Devi Bhagavata Purana · Chapter 12.13

janamejayenāmbāmakhakaraṇa-devībhāgavataśravaṇapūrvakaṃ svapitruddhāravarṇanam
vyāsa uvāca
iti te kathitaṃ bhūpa yadyatpṛṣṭaṃ tvayānagha /
nārāyaṇena yatproktaṃ nāradāya mahātmane

śrutvaitattu mahādevyāḥ purāṇaṃ paramād‍bhutam /
kṛtakṛtyo bhavenmartyo devyāḥ priyatamo hi saḥ

kuru cāmbāmakhaṃ rājan svapitruddharaṇāya vai /
khinno'si yena rājendra piturjñātvā tu durgatim

gṛhāṇa tvaṃ mahādevyā mantraṃ sarvottamottamam /
yathāvidhividhānena janmasāphalyadāyakam

sūta uvāca
tacchrutvā nṛpaśārdūlaḥ prārthayitvā munīśvaram /
tasmādeva mahāmantraṃ devīpraṇavasaṃjñakam

dīkṣāvidhiṃ vidhānena jagrāha nṛpasattamaḥ /
tata āhūya dhaumyādīnnavarātrasamāgame

ambāyajñaṃ cakārāśu vittaśāḍhyavivarjitaḥ /
brāhmaṇaiḥ pāṭhayāmāsa purāṇaṃ tvetaduttamam

śrīdevyagre'mbikāprītyai devībhāgavataṃ param /
brāhmaṇānbhojayāmāsāpyasaṃkhyātānsuvāsinīḥ

kumārīrvaṭukādīṃśca dīnānāthāṃstathaiva ca /
dravyapradānaistānsarvān santoṣya vasudhādhipaḥ

samāpya yajñaṃ saṃsthāne saṃsthito yāvadeva hi /
tāvadeva hi cākāśānnāradaḥ samavātarat

raṇayanmahatīṃ vīṇāṃ jvaladagniśikhopamaḥ /
sasambhamaḥ samutthāya dṛṣṭvā taṃ nāradaṃ munim

āsanādyupacāraiśca pūjayāmāsa bhūmipaḥ /
kṛtvā tu kuśalapraśnaṃ papracchāgamakāraṇam

rājovāca
kuta āgamanaṃ sādho brūhi kiṃ karavāṇi te /
sanātho'haṃ kṛtārtho'haṃ tvadāgamanakāraṇāt

iti rājño vacaḥ śrutvā provāca munisattamaḥ /
adyāścaryaṃ mayā dṛṣṭaṃ devaloke nṛpottama

tannivedayituṃ prāptastvatsakāśe suvismitaḥ /
pitā te durgatiṃ prāpto nijakarmaviparyayāt

sa evāyaṃ divyarūpavapurbhūtvādhunaiva hi /
devadevaiḥ stutaḥ samyagapsarobhiḥ samantataḥ

vimānavaramāruhya maṇidvīpaṃ gato'bhavat /
devībhāgavatasyāsya śravaṇotthaphalena ca

ambāmakhaphalenāpi pitā te sugatiṃ gataḥ /
dhanyo'si kṛtakṛtyo'si jīvitaṃ saphalaṃ tava

narakāduddhṛtastātastvayā tu kulabhūṣaṇa /
devaloke sphītakīrtistavādya vipulābhavat

sūta uvāca
nāradoktaṃ samākarṇya premagad‌gaditāntaraḥ /
papāta pādāmbujayorvyāsasyād‌bhutakarmaṇaḥ

tavānugrahato deva kṛtārtho'haṃ mahāmune /
kiṃ mayā pratikartavyaṃ namaskārādṛte tava

anugrāhyaḥ sadaivāhamevameva tvayā mune /
iti rājño vacaḥ śrutvāpyāśīrbhirabhinandya ca

uvāca vacanaṃ ślakṣṇaṃ bhagavān bādarāyaṇaḥ /
rājansarvaṃ parityajya bhaja devīpadāmbujam

devībhāgavataṃ caiva paṭha nityaṃ samāhitaḥ /
ambāmakhaṃ sadā bhaktyā kuru nityamatandritaḥ

anāyāsena tena tvaṃ mokṣyase bhavabandhanāt /
santyanyāni purāṇāni harirudramukhāni ca

devībhāgavatasyāsya kalāṃ nārhanti ṣoḍaśīm /
sārametatpurāṇānāṃ vedānāṃ caiva sarvaśaḥ

mūlaprakṛtirevaiṣā yatra tu pratipādyate /
samaṃ tena purāṇaṃ syātkathamanyannṛpottama

pāṭhe vedasamaṃ puṇyaṃ yasya syājjanamejaya /
paṭhitavyaṃ prayat‍nena tadeva vibudhottamaiḥ

ityuktvā nṛpavaryaṃ taṃ jagāma munirāṭ tataḥ /
jagmuścaiva yathāsthānaṃ dhaumyādimunayo'malāḥ

devībhāgavatasyaiva praśaṃsāṃ cakruruttamām /
rājā śaśāsa dharaṇīṃ tataḥ santuṣṭamānasaḥ /
devībhāgavataṃ caiva paṭhacchṛṇvantirantaram

iti śrīmaddevībhāgavate mahāpurāṇe'ṣṭādalasāhasryāṃ saṃhitāyāṃ dvādaśaskandhe janamejayenāmbāmakhakaraṇa-devībhāgavataśravaṇapūrvakaṃ svapitruddhāravarṇanaṃ nāma trayodaśo'dhyāyaḥ