Devi Bhagavata Purana · Chapter 5.28

raktabījadvārā devīsamīpe śumbhaniśumbhasaṃvādavarṇanam
vyāsa uvāca
kṛtvā hāsyaṃ tato devī tamuvāca viśāṃpate /
meghagambhīrayā vācā yuktiyuktamidaṃ vacaḥ

pūrvameva mayā proktaṃ mandātman kiṃ vikatthase /
dūtasyāgre yathāyogyaṃ vacanaṃ hitasaṃyutam

sadṛśo mama rūpeṇa balena vibhavena ca /
trilokyāṃ yadi ko'pi syāttaṃ patiṃ pravṛṇomyaham

brūhi śumbhaṃ niśumbhañca pratijñā me purā kṛtā /
tasmādyudhyasva jitvā māṃ vivāhaṃ vidhivatkuru

tvaṃ vai tadājñayā prāptastasya kāryārthasiddhaye /
saṃgrāmaṃ kuru pātālaṃ gaccha vā patinā saha

vyāsa uvāca
tacchrutvā vacanaṃ devyāḥ sa daityo'marṣapūritaḥ /
mumoca tarasā bāṇānsiṃhasyopari dāruṇān

ambikā tāccharānvīkṣya gagane pannagopamān /
ciccheda sāyakaistīkṣṇairlaghuhastatayā kṣaṇāt

anyairjaghāna viśikhai raktabījaṃ mahāsuram /
ambikācāpanirmuktaiḥ karṇākṛṣṭaiḥ śilāśitaiḥ

devībāṇahataḥ pāpo mūrcchāmāpa rathopari /
patite raktabīje tu hāhākāro mahānabhūt

sainikāścukruśuḥ sarve hatāḥ sma iti cābruvan /
tato bumbāravaṃ śrutvā śumbhaḥ paramadāruṇam

udyogaṃ sarvasainyānāṃ daityānāmādideśa ha /
śumbha uvāca
niryāntu dānavāḥ sarve kāmbojāḥ svabalairvṛtāḥ

anye'pyatibalāḥ śūrāḥ kālakeyā viśeṣataḥ /
vyāsa uvāca
ityājñaptaṃ balaṃ sarvaṃ śumbhena ca caturvidham

nirjagāma madā''viṣṭaṃ devīsamaramaṇḍale /
tamāgataṃ samālokya caṇḍikā dānavaṃ balam

ghaṇṭānādaṃ cakārāśu bhīṣaṇaṃ bhayadaṃ muhuḥ /
jyāsvanaṃ śaṅkhanādañca cakāra jagadambikā

tena nādena sā jātā kālī vistāritānanā /
śrutvā tanninadaṃ ghoraṃ siṃho devyāśca vāhanam

jagarja so'pi balavāñjanayanbhayamad‌bhutam /
tanninādamupaśrutya dānavāḥ krodhamūrcchitāḥ

sarve cikṣipurastrāṇi devīṃ prati mahābalāḥ /
tasminnevāyate yuddhe dāruṇe lomaharṣaṇe

brahmādīnāñca devānāṃ śaktayaścaṇḍikāṃ yayuḥ /
yasya devasya yad‌rūpaṃ yathā bhūṣaṇavāhanam

tādṛg‌rūpāstadā devyaḥ prayayuḥ samarāṅgaṇe /
brahmāṇī varaṭārūḍhā sākṣasūtrakamaṇḍaluḥ

āgatā brahmaṇaḥ śaktirbrahmāṇīti pratiśrutā /
vaiṣṇavī garuḍārūḍhā śaṅkhacakragadādharā

padmahastā samāyātā pītāmbaravibhūṣitā /
śāṅkarī tu vṛṣārūḍhā triśūlavaradhāriṇī

ardhacandradharā devī tathāhivalayā śivā /
kaumārī śikhisaṃrūḍhā śaktihastā varānanā

yuddhakāmā samāyātā kārtikeyasvarūpiṇī /
indrāṇī suṣṭhuvadanā suśvetagajavāhanā

vajrahastātiroṣāḍhyā saṃgrāmābhimukhī yayau /
vārāhī śūkarākārā prauḍhapretāsanā matā

nārasiṃhī nṛsiṃhasya bibhratī sadṛśaṃ vapuḥ /
yāmyā ca mahiṣārūḍhā daṇḍahastā bhayapradā

samāyātātha saṃgrāme yamarūpā śucismitā /
tathaiva vāruṇī śaktiḥ kauberī ca madotkaṭā

evaṃvidhāstathā''kārā yayuḥ svasvabalairvṛtāḥ /
āgatāstāḥ samālokya devī mudamavāpa ca

svasthā mumudire devā daityāśca bhayamāyayuḥ /
tābhiḥ parivṛtastatra śaṅkaro lokaśaṅkaraḥ

samāgamya ca saṃgrāme caṇḍikāmityuvāca ha /
hanyantāmasurāḥ śīghraṃ devānāṃ kāryasiddhaye

niśumbhaṃ caiva śumbhaṃ ca ye cānye dānavāḥ sthitāḥ /
hatvā daityabalaṃ sarvaṃ kṛtvā ca nirbhayaṃ jagat

svāni svāni ca dhiṣṇyāni samāgacchantu śaktayaḥ /
devā yajñabhujaḥ santu brāhmaṇā yajane ratāḥ

prāṇinaḥ santu santuṣṭāḥ sarve sthāvarajaṅgamāḥ /
śamaṃ yāntu tathotpātā ītayaśca tathā punaḥ

ghanāḥ kāle pravarṣantu kṛṣirbahuphalā tathā /
vyāsa uvāca
evaṃ bruvati deveśe śaṅkare lokaśaṅkare

caṇḍikāyā śarīrāttu nirgatā śaktirad‌bhutā /
bhīṣaṇātipracaṇḍā ca śivāśataninādinī

ghorarūpātha pañcāsyamityuvāca smitānanā /
devadeva vrajāśu tvaṃ daityānāmadhipaṃ prati

dūtatvaṃ kuru kāmāre brūhi śumbhaṃ smarākulam /
niśumbhañca madotsiktaṃ vacanānmama śaṅkara

muktvā triviṣṭapaṃ yāta yūyaṃ pātālamāśu vai /
devāḥ svarge sukhaṃ yāntu turāṣāṭ svāsanaṃ śabham

prāpnotu tridivaṃ sthānaṃ yajñabhāgāṃśca devatāḥ /
jīvitecchā ca yuṣmākaṃ yadi syāttu mahattarā

tarhi gacchata pātālaṃ tarasā yatra dānavāḥ /
athavā balamāsthāya yuddhecchā maraṇāya cet

tadā''gacchantu tṛpyantu macchivāḥ piśitena vaḥ /
vyāsa uvāca
tacchrutvā vacanaṃ tasyāḥ śūlapāṇistvarānvitaḥ

gatvā''ha daityarājānaṃ śumbhaṃ sadasi saṃsthitam /
śiva uvāca
rājan dūto'hamambāyāstripurāntakaro haraḥ

tvatsakāśamihāyāto hitaṃ kartuṃ tavākhilam /
tyaktvā svargaṃ tathā bhūmiṃ yūyaṃ gacchata satvaram

pātālaṃ yatra prahlādo baliśca balināṃ varaḥ /
athavā maraṇecchā cettarhyāgacchata satvaram

saṃgrāme vo haniṣyāmi sarvānevāhamāśu vai /
ityuvāca mahārājñī yuṣmatkalyāṇahetave

vyāsa uvāca
iti daityavarāndevīvākyaṃ pīyūṣasannibham /
hitakṛcchrāvayitvā sa pratyāyātaśca śūlabhṛt

yayāsau preritaḥ śaṃbhurdūtatve dānavānprati /
śivadūtīti vikhyātā jātā tribhuvane'khile

te'pi śrutvā vaco devyāḥ śaṅkaroktaṃ tuduṣkaram /
yuddhāya niryayuḥ śīghraṃ daṃśitāḥ śastrapāṇayaḥ

tarasā raṇamāgatya caṇḍikāṃ prati dānavāḥ /
nirjaghnuśca śaraistīkṣṇaiḥ karṇākṛṣṭaiḥ śilāśitaiḥ

kālikā śūlapātaistān gadāśaktividāritān /
kurvantī vyacarattatra bhakṣayantī ca dānavān

kamaṇḍalujalākṣepagataprāṇān mahābalān /
brahmāṇī cākarottatra dānavānsamarāṅgaṇe

māheśvarī vṛṣārūḍhā triśūlenātiraṃhasā /
jaghāna dānavānsaṃkhye pātayāmāsa bhūtale

vaiṣṇavī cakrapātena gadāpātena dānavān /
gataprāṇāṃścakārāśu cottamāṅgavivarjitān

aindrī vajraprahāreṇa pātayāmāsa bhūtale /
airāvatakarāghātapīḍitāndaityapuṅgavān

vārāhī tuṇḍaghātena daṃṣṭrāgrapātanena ca /
jaghāna krodhasaṃyuktā śataśo daityadānavān

nārasiṃhī nakhaistīvrairdāritāndaityapuṅgavān /
bhakṣayantī cacārājau nanāda ca muhurmuhuḥ

śivadūtī aṭṭahāsaiḥ pātayāmāsa bhūtale /
tāṃścakhādātha cāmuṇḍā kālikā ca tvarānvitā

śikhisaṃsthā ca kaumārī karṇākṛṣṭaiḥ śilāśitaiḥ /
nijaghāna raṇe śatrūndevānāṃ ca hitāya vai

vāruṇī pāśasambaddhāndaityānsamaramastake /
pātayāmāsa tatpṛṣṭhe mūrcchitāngatacetanān

evaṃ mātṛgaṇenājāvativīryaparākramam /
marditaṃ dānavaṃ sainyaṃ palāyanaparaṃ hyabhūt

bumbāravastu sumahānabhūttatra balārṇave /
puṣpavṛṣṭiṃ tadā devāścakrurdevyā gaṇopari

tacchrutvā ninadaṃ ghoraṃ jayaśabdaṃ ca dānavāḥ /
raktabījaścukopāśu dṛṣṭvā daityānpalāyitān

garjamānāṃstathā devānvīkṣya daityo mahābalaḥ /
raktabījastu tejasvī raṇamabhyāyayau tadā

sāyudho rathasaṃviṣṭaḥ kurvañjyāśabdamad‌bhutam /
ājagāma tadā devīṃ krodharaktekṣaṇodyataḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
pañcamaskandhe raktabījena devyā yuddhavarṇanaṃ nāmāṣṭāviśo'dhyāyaḥ