Devi Bhagavata Purana · Chapter 11.16

sandhyopāsananirūpaṇam
śrīnārāyaṇa uvāca
athātaḥ śrūyatāṃ puṇyaṃ sandhyopāsanamuttamam /
bhasmadhāraṇamāhātmyaṃ kathitaṃ caiva vistarāt

prātaḥsandhyāvidhānaṃ ca kathayiṣyāmi te'nagha /
prātaḥsandhyāṃ sanakṣatrāṃ madhyāhne madhyabhāskarām

sasūryāṃ paścimāṃ sandhyāṃ tisraḥ sandhyā upāsate /
tad‍bhedānapi vakṣyāmi śṛṇu devarṣisattama

uttamā tārakopetā madhyamā luptatārakā /
adhamā sūryasahitā prātaḥsandhyā tridhā matā

uttamā sūryasahitā madhyamāstamite ravau /
adhamā tārakopetā sāyaṃsandhyā tridhā matā

vipro vṛkṣo mūlakānyatra sandhyā
vedaḥ śākhā dharmakarmāṇi patram /
tasmānmūlaṃ yat‍nato rakṣaṇīyaṃ
chinne mūle naiva vṛkṣo na śākhā

sandhyā yena na vijñātā sandhyā yenānupāsitā /
jīvamāno bhavecchūdro mṛtaḥ śvā caiva jāyate

tasmānnityaṃ prakartavyaṃ sandhyopāsanamuttamam /
tadabhāve'nyakarmādāvadhikārī bhavenna hi

udayāstamayādūrdhvaṃ yāvatsyād‌ghaṭikātrayam /
tāvatsandhyāmupāsīta prāyaścittaṃ tataḥ param

kālātikramaṇe jāte caturthārghyaṃ pradāpayet /
athavāṣṭaśataṃ devīṃ japtvādau tāṃ samācaret

yasminkāle tu yatkarma tatkālādhīśvarīṃ ca tām /
sandhyāmupāsya paścāttu tatkālīnaṃ samācaret

gṛhe sādhāraṇā proktā goṣṭhe vai madhyamā bhavet /
nadītīre cottamā syāddevīgehe taduttamā

yato devyā upāseyaṃ tato devyāstu sannidhau /
sandhyātrayaṃ prakartavyaṃ tadānantyāya kalpate

etasyā aparaṃ daivaṃ brāhmaṇānāṃ ca vidyate /
na viṣṇūpāsanā nityā na śivopāsanā tathā

yathā bhavenmahādevyā gāyatryāḥ śruticoditā /
sarvavedasārabhūtā gāyatryāstu samarcanā

brahmādayo'pi sandhyāyāṃ tāṃ dhyāyanti japanti ca /
vedā japanti tāṃ nityaṃ vedopāsyā tataḥ smṛtā

tasmātsarve dvijāḥ śāktā na śaivā na ca vaiṣṇavāḥ /
ādiśaktimupāsante gāyatrīṃ vedamātaram

ācāntaḥ prāṇamāyamya keśavādikanāmabhiḥ /
keśavaśca tathā nārāyaṇo mādhava eva ca

govindo viṣṇurevātha madhusūdana eva ca /
trivikramo vāmanaśca śrīdharo'pi tataḥ param

hṛṣīkeśaḥ padmanābho dāmodara ataḥ param /
saṅ‌karṣaṇo vāsudevaḥ pradyumno'pyaniruddhakaḥ

puruṣottamādhokṣajau ca nārasiṃho'pyutastathā /
janārdana upendraśca hariḥ kṛṣṇo'ntimastathā

ॐkārapūrvakaṃ nāma caturviṃśatisaṅ‌khyayā /
svāhāntaiḥ prāśayedvāri namo'ntaiḥ sparśayettathā

keśavāditribhiḥ pītvā dvābhyāṃ prakṣālayetkarau /
mukhaṃ prakṣālayeddvābhyāṃ dvābhyāmunmārjanaṃ tathā

ekena pāṇiṃ samprokṣya pādāvapi śiro'pi ca /
saṅkarṣaṇādidevānāṃ dvādaśāṅgāni saṃspṛśet

dakṣiṇenodakaṃ pītvā vāmena saṃspṛśed‌budha: /
tāvanna śudhyate toyaṃ yāvadvāmena na spṛśet

gokarṇākṛtihastena māṣamātraṃ jalaṃ pibet /
tato nyūnādhikaṃ pītvā surāpāyī bhaved‌dvijaḥ

saṃhatāṅgulinā toyaṃ pāṇinā dakṣiṇena tu /
muktāṅguṣṭhakaniṣṭhābhyāṃ śeṣeṇācamanaṃ viduḥ

prāṇāyāmaṃ tataḥ kṛtvā praṇavasmṛtipūrvakam /
gāyatrīṃ śirasā sārdhaṃ turīyapadasaṃyutām

dakṣiṇe recayedvāyuṃ vāmena pūritodaram /
kumbhena dhārayennityaṃ prāṇāyāmaṃ vidurbudhā:

pīḍayeddakṣiṇāṃ nāḍīmaṅguṣṭhena tathottarām /
kaniṣṭhānāmikābhyāṃ tu madhyamāṃ tarjanīṃ tyajet

recaka: pūrakaścaiva prāṇāyāmo'tha kumbhaka: /
procyate sarvaśāstreṣu yogibhiryatamānasai:

recakaḥ sṛjate vāyuṃ pūrakaḥ pūrayettu tam /
sāmyena saṃsthitiryattatkumbhakaḥ parikīrtitaḥ

nīlotpaladalaśyāmaṃ nābhimadhye pratiṣṭhitam /
caturbhujaṃ mahātmānaṃ pūrake cintayeddharim

kumbhake tu hṛdi sthāne dhyāyettu kamalāsanam /
prajāpatiṃ jagannāthaṃ caturvaktraṃ pitāmaham

recake śaṅ‌karaṃ dhyāyellalāṭasthaṃ maheśvaram /
śuddhasphaṭikasaṃkāśaṃ nirmalaṃ pāpanāśanam

pūrake viṣṇusāyujyaṃ kumbhake brahmaṇo gatim /
recakena tṛtīyaṃ tu prāpnuyādīśvaraṃ param

paurāṇācamanādyaṃ ca proktaṃ devarṣisattama /
śrautamācamanādyaṃ ca śṛṇu pāpāpahaṃ mune

praṇavaṃ pūrvamuccārya gāyatrīṃ tu tadityṛcam /
pādādau vyāhṛtīstisraḥ śrautācamanamucyate

gāyatrīṃ śirasā sārdhaṃ japed‌vyāhṛtipūrvikām /
pratipraṇavasaṃyuktāṃ tritayaṃ prāṇasaṃyamaḥ

(salakṣaṇaṃ tu prāṇānāmāyāmaṃ kīrtyate'dhunā /
nānāpāpaikaśamanaṃ mahāpuṇyaphalapradam //)
pañcāṅ‌gulībhirnāsāgraṃ pīḍayetpraṇavena tu /
sarvapāpaharā mudrā vānaprasthagṛhasthayoḥ

kaniṣṭhānāmikāṅ‌guṣṭhairyateśca brahmacāriṇaḥ /
āpo hi ṣṭheti tisṛbhiḥ prokṣaṇaṃ syātkuśodakaiḥ

ṛgante mārjanaṃ kuryātpādānte vā samāhitaḥ /
navapraṇavayuktena āpo hi ṣṭhetyanena tu

naśyedaghaṃ mārjanena saṃvatsarasamud‍bhavam /
tata ācamanaṃ kṛtvā sūryaśceti pibedapaḥ

antaḥkaraṇasambhinnaṃ pāpaṃ tasya vinaśyati /
praṇavena vyāhṛtibhirgāyatryā praṇavādyayā

āpo hi ṣṭheti sūktena mārjanaṃ caiva kārayet /
uddhṛtya dakṣiṇe haste jalaṃ gokarṇavatkṛte

nītvā taṃ nāsikāgraṃ tu vāmakukṣau smaredagham /
puruṣaṃ kṛṣṇavarṇaṃ ca ṛtaṃ ceti paṭhettataḥ

drupadāṃ vā ṛcaṃ paścāddakṣanāsāpuṭena ca /
śvāsamārgeṇa taṃ pāpamānayetkaravāriṇi

nāvalokyaiva tadvāri vāmabhāge'śmani kṣipet /
niṣpāpaṃ tu śarīraṃ me sañjātamiti bhāvayet

utthāya tu tataḥ pādau dvau samau sanniyojayet /
jalāñjaliṃ gṛhītvā tu tarjanyaṅ‌guṣṭhavarjitam

vīkṣya bhānuṃ kṣipedvāri gāyatryā cābhimantritam /
trivāraṃ muniśārdūla vidhireṣo'rghyamocane

tataḥ pradakṣiṇāṃ kuryādasāvādityamantrataḥ /
madhyāhne sakṛdeva syātsandhyayostu trivārataḥ

īṣannagraḥ prabhāte tu madhyāhne daṇḍavatsthitaḥ /
āsane copaviṣṭastu dvijaḥ sāyaṃ kṣipedapaḥ

udakaṃ prakṣipedyasmāttatkāraṇamataḥ śṛṇu /
triṃśatkoṭyo mahāvīrā mandehā nāma rākṣasāḥ

kṛtaghnā dāruṇā ghorāḥ sūryamicchanti khāditum /
tato devagaṇāḥ sarve ṛṣayaśca tapodhanāḥ

upāsate mahāsandhyāṃ prakṣipantyudakāñjalim /
dahyante tena daityāste vajrībhūtena vāriṇā

etasmātkāraṇādviprāḥ sandhyāṃ nityamupāsate /
mahāpuṇyasya jananaṃ sandhyopāsanamīritam

arghyāṅ‌gabhūtamantro'yaṃ procyate śṛṇu nārada /
yaduccāraṇamātreṇa sāṅ‌gaṃ sandhyāphalaṃ bhavet

so'hamarko'smyahaṃ jyotirātmā jyotirahaṃ śivaḥ /
ātmajyotirahaṃ śuklaḥ sarvajyotī raso'smyaham

āgaccha varade devi gāyatri brahmarūpiṇi /
japānuṣṭhānasiddhyarthaṃ praviśya hṛdayaṃ mama

uttiṣṭha devi gantavyaṃ punarāgamanāya ca /
arghyeṣu devi gantavyaṃ praviśya hṛdayaṃ mama

tataḥ śuddhasthale naijamāsanaṃ sthāpayed‌budhaḥ /
tatrāruhya japetpaścād‌gāyatrīṃ vedamātaram

atraiva khecarī mudrā prāṇāyāmottaraṃ mune /
prātaḥsandhyāvidhāne ca kīrtitā munipuṅ‌gava

tannāmārthaṃ pravakṣyāmi sādaraṃ śṛṇu nārada /
cittaṃ carati khe yasmājjihvā carati khe gatā

bhruvorantargatā dṛṣṭirmudrā bhavati khecarī /
na cāsanaṃ siddhasamaṃ na kumbhasadṛśo'nilaḥ

na khecarīsamā mudrā satyaṃ satyaṃ ca nārada /
ghaṇṭāvatpaṇavoccārādvāyuṃ nirjitya yat‍nataḥ

sthirāsane sthiro bhūtvā nirahaṅ‌kāranirmamaḥ /
lakṣaṇaṃ nārada mune śṛṇu siddhāsanasya ca

yonisthānakamaṅ‌ghrimūlaghaṭitaṃ kṛtvā dṛḍhaṃ vinyase-
nmeḍhre pādamathaikameva hṛdayaṃ kṛtvā samaṃ vigraham /
sthāṇuḥ saṃyamitendriyo'caladṛśā paśyanbhruvorantaraṃ
tiṣṭhatyetadatīva yogisukhadaṃ siddhāsanaṃ procyate

āyātu varadā devī akṣaraṃ brahmasammitam /
gāyatrī chandasāṃ mātaridaṃ brahma juṣasva me

yadahnā kurute pāpaṃ tadahnā pratimucyate /
yad‌rātryā kurute pāpaṃ tad‌rātryā pratimucyate

sarvavarṇe mahādevi sandhyāvidye sarasvati /
ajare amare devi sarvadevi namo'stu te

tejo'sītyādimantreṇa devīmāvāhayettataḥ /
yatkṛtaṃ tvadanuṣṭhānaṃ tatsarvaṃ pūrṇamastu me

tataḥ śāpavimokṣāya vidhānaṃ samyagācaret /
brahmaśāpastato viśvāmitrasya ca tathaiva ca

vasiṣṭhaśāpa ityetattrividhaṃ śāpalakṣaṇam /
brahmaṇaḥ smaraṇenaiva brahmaśāpo nivartate

viśvāmitrasmaraṇato viśvāmitrasya śāpataḥ /
vasiṣṭhasmaraṇādeva tasya śāpo vinaśyati

hṛtpadmamadhye puruṣaṃ pramāṇaṃ
satyātmakaṃ sarvajagatsvarūpam /
dhyāyāmi nityaṃ paramātmasaṃjñaṃ
cid‌rūpamekaṃ vacasāmagamyam

atha nyāsavidhiṃ vakṣye sandhyāyā aṅgasambhavam /
ॐkāraṃ pūrvavadyojyaṃ tato mantrānudīrayet

bhūrityuktvā ca pādābhyāṃ nama ityeva coccaret /
bhuvaḥ pūrvaṃ tu jānubhyāṃ sva: kaṭibhyāṃ namo vadet

maharnābhyai janaścaiva hadayāya tatastapaḥ /
kaṇṭhāya ca tataḥ satyaṃ lalāṭe parikīrtayet

aṅguṣṭhābhyāṃ tatsavitustarjanībhyāṃ vareṇyakam /
bhargo devasya madhyābhyāṃ dhīmahītyeva kīrtayet

anāmābhyāṃ kaniṣṭhābhyāṃ dhiyo yo na: padaṃ vadet /
pracodayātkarapṛṣṭhatalayorvinyasetsudhī:

brahmātmane tatsaviturhṛdayāya namastathā /
viṣṇvātmane vareṇyaṃ ca śirase nama ityapi

bhargo devastha rudrātmane śikhāyai prakīrtitam /
śaktyātmane dhīmahīti kavacāya tataḥ param

kālātmane dhiyo yo no netratraya udīritam /
pracodayācca sarvātmane'strāya parikīrtitam

akṣaranyāsamevāgre kathayāmi mahāmune /
gāyatrīvarṇasambhūtanyāsa: pāpaharaḥ para:

praṇavaṃ pūrvamuccārya varṇanyāsaḥ prakīrtitaḥ /
tatkāramādāvuccārya pādāṅguṣṭhadvaye nyaset

sakāraṃ gulphayostadvad‌vikāraṃ jaṅghayornyaset /
jānvostukāraṃ vinyasya ūrvoścaiva vakārakam

rekāraṃ ca gude nyasya ṇikāraṃ liṅga eva ca /
kaṭyāṃ yakāramevātra bhakāraṃ nābhimaṇḍale

gokāraṃ hṛdaye nyasya dekāraṃ stanayordvayoḥ /
vakāraṃ hṛdi vinyasya syakāraṃ kaṇṭhakūpake

dhīkāraṃ mukhadeśe tu makāraṃ tāludeśake /
hikāraṃ nāsikāgre tu dhikāraṃ netramaṇḍale

bhrūmadhye caiva yokāraṃ yokāraṃ ca lalāṭake /
nakāraṃ vai pūrvamukhe prakāraṃ dakṣiṇe mukhe

cokāraṃ paścimamukhe dakāraṃ cottare mukhe /
yākāraṃ mūrdhni vinyasya takāraṃ vyāpakaṃ nyaset

etannyāsavidhiṃ kecinnecchanti japatatparāḥ /
tato dhyāyenmahādevīṃ jaganmātaramambikām

bhāsvajjapāprasūnābhāṃ kumārīṃ parameśvarīm /
raktāmbujāsanārūḍhāṃ raktagandhānulepanām

raktamālyāmbaradharāṃ caturāsyāṃ caturbhujām /
dvinetrāṃ sruksruvo mālāṃ kuṇḍikāṃ caiva bibhratīm

sarvābharaṇasandīptāmṛgvedādhyāyinīṃ parām /
haṃsapatrāmāhavanīyamadhyasthāṃ brahmadevatām

catuṣpadāmaṣṭakukṣiṃ saptaśīrṣāṃ maheśvarīm /
agnivaktrāṃ rudraśikhāṃ viṣṇucittāṃ tu bhāvayet

brahmā tu kavacaṃ yasyā gotraṃ sāṃkhyāyanaṃ smṛtam /
ādityamaṇḍalāntaḥsthāṃ dhyāyeddevīṃ maheśvarīm

evaṃ dhyātvā vidhānena gāyatrīṃ vedamātaram /
tato mudrāḥ prakurvīta devyāḥ prītikarāḥ śubhāḥ

sumukhaṃ sapuṭaṃ caiva vitataṃ vistṛtaṃ tathā /
dvimukhaṃ trimukhaṃ caiva catuṣkaṃ pañcakaṃ tathā

ṣaṇmukhādhomukhaṃ caiva vyāpakāñjalikaṃ tathā /
śakaṭaṃ yamapāśaṃ ca grathitaṃ sanmukhonmukham

vilambaṃ muṣṭikaṃ caiva matsyaṃ kūrmaṃ varāhakam /
siṃhākrāntaṃ mahākrāntaṃ mud‌garaṃ pallavaṃ tathā

caturviṃśatimudrāśca gāyatryāḥ sampradarśayet /
śatākṣarāṃ ca gāyatrīṃ sakṛdāvartayetsudhīḥ

caturviṃśatyakṣarāṇi gāyatryā kīrtitāni hi /
jātavedasanāmnīṃ ca ṛcamuccārayettataḥ

tryambakasyarcamāvṛtya gāyatrī śatavarṇakā /
bhavatīyaṃ mahāpuṇyā sakṛjjapyā budhairiyam

ॐkāraṃ pūrvamuccārya bhūrbhuvaḥ svastathaiva ca /
caturviṃśatyakṣarāṃ ca gāyatrīṃ proccarettataḥ

evaṃ nityaṃ japaṃ kuryād‌brāhmaṇo viprapuṅ‌gavaḥ /
sa samagraṃ phalaṃ prāpya sandhyāyāḥ sukhamedhate

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
ekādaśaskandhe sandhyopāsananirūpaṇaṃ nāma ṣoḍaśo'dhyāyaḥ