Devi Bhagavata Purana · Chapter 3.29

lakṣmaṇakṛtarāmaśokasāntvanam
vyāsa uvāca
tadākarṇya vaco duṣṭaṃ jānakī bhayavihvalā /
vepamānā sthiraṃ kṛtvā mano vācamuvāca ha

paulastya kimasadvākyaṃ tvamāttha smaramohitaḥ /
nāhaṃ vai svairiṇī kintu janakasya kulod‌bhavā

gaccha laṅkāṃ daśāsya tvaṃ rāma tvāṃ vai haniṣyati /
matkṛte maraṇaṃ tatra bhaviṣyati na saṃśayaḥ

ityuktvā parṇaśālāyāṃ gatā sā vahnisannidhau /
gaccha gaccheti vadatī rāvaṇaṃ lokarāvaṇam

so'tha kṛtvā nijaṃ rūpaṃ jagāmoṭajamantikam /
balājjagrāha tāṃ bālāṃ rudatī bhayavihvalām

rāmarāmeti krandantī lakṣmaṇeti muhurmuhuḥ /
gṛhītvā nirgataḥ pāpo rathamāropya satvaraḥ

gacchannaruṇaputreṇa mārge ruddho jaṭāyuṣā /
saṅgrāmo'bhūnmahāraudrastayostatra vanāntare

hatvā taṃ tāṃ gṛhītvā ca gato'sau rākṣasādhipaḥ /
laṅkāyāṃ krandatī tāta kurarīva durātmanaḥ

aśokavanikāyāṃ sā sthāpitā rākṣasīyutā /
svavṛttānnaiva calitā sāmadānādibhiḥ kila

rāmo'pi taṃ mṛgaṃ hatvā jagāmādāya nirvṛtaḥ /
āyāntaṃ lakṣmaṇaṃ vīkṣya kiṃ kṛtaṃ te'nujāsamam

ekākinīṃ priyāṃ hitvā kimarthaṃ tvamihāgataḥ /
śrutvā svanaṃ tu pāpasya rāghavastvabravīdidam

sau‌mitristvabravīdvākyaṃ sītāvāgbāṇapīḍitaḥ /
prabho'trāhaṃ samāyātaḥ kālayogānna saṃśayaḥ

tadā tau parṇaśālāyāṃ gatvā vīkṣyātiduḥkhitau /
jānakyanveṣaṇe yat‍namubhau kartuṃ samudyatau

mārgamāṇau tu samprāptau yatrāsau patitaḥ khagaḥ /
jaṭāyuḥ prāṇaśeṣastu patitaḥ pṛthivītale

tenoktaṃ rāvaṇenādya hṛtā‍‍'sau janakātmajā /
mayā niruddhaḥ pāpātmā pātito'haṃ mṛdhe punaḥ

ityuktvā'sau gataprāṇaḥ saṃskṛto rāghaveṇa vai /
kṛtvaurghvadaihikaṃ rāmalakṣmaṇau nirgatau tataḥ

kabandhaṃ ghātayitvāsau śāpāccāmocayatprabhuḥ /
vacanāttasya hariṇā sakhyaṃ cakre'tha rāghavaḥ

hatvā ca vālinaṃ vīraṃ kiṣkindhārājyamuttamam /
sugrīvāya dadau rāmaḥ kṛtasakhyāya kāryataḥ

tatraiva vārṣikānmāsāṃstasthau lakṣmaṇasaṃyutaḥ /
cintayañjānakīṃ citte daśānanahṛtāṃ priyām

lakṣmaṇaṃ prāha rāmastu sītāvirahapīḍitaḥ /
sau‌mitre kaikayasutā jātā pūrṇamanorathā

na prāptā jānakī nūnaṃ nāhaṃ jīvāmi tāṃ vinā /
nāgamiṣyāmyayodhyāyāmṛte janakanandinīm

gataṃ rājyaṃ vane vāso mṛtastāto hṛtā priyā /
pīḍayanmāṃ sa duṣṭātmā daivo‍'gre kiṃ kariṣyati

durjñeyaṃ bhavitavyaṃ hi prāṇināṃ bharatānuja /
āvayoḥ kā gatistāta bhaviṣyati suduḥkhadā

prāpya janma manorvaṃśe rājaputrāvubhau kila /
vane'tiduḥkhabhoktārau jātau pūrvakṛtena ca

tyaktvā tvamapi bhogāṃstu mayā saha vinirgataḥ /
daivayogācca sau‌mitre bhuṃkṣva duḥkhaṃ duratyayam

na ko'pyasmatkule pūrvaṃ matsamo duḥkhabhāṅnaraḥ /
akiñcano'kṣamaḥ kliṣṭo na bhūto na bhaviṣyati

kiṃ karomyadya sau‌mitre magno'smi duḥkhasāgare /
na cāsti taraṇopāyo hyasahāyasya me kila

na vittaṃ na balaṃ vīra tvamekaḥ sahacārakaḥ /
kopaṃ kasminkaromyadya bhogesminsvakṛte'nuja

gataṃ hastagataṃ rājyaṃ kṣaṇādindrāsanopamam /
vane vāsastu samprāptaḥ ko veda vidhinirmitam

bālabhāvācca vaidehī calitā cāvayoḥ saha /
nītā daivena duṣṭena śyāmā duḥkhatarāṃ daśām

laṅkeśasya gṛhe śyāmā kathaṃ duḥkhaṃ bhaviṣyati /
pativratā suśīlā ca mayi prītiyutā bhṛśam

na ca lakṣmaṇa vaidehī sā tasya vaśagā bhavet /
svairiṇīva varārohā kathaṃ syājjanakātmajā

tyajetprāṇānniyantṛtve maithilī bharatānuja /
na rāvaṇasya vaśagā bhavediti suniścitam

mṛtā cejjānakī vīra prāṇāṃstyakṣyāmyasaṃśayam /
mṛtā cedasitāpāṅgīṃ kiṃ me dehena lakṣmaṇa

evaṃ vilapamānaṃ taṃ rāmaṃ kamalalocanam /
lakṣmaṇaḥ prāha dharmātmā sāntvayannṛtayā girā

dhairyaṃ kuru mahābāho tyaktvā kātaratāmiha /
ānayiṣyāmi vaidehīṃ hatvā taṃ rākṣasādhamam

āpadi sampadi tulyā dhairyād‌bhavanti te dhīrāḥ /
alpadhiyastu nimagnāḥ kaṣṭe bhavanti vibhave'pi

saṃyogo viprayogaśca daivādhīnāvubhāvapi /
śokastu kīdṛśastatra dehenātmani ca kvacit

rājyādyathā vane vāso vaidehyā haraṇaṃ yathā /
tathā kāle samīcīne saṃyogo'pi bhaviṣyati

prāptavyaṃ sukhaduḥkhānāṃ bhogānnirvartanaṃ kvacit /
nānyathā jānakījāne tasmācchokaṃ tyajādhunā

vānarāḥ santi bhūyāṃso gamiṣyanti caturdiśam /
śuddhiṃ janakanandinyā ānayiṣyanti te kila

jñātvā mārgasthitiṃ tatra gatvā kṛtvā parākramam /
hatvā taṃ pāpakarmāṇamānayiṣyāmi maithilīm

sasainyaṃ bharataṃ vā'pi samāhūya sahānujam /
haniṣyāmo vayaṃ śatruṃ kiṃ śocasi vṛthāgraja

raghuṇaikarathenaiva jitāḥ sarvā diśaḥ purā /
tadvaṃśajaḥ kathaṃ śokaṃ kartumarhasi rāghava

eko'haṃ sakalāñjetuṃ samartho'smi surāsurān /
kiṃ punaḥ sasahāyo vai rāvaṇaṃ kulapāṃsanam

janakaṃ vā samānīya sāhāyye raghunandana /
haniṣyāmi durācāraṃ rāvaṇaṃ surakaṇṭakam

sukhasyānantaraṃ duḥkhaṃ duḥkhasyānantaraṃ sukham /
cakranemirivaikaṃ yanna bhaved‌raghunandana

mano'tikātaraṃ yasya sukhaduḥkhasamud‌bhave /
sa śokasāgare magno na sukhī syātkadācana

indreṇa vyasanaṃ prāptaṃ purā vai raghunandana /
nahuṣaḥ sthāpito devaiḥ sarvairmaghavataḥ pade

sthitaḥ paṅkajamadhye ca bahuvarṣagaṇānapi /
ajñātavāsaṃ maghavā bhītastyaktvā nijaṃ padam

punaḥ prāptaṃ nijasthānaṃ kāle viparivartite /
nahuṣaḥ patito bhūmau śāpādajagarākṛtiḥ

indrāṇīṃ kāmayānastu brāhmaṇānavamanya ca /
agastikopātsañjātaḥ sarpadeho mahīpatiḥ

tasmācchoko na kartavyo vyasane sati rāghava /
udyame cittamāsthāya sthātavyaṃ vai vipaścitā

sarvajño'si mahābhāga samartho'si jagatpate /
kiṃ prākṛta ivātyarthaṃ kuruṣe śokamātmani

vyāsa uvāca
iti lakṣmaṇavākyena bodhito raghunandanaḥ /
tyaktvā śokaṃ tathātyarthaṃ babhūva vigatajvaraḥ

iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ tṛtīyaskandhe
lakṣmaṇakṛtarāmaśokasāntvanaṃ nāmaikonatriṃśo'dhyāyaḥ