Devi Bhagavata Purana · Chapter 5.10

mantrīdvārā mahiṣāsureṇa devyā saha vivāhaprastāvaḥ
vyāsa uvāca
iti tasya vacaḥ śrutvā prahasya pramadottamā /
tamuvāca mahārāja meghagambhīrayā girā

devyuvāca
mantrivarya surāṇāṃ vai jananīṃ viddhi māṃ kila /
mahālakṣmīmiti khyātāṃ sarvadaityaniṣūdinīm

prārthitāhaṃ suraiḥ sarvairmahiṣasya vadhāya ca /
pīḍitairdānavendreṇa yajñabhāgabahiṣkṛtaiḥ

tasmādihāgatāsmyadya tadvadhārthaṃ kṛtodyamā /
ekākinī na sainyena saṃyutā mantrisattama

yattvayāhaṃ sāmapūrvaṃ kṛtvā svāgatamādarāt /
uktā madhurayā vācā tena tuṣṭāsmi te'nagha

noceddhanmi dṛśā tvāṃ vai kālāgnisamayā kila /
kasya prītikaraṃ na syānmādhuryavacanaṃ khalu

gaccha taṃ mahiṣaṃ pāpaṃ vada madvacanādidam /
gaccha pātālamadhunā jīvitecchā yadasti te

nocetkṛtāgasaṃ duṣṭaṃ haniṣyāmi raṇāṅgaṇe /
mad‌bāṇakṣuṇṇadehastvaṃ gantāsi yamasādanam

dayālutvaṃ mamedaṃ tvaṃ viditvā gaccha satvaram /
hate tvayi surā mūḍha svargaṃ prāpsyanti satvaram

tasmād‌ gacchasva tyaktvaiko medinīñca sasāgarām /
pātālaṃ tarasā manda yāvad‌ bāṇā na me'patan

yuddhecchā cenmanasi te tarhyehi tvarito'sura /
vīrairmahābalaiḥ sarvairnayāmi yamasādanam

yuge yuge mahāmūḍha hatāstvatsadṛśāḥ kila /
asaṃkhyātāstathā tvāṃ vai haniṣyāmi raṇāṅgaṇe

sāphalyaṃ kuru śastrāṇāṃ dhāraṇe tu śramo'nyathā /
tadyudhyasva mayā sārdhaṃ samare smarapīḍitaḥ

mā garvaṃ kuru duṣṭātman yanme'sti brahmaṇo varaḥ /
strīvadhyatve tvayā mūḍha pīḍitāḥ surasattamāḥ

kartavyaṃ vacanaṃ dhātustenāhaṃ tvāmupāgatā /
strīrūpamatulaṃ kṛtvā satyaṃ hantuṃ kṛtāgasam

yathecchaṃ gaccha vā mūḍha pātālaṃ pannagāvṛtam /
hitvā bhūsurasadmādya jīvitecchā yadasti te

vyāsa uvāca
ityuktaḥ sa tato devyā mantriśreṣṭho balānvitaḥ /
pratyuvāca niśamyāsau vacanaṃ hetugarbhitam

devi strīsadṛśaṃ vākyaṃ brūṣe tvaṃ madagarvitā /
kvāsau kva tvaṃ kathaṃ yuddhamasambhāvyamidaṃ kila

ekākinī punarbālā prārabdhayauvanā mṛduḥ /
mahiṣo'sau mahākāyo durvibhāvyaṃ hi saṅgatam

sainyaṃ bahuvidhaṃ tasya hastyaśvarathasaṃkulam /
padātigaṇasaṃviddhaṃ nānāyudhavirājitam

kaḥ śramaḥ karirājasya mālatīpuṣpamardane /
māraṇe tava vāmoru mahiṣasya tathā raṇe

yadi tvāṃ paruṣaṃ vākyaṃ bravīmi svalpamapyaham /
śṛṅgāre tadviruddhaṃ hi rasabhaṅgād‌bibhemyaham

rājāsmākaṃ suraripurvartate tvayi bhaktimān /
sāmameva mayā vācyaṃ dānayuktaṃ tathā vacaḥ

noceddhanmyahamadyaiva bāṇena tvāṃ mṛṣāvadām /
mithyābhimānacaturāṃ rūpayauvanagarvitām

svāmī me mohitaḥ śrutvā rūpaṃ te bhuvanātigam /
tatpriyārthaṃ priyaṃ kāmaṃ vaktavyaṃ tvayi yanmayā

rājyaṃ tava dhanaṃ sarvaṃ dāsaste mahiṣaḥ kila /
kuru bhāvaṃ viśālākṣi tyaktvā roṣaṃ mṛtipradam

patāmi pādayoste'haṃ bhaktibhāvena bhāmini /
paṭṭarājñī mahārājño bhava śīghraṃ śucismite

trailokyavibhavaṃ sarvaṃ prāpsyasi tvamanāvilam /
sukhaṃ saṃsārajaṃ sarvaṃ mahiṣasya parigrahāt

devyuvāca
śṛṇu sāciva vakṣyāmi vākyānāṃ sāramuttamam /
śāstradṛṣṭena mārgeṇa cāturyamanucintya ca

mahiṣasya pradhānastvaṃ mayā jñātaṃ dhiyā kila /
paśubuddhisvabhāvo'si vacanāttava sāmpratam

mantriṇastvādṛśā yasya sa kathaṃ buddhimānbhavet /
ubhayoḥ sadṛśo yogaḥ kṛto'yaṃ vidhinā kila

yaduktaṃ strīsvabhāvāsi tadvicārasya mūḍha kim /
pumānnāhaṃ tatsvabhāvābhavaṃstrīveṣadhāriṇī

yācitaṃ maraṇaṃ pūrvaṃ striyā tvatprabhuṇā yathā /
tasmānmanye'timūrkho'sau na vīrarasavittamaḥ

kāminyā maraṇaṃ klībaratidaṃ śūraduḥkhadam /
prārthitaṃ prabhuṇā tena mahiṣeṇātmabuddhinā

tasmātstrīrūpamādhāya kāryaṃ kartumupāgatā /
kathaṃ bibhemi tvadvākyairdharmaśāstravirodhakaiḥ

viparītaṃ yadā daivaṃ tṛṇaṃ vajrasamaṃ bhavet /
vidhiścetsumukhaḥ kāmaṃ kuliśaṃ tūlavattadā

kiṃ sainyairāyudhaiḥ kiṃ vā prapañcairdurgasevanaiḥ /
maraṇaṃ sāmprataṃ yasya tasya sainyaistu kiṃ phalam

yadāyaṃ dehasambandho jīvasya kālayogataḥ /
tadaiva likhitaṃ sarvaṃ sukhaṃ duḥkhaṃ tathā mṛtiḥ

yasya yena prakāreṇa maraṇaṃ daivanirmitam /
tasya tenaiva jāyeta nānyatheti viniścayaḥ

brahmādīnāṃ yathā kāle nāśotpattī vinirmite /
tathaiva bhavataḥ kāmaṃ kimanyeṣāṃ vicāryate

ye mṛtyudharmiṇasteṣāṃ varadānena darpitāḥ /
mariṣyāmo na manyante te mūḍhā mandacetasaḥ

tasmād‌ gaccha nṛpaṃ brūhi vacanaṃ mama satvaram /
yadājñāpayate bhūpastatkartavyaṃ tvayā kila

maghavā svargamāpnotu devāḥ santu havirbhujaḥ /
yūyaṃ prayāta pātālaṃ yadi jīvitumicchatha

anyathā cenmatirmanda mahiṣasya durātmanaḥ /
tadyudhyasva mayā sārdhaṃ maraṇāya kṛtādaraḥ

manyase saṅgare bhagnā devā viṣṇupurogamāḥ /
daivaṃ hi kāraṇaṃ tatra varadānaṃ prajāpateḥ

vyāsa uvāca
iti devyā vacaḥ śrutvā cintayāmāsa dānavaḥ /
kiṃ kartavyaṃ mayā yuddhaṃ gantavyaṃ vā nṛpaṃ prati

vivāhārthamihājñapto rājñā kāmātureṇa vai /
tatkathaṃ virasaṃ kṛtvā gaccheyaṃ nṛpasannidhau

iyaṃ buddhiḥ samīcīnā yad‌ vrajāmi kaliṃ vinā /
yathāgataṃ tathā śīghraṃ rājñe saṃvedayāmyaham

sa pramāṇaṃ punaḥ kārye rājā matimatāṃ varaḥ /
kariṣyati vicāryaiva sacivairnipuṇaiḥ saha

sahasā na mayā yuddhaṃ kartavyamanayā saha /
jaye parājaye vāpi bhūpaterapriyaṃ bhavet

yadi māṃ sundarī hanyādahaṃ vā hanmi tāṃ punaḥ /
yena kenāpyupāyena sa kupyetpārthivaḥ kila

tasmāttatraiva gatvāhaṃ bodhayiṣyāmi taṃ nṛpam /
yathādyābhihitaṃ devyā yathāruci karotu saḥ

vyāsa uvāca
iti sañcintya medhāvī jagāma nṛpasannidhau /
praṇamya tamuvācedaṃ kṛtāñjaliramātyakaḥ

mantryuvāca
rājan devī varārohā siṃhasyopari saṃsthitā /
aṣṭādaśabhujā ramyā varāyudhadharā parā

sā mayoktā mahārāja mahiṣaṃ bhaja bhāmini /
mahiṣī bhava rājñastvaṃ trailokyādhipateḥ priyā

paṭṭarājñī tvamevāsya bhavitā nātra saṃśayaḥ /
sa tavājñākaro jāto vaśavartī bhaviṣyati

trailokyavibhavaṃ bhuktvā cirakālaṃ varānane /
mahiṣaṃ patimāsādya yoṣitāṃ subhagā bhava

iti madvacanaṃ śrutvā sā smayāveśamohitā /
māmuvāca viśālākṣī smitapūrvamidaṃ vacaḥ

mahiṣīgarbhasambhūtaṃ paśūnāmadhamaṃ kila /
baliṃ dāsyāmyahaṃ devyai surāṇāṃ hitakāmyayā

kā mūḍhā kāminī loke mahiṣaṃ vai patiṃ bhajet /
mādṛśī mandabuddhe kiṃ paśubhāvaṃ bhajediha

mahiṣī mahiṣaṃ nāthaṃ saśṛṅgā śṛṅgasaṃyutam /
kurute krandamānā vai nāhaṃ tatsadṛśī śaṭhā

kariṣye'haṃ mṛdhe yuddhaṃ haniṣye tvāṃ surāpriyam /
gaccha vā duṣṭa pātālaṃ jīvitecchā yadasti te

paruṣaṃ tu tayā vākyamityuktaṃ nṛpa mattayā /
tacchrutvāhaṃ samāyātaḥ pravicintya punaḥ punaḥ

rasabhaṅgaṃ vicintyaiva na yuddhaṃ tu mayā kṛtam /
ājñāṃ vinā tavātyantaṃ kathaṃ kuryāṃ vṛthodyamam

sātīva ca balonmattā vartate bhūpa bhāminī /
bhavitavyaṃ na jānāmi kiṃ vā bhāvi bhaviṣyati

kārye'smiṃstvaṃ pramāṇaṃ no mantro'tīva durāsadaḥ /
yuddhaṃ palāyanaṃ śreyo na jāne'haṃ viniścayam

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ pañcamaskandhe
mantrīdvārā mahiṣāsureṇa devyā saha vivāhaprastāvo nāma daśamo'dhyāyaḥ