Devi Bhagavata Purana · Chapter 5.26

caṇḍamuṇḍavadhena devyāścāmuṇḍetināmavarṇanam
vyāsa uvāca
ityājñaptau tadā vīrau caṇḍamuṇḍau mahābalau /
jagmatustarasaivājau sainyena mahatānvitau

dṛṣṭvā tatra sthitāṃ devīṃ devānāṃ hitakāriṇīm /
ūcatustau mahāvīryau tadā sāmānvitaṃ vacaḥ

bāle tvaṃ kiṃ na jānāsi śumbhaṃ surabalārdanam /
niśumbhañca mahāvīryaṃ turāṣāḍ‌vijayoddhatam

tvamekāsi varārohe kālikāsiṃhasaṃyutā /
jetumicchasi durbuddhe śumbhaṃ sarvabalānvitam

matidaḥ ko'pi te nāsti nārī vāpi naro'pi vā /
devāstvāṃ prerayantyeva vināśāya tavaiva te

vimṛśya kuru tanvaṅ‌gi kāryaṃ svaparayorbalam /
aṣṭādaśabhujatvāttvaṃ garvañca kuruṣe mṛṣā

kiṃ bhujairbahubhirvyarthairāyudhaiḥ kiṃ śramapradaiḥ /
śumbhasyāgre surāṇāṃ vai jetuḥ samaraśālinaḥ

airāvatakaracchetturdantidāraṇakāriṇaḥ /
jayinaḥ surasaṅghānāṃ kāryaṃ kuru manogatam

vṛthā garvāyase kānte kuru me vacanaṃ priyam /
hitaṃ tava viśālākṣi sukhadaṃ duḥkhanāśanam

duḥkhadāni ca kāryāṇi tyājyāni dūrato budhaiḥ /
sukhadāni ca sevyāni śāstratattvaviśāradaiḥ

caturāsi pikālāpe paśya śumbhabalaṃ mahat /
pratyakṣaṃ surasaṅghānāṃ mardanena mahodayam

pratyakṣañca parityajya vṛthaivānumitiḥ kila /
sandehasahite kārye na vipaścitpravartate

śatruḥ surāṇāṃ paramaḥ śumbhaḥ samaradurjayaḥ /
tasmāttvāṃ prerayantyatra devā daityeśapīḍitāḥ

tasmāttadvacanaiḥ snigdhairvañcitāsi śucismite /
duḥkhāya tava devānāṃ śikṣā svārthasya sādhikā

kāryamitraṃ parikṣipya dharmamitraṃ samāśrayet /
devāḥ svārthaparāḥ kāmaṃ tvāmahaṃ satyamabruvam

bhaja śumbhaṃ sureśānaṃ jetāraṃ bhuvaneśvaram /
caturaṃ sundaraṃ śūraṃ kāmaśāstraviśāradam // १६
aiśvaryaṃ sarvalokānāṃ prāpsyase śumbhaśāsanāt /
niścayaṃ paramaṃ kṛtvā bhartāraṃ bhaja śobhanam

vyāsa uvāca
iti tasya vacaḥ śrutvā caṇḍasya jagadambikā /
meghagambhīraninadaṃ jagarja punarabravīt

gaccha jālma mṛṣā kiṃ tvaṃ bhāṣase vañcakaṃ vacaḥ /
tyaktvā hariharādīṃśca śumbhaṃ kasmād‌bhaje patim

na me kaścitpatiḥ kāryo na kāryaṃ patinā saha /
svāminī sarvabhūtānāmahameva niśāmaya

śumbhā me bahavo dṛṣṭā niśumbhāśca sahasraśaḥ /
ghātitāśca mayā pūrvaṃ śataśo daityadānavāḥ

mamāgre devavṛndāni vinaṣṭāni yuge yuge /
nāśaṃ yāsyanti daityānāṃ yūthāni punaradya vai

kāla evāgato'styatra daityasaṃhārakārakaḥ /
vṛthā tvaṃ kuruṣe yat‍naṃ rakṣaṇāyātmasantateḥ

kuru yuddhaṃ vīradharmarakṣāyai tvaṃ mahāmate /
maraṇaṃ bhāvi dustyājyaṃ yaśo rakṣyaṃ mahātmabhiḥ

kiṃ te kāryaṃ niśumbhena śumbhena ca durātmanā /
vīradharmaṃ paraṃ prāpya gaccha svargaṃ surālayam

śumbho niśumbhaścaivānye ye cātra tava bāndhavāḥ /
sarve tavānugāḥ paścādāgamiṣyanti sāmpratam

kramaśaḥ sarvadaityānāṃ kariṣyāmyadya saṃkṣayam /
viṣādaṃ tyaja mandātman kuru yuddhaṃ viśāṃpate

tvāmahaṃ nihaniṣyāmi bhrātaraṃ tava sāmpratam /
tataḥ śumbhaṃ niśumbhaṃ ca raktabījaṃ madotkaṭam

anyāṃśca dānavānsarvānhatvāhaṃ samarāṅgaṇe /
gamiṣyāmi yathāsthānaṃ tiṣṭha vā gaccha vā drutam

gṛhāṇāstraṃ vṛthāpuṣṭa kuru yuddhaṃ mayādhunā /
kiṃ jalpasi mṛṣā vākyaṃ sarvathā kātarapriyam

vyāsa uvāca
tayetthaṃ preritau daityau caṇḍamuṇḍau krudhānvitau /
jyāśabdaṃ tarasā ghoraṃ cakraturbaladarpitau

sāpi śaṅkhasvanaṃ cakre pūrayantī diśo daśa /
siṃho'pi kupitastāvannādaṃ samakarod‌balī

tena nādena śakrādyā jaharṣuramarāstadā /
munayo yakṣagandharvāḥ siddhāḥ sādhyāśca kinnarāḥ

yuddhaṃ parasparaṃ tatra jātaṃ kātarabhītidam /
caṇḍikācaṇḍayostīvraṃ bāṇakhaḍ‍gagadādibhiḥ

caṇḍamuktāñcharāndevī ciccheda niśitaiḥ śaraiḥ /
mumoca punarugrānsā bāṇāṃśca pannagāniva

gaganaṃ chāditaṃ tatra saṃgrāme viśikhaistadā /
śalabhairiva meghānte karṣakāṇāṃ bhayapradaiḥ

muṇḍo'pi sainikaiḥ sārdhaṃ papāta tarasā raṇe /
mumoca bāṇavṛṣṭiṃ vai kruddhaḥ paramadāruṇaḥ

bāṇajālaṃ mahad‌ dṛṣṭvā kuddhā tatrāmbikā bhṛśam /
kopena vadanaṃ tasyā babhūva ghanasannibham

kadalīpuṣpanetrañca bhṛkuṭīkuṭilaṃ tadā /
niṣkrāntā ca tadā kālī lalāṭaphalakāddrutam

vyāghracarmāmbarā krūrā gajacarmottarīyakā /
muṇḍamālādharā ghorā śuṣkavāpīsamodarā

khaḍgapāśadharātīva bhīṣaṇā bhayadāyinī /
khaṭvāṅgadhāriṇī raudrā kālarātririvāparā

vistīrṇavadanā jihvāṃ cālayantī muhurmuhuḥ /
vistārajaghanā vegājjaghānāsurasainikān

kare kṛtvā mahāvīrāṃstarasā sā ruṣānvitā /
mukhe cikṣepa daiteyānpipeṣa daśanaiḥ śanaiḥ

gajānghaṇṭānvitānhaste gṛhītvā nidadhau mukhe /
sārohānbhakṣayitvājau sāṭṭahāsaṃ cakāra ha

tathaiva turagānuṣṭrāṃstathā sārathibhiḥ saha /
nikṣipya vakttre daśanaiścarvayatyatibhairavam

hanyamānaṃ balaṃ prekṣya caṇḍamuṇḍau mahāsurau /
chādayāmāsaturdevīṃ bāṇāsārairanantaraiḥ

caṇḍaścaṇḍakaracchāyaṃ cakraṃ cakradharāyudham /
cikṣepa tarasā devīṃ nanāda ca muhurmuhuḥ

nadantaṃ vīkṣya taṃ kālī rathāṅgañca raviprabham /
bāṇenaikena ciccheda suprabhaṃ tatsudarśanam

taṃ jaghāna śaraistīkṣṇaiścaṇḍaṃ caṇḍī śilāśitaiḥ /
mūrcchito'sau papātorvyāṃ devībāṇārdito bhṛśam

patitaṃ bhrātaraṃ vīkṣya muṇḍo duḥkhārditastadā /
cakāra śaravṛṣṭiñca kālikopari kopataḥ

caṇḍikā muṇḍanirmuktāṃ śaravṛṣṭiṃ sudāruṇām /
īṣikāstrairbalānmuktaiścakāra tilaśaḥ kṣaṇāt

ardhacandreṇa bāṇena tāḍayāmāsa taṃ punaḥ /
patito'sau mahāvīryo medinyāṃ madavarjitaḥ

hāhākāro mahānāsīddānavānāṃ bale tadā /
jaharṣuramarāḥ sarve gaganasthā gatavyathāḥ

vihāya mūrcchāṃ caṇḍastu saṃgṛhya mahatīṃ gadām /
tarasā tāḍayāmāsa kālikāṃ dakṣiṇe bhuje

vañcayitvā gadāghātaṃ taṃ babandha mahāsuram /
tarasā bāṇapāśena mantramuktena kālikā

utthitastu tadā muṇḍo baddhaṃ dṛṣṭvānujaṃ balāt /
ājagāma susannaddhaḥ śaktiṃ kṛtvā kare dṛḍhām

āgacchantaṃ tadā kālī dānavaṃ vīkṣya satvaram /
babandha tarasā taṃ tu dvitīyaṃ bhrātaraṃ bhṛśam

gṛhītvā tau mahāvīryau caṇḍamuṇḍau śaśāviva /
kurvatī vipulaṃ hāsamājagāmāmbikāṃ prati

āgatya tāmathovāca gṛhāṇemau paśū priye /
raṇayajñārthamānītau dānavau raṇadurjayau

tāvānītau tadā vīkṣya caṇḍikā tau vṛkāviva /
ambikā kālikāṃ prāha mādhurīsaṃyutaṃ vacaḥ

vadhaṃ mā kuru mā muñca caturāsi raṇapriye /
devānāṃ kāryasaṃsiddhiḥ kartavyā tarasā tvayā

vyāsa uvāca
iti tasyā vacaḥ śrutvā kālikā prāha tāṃ punaḥ /
yuddhayajñe'tivikhyāte khaḍgayūpe pratiṣṭhite

ālambhañca kariṣyāmi yathā hiṃsā na jāyate /
ityuktvā sā tadā devī khaḍgena śirasī tayoḥ

cakarta tarasā kālī papau ca rudhiraṃ mudā /
evaṃ daityau hatau dṛṣṭvā muditovāca cāmbikā

kṛtaṃ kāryaṃ surāṇāṃ te dadāmyadya varaṃ śubham /
caṇḍamuṇḍau hatau yasmāttasmātte nāma kālike /
cāmuṇḍeti suvikhyātaṃ bhaviṣyati dharātale

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ pañcamaskandhe
caṇḍamuṇḍavadhena devyāścāmuṇḍetināmavarṇanaṃ nāma ṣaḍ‌viṃśo'dhyāyaḥ