Devi Bhagavata Purana · Chapter 4.18

brahmāṇaṃ prati viṣṇuvākyam
vyāsa uvāca
śṛṇu rājanpravakṣyāmi kṛṣṇasya caritaṃ mahat /
avatārakāraṇaṃ caiva devyāścaritamad‌bhutam

dharaikadā bharākrāntā rudatī cātikarśitā /
gorūpadhāriṇī dīnā bhītāgacchattriviṣṭapam

pṛṣṭā śakreṇa kiṃ te'dya vartate bhayamityatha /
kena vai pīḍitāsi tvaṃ kiṃ te duḥkhaṃ vasundhare

tacchrutvelā tadovāca śṛṇu deveśa me'khilam /
duḥkhaṃ pṛcchasi yattvaṃ me bhārākrānto'smi mānada

jarāsandho mahāpāpī māgadheṣu patirmama /
śiśupālastathā caidyaḥ kāśirājaḥ pratāpavān

rukmī ca balavānkaṃso narakaśca mahābalaḥ /
śālvaḥ saubhapatiḥ krūraḥ keśī dhenukavatsakau

sarve dharmavihīnāśca parasparavirodhinaḥ /
pāpācārā madonmattāḥ kālarūpāśca pārthivāḥ

tairahaṃ pīḍitā śakra bhārākrāntākṣamā vibho /
kiṃ karomi kva gacchāmi cintā me mahatī sthitā

pīḍitāhaṃ varāheṇa viṣṇunā prabhaviṣṇunā /
śakra jānīhi hariṇā duḥkhādduḥkhataraṃ gatā

yato'haṃ duṣṭadaityena kaśyapasyātmajena vai /
hṛtāhaṃ hiraṇyākṣeṇa magnā tasminmahārṇave

tadā sūkararūpeṇa viṣṇunā nihato'pyasau /
uddhṛtāhaṃ varāheṇa sthāpitā hi sthirā kṛtā

noced‌rasātale svasthā sthitā syāṃ sukhaśāyinī /
na śaktāsmyadya deveśa bhāraṃ voḍhuṃ durātmanām

agre duṣṭaḥ samāyāti hyaṣṭāviṃśastathā kaliḥ /
tadāhaṃ pīḍitā śakra gantāsmyāśu rasātalam

tasmāttvaṃ devadeveśa duḥkharūpārṇavasya ca /
pārado bhava bhāraṃ me hara pādau namāmi te

iṃdra uvāca
ile kiṃ te karomyadya brahmāṇaṃ śaraṇaṃ vraja /
ahaṃ tatrāgamiṣyāmi sa te duḥkhaṃ hariṣyati

tacchrutvā tvaritā pṛthvī brahmalokaṃ gatā tadā /
śakro'pi pṛṣṭhataḥ prāptaḥ sarvadevapuraḥsaraḥ

surabhīmāgatāṃ tatra dṛṣṭvovāca prajāpatiḥ /
mahīṃ jñātvā mahārāja dhyānena samupasthitām

kasmād‌rudasi kalyāṇi kiṃ te duḥkhaṃ vadādhunā /
pīḍitāsi ca kena tvaṃ pāpācāreṇa bhūrvada

dharovāca
kalirāyāti duṣṭo'yaṃ bibhemi tad‌bhayādaham /
pāpācārāḥ prajāstatra bhaviṣyanti jagatpate

rājānaśca durācārāḥ parasparavirodhinaḥ /
caurakarmaratāḥ sarve rākṣasāḥ pūrṇavairiṇaḥ

tānhatvā nṛpatīnbhāraṃ hara me'dya pitāmaha /
pīḍitāsmi mahārāja sainyabhāreṇa bhūbhṛtām

brahyovāca
nāhaṃ śaktastathā devi bhārāvataraṇe tava /
gacchāvaḥ sadanaṃ viṣṇordevadevasya cakriṇaḥ

sa te bhārāpanodaṃ vai kariṣyati janārdanaḥ /
pūrvaṃ mayāpi te kāryaṃ cintitaṃ suvicārya ca

tatra gaccha suraśreṣṭha yatra devo janārdanaḥ /
vyāsa uvāca
ityuktvā vedakartāsau puraskṛtya surāṃśca gām

jagāma viṣṇusadanaṃ haṃsārūḍhaścaturmukhaḥ /
tuṣṭāva vedavākyaiśca bhaktipravaṇamānasaḥ

brahmovāca
sahasraśīrṣāstvamasi sahasrākṣaḥ sahasrapāt /
tvaṃ vedapuruṣaḥ pūrvaṃ devadevaḥ sanātanaḥ

bhūtapūrvaṃ bhaviṣyacca vartamānaṃ ca yadvibho /
amaratvaṃ tvayā dattamasmākaṃ ca ramāpate

etāvānmahimā te'sti ko na vetti jagattraye /
tvaṃ kartāpyavitā hantā tvaṃ sarvagatirīśvaraḥ

vyāsa uvāca
itīḍitaḥ prabhurviṣṇuḥ prasanno garuḍadhvajaḥ /
darśanañca dadau tebhyo brahmādibhyo'malāśayaḥ

papraccha svāgataṃ devānprasannavadano hariḥ /
tatastvāgamane teṣāṃ kāraṇañca savistaram

tamuvācābjajo natvā dharāduḥkhañca saṃsmaran /
bhārāvataraṇaṃ viṣṇo kartavyaṃ te janārdana

bhuvi dhṛtvāvatāraṃ tvaṃ dvāparānte samāgate /
hatvā duṣṭānnṛpānurvyā hara bhāraṃ dayānidhe

viṣṇuruvāca
nāhaṃ svatantra evātra na brahmā na śivastathā /
nendro'gnirna yamastvaṣṭā na sūryo varuṇastathā

yogamāyāvaśe sarvamidaṃ sthāvarajaṅgamam /
brahmādistambaparyantaṃ grathitaṃ guṇasūtrataḥ

yathā sā svecchayā pūrvaṃ kartumicchati suvrata /
tathā karoti suhitā vayaṃ sarve'pi tadvaśāḥ

yadyahaṃ syāṃ svatantro vai cintayantu dhiyā kila /
kuto'bhavaṃ matsyavapuḥ kacchapo vā mahārṇave

tiryagyoniṣu ko bhogaḥ kā kīrtiḥ kiṃ sukhaṃ punaḥ /
kiṃ puṇyaṃ kiṃ phalaṃ tatra kṣudrayonigatasya me

kolo vātha nṛsiṃho vā vāmano vābhavaṃ kutaḥ /
jamadagnisutaḥ kasmātsambhaveyaṃ pitāmaha

nṛśaṃsaṃ vā kathaṃ karma kṛtavānasmi bhūtale /
kṣatajaistu hradānsarvānpūrayeyaṃ kathaṃ punaḥ

tatkathaṃ jamadagneśca putro bhūtvā dvijottamaḥ /
kṣatriyānhatavānājau nirdayo garbhagānapi

rāmo bhūtvātha devendra prāviśaddaṇḍakaṃ vanam /
padātiścīravāsāśca jaṭāvalkalavānpunaḥ

asahāyo hyapātheyo bhīṣaṇe nirjane vane /
kurvannākheṭakaṃ tatra vyacaraṃ vigatatrapaḥ

na jñātavānmṛgaṃ haimaṃ māyayā pihitastadā /
uṭaje jānakīṃ tyaktvā nirgatastatpadānugaḥ

lakṣmaṇo'pi ca tāṃ tyaktvā nirgato matpadānugaḥ /
vārito'pi mayātyarthaṃ mohitaḥ prākṛtairguṇaiḥ

bhikṣurūpaṃ tataḥ kṛtvā rāvaṇaḥ kapaṭākṛtiḥ /
jahāra tarasā rakṣo jānakīṃ śokakarśitām

duḥkhārtena mayā tatra ruditañca vane vane /
sugrīveṇa ca mitratvaṃ kṛtaṃ kāryavaśānmayā

anyāyena hato vālī śāpāccaiva nivāritaḥ /
sahāyānvānarān kṛtvā laṅkāyāṃ calitaḥ punaḥ

baddho'haṃ nāgapāśaiśca lakṣmaṇaśca mamānujaḥ /
visaṃjñau patitau dṛṣṭvā vānarā vismayaṃ gatāḥ

garuḍena tadā''gatya mocitau bhrātarau kila /
cintā me mahatī jātā daivaṃ kiṃ vā kariṣyati

hṛtaṃ rājyaṃ vane vāso mṛtastātaḥ priyā hṛtā /
yuddhaṃ kaṣṭaṃ dadātyevamagre kiṃ vā kariṣyati

prathamaṃ tu mahadduḥkhamarājyasya vanāśrayam /
rājaputryānvitasyaiva dhanahīnasya me surāḥ

varāṭikāpi pitrā me na dattā vananirgame /
padātirasahāyo'haṃ dhanahīnaśca nirgataḥ

caturdaśaiva varṣāṇi nītāni ca tadā mayā /
kṣātraṃ dharmaṃ parityajya vyādhavṛttyā mahāvane

daivādyuddhe jayaḥ prāpto nihato'sau mahāsuraḥ /
ānītā ca punaḥ sītā prāptāyodhyā mayā tathā

varṣāṇi katicittatra sukhaṃ saṃsārasambhavam /
prāptaṃ rājyañca sampūrṇaṃ kosalānadhitiṣṭhatā

puraivaṃ vartamānena prāptarājyena vai tadā /
lokāpavādabhītena tyaktā sītā vane mayā

kāntāvirahajaṃ duḥkhaṃ punaḥ prāptaṃ durāsadam /
pātālaṃ sā gatā paścāddharāṃ bhittvā dharātmajā

evaṃ rāmāvatāre'pi duḥkhaṃ prāptaṃ nirantaram /
paratantreṇa me nūnaṃ svatantraḥ ko bhavettadā

paścātkālavaśātprāptaḥ svargo me bhrātṛbhiḥ saha /
paratantrasya kā vārtā vaktavyā vibudhena vai

paratantro'tmyahaṃ nūnaṃ padmayone niśāmaya /
tathā tvamapi rudraśca sarve cānye surottamāḥ

iti śrīmaddevībhāgavate mahāpurāṇe'ṣṭādaśasāhasryāṃ sahitāyāṃ
caturthaskandhe brahmāṇaṃ prati viṣṇuvākyaṃ nāmāṣṭādaśo'dhyāyaḥ