Devi Bhagavata Purana · Chapter 11.14

vibhūtidhāraṇamāhātmyavarṇanam
śrīnārāyaṇa uvāca
bhasmadigdhaśarīrāya yo dadāti dhanaṃ mudā /
tasya sarvāṇi pāpāni vinaśyanti na saṃśayaḥ

śrutayaḥ smṛtayaḥ sarvāḥ purāṇānyakhilānyapi /
vadanti bhūtimāhāmyaṃ tattasmāddhārayed‌dvijaḥ

sitena bhasmanā kuryāttrisandhyaṃ yastripuṇḍrakam /
sarvapāpavinirmuktaḥ śivaloke mahīyate

yogī sarvāṅ‌gakaṃ stānamāpādatalamastakam /
trisandhyamācarennityamāśu yogamavāpnuyāt

bhasmasnānena puruṣaḥ kulasyoddhārako bhavet /
bhasmasnānaṃ jalasnānādasaṃkhyeyaguṇānvitam

sarvatīrtheṣu yatpuṇyaṃ sarvatīrtheṣu yatphalam /
tatphalaṃ labhate sarvaṃ bhasmasnānānna saṃśayaḥ

mahāpātakayukto vā yukto vāpyupapātakaiḥ /
bhasmasnānena tatsarvaṃ dahatyagnirivendhanam

bhasmasnānātparaṃ snānaṃ pavitraṃ naiva vidyate /
evamuktaṃ śivenādau tadā snātaḥ svayaṃ śivaḥ

tadāprabhṛti brahmādyā munayaśca śivārthinaḥ /
sarvakarmasu yat‍nena bhasmasnānaṃ pracakrire

tasmādetacchiraḥsnānamāgneyaṃ yaḥ samācaret /
anenaiva śarīreṇa sa hi rudro na saṃśayaḥ

ye bhasmadhāriṇaṃ dṛṣṭvā paritṛptā bhavanti te /
devāsuramunīndraiśca pūjyā nityaṃ na saṃśayaḥ

bhasmasañchannasarvāṅ‌gaṃ dṛṣṭvottiṣṭhati yaḥ pumān /
taṃ dṛṣṭvā devarājo'pi daṇḍavatpraṇamiṣyati

abhakṣyabhakṣaṇaṃ yeṣāṃ bhasmadhāraṇapūrvakam /
teṣāṃ tad‍bhakṣyameva syānmune nātra vicāraṇā

yaḥ snāti bhasmanā nityaṃ jale snātvā tataḥ param /
brahmacārī gṛhastho vā vānaprastho''thavādarāt

sarvapāpavinirmuktaḥ sa yāti paramāṃ gatim /
āgneyaṃ bhasmanā snānaṃ yatīnāṃ ca viśiṣyate

ārdrasnānādvaraṃ bhasmasnānamārdravadho dhruvaḥ /
ārdraṃ tu prakṛtiṃ vidyātprakṛtiṃ bandhanaṃ viduḥ

prakṛtestu prahāṇāya bhasmanā snānamiṣyate /
bhasmanā sadṛśaṃ brahyannāsti lokatrayeṣvapi

rakṣārthaṃ maṅ‌galārthaṃ ca pavitrārthaṃ purā suraiḥ /
bhasma dṛṣṭvā mune pūrvaṃ dattaṃ devyai priyeṇa tu

tasmādetacchiraḥsnānamāgneyaṃ yaḥ samācaret /
bhavapāśairvinirmuktaḥ śivaloke mahīyate

jvararakṣaḥpiśācāśca pūtanākuṣṭhagulmakāḥ /
bhagandarāṇi sarvāṇi cāśītirvātarogakāḥ

catuḥṣaṣṭiḥ pittarogāḥ śleṣmā saptatripañcakāḥ /
vyāghracaurabhayaṃ caivāpyanye duṣṭagrahā api

bhasmasnānena naśyanti siṃhenaiva yathā gajāḥ /
śuddhaśītajalenaiva bhasmanā ca tripuṇḍrakam

yo dhārayetparaṃ brahma sa prāpnoti na saṃśayaḥ /
(bhasmanā ca tripuṇḍraṃ ca yaḥ ko'pi dhārayetparam /
sa brahmalokamāpnoti muktapāpo na saṃśayaḥ //)
yathāvidhi lalāṭe vai vahnivīryapradhāraṇāt

nāśayellikhitāṃ yāmīṃ lalāṭasthāṃ lipiṃ dhruvam /
kaṇṭhoparikṛtaṃ pāpaṃ nāśayettatpradhāraṇāt

kaṇṭhe ca dhāraṇātkaṇṭhabhogādikṛtapātakam /
bāhvorbāhukṛtaṃ pāpaṃ vakṣasā manasā kṛtam

nābhyāṃ śiśnakṛtaṃ pāpaṃ gude gudakṛtaṃ haret /
pārśvayordhāraṇād‌brahman parastryāliṅ‌ganādikam

tad‍bhasmadhāraṇaṃ śastaṃ sarvatraiva triliṅ‌gakam /
brahmaviṣṇumaheśānāṃ trayyagnīnāṃ ca dhāraṇam

guṇalokatrayāṇāṃ ca dhāraṇaṃ tena vai kṛtam /
bhasmacchanno dvijo vidvānmahāpātakasambhavaiḥ

doṣairviyujyate sadyo mucyate ca na saṃśayaḥ /
bhasmaniṣṭhasya dahyante doṣā bhasmāgnisaṅ‌gamāt

bhasmasnānaviśuddhātmā ātmaniṣṭha iti smṛtaḥ /
bhasmanā digdhasarvāṅ‌go bhasmadīptatripuṇḍrakaḥ

bhasmaśāyī ca puruṣo bhasmaniṣṭha iti smṛtaḥ /
bhūtapretapiśācādyā rogāścātīva duḥsahāḥ

bhasmaniṣṭhasya sānnidhyādvidravanti na saṃśayaḥ /
bhāsanād‍bhasitaṃ proktaṃ bhasma kalmaṣabhakṣaṇāt

bhūtirbhūtikarī puṃsāṃ rakṣā rakṣākarī purā /
tripuṇḍradhāriṇaṃ dṛṣṭvā bhūtapretapuraḥsarāḥ

bhītāḥ prakampitāḥ śīghraṃ naśyantyeva na saṃśayaḥ /
smaraṇādeva rudrasya yathā pāpaṃ praṇaśyati

apyakāryasahasrāṇi kṛtvā yaḥ snāti bhasmanā /
tatsarvaṃ dahate bhasma yathāgnistejasā vanam

kṛtvāpi cātulaṃ pāpaṃ mṛtyukāle'pi yo dvijaḥ /
bhasmasnāyī bhavetkaścitkṣipraṃ pāpaiḥ pramucyate

bhasmasnānāddhi śuddhātmā jitakrodho jitendriyaḥ /
matsamīpaṃ samāgamya na sa bhūyo'bhivartate

vanaspatigate some bhasmoddhūlitavigrahaḥ /
arcitaṃ śaṅ‌karaṃ dṛṣṭvā sarvapāpaiḥ pramucyate

āyuṣkāmo'thavā vidvānbhūtikāmo'thavā naraḥ /
nityaṃ vai dhārayed‍bhasma mokṣakāmī ca vai dvijaḥ

tripuṇḍraṃ paramaṃ puṇyaṃ brahmaviṣṇuśivātmakam /
ye ghorā rākṣasāḥ pretā ye cānye kṣudrajantavaḥ

tripuṇḍradhāraṇaṃ dṛṣṭvā palāyante na saṃśayaḥ /
kṛtvā śaucādikaṃ karma snātvā tu vimale jale

bhasmanoddhūlanaṃ kāryamāpādatalamastakam /
kevalaṃ vāruṇaṃ snānaṃ dehe bāhyamalāpaham

vibhūtistānamanaghaṃ bāhyāntaramalāpaham /
tyaktvāpi vāruṇaṃ snānaṃ tatparaḥ syānna saṃśayaḥ

kṛtamapyakṛtaṃ satyaṃ bhasmasnānaṃ vinā mune /
bhasmasnānaṃ śrutiproktamāgneyaṃ snānamucyate

antarbahiśca saṃśuddhaṃ śivapūjāphalaṃ labhet /
yad‌bāhyamalamātrasya nāśakaṃ stānamasti tat

tannāśayati tīvreṇa prāṇibāhyāntaraṃ malam /
kṛtvāpi koṭiśo nityaṃ vāruṇaṃ snānamādarāt

na bhavatyeva pūtātmā bhasmasnānaṃ vinā mune /
yad‍bhasmasnānamāhāmyaṃ tadvedo veda tattvataḥ

yadvā veda mahādevaḥ sarvadevaśikhāmaṇiḥ /
bhasmasnānamakṛtvaiva yaḥ kuryātkarma vaidikam

sa tatkarmakalārdhārdhamapi nāpnoti vastutaḥ /
yaḥ kariṣyati yat‍nena bhasmasnānaṃ yathāvidhi

sa evaikaḥ sarvakarmasvadhikārī śrutiśrutaḥ /
pāvanaṃ pāvanānāṃ ca bhasmasnānaṃ śrutiśrutam

na kariṣyati yo mohātsa mahāpātakī bhavet /
anantairvāruṇaiḥ snānairyatpuṇyaṃ prāpyate dvijaiḥ

tato'nantaguṇaṃ puṇyaṃ bhasmasnānādavāpyate /
kālatraye'pi kartavyaṃ bhasmasnānaṃ prayat‍nataḥ

bhasmasnānaṃ smṛtaṃ śrautaṃ tattyāgī patito bhavet /
mūtrādyutsarjanānte tu bhasmasnānaṃ prayat‍nataḥ

kartavyamanyathā pūtā na bhaviṣyanti mānavāḥ /
vidhivatkṛtaśauco'pi bhasmasnānaṃ vinā dvijaḥ

na bhaviṣyati pūtātmā nādhikāryapi karmaṇi /
apānavāyuniryāte jṛmbhaṇe skandane kṣute

śleṣmod‌gāre'pi kartavyaṃ bhasmasnānaṃ prayat‍nataḥ /
śrībhasmasnānamāhātmyasyaikadeśo'tra varṇitaḥ

punaśca sampravakṣyāmi bhasmasnānotthitaṃ phalam /
sāvadhānena manasā śrotavyaṃ munipuṅ‌gava

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ ekādaśaskandhe
vibhūtidhāraṇamāhātmyavarṇanaṃ nāma caturdaśo'dhyāyaḥ