Devi Bhagavata Purana · Chapter 12.7

mantradīkṣāvidhivarṇanam
nārada uvāca
śrutaṃ sahasranāmākhyaṃ śrīgāyatryāḥ phalapradam /
stotraṃ mahonnatikaraṃ mahābhāgyakaraṃ param

adhunā śrotumicchāmi dīkṣālakṣaṇamuttamam /
vinā yena na sidhyeta devīmantre'dhikāritā

brāhmaṇānāṃ kṣatriyāṇāṃ viśāṃ strīṇāṃ tathaiva ca /
sāmānyavidhinā sarvaṃ vistareṇa vada prabho

śrīnārāyaṇa uvāca
śṛṇu dīkṣāṃ pravakṣyāmi śiṣyāṇāṃ bhāvitātmanām /
devāgnigurupūjādāvadhikāro yayā bhavet

divyaṃ jñānaṃ hi yā dadyātkuryātpāpakṣayaṃ tu yā /
saiva dīkṣeti samproktā vedatantraviśāradaiḥ

avaśyaṃ sā tu kartavyā yato bahuphalā matā /
guruśiṣyāvubhāvatrāpyatiśuddhāvapekṣitau

gurustu vidhivatprātaḥ kṛtyaṃ sarvaṃ vidhāya ca /
snānasandhyādikaṃ sarvaṃ yathāvidhi vidhāya ca

kamaṇḍalukaro maunī gṛhaṃ yāyātsarittaṭāt /
yāgamaṇḍapamāsādya viśettatrāsane vare

ācamya prāṇānāyamya gandhapuṣpavimiśritam /
saptavārāstramantreṇa japtaṃ vāri susādhayet

vāriṇā tena matimānastramantraṃ samuccaran /
prokṣayed‌dvāramakhilaṃ tataḥ pūjāṃ samācaret

ūrdhvodumbarake devaṃ gaṇanāthaṃ tathā śriyam /
sarasvatīṃ nāmamantraiḥ pūjayed‌gandhapuṣpakaiḥ

dvāradakṣiṇaśākhāyāṃ gaṅ‌gāṃ vighneśamarcayet /
dvārasya vāmaśākhāyāṃ kṣetrapālaṃ ca sūryajām

dehalyāṃ pūjayedastradevatāmastramantrataḥ /
sarvaṃ devīmayaṃ dṛśyamiti sañcintya sarvataḥ

divyānutsārayedvighnānastramantrajapena tu /
antarikṣagatānvighnānpādaghātaistu bhūmigān // १४
vāmaśākhāṃ spṛśanpaścātpraviśeddakṣiṇāṅghriṇā /
praviśya kumbhaṃ saṃsthāpya sāmānyārghyaṃ vidhāya ca

tena cārghyajalenāpi nairṛtyāṃ diśi pūjayet /
vāstunāthaṃ padmayoniṃ gandhapuṣpākṣatādibhiḥ

tataḥ kuryātpañcagavyaṃ tena cārghyodakena ca /
toraṇastambhaparyantaṃ prokṣayenmaṇḍapaṃ guruḥ

sarvaṃ devīmayaṃ cedaṃ bhāvayenmanasā kila /
mūlamantraṃ japanbhaktyā prokṣaṇaṃ syāccharāṇunā

śaramantraṃ samuccārya tāḍayenmaṇḍapakṣamām /
huṃmantraṃ tu samuccārya kuryādabhyukṣaṇaṃ tataḥ

dhūpayedantaraṃ dhūpairvikirān vikirettataḥ /
mārjayettāṃstu mārjanyā kuśanirmitayā punaḥ

īśānadiśi tatpuñjaṃ kṛtvā saṃsthāpayenmune /
puṇyāhavācanaṃ kṛtvā dīnānāthāṃśca toṣayet

viśenmṛdvāsane paścānnamaskṛtya guruṃ nijam /
prāṅmukho vidhivaddhyātvā deyamantrasya devatām

bhūtaśuddhyādikaṃ kṛtvā pūrvoktenaiva vartmanā /
ṛṣyādinyāsakaṃ kuryāddeyamantrasya vai mune

nyasenmuniṃ tu śirasi mukhe chandaḥ samīritam /
devatāṃ hṛdayāmbhoje guhye bījaṃ tu pādayoḥ

śaktiṃ vinyasya paścāttu tālatrayaravāttataḥ /
digbandhaṃ kārayetpaścācchoṭikābhistribhirnaraḥ

prāṇāyāmaṃ tataḥ kṛtvā mūlamantramanusmaran /
mātṛkāṃ vinyaseddehe tatprakārastathocyate

ॐ aṃ nama iti procya nyasecchirasi mantravit /
evameva tu sarveṣu nyasetsthāneṣu vai mune

mūlamantraṃ ṣaḍaṅgaṃ ca nyasedaṅgeṣu sattamaḥ /
aṅguṣṭhādiṣvaṅgulīṣu hṛdayādiṣu ca kramāt

namaḥ svāhāvaṣaḍyuktairhuṃvauṣaṭphaṭpadānvitaiḥ /
praṇavādiyutairmantraiḥ ṣaḍbhireva ṣaḍaṅgakam

varṇanyāsādikaṃ paścānmūlamantrasya yojayet /
sthāneṣu tattatkalpokteṣviti nyāsavidhiḥ smṛtaḥ

tato nije śarīre'smiṃścintayedāsanaṃ śubham /
dakṣāṃse ca nyaseddharmaṃ vāmāṃse jñānameva ca

vāmorau cāpi vairāgyaṃ dakṣorāvatha vinyaset /
aiśvaryaṃ mukhadeśe tu mune dhyāyedadharmakam

vāmapārśve nābhideśe dakṣapārśve tathā punaḥ /
nañādīścāpi jñānādīnpūrvoktāneva vinyaset

pādā dharmādayaḥ proktāḥ pīṭhasya munisattama /
adharmādyāstu gātrāṇi smṛtāni munipuṅgavaiḥ

madhye'nantaṃ hṛdi sthāne nyasenmṛdvāsane sthale /
prapañcapadmaṃ vimalaṃ tasminsūryendupāvakān

nyasetkalāyutānmantrī saṃkṣepāttā vadāmyaham /
sūryasya dvādaśa kalāstā indoḥ ṣoḍaśa smṛtāḥ

daśa vahneḥ kalāḥ proktāstābhiryuktāṃstu tānsmaret /
sattvaṃ rajastamaścaiva nyasetteṣāmathopari

ātmānamantarātmānaṃ paramātmānameva ca /
jñānātmānaṃ nyasedvidvānitthaṃ pīṭhasya kalpanā

amukāsanāya nama iti mantreṇa sādhakaḥ /
āsanaṃ pūjayitvā tu tasmindhyāyetparāmbikām

kalpoktavidhinā mantrī deyamantrasya devatām /
mānasairupacāraiśca pūjayettāṃ yathāvidhi

mudrāḥ pradarśayedvidvānkalpoktā modakārikāḥ /
yābhirviracitābhistu modo devyāstu jāyate

śrīnārāyaṇa uvāca
tataḥ svavāmabhāgāgre ṣaṭkoṇopari vartulam /
caturasrayutaṃ samyaṅ‌madhye maṇḍalamālikhet

madhye trikoṇaṃ saṃlikhya śaṅkhamudrāṃ pradarśayet /
ṣaḍaṅgāni ca ṣaṭkoṇeṣvarcayetkusumādibhiḥ

agnyādiṣu tu koṇeṣu ṣaḍaṅgārcanamācaret /
ādhārapātramādāya śaṅkhasya munisattama

astramantreṇa samprokṣya sthāpayettatra maṇḍale /
maṃ vahnimaṇḍalāyoktvā tato daśakalātmane

amukadevyā arghyapātrasthānāya nama ityapi /
mantro'yamuktaḥ śaṅkhasyāpyādhārasthāpane budhaiḥ

ādhāre pūrvamārabhya pradakṣiṇakrameṇa tu /
daśa vahnikalāḥ pūjyā vahnimaṇḍalasaṃsthitāḥ

tato vai mūlamantreṇa prokṣitaṃ śaṅkhamuttamam /
sthāpayettatra cādhāre mūlamantramanusmaran

aṃ sūryamaṇḍalāyoktvā dvādaśānte kalātmane /
amukadevyarghyapātrāya nama ityuccarettataḥ

śaṃ śaṅkhāya padaṃ procya nama ityetaduccaret /
prokṣayettena taṃ śaṅkhaṃ tasmindvādaśa pūjayet

sūryasya dvādaśa kalāstapanyādyā yathākramam /
vilomamātṛkāṃ procya mūlamantraṃ vilomakam

jalairāpūrayecchaṅkhaṃ tatra cendoḥ kalāṃ nyaset /
ॐ somamaṇḍalāyoktvānte ṣoḍaśakalātmane

amukārghyāmṛtāyeti hṛnmantrānto manuḥ smṛtaḥ /
pūjayenmanunā tena jalaṃ tu sṛṇimudrayā

tīrthānyāvāhya tatraivāpyaṣṭakṛtvo japenmanum /
ṣaḍaṅgāni jale nyasya hṛdā saṃpūjayedapaḥ

aṣṭakṛtvo japenmūlaṃ chādayenmatsyamudrayā /
tato dakṣiṇadigbhāge śaṅkhasya prokṣaṇīṃ nyaset

śaṅkhāmbu kiñcinnikṣipya prokṣayettena sarvataḥ /
pūjādravyaṃ nijātmānaṃ viśuddhaṃ bhāvayettataḥ

śrīnārāyaṇāya uvāca
tataḥ svapurato vedyāṃ sarvatobhadramaṇḍalam /
saṃlikhya karṇikāmadhyaṃ pūrayecchālitaṇḍulaiḥ

āstīrya darbhāṃstatraiva nyasetkūrcaṃ salakṣaṇam /
ādhāraśaktimārabhya pīṭhamanvantamarcayet

nirvraṇaṃ kumbhamādāyāpyastrādbhiḥ kṣālitāntaram /
tantunā veṣṭayettaṃ tu triguṇenāruṇena ca

navarat‍nodaraṃ kūrcayutaṃ gandhādipūjitam /
sthāpayettatra pīṭhe tu tāramantreṇa deśikaḥ

aikyaṃ kumbhasya pīṭhasya bhāvayetpūrayettataḥ /
mātṛkāṃ pratilomena japaṃstīrthodakairmune

mūlamantraṃ ca sañjapya pūrayed‌devatādhiyā /
aśvatthapanasāmrāṇāṃ komalairnavapallavaiḥ

chādayetkumbhavadanaṃ caṣakaṃ saphalākṣatam /
saṃsthāpayeta matimān vastrayugmena veṣṭayet

prāṇasthāpanamantreṇa prāṇasthāpanamācaret /
āvāhanādimudrābhirmodayeddevatāṃ parām

dhyāyettāṃ parameśānīṃ kalpoktena prakārataḥ /
svāgataṃ kuśalapraśnaṃ devyā agre samuccaret

pādyaṃ dadyāttato'pyarghyaṃ tataścācamanīyakam /
madhuparkaṃ ca sābhyaṅgaṃ devyai snānaṃ nivedayet

vāsasī ca tato dadyād‌rakte kṣaume sunirmale /
nānāmaṇigaṇākīrṇānākalpānkalpayettataḥ

manunā puṭitairvarṇairmātṛkāyā vidhānataḥ /
devyā aṅgeṣu vinyasya candanādyaiḥ samarcayet

gandhaḥ kālāgurubhavaḥ karpūreṇa samanvitaḥ /
kāśmīraṃ candanaṃ cāpi kastūrīsahitaṃ mune

kundapuṣpādipuṣpāṇi paradevyai samarpayet /
dhūpo'gurupuruvrātośīracandanaśarkarāḥ

madhumiśrāḥ smṛtā devyāḥ priyā dhūpātmanā sadā /
dīpānanekāndattvātha naivedyaṃ darśayetsudhīḥ

pratidravyaṃ jalaṃ dadyātprokṣaṇīsthaṃ na cānyathā /
tataḥ kuryādaṅgapūjāṃ kalpoktāvaraṇāni ca

sāṅgāṃ devīmathābhyarcya vaiśvadevaṃ tataścaret /
dakṣiṇe sthaṇḍilaṃ kṛtvā tatrādhāya hutāśanam

mūrtisthāṃ devatāṃ tatrāvāhya saṃpūjya ca kramāt /
tāravyāhṛtibhirhutvā mūlamantreṇa vai tataḥ

pañcaviṃśativāraṃ tu pāyasena sasarpiṣā /
hunetpaścādvyāhṛtibhiḥ punaśca juhuyānmune

gandhādyairarcayitvā ca devīṃ pīṭhe tu yojayet /
vahniṃ visṛjya haviṣā parito vikired‌balim

devatāyāḥ pārṣadebhyo gandhapuṣpādisaṃyutān /
pañcopacārāndattvātha tāmbūlaṃ chatracāmare

dadyāddevyai tato mantraṃ sahasrāvṛttito japet /
japaṃ samarpya caiśānyāṃ vikire diśi saṃsthite

karkarīṃ sthāpayettasyāṃ durgāmāvāhya pūjayet /
rakṣa rakṣeti coccārya nālamuktena vāriṇā

astramantraṃ japandeśaṃ secayettu pradakṣiṇam /
karkarīṃ sthāpayetsthāne pūjayeccāstradevatām

paścād‌gurustu śiṣyeṇa saha bhuñjīta vāgyataḥ /
tasyāṃ rātrau tu tadvedyāṃ nidrāṃ kuryātprayat‍nataḥ

śrīnārāyaṇa uvāca
tataḥ kuṇḍasya saṃskāraṃ sthaṇḍilasya ca vā mune /
pravakṣyāmi samāsena yathāvidhi vidhānataḥ

mūlamantraṃ samuccārya vīkṣayedastramantrataḥ /
prokṣayettāḍanaṃ kuryāttenaiva kavacena tu

abhyukṣaṇaṃ samuddiṣṭaṃ tisrastisrastataḥ param /
prāgagrā udagagrāśca likhellekhāḥ samantataḥ

praṇavena samabhyukṣya pīṭhaṃ devyāḥ samarcayet /
ādhāraśaktimārabhya pīṭhamantrāvasānakam

tasminpīṭhe samāvāhya śivau paramakāraṇau /
gandhādyairupacāraiśca pūjayettau samāhitaḥ

devīṃ dhyāyedṛtusnātāṃ saṃsaktāṃ śaṅ‌kareṇa tu /
kāmāturāṃ tayoḥ krīḍāṃ kiñcitkālaṃ vibhāvayet

atha vahniṃ samādāya pātreṇa purato nyaset /
kravyādāṃśaṃ parityajya pūrvoktairvīkṣaṇādibhiḥ

saṃskṛtya vahniṃ raṃ bījamuccārya tadanantaram /
caitanyaṃ yojayettasminpraṇavenābhimantrayet

saptavāraṃ tato dhenumudrāṃ sandarśayed‌guruḥ /
śareṇa rakṣitaṃ kṛtvā tanutreṇāvaguṇṭhayet

arcitaṃ triḥ paribhrāmya prādakṣiṇyena sattamaḥ /
kuṇḍopari japaṃstāraṃ jānuspṛṣṭamahītalaḥ

śivabījadhiyā devyā yonau vahniṃ vinikṣipet /
ācāmayettato devaṃ devīṃ ca jagadambikām

citpiṅ‌gala hanadahapacayugmaṃ tataḥ param /
sarvajñājñāpaya svāhā mantro'yaṃ vahnidīpane

agniṃ prajvalitaṃ vande jātavedaṃ hutāśanam /
suvarṇavarṇamamalaṃ samiddhaṃ viśvatomukham

mantreṇānena taṃ vahniṃ stuvīta paramādarāt /
tato nyasedvahnimantraṃ ṣaḍaṅgaṃ deśikottamaḥ

sahasrārciḥ svastipūrṇa uttiṣṭhapuruṣaḥ smṛtaḥ /
dhūmavyāpī saptajihvo dhanurdhara iti kramāt

jātiyuktāḥ ṣaḍaṅgāḥ syuḥ pūrvasthāneṣu vinyaset /
dhyāyedvahniṃ hemavarṇaṃ trinetraṃ padmasaṃsthitam

iṣṭaśaktisvastikābhīrdhārakaṃ maṅgalaṃ param /
pariṣiñcettataḥ kuṇḍaṃ mekhalopari mantravit

darbhaiḥ paristaretpaścātparidhīnvinyasedatha /
trikoṇavṛttaṣaṭkoṇaṃ sāṣṭapatraṃ sabhūpuram

yantraṃ vibhāvayedvahneḥ pūrvaṃ vā saṃlikhedatha /
tanmadhye pūjayedvahniṃ mantreṇānena vai mune

vaiśvānara tato jātavedaḥ paścādihāvaha /
lohitākṣapadaṃ proktvā sarvakarmāṇi sādhaya

vahnijāyāntako mantrastena vahniṃ tu pūjayet /
madhye ṣaṭsvapi koṇeṣu hiraṇyā gaganā tathā

raktā kṛṣṇā suprabhā ca bahurūpātiraktikā /
pūjayetsaptajihvāstāḥ kesareṣvaṅgapūjanam

daleṣu pūjayenmūrtīḥ śaktisvastikadhāriṇī /
jātavedāḥ saptajihvo havyavāhana eva ca

aśvodarajasaṃjño'nyaḥ punarvaiśvānarāhvayaḥ /
kaumāratejāḥ syādviśvamukho devamukhaḥ smṛtaḥ

tārāgnaye padādyāḥ syurnatyantā vahnimūrtayaḥ /
lokapālāṃścaturdikṣu vajrādyāyudhasaṃyutān

śrīnārāyaṇa uvāca
tataḥ sruksruvasaṃskārāvājyasaṃskāra eva ca /
kṛtvā homaṃ tataḥ kuryātsruveṇādāya vai ghṛtam

dakṣiṇād‌ghṛtabhāgāttu vahnerdakṣiṇalocane /
juhuyādagnaye svāhetyevaṃ vai vāmato'nyataḥ

somāya svāheti madhyād‌ghṛtamādāya sattama /
agnīṣomābhyāṃ svāheti madhyanetre hunettataḥ

punardakṣiṇabhāgāttu ghṛtamādāya vai mukhe /
agnaye sviṣṭakṛtsvāhetyanenaiva hunettataḥ

satārābhirvyāhṛtibhirjuhuyādatha sādhakaḥ /
juhuyādagnimantreṇa trivāraṃ tu tataḥ param

tatastu praṇavenaivāpyaṣṭāvaṣṭau ghṛtāhutīḥ /
garbhādhānādisaṃskārakṛte tu juhuyānmune

garbhādhānaṃ puṃsavanaṃ sīmantonnayanaṃ tataḥ /
jātakarma nāmakarmāpyupaniṣkramaṇaṃ tathā

annāśanaṃ tathā cūḍā vratabandhastathaiva ca /
mahānāmnyaṃ vrataṃ paścāttathaupaniṣadaṃ vratam

godānodvāhakau proktāḥ saṃskārāḥ śruticoditāḥ /
tataḥ śivaṃ pārvatīṃ ca pūjayitvā visarjayet

juhuyātpañca samidho vahnimuddiśya sādhakaḥ /
paścādāvaraṇānāṃ cāpyekaikāmāhutiṃ hunet

ghṛtaṃ sruci samādāya caturvāraṃ sruveṇa ca /
pidhāya tāṃ tu tenaiva mune tiṣṭhannijāsane

vauṣaḍantena manunā vahnestu juhuyāttataḥ /
mahāgaṇeśamantreṇa juhuyādāhutīrdaśa

vahnau pīṭhaṃ samabhyarcya deyamantrasya devatām /
vahnau dhyātvā tu tadvaktre pañcaviṃśatisaṃkhyayā

mūlamantreṇa juhuyādvaktraikīkaraṇāya ca /
vahnidevatayoraikyaṃ bhāvayannātmanā saha

ekībhūtaṃ bhāvayettu tatastu sādhakottamaḥ /
ṣaḍaṅ‌gaṃ devatānāṃ ca juhuyādāhutīḥ pṛthak

ekādaśaiva juhuyādāhutīrmunisattama /
etena nāḍīsandhānaṃ vahnidevatayormune

ekaikakramayogenāpyāvṛttīnāṃ tathaiva ca /
ekaikakramayogena ghṛtena juhuyānmune

tataḥ kalpoktadravyaistu juhuyādathavā tilaiḥ /
devatāmūlamantreṇa gajāntakasahasrakam

evaṃ hutvā tato devīṃ santuṣṭāṃ bhāvayenmune /
tathaivāvṛtidevīśca vahnyādyā devatā api

tataḥ śiṣyaṃ ca susnātaṃ kṛtasamyādikakriyam /
vastradvayayutaṃ svarṇābharaṇena samanvitam

kamaṇḍalukaraṃ śuddhaṃ kuṇḍasyāntikamānayet /
namaskṛtya tataḥ śiṣyo gurūnatha sabhāsadaḥ

kuladevaṃ namaskṛtya viśettatrātha viṣṭare /
gurustatastu taṃ śiṣyaṃ kṛpādṛṣṭyā vilokayet

taccaitanyaṃ nije dehe bhāvayetsaṅ‌gataṃ tviti /
tataḥ śiṣyatanusthānāmadhvanāṃ pariśodhanam

kuryāttu homato vidvāndivyadṛṣṭyavalokanāt /
yena jāyeta śuddhātmā yogyo devādyanugrahe

śrīnārāyaṇa uvāca
tanau dhyāyettu śiṣyasya ṣaḍadhvanaḥ kameṇa tu /
pādayostu kalādhvānamandhau tattvādhvakaṃ punaḥ

nābhau tu bhuvanādhvānaṃ varṇādhvānaṃ tathā hṛdi /
padādhvānaṃ tathā bhāle mantrādhvānaṃ tu mūrdhani

śiṣyaṃ spṛśaṃstu kūrcena tilairājyapariplutaiḥ /
śodhayāmyamumadhvānaṃ svāheti manumuccaran

tārāḍhyaṃ juhuyādaṣṭavāraṃ pratyadhvameva hi /
ṣaḍadhvanastatastāṃstu līnān brahmaṇi bhāvayet

punarutpādayettasmātsṛṣṭimārgeṇa vai guruḥ /
ātmasthitaṃ taccaitanyaṃ punaḥ śiṣye tu yojayet

pūrṇāhutiṃ tato hutvā devatāṃ kalaśe nayet /
punarvyāhṛtibhirhutvā vahneraṅgāhutīstathā

ekaikaśo gururdattvā visṛjedvahnimātmani /
tataḥ śiṣyasya netre tu badhnīyādvāsasā guruḥ

netramantreṇa taṃ śiṣyaṃ kuṇḍato maṇḍalaṃ nayet /
puṣpāñjaliṃ mukhyadevyāṃ kārayecchiṣyahastataḥ

netrabandhaṃ nirākṛtya veśayetkuśaviṣṭare /
bhūtaśuddhiṃ śiṣyadehe kuryātproktena vartmanā

mantroditāṃstathā nyāsānkṛtvā śiṣyatanau tataḥ /
maṇḍale veśayecchiṣyamanyasminkumbhasaṃsthitān

pallavāñchiṣyaśirasi vinyasenmātṛkāṃ japet /
kalaśasthajalaiḥ śiṣyaṃ snāpayeddevatātmakaiḥ

vardhanījalasekaṃ ca kuryād‌rakṣārthamañjasā /
tataḥ śiṣyaḥ samutthāya vāsasī paridhāya ca

kṛtabhasmāvalepaśca saṃviśed‌gurusannidhau /
tato guruḥ svakīyāttu hṛdayānnirgatāṃ śivām

praviṣṭāṃ śiṣyahṛdaye bhāvayetkaruṇānidhiḥ /
pūjayed‌gandhapuṣpādyairaikyaṃ vai bhāvayaṃstayoḥ

tatastriṃśo dakṣakarṇe śiṣyasyopadiśed‌guruḥ /
mahāmantraṃ mahādevyāḥ svahastaṃ śirasi nyasan

aṣṭottaraśataṃ mantraṃ śiṣyo'pi prajapenmune /
daṇḍavatpraṇamed‌bhūmau taṃ guruṃ devatātmakam

sarvasvamarpayettasmai yāvajjīvamananyadhīḥ /
ṛtvigbhyo dakṣiṇāṃ dattvā brāhmaṇāṃścāpi bhojayet

suvāsinīḥ kumārīśca baṭukāṃścaiva sarvaśaḥ /
dīnānāthāndaridrāṃśca vittaśāṭhyavivarjitaḥ

kṛtārthatāṃ svasya buddhvā nityamārādhayenmanum /
iti te kathitaḥ samyagdīkṣāvidhiranuttamaḥ

vimṛśyaitadaśeṣeṇa bhaja devīpadāmbujam /
nānyastu paramo dharmo brāhmaṇasyātra vidyate

vaidikaḥ svasvagṛhyoktakrameṇopadiśenmanum /
tāntrikastantrarītyā tu sthitireṣā sanātanī

tattaduktaprayogāṃste te te kuryurna cānyathā /
śrīnārāyaṇa uvāca
iti sarvaṃ mayākhyātaṃ yatpṛṣṭaṃ nārada tvayā

ataḥ paraṃ parāmbāyā bhaja nityaṃ padāmbujam /
nityamārādhya taccāhaṃ nirvṛtiṃ paramāṃ gataḥ

vyāsa uvāca
iti rājannāradāya proktvā sarvamanuttamam /
samādhimīlitākṣastu dadhyau devīpadāmbujam

nārāyaṇastu bhagavān munivaryaśikhāmaṇiḥ /
nārado'pi tato natvā guruṃ nārāyaṇaṃ param /
jagāma sadyastapase devīdarśanalālasaḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
dvādaśaskandhe mantradīkṣāvidhivarṇanaṃ nāma saptamo'dhyāyaḥ