ ચતુર્દશ્યાં નવમ્યાં ચ વિશેષતઃ ।
કર્તવ્યં પૂજનં દેવ્યા બ્રાહ્મણાનાં ચ ભોજનમ્

નિર્ધનો ધનમાપ્નોતિ રોગી રોગાત્પ્રમુચ્યતે ।
અપુત્રો લભતે પુત્રાઞ્છુભાંશ્ચ વશવર્તિનઃ

રાજ્યભ્રષ્ટો નૃપો રાજ્યં પ્રાપ્નોતિ સાર્વભૌમિકમ્ ।
શત્રુભિઃ પીડિતો હંતિ રિપું માયાપ્રસાદતઃ

વિદ્યાર્થી પૂજનં યસ્તુ કરોતિ નિયતેંદ્રિયઃ ।
અનવદ્યાં શુભાં વિદ્યાં વિંદતે નાત્ર સંશયઃ

બ્રાહ્મણઃ ક્ષત્રિયો વૈશ્યઃ શૂદ્રો વા ભક્તિસંયુતઃ ।
પૂજયેજ્જગતાં ધાત્રીં સ સર્વસુખભાગ્ભવેત્

નવરાત્રવ્રતં કુર્યાન્નરનારીગણશ્ચ યઃ ।
વાંછિતં ફલમાપ્નોતિ સર્વદા ભક્તિતત્પરઃ

આશ્વિને શુક્લપક્ષે તુ નવરાત્રવ્રતં શુભમ્ ।
કરોતિ ભાવસંયુક્તઃ સર્વાન્કામાનવાપ્નુયાત્

વિધિવન્મંડલં કૃત્વા પૂજાસ્થાનં પ્રકલ્પયેત્ ।
કલશં સ્થાપયેત્તત્ર વેદમંત્રવિધાનતઃ

યંત્રં સુરુચિરં કૃત્વા સ્થાપયેત્કલશોપરિ ।
વાપયિત્વા યવાંશ્ચારૂન્પાર્શ્વતઃ પરિવર્તિતાન્

કૃત્વોપરિ વિતાનં ચ પુષ્પમાલાસમાવૃતમ્ ।
ધૂપદીપસુસંયુક્તં કર્તવ્યં ચણ્ડિકાગૃહમ્

ત્રિકાલં તત્ર કર્તવ્યા પૂજા શક્ત્યનુસારતઃ ।
વિત્તશાઠ્યં ન કર્તવ્યં ચણ્ડિકાયાશ્ચ પૂજને

ધૂપૈર્દીપૈઃ સુનૈવેદ્યૈઃ ફલપુષ્પૈરનેકશઃ ।
ગીતવાદ્યૈઃ સ્તોત્રપાઠૈર્વેદપારાયણૈસ્તથા

ઉત્સવસ્તત્ર કર્તવ્યો નાનાવાદિત્રસંયુતૈઃ ।
કન્યકાનાં પૂજનં ચ વિધેયં વિધિપૂર્વકમ્

ચન્દનૈર્ભૂષણૈર્વસ્ત્રૈર્ભક્ષ્યૈશ્ચ વિવિધૈસ્તથા ।
સુગન્ધતૈલમાલ્યૈશ્ચ મનસો રુચિકારકૈઃ

એવં સમ્પૂજનં કૃત્વા હોમં મન્ત્રવિધાનતઃ ।
અષ્ટમ્યાં વા નવમ્યાં વા કારયેદ્વિધિપૂર્વકમ્

બ્રાહ્મણાન્ભોજયેત્પશ્ચાત્પારણં દશમીદિને ।
કર્તવ્યં શક્તિતો દાનં દેયં ભક્તિપરૈર્નૃપૈઃ

એવં યઃ કુરુતે ભક્ત્યા નવરાત્રવ્રતં નરઃ ।
નારી વા સધવા ભક્ત્યા વિધવા વા પતિવ્રતા

ઇહ લોકે સુખં ભોગાન્પ્રાપ્નોતિ મનસેપ્સિતાન્ ।
દેહાન્તે પરમં સ્થાનં પ્રાપ્નોતિ વ્રતતત્પરઃ

જન્માન્તરેઽમ્બિકાભક્તિર્ભવત્યવ્યભિચારિણી।
જન્મોત્તમકુલે પ્રાપ્ય સદાચારો ભવેદ્ધિ સઃ

નવરાત્રવ્રતં પ્રોક્તં વ્રતાનામુત્તમં વ્રતમ્ ।
આરાધનં શિવાયાસ્તુ સર્વસૌખ્યકરં પરમ્

અનેન વિધિના રાજન્સમારાધય ચણ્ડિકામ્ ।
જિત્વા રિપૂનસ્ખલિતં રાજ્યં પ્રાપ્સ્યત્યનુત્તમમ્

સુખં ચ પરમં ભૂપ દેહેઽસ્મિન્સ્વગૃહે પુનઃ ।
પુત્રદારાન્સમાસાદ્ય લપ્સ્યસે નાત્ર સંશયઃ

વૈશ્યોત્તમ ત્વમેવાદ્ય સમારાધય કામદામ્ ।
દેવીં વિશ્વેશ્વરીં માયાં સૃષ્ટિસંહારકારિણીમ્

સ્વજનાનાં ચ માન્યસ્ત્વં ભવિષ્યસિ ગૃહે ગતઃ ।
સુખં સાંસારિકં પ્રાપ્ય યથાભિલષિતં પુનઃ

દેવીલોકે શુભે વાસો ભવિતા તે ન સંશયઃ ।
નારાધિતા ભગવતી યૈસ્તે નરકભાગિનઃ

ઇહ લોકેઽતિદુઃખાર્તા નાનારોગૈઃ પ્રપીડિતાઃ ।
ભવંતિ માનવા રાજઞ્છત્રુભિશ્ચ પરાજિતાઃ

નિષ્કલત્રા હ્યપુત્રાશ્ચ તૃષ્ણાર્તાઃ સ્તબ્ધબુદ્ધયઃ ।
બિલ્બીદલૈઃ કરવીરૈઃ શતપત્રૈશ્ચ ચમ્પકૈઃ

અર્ચિતા જગતાં ધાત્રી યૈસ્તેઽતીવ વિલાસિનઃ ।
ભવંતિ કૃતપુણ્યાસ્તે શક્તિભક્તિપરાયણાઃ

ધનવિભવસુખાઢ્યા માનવા માનવંતઃ સકલગુણગણાનાં ભાજનં ભારતીશાઃ ।
નિગમપઠિતમન્ત્રૈઃ પૂજિતા યૈર્ભવાની નૃપતિતિલકમુખ્યાસ્તે ભવંતીહ લોકે

ઇતિ શ્રીદેવીભાગવતે મહાપુરાણે પઞ્ચમસ્કન્ધે ચતુસ્ત્રિંશોઽધ્યાયઃ