Devi Bhagavata Purana · Chapter 3.26

kumārīpūjāvarṇanam
janamejaya uvāca
navarātre tu samprāpte kiṃ kartavyaṃ dvijottama /
vidhānaṃ vidhivad‌brūhi śaratkāle viśeṣataḥ

kiṃ phalaṃ khalu kastatra vidhiḥ kāryo mahāmate /
etadvistarato brūhi kṛpayā dvijasattama

vyāsa uvāca
śṛṇu rājanpravakṣyāmi navarātravrataṃ śubham /
śaratkāle viśeṣeṇa kartavyaṃ vidhipūrvakam

vasante ca prakartavyaṃ tathaiva premapūrvakam /
dvāvṛtū yamadaṃṣṭrākhyau nūnaṃ sarvajaneṣu vai

śaradvasantanāmānau durgamau prāṇināmiha /
tasmādyat‍nādidaṃ kāryaṃ sarvatra śubhamicchatā

dvāveva sumahāghorāvṛtū rogakarau nṛṇām /
vasantaśaradāveva sarvanāśakarāvubhau

tasmāttatra prakartavyaṃ caṇḍikāpūjanaṃ budhaiḥ /
caitrāśvine śubhe māse bhaktipūrvaṃ narādhipa

amāvāsyāṃ ca samprāpya sambhāraṃ kalpayecchubham /
haviṣyaṃ cāśanaṃ kāryamekabhuktaṃ tu taddine

maṇḍapastu prakartavyaḥ same deśe śubhe sthale /
hastaṣoḍaśamānena stambhadhvajasamanvitaḥ

gauramṛd‌gomayābhyāṃ ca lepanaṃ kārayettataḥ /
tanmadhye vedikā śubhrā kartavyā ca samā sthirā

caturhastā ca hastocchrā pīṭhārthaṃ sthānamuttamam /
toraṇāni vicitrāṇi vitānañca prakalpayet

rātrau dvijānathāmantrya devītattvaviśāradān /
ācāraniratāndāntānvedavedāṅgapāragān

pratipaddivase kāryaṃ prātaḥsnānaṃ vidhānataḥ /
nadyāṃ nade taḍāge vā vāpyāṃ kūpe gṛhe'thavā

prātarnityaṃ puraḥ kṛtvā dvijānāṃ varaṇaṃ tataḥ /
arghyapādyādikaṃ sarvaṃ kartavyaṃ madhupūrvakam

vastrālaṅkaraṇādīni deyāni ca svaśaktitaḥ /
vittaśāṭhyaṃ na kartavyaṃ vibhave sati karhicit

vipraiḥ santoṣitaiḥ kāryaṃ sampūrṇaṃ sarvathā bhavet /
nava pañca trayaścaiko devyāḥ pāṭhe dvijāḥ smṛtāḥ

varayed‌brāhmaṇaṃ śāntaṃ pārāyaṇakṛte tadā /
svastivācanakaṃ kāryaṃ vedamantravidhānataḥ

vedyāṃ siṃhāsanaṃ sthāpya kṣau‍mavastrasamanvitam /
tatra sthāpyā'mbikā devī caturhastāyudhānvitā

rat‍nabhūṣaṇasaṃyuktā muktāhāravirājitā /
divyāmbaradharā sau‌myā sarvalakṣaṇasaṃyutā

śaṃkhacakragadāpadmadharā siṃhe sthitā śivā /
aṣṭādaśabhujā vā'pi pratiṣṭhāpyā sanātanī

arcābhāve tathā yantraṃ navārṇamantrasaṃyutam /
sthāpayetpīṭhapūjārthaṃ kalaśaṃ tatra pārśvataḥ

pañcapallavasaṃyuktaṃ vedamantraiḥ susaṃskṛtam /
sutīrthajalasampūrṇaṃ hemarat‍naiḥ samanvitam

pārśve pūjārthasambhārānparikalpya samantataḥ /
gītavāditranirghoṣānkārayenmaṅgalāya vai

tithau hastānvitāyāṃ ca nandāyāṃ pūjanaṃ varam /
prathame divase rājan vidhivatkāmadaṃ nṛṇām

niyamaṃ prathamaṃ kṛtvā paścātpūjāṃ samācaret /
upavāsena naktena caikabhuktena vā punaḥ

kariṣyāmi vrataṃ mātarnavarātramanuttamam /
sāhāyyaṃ kuru me devi jagadamba mamākhilam

yathāśakti prakartavyo niyamo vratahetave /
paścātpūjā prakartavyā vidhivanmantrapūrvakam

candanāgurukarpūraiḥ kusumaiśca sugandhibhiḥ /
mandārakarajāśokacampakaiḥ karavīrakaiḥ

mālatībrahmakāpuṣpaistathā bilvadalaiḥ śubhaiḥ /
pūjayejjagatāṃ dhātrīṃ dhūpairdīpairvidhānataḥ

phalairnānāvidhairarghyaṃ pradātavyaṃ ca tatra vai /
nārikelairmātuluṅgairdāḍimīkadalīphalaiḥ

nāraṅgaiḥ panasaiścaiva tathā pūrṇaphalaiḥ śubhaiḥ /
annadānaṃ prakartavyaṃ bhaktipūrvaṃ narādhipa

māṃsāśanaṃ ye kurvanti taiḥ kāryaṃ paśuhiṃsanam /
mahiṣājavarāhāṇāṃ balidānaṃ viśiṣyate

devyagre nihatā yānti paśavaḥ svargamavyayam /
na hiṃsā paśujā tatra nighnatāṃ tatkṛte'nagha

ahiṃsā yājñikī proktā sarvaśāstravinirṇaye /
devatārthe visṛṣṭānāṃ paśūnāṃ svargatirdhruvā

homārthaṃ caiva kartavyaṃ kuṇḍaṃ caiva trikoṇakam /
sthaṇḍilaṃ vā prakartavyaṃ trikoṇaṃ mānataḥ śubham

trikālaṃ pūjanaṃ nityaṃ nānādravyairmanoharaiḥ /
gītavāditranṛtyaiśca kartavyaśca mahotsavaḥ

nityaṃ bhūmau ca śayanaṃ kumārīṇāṃ ca pūjanam /
vastrālaṅkaraṇairdivyairbhojanaiśca sudhāmayaiḥ

ekaikāṃ pūjayennityamekavṛddhyā tathā punaḥ /
dviguṇaṃ triguṇaṃ vā'pi pratyekaṃ navakaṃ ca vā

vibhavasyānusāreṇa kartavyaṃ pūjanaṃ kila /
vittaśāṭhyaṃ na kartavyaṃ rājañchaktimakhe sadā

ekavarṣā na kartavyā kanyā pūjāvidhau nṛpa /
paramajñā tu bhogānāṃ gandhādīnāṃ ca bālikā

kumārikā tu sā proktā dvivarṣā yā bhavediha /
trimūrtiśca trivarṣā ca kalyāṇī caturabdikā

rohiṇī pañcavarṣā ca ṣaḍ‌varṣā kālikā smṛtā /
caṇḍikā saptavarṣā syādaṣṭavarṣā ca śāmbhavī

navavarṣā bhaved‌durgā subhadrā daśavārṣikī /
ata ūrdhvaṃ na kartavyā sarvakāryavigarhitā

ebhiśca nāmabhiḥ pūjā kartavyā vidhisaṃyutā /
tāsāṃ phalāni vakṣyāmi navānāṃ pūjane sadā

kumārī pūjitā kuryād‌duḥkhadāridrayanāśanam /
śatrukṣayaṃ dhanāyuṣyaṃ balavṛddhiṃ karoti vai

trimūrtipūjanādāyustrivargasya phalaṃ bhavet /
dhanadhānyāgamaścaiva putrapautrādivṛddhayaḥ

vidyārthī vijayārthī ca rājyārthī yaśca pārthivaḥ /
sukhārthī pūjayennityaṃ kalyāṇīṃ sarvakāmadām

kālikāṃ śatrunāśārthaṃ pūjayed‌bhaktipūrvakam /
aiśvaryadhanakāmaśca caṇḍikāṃ paripūjayet

pūjayecchāmbhavīṃ nityaṃ nṛpasaṃmohanāya ca /
duḥkhadāridryanāśāya saṅgrāme vijayāya ca

krūraśatruvināśārthaṃ tathograkarmasādhane /
durgāñca pūjayed‌bhaktyā paralokasukhāya ca

vāñchitārthasya siddhyarthaṃ subhadrāṃ pūjayetsadā /
rohiṇīṃ roganāśāya pūjayedvidhivannaraḥ

śrīrastviti ca mantreṇa pūjayed‌bhaktitatparaḥ /
śrīyuktamantrairathavā bījamantrairathāpi vā

kumārasya ca tattvāni yā sṛjatyapi līlayā /
kādīnapi ca devāṃstāṃ kumārīṃ pūjayāmyaham

sattvādibhistrimūrtiryā tairhi nānāsvarūpiṇī /
trikālavyāpinī śaktistrimūrtiṃ pūjayāmyaham

kalyāṇakāriṇī nityaṃ bhaktānāṃ pūjitā'niśam /
pūjayāmi ca tāṃ bhaktyā kalyāṇīṃ sarvakāmadām

rohayantī ca bījāni prāgjanmasañcitāni vai /
yā devī sarvabhūtānāṃ rohiṇīṃ pūjayāmyaham

kālī kālayate sarvaṃ brahmāṇḍaṃ sacarācaram /
kalpāntasamaye yā tāṃ kālikāṃ pūjayāmyaham

tāṃ caṇḍapāpaharaṇīṃ caṇḍikāṃ pūjayāmyaham

akāraṇātsamutpattiryanmayaiḥ parikīrtitā /
yasyāstāṃ sukhadāṃ devīṃ śāmbhavīṃ pūjayāmyaham

durgāttrāyati bhaktaṃ yā sadā durgātināśinī /
durjñeyā sarvadevānāṃ tāṃ durgāṃ pūjayāmyaham

subhadrāṇi ca bhaktānāṃ kurute pūjitā sadā /
abhadranāśinīṃ devīṃ subhadrāṃ pūjayāmyaham

ebhirmantraiḥ pūjanīyāḥ kanyakāḥ sarvadā budhaiḥ /
vastrālaṅkaraṇairmālyairgandhairuccāvacairapi

iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ
tṛtīyaskandhe kumārīpūjāvarṇanaṃ nāma ṣaḍ‌viṃśo'dhyāyaḥ