Devi Bhagavata Purana · Chapter 10.11

devīmāhātmye madhukaiṭabhavadhavarṇanam
rājovāca
kā sā devī tvayā proktā brūhi kālavidāṃ vara /
kā mohayati sattvāni kāraṇaṃ kiṃ bhaved‌ dvija

kasmādutpadyate devī kiṃrūpā sā kimātmikā /
sarvamākhyāhi bhūdeva kṛpayā mama sarvataḥ

muniruvāca
rājan devyāḥ svarūpaṃ te varṇayāmi niśāmaya /
yathā cotpatitā devī yena vā sā jaganmayī

yadā nārāyaṇo devo viśvaṃ saṃhṛtya yogarāṭ /
āstīrya śeṣaṃ bhagavān samudre nidrito'bhavat

tadā prasvāpavaśago devadevo janārdanaḥ /
tatkarṇamalasañjātau dānavau madhukaiṭabhau

brahmāṇaṃ hantumudyuktau dānavau ghorarūpiṇau /
tadā kamalajo devo dṛṣṭvā tau madhukaiṭabhau

nidritaṃ devadeveśaṃ cintāmāpa duratyayām /
nidrito bhagavānīśo dānavau ca durāsadau

kiṃ karomi kva gacchāmi kathaṃ śarma labhe hyaham /
evaṃ cintayatastasya padyayonermahātmanaḥ

buddhiḥ prādūrabhūttāta tadā kāryaprasādhinī /
yasyā vaśaṃ gato devo nidrito bhagavān hariḥ

tāṃ devīṃ śaraṇaṃ yāmi nidrāṃ sarvaprasūtikām /
brahmovāca
devi devi jagaddhātri bhaktābhīṣṭaphalaprade

jaganmāye mahāmāye samudraśayane śive /
tvadājñāvaśagāḥ sarve svasvakāryavidhāyinaḥ

kālarātrirmahārātrirmoharātrirmadotkaṭā /
vyāpinī vaśagā mānyā mahānandaikaśevadhiḥ

mahanīyā mahārādhyā māyā madhumatī mahī /
parāparāṇāṃ sarveṣāṃ paramā tvaṃ prakīrtitā

lajjā puṣṭiḥ kṣamā kīrtiḥ kāntiḥ kāruṇyavigrahā /
kamanīyā jagadvandyā jāgradādisvarūpiṇī

paramā parameśānī parānandaparāyaṇā /
ekāpyekasvarūpā ca sadvitīyā dvayātmikā

trayī trivarganilayā turyā turyapadātmikā /
pañcamī pañcabhūteśī ṣaṣṭhī ṣaṣṭheśvarīti ca

saptamī saptavāreśī saptasaptavarapradā /
aṣṭamī vasunāthā ca navagrahamayīśvarī

navarāgakalā ramyā navasaṃkhyā naveśvarī /
daśamī daśadikpūjyā daśāśāvyāpinī ramā

ekādaśātmikā caikādaśarudraniṣevitā /
ekādaśītithiprītā ekādaśagaṇādhipā

dvādaśī dvādaśabhujā dvādaśādityajanmabhūḥ /
trayodaśātmikā devī trayodaśagaṇapriyā

trayodaśābhidhā bhinnā viśvedevādhidevatā /
caturdaśendravaradā caturdaśamanuprasūḥ

pañcādhikadaśī vedyā pañcādhikadaśī tithiḥ /
ṣoḍaśī ṣoḍaśabhujā ṣoḍaśendukalāmayī

ṣoḍaśātmakacandrāṃśuvyāptadivyakalevarā /
evaṃrūpāsi deveśi nirguṇe tāmasodaye

tvayā gṛhīto bhagavāndevadevo ramāpatiḥ /
etau durāsadau daityau vikrāntau madhukaiṭabhau

etayośca vadhārthāya deveśaṃ pratibodhaya /
muniruvāca
evaṃ stutā bhagavatī tāmasī bhagavatpriyā

devadevaṃ tadā tyaktvā mohayāmāsa dānavau /
tadaiva bhagavānviṣṇuḥ paramātmā jagatpatiḥ

prabodhamāpa deveśo dadṛśe dānavottamau /
tadā tau dānavau ghorau dṛṣṭvā taṃ madhusūdanam

yuddhāya kṛtasaṅ‌kalpau jagmatuḥ sannidhiṃ hareḥ /
yuyudhe ca tatastābhyāṃ bhagavānmadhusūdanaḥ

pañcavarṣasahasrāṇi bāhupraharaṇo vibhuḥ /
tau tadātibalonmattau jaganmāyāvimohitau

vriyatāṃ vara ityevamūcatuḥ parameśvaram /
evaṃ tayorvacaḥ śrutvā bhagavānādipūruṣaḥ

vavre vadhyābubhau me'dya bhavetāmiti niścitam /
tau tadātibalau devaṃ punarevocaturharim

āvāṃ jahi na yatrorvī payasā ca pariplutā /
tathetyuktvā bhagavatā gadāśaṅ‌khabhṛtā nṛpa

kṛtvā cakreṇa vai chinne jaghane śirasī tayoḥ /
evaṃ devī samutpannā brahmaṇā saṃstutā nṛpa

mahākālī mahārāja sarvayogeśvareśvarī /
mahālakṣmyāstathotpattiṃ niśāmaya mahīpate

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ daśamaskandhe devīmāhātmye madhukaiṭabhavadhavarṇanaṃ nāma ekādaśo'dhyāyaḥ