દેવી ભાગવત પુરાણ · અધ્યાય 12.13

જનમેજયેનામ્બામખકરણ-દેવીભાગવતશ્રવણપૂર્વકં સ્વપિત્રુદ્ધારવર્ણનમ્
વ્યાસ ઉવાચ
ઇતિ તે કથિતં ભૂપ યદ્યત્પૃષ્ટં ત્વયાનઘ ।
નારાયણેન યત્પ્રોક્તં નારદાય મહાત્મને

શ્રુત્વૈતત્તુ મહાદેવ્યાઃ પુરાણં પરમાદ્‍ભુતમ્ ।
કૃતકૃત્યો ભવેન્મર્ત્યો દેવ્યાઃ પ્રિયતમો હિ સઃ

કુરુ ચામ્બામખં રાજન્ સ્વપિત્રુદ્ધરણાય વૈ ।
ખિન્નોઽસિ યેન રાજેન્દ્ર પિતુર્જ્ઞાત્વા તુ દુર્ગતિમ્

ગૃહાણ ત્વં મહાદેવ્યા મન્ત્રં સર્વોત્તમોત્તમમ્ ।
યથાવિધિવિધાનેન જન્મસાફલ્યદાયકમ્

સૂત ઉવાચ
તચ્છ્રુત્વા નૃપશાર્દૂલઃ પ્રાર્થયિત્વા મુનીશ્વરમ્ ।
તસ્માદેવ મહામન્ત્રં દેવીપ્રણવસંજ્ઞકમ્

દીક્ષાવિધિં વિધાનેન જગ્રાહ નૃપસત્તમઃ ।
તત આહૂય ધૌમ્યાદીન્નવરાત્રસમાગમે

અમ્બાયજ્ઞં ચકારાશુ વિત્તશાઢ્યવિવર્જિતઃ ।
બ્રાહ્મણૈઃ પાઠયામાસ પુરાણં ત્વેતદુત્તમમ્

શ્રીદેવ્યગ્રેઽમ્બિકાપ્રીત્યૈ દેવીભાગવતં પરમ્ ।
બ્રાહ્મણાન્ભોજયામાસાપ્યસંખ્યાતાન્સુવાસિનીઃ

કુમારીર્વટુકાદીંશ્ચ દીનાનાથાંસ્તથૈવ ચ ।
દ્રવ્યપ્રદાનૈસ્તાન્સર્વાન્ સન્તોષ્ય વસુધાધિપઃ

સમાપ્ય યજ્ઞં સંસ્થાને સંસ્થિતો યાવદેવ હિ ।
તાવદેવ હિ ચાકાશાન્નારદઃ સમવાતરત્

રણયન્મહતીં વીણાં જ્વલદગ્નિશિખોપમઃ ।
સસમ્ભમઃ સમુત્થાય દૃષ્ટ્વા તં નારદં મુનિમ્

આસનાદ્યુપચારૈશ્ચ પૂજયામાસ ભૂમિપઃ ।
કૃત્વા તુ કુશલપ્રશ્નં પપ્રચ્છાગમકારણમ્

રાજોવાચ
કુત આગમનં સાધો બ્રૂહિ કિં કરવાણિ તે ।
સનાથોઽહં કૃતાર્થોઽહં ત્વદાગમનકારણાત્

ઇતિ રાજ્ઞો વચઃ શ્રુત્વા પ્રોવાચ મુનિસત્તમઃ ।
અદ્યાશ્ચર્યં મયા દૃષ્ટં દેવલોકે નૃપોત્તમ

તન્નિવેદયિતું પ્રાપ્તસ્ત્વત્સકાશે સુવિસ્મિતઃ ।
પિતા તે દુર્ગતિં પ્રાપ્તો નિજકર્મવિપર્યયાત્

સ એવાયં દિવ્યરૂપવપુર્ભૂત્વાધુનૈવ હિ ।
દેવદેવૈઃ સ્તુતઃ સમ્યગપ્સરોભિઃ સમન્તતઃ

વિમાનવરમારુહ્ય મણિદ્વીપં ગતોઽભવત્ ।
દેવીભાગવતસ્યાસ્ય શ્રવણોત્થફલેન ચ

અમ્બામખફલેનાપિ પિતા તે સુગતિં ગતઃ ।
ધન્યોઽસિ કૃતકૃત્યોઽસિ જીવિતં સફલં તવ

નરકાદુદ્ધૃતસ્તાતસ્ત્વયા તુ કુલભૂષણ ।
દેવલોકે સ્ફીતકીર્તિસ્તવાદ્ય વિપુલાભવત્

સૂત ઉવાચ
નારદોક્તં સમાકર્ણ્ય પ્રેમગદ્‌ગદિતાન્તરઃ ।
પપાત પાદામ્બુજયોર્વ્યાસસ્યાદ્‌ભુતકર્મણઃ

તવાનુગ્રહતો દેવ કૃતાર્થોઽહં મહામુને ।
કિં મયા પ્રતિકર્તવ્યં નમસ્કારાદૃતે તવ

અનુગ્રાહ્યઃ સદૈવાહમેવમેવ ત્વયા મુને ।
ઇતિ રાજ્ઞો વચઃ શ્રુત્વાપ્યાશીર્ભિરભિનન્દ્ય ચ

ઉવાચ વચનં શ્લક્ષ્ણં ભગવાન્ બાદરાયણઃ ।
રાજન્સર્વં પરિત્યજ્ય ભજ દેવીપદામ્બુજમ્

દેવીભાગવતં ચૈવ પઠ નિત્યં સમાહિતઃ ।
અમ્બામખં સદા ભક્ત્યા કુરુ નિત્યમતન્દ્રિતઃ

અનાયાસેન તેન ત્વં મોક્ષ્યસે ભવબન્ધનાત્ ।
સન્ત્યન્યાનિ પુરાણાનિ હરિરુદ્રમુખાનિ ચ

દેવીભાગવતસ્યાસ્ય કલાં નાર્હન્તિ ષોડશીમ્ ।
સારમેતત્પુરાણાનાં વેદાનાં ચૈવ સર્વશઃ

મૂલપ્રકૃતિરેવૈષા યત્ર તુ પ્રતિપાદ્યતે ।
સમં તેન પુરાણં સ્યાત્કથમન્યન્નૃપોત્તમ

પાઠે વેદસમં પુણ્યં યસ્ય સ્યાજ્જનમેજય ।
પઠિતવ્યં પ્રયત્‍નેન તદેવ વિબુધોત્તમૈઃ

ઇત્યુક્ત્વા નૃપવર્યં તં જગામ મુનિરાટ્ તતઃ ।
જગ્મુશ્ચૈવ યથાસ્થાનં ધૌમ્યાદિમુનયોઽમલાઃ

દેવીભાગવતસ્યૈવ પ્રશંસાં ચક્રુરુત્તમામ્ ।
રાજા શશાસ ધરણીં તતઃ સન્તુષ્ટમાનસઃ ।
દેવીભાગવતં ચૈવ પઠચ્છૃણ્વન્તિરન્તરમ્

ઇતિ શ્રીમદ્દેવીભાગવતે મહાપુરાણેઽષ્ટાદલસાહસ્ર્યાં સંહિતાયાં દ્વાદશસ્કન્ધે જનમેજયેનામ્બામખકરણ-દેવીભાગવતશ્રવણપૂર્વકં સ્વપિત્રુદ્ધારવર્ણનં નામ ત્રયોદશોઽધ્યાયઃ