દેવી ભાગવત પુરાણ · અધ્યાય 10.11

દેવીમાહાત્મ્યે મધુકૈટભવધવર્ણનમ્
રાજોવાચ
કા સા દેવી ત્વયા પ્રોક્તા બ્રૂહિ કાલવિદાં વર ।
કા મોહયતિ સત્ત્વાનિ કારણં કિં ભવેદ્‌ દ્વિજ

કસ્માદુત્પદ્યતે દેવી કિંરૂપા સા કિમાત્મિકા ।
સર્વમાખ્યાહિ ભૂદેવ કૃપયા મમ સર્વતઃ

મુનિરુવાચ
રાજન્ દેવ્યાઃ સ્વરૂપં તે વર્ણયામિ નિશામય ।
યથા ચોત્પતિતા દેવી યેન વા સા જગન્મયી

યદા નારાયણો દેવો વિશ્વં સંહૃત્ય યોગરાટ્ ।
આસ્તીર્ય શેષં ભગવાન્ સમુદ્રે નિદ્રિતોઽભવત્

તદા પ્રસ્વાપવશગો દેવદેવો જનાર્દનઃ ।
તત્કર્ણમલસઞ્જાતૌ દાનવૌ મધુકૈટભૌ

બ્રહ્માણં હન્તુમુદ્યુક્તૌ દાનવૌ ઘોરરૂપિણૌ ।
તદા કમલજો દેવો દૃષ્ટ્વા તૌ મધુકૈટભૌ

નિદ્રિતં દેવદેવેશં ચિન્તામાપ દુરત્યયામ્ ।
નિદ્રિતો ભગવાનીશો દાનવૌ ચ દુરાસદૌ

કિં કરોમિ ક્વ ગચ્છામિ કથં શર્મ લભે હ્યહમ્ ।
એવં ચિન્તયતસ્તસ્ય પદ્યયોનેર્મહાત્મનઃ

બુદ્ધિઃ પ્રાદૂરભૂત્તાત તદા કાર્યપ્રસાધિની ।
યસ્યા વશં ગતો દેવો નિદ્રિતો ભગવાન્ હરિઃ

તાં દેવીં શરણં યામિ નિદ્રાં સર્વપ્રસૂતિકામ્ ।
બ્રહ્મોવાચ
દેવિ દેવિ જગદ્ધાત્રિ ભક્તાભીષ્ટફલપ્રદે

જગન્માયે મહામાયે સમુદ્રશયને શિવે ।
ત્વદાજ્ઞાવશગાઃ સર્વે સ્વસ્વકાર્યવિધાયિનઃ

કાલરાત્રિર્મહારાત્રિર્મોહરાત્રિર્મદોત્કટા ।
વ્યાપિની વશગા માન્યા મહાનન્દૈકશેવધિઃ

મહનીયા મહારાધ્યા માયા મધુમતી મહી ।
પરાપરાણાં સર્વેષાં પરમા ત્વં પ્રકીર્તિતા

લજ્જા પુષ્ટિઃ ક્ષમા કીર્તિઃ કાન્તિઃ કારુણ્યવિગ્રહા ।
કમનીયા જગદ્વન્દ્યા જાગ્રદાદિસ્વરૂપિણી

પરમા પરમેશાની પરાનન્દપરાયણા ।
એકાપ્યેકસ્વરૂપા ચ સદ્વિતીયા દ્વયાત્મિકા

ત્રયી ત્રિવર્ગનિલયા તુર્યા તુર્યપદાત્મિકા ।
પઞ્ચમી પઞ્ચભૂતેશી ષષ્ઠી ષષ્ઠેશ્વરીતિ ચ

સપ્તમી સપ્તવારેશી સપ્તસપ્તવરપ્રદા ।
અષ્ટમી વસુનાથા ચ નવગ્રહમયીશ્વરી

નવરાગકલા રમ્યા નવસંખ્યા નવેશ્વરી ।
દશમી દશદિક્પૂજ્યા દશાશાવ્યાપિની રમા

એકાદશાત્મિકા ચૈકાદશરુદ્રનિષેવિતા ।
એકાદશીતિથિપ્રીતા એકાદશગણાધિપા

દ્વાદશી દ્વાદશભુજા દ્વાદશાદિત્યજન્મભૂઃ ।
ત્રયોદશાત્મિકા દેવી ત્રયોદશગણપ્રિયા

ત્રયોદશાભિધા ભિન્ના વિશ્વેદેવાધિદેવતા ।
ચતુર્દશેન્દ્રવરદા ચતુર્દશમનુપ્રસૂઃ

પઞ્ચાધિકદશી વેદ્યા પઞ્ચાધિકદશી તિથિઃ ।
ષોડશી ષોડશભુજા ષોડશેન્દુકલામયી

ષોડશાત્મકચન્દ્રાંશુવ્યાપ્તદિવ્યકલેવરા ।
એવંરૂપાસિ દેવેશિ નિર્ગુણે તામસોદયે

ત્વયા ગૃહીતો ભગવાન્દેવદેવો રમાપતિઃ ।
એતૌ દુરાસદૌ દૈત્યૌ વિક્રાન્તૌ મધુકૈટભૌ

એતયોશ્ચ વધાર્થાય દેવેશં પ્રતિબોધય ।
મુનિરુવાચ
એવં સ્તુતા ભગવતી તામસી ભગવત્પ્રિયા

દેવદેવં તદા ત્યક્ત્વા મોહયામાસ દાનવૌ ।
તદૈવ ભગવાન્વિષ્ણુઃ પરમાત્મા જગત્પતિઃ

પ્રબોધમાપ દેવેશો દદૃશે દાનવોત્તમૌ ।
તદા તૌ દાનવૌ ઘોરૌ દૃષ્ટ્વા તં મધુસૂદનમ્

યુદ્ધાય કૃતસઙ્‌કલ્પૌ જગ્મતુઃ સન્નિધિં હરેઃ ।
યુયુધે ચ તતસ્તાભ્યાં ભગવાન્મધુસૂદનઃ

પઞ્ચવર્ષસહસ્રાણિ બાહુપ્રહરણો વિભુઃ ।
તૌ તદાતિબલોન્મત્તૌ જગન્માયાવિમોહિતૌ

વ્રિયતાં વર ઇત્યેવમૂચતુઃ પરમેશ્વરમ્ ।
એવં તયોર્વચઃ શ્રુત્વા ભગવાનાદિપૂરુષઃ

વવ્રે વધ્યાબુભૌ મેઽદ્ય ભવેતામિતિ નિશ્ચિતમ્ ।
તૌ તદાતિબલૌ દેવં પુનરેવોચતુર્હરિમ્

આવાં જહિ ન યત્રોર્વી પયસા ચ પરિપ્લુતા ।
તથેત્યુક્ત્વા ભગવતા ગદાશઙ્‌ખભૃતા નૃપ

કૃત્વા ચક્રેણ વૈ છિન્ને જઘને શિરસી તયોઃ ।
એવં દેવી સમુત્પન્ના બ્રહ્મણા સંસ્તુતા નૃપ

મહાકાલી મહારાજ સર્વયોગેશ્વરેશ્વરી ।
મહાલક્ષ્મ્યાસ્તથોત્પત્તિં નિશામય મહીપતે

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દશમસ્કન્ધે દેવીમાહાત્મ્યે મધુકૈટભવધવર્ણનં નામ એકાદશોઽધ્યાયઃ