Devi Bhagavata Purana · Chapter 1.4

devīsarvottametikathanam
ṛṣaya ūcuḥ
saumya vyāsasya bhāryāyāṃ kasyāṃ jātaḥ sutaḥ śukaḥ /
kathaṃ vā kīdṛśo yena paṭhiteyaṃ susaṃhitā

ayonijastvayā proktastathā cāraṇijaḥ śukaḥ /
sandeho'sti mahāṃstatra kathayādya mahāmate

garbhayogī śrutaḥ pūrvaṃ śuko nāma mahātapāḥ /
kathaṃ ca paṭhitaṃ tena purāṇaṃ bahuvistaram

sūta uvāca
purā sarasvatītīre vyāsaḥ satyavatīsutaḥ /
āśrame kalaviṃkau tu dṛṣṭvā vismayamāgataḥ

jātamātraṃ śiśuṃ nīḍe muktamaṇḍānmanoharam /
tāmrāsyaṃ śubhasarvāṅgaṃ picchāṃkuravivarjitam

tau tu bhakṣyārthamatyantaṃ ratau śramaparāyaṇau /
śiśoścaṃcupuṭe bhakṣyaṃ kṣipantau ca punaḥ punaḥ

aṅgenāṅgāni bālasya gharṣayantau mudānvitau /
cumbantau ca mukhaṃ premṇā kalaviṃkau śiśoḥ śubham

vīkṣya premād‌bhutaṃ tatra bāle caṭakayostadā /
vyāsaścintāturaḥ kāmaṃ manasā samacintayat

tiraścāmapi yatprema putre samabhilakṣyate /
kiṃ citraṃ yanmanuṣyāṇāṃ sevāphalamabhīpsatām

kimetau caṭakau cāsya vivāhaṃ sukhasādhanam /
viracya sukhinau syātāṃ dṛṣṭvā vadhvā mukhaṃ śubham

athavā vārdhake prāpte paricaryāṃ kariṣyati /
putraḥ paramadharmiṣṭhaḥ puṇyārthaṃ kalaviṃkayoḥ

arjayitvāthavā dravyaṃ pitarau tarpayiṣyati /
athavā pretakāryāṇi kariṣyati yathāvidhi

athavā kiṃ gayāśrāddhaṃ gatvā saṃvitariṣyati /
nīlotsargaṃ ca vidhivatprakariṣyati bālakaḥ

saṃsāre'tra samākhyātaṃ sukhānāmuttamaṃ sukham /
putragātrapariṣvaṃgo lālanañca viśeṣataḥ

aputrasya gatirnāsti svargo naiva ca naiva ca /
putrādanyatarannāsti paralokasya sādhanam

manvādibhiśca munibhirdharmaśāstreṣu bhāṣitam /
putravānsvargamāpnoti nāputrastu kathañcana

dṛśyate'tra samakṣaṃ tannānumānena sādhyate /
putravānmucyate pāpādāptavākyaṃ ca śāśvatam

āture mṛtyukāle'pi bhūmiśayyāgato naraḥ /
karoti manasā cintāṃ duḥkhitaḥ putravarjitaḥ

dhanaṃ me vipulaṃ gehe pātrāṇi vividhāni ca /
mandiraṃ sundaraṃ caitatko'sya svāmī bhaviṣyati

mṛtyukāle manastasya duḥkhena bhramate yataḥ /
ato'sya durgatirnūnaṃ bhrāntacittasya sarvathā

evaṃ bahuvidhāṃ cintāṃ kṛtvā satyavatīsutaḥ /
niḥśvasya bahudhā coṣṇaṃ vimanāḥ sambabhūva ha

vicārya manasātyarthaṃ kṛtvā manasi niścayam /
jagāma ca tapastaptuṃ meruparvatasanidhau

manasā cintayāmāsa kaṃ devaṃ samupāsmahe /
varapradānanipuṇaṃ vāñchitārthapradaṃ tathā

viṣṇuṃ rudraṃ surendraṃ vā brahmāṇaṃ vā divākaram /
gaṇeśaṃ kārtikeyaṃ ca pāvakaṃ varuṇaṃ tathā

evaṃ cintayatastasya nārado munisattamaḥ /
yadṛcchayā samāyāto vīṇāpāṇiḥ samāhitaḥ

taṃ dṛṣṭvā paramaprīto vyāsaḥ satyavatīsutaḥ /
kṛtvārghyamāsanaṃ dattvā papraccha kuśalaṃ munim

śrutvātha kuśalapraśnaṃ papraccha munisattamaḥ /
cintāturo'si kasmāttvaṃ dvaipāyana vadasva me

vyāsa uvāca
aputrasya gatirnāsti na sukhaṃ mānase yataḥ /
tadarthaṃ duḥkhitaścāhaṃ cintayāmi puna punaḥ

tapasā toṣayāmyadya kaṃ devaṃ vācchitārthadam /
iti cintāturo'smyadya tvāmahaṃ śaraṇaṃ gataḥ

sarvajño'si maharṣe tvaṃ kathayāśu kṛpānidhe /
kaṃ devaṃ śaraṇaṃ yāmi yo me putraṃ pradāsyati

sūta uvāca
iti vyāsena pṛṣṭastu nārado vedavinmuniḥ /
uvāca parayā prītyā kṛṣṇaṃ prati mahāmanāḥ

nārada uvāca
pārāśarya mahābhāga yattvaṃ pṛcchasi māmiha /
tamevārthaṃ purā pṛṣṭaḥ pitrā me madhusūdanaḥ

dhyānasthaṃ ca hariṃ dṛṣṭvā pitā me vismayaṃ gataḥ /
paryapṛcchata deveśaṃ śrīnāthaṃ jagataḥ patim

kaustubhodbhāsitaṃ divyaṃ śaṅkhacakragadādharam /
pītāmbaraṃ caturbāhuṃ śrīvatsāṅ‌kitavakṣasam

kāraṇaṃ sarvalokānāṃ devadevaṃ jagadgurum /
vāsudevaṃ jagannāthaṃ tapyamānaṃ mahattapaḥ

brahmovāca
devadeva jagannātha bhūtabhavyabhavatprabho /
tapaścarasi kasmāttvaṃ kiṃ dhyāyasi janārdana

vismayo'yaṃ mamātyarthaṃ tvaṃ sarvajagatāṃ prabhuḥ /
dhyānayukto'si deveśa kiṃ ca citramataḥ param

tvannābhikamalājjātaḥ kartāhamakhilasya ha /
tvattaḥ ko'pyadhiko'styatra taṃ devaṃ brūhi māpate

jānāmyahaṃ jagannātha tvamādiḥ sarvakāraṇam /
kartā pālayitā hartā samarthaḥ sarvakāryakṛt

icchayā te mahārāja sṛjāmyahamidaṃ jagat /
haraḥ saṃharate kāle so'pi te vacane sadā

sūryo bhramati cākāśe vāyurvāti śubhāśubhaḥ /
agnistapati parjanyo varṣatīśa tvadājñayā

tvaṃ tu dhyāyasi kaṃ devaṃ saṃśayo'yaṃ mahānmama /
tvattaḥ paraṃ na paśyāmi devaṃ vai bhuvanatraye

kṛpāṃ kṛtvā vadasvādya bhakto'smi tava suvrata /
mahatāṃ naiva gopyaṃ hi prāyaḥ kiñciditi smṛtiḥ

tacchrutvā vacanaṃ tasya harirāha prajāpatim /
śṛṇuṣvaikamanā brahmaṃstvāṃ bravīmi manogatam

yadyapi tvāṃ śivaṃ māṃ ca sthitisṛṣṭyantakāraṇam /
te jānanti janāḥ sarve sadevāsuramānuṣāḥ

sraṣṭā tvaṃ pālakaścāhaṃ haraḥ saṃhārakārakaḥ /
kṛtāḥ śaktyeti saṃtarkaḥ kriyate vedapāragaiḥ

jagatsaṃjanane śaktistvayi tiṣṭhati rājasī /
sāttvikī mayi rudre ca tāmasī parikīrtitā

tayā virahitastvaṃ na tatkarmakaraṇe prabhuḥ /
nāhaṃ pālayituṃ śaktaḥ saṃhartuṃ nāpi śaṅkaraḥ

tadadhīnā vayaṃ sarve vartāmaḥ satataṃ vibho /
pratyakṣe ca parokṣe ca dṛṣṭāntaṃ śṛṇu suvrata

śeṣe svapimi paryaṅke paratantro na saṃśayaḥ /
tadadhīnaḥ sadottiṣṭhe kāle kālavaśaṃ gataḥ

tapaścarāmi satataṃ tadadhīno'smyahaṃ sadā /
kadācitsaha lakṣyā ca viharāmi yathāsukham

kadāciddānavaiḥ sārdhaṃ saṃgrāmaṃ prakaromyaham /
dāruṇaṃ dehadamanaṃ sarvalokabhayaṅkaram

pratyakṣaṃ tava dharmajña tasminnekārṇave purā /
pañcavarṣasahasrāṇi bāhuyuddhaṃ mayā kṛtam

tau karṇamalajau duṣṭau dānavau madagarvitau /
deva devyāḥ prasādena nihatau madhukaiṭabhau

tadā tvayā na kiṃ jñātaṃ kāraṇaṃ tu parātparam /
śaktirūpaṃ mahābhāga kiṃ pṛcchasi punaḥ punaḥ

yadicchaḥ puruṣo bhūtvā vicarāmi mahārṇave /
kacchapaḥ kolasiṃhaśca vāmanaśca yuge yuge

na kasyāpi priyo loke tiryagyoniṣu sambhavaḥ /
nābhavaṃ svecchayā vāmavarāhādiṣu yoniṣu

vihāya lakṣyā saha saṃvihāraṃ
ko yāti matsyādiṣu hīnayoniṣu /
śayyāṃ ca muktvā garuḍāsanasthaḥ
karomi yuddhaṃ vipulaṃ svatantraḥ

purā puraste'ja śiro madīyaṃ
gataṃ dhanurjyāskhalanātkva cāpi /
tvayā tadā vājiśiro gṛhītvā
saṃyojitaṃ śilpivareṇa bhūyaḥ

hayānano'haṃ parikīrtitaśca
pratyakṣametattava lokakartaḥ /
viḍambaneyaṃ kila lokamadhye
kathaṃ bhavedātmaparo yadi syām

tasmānnāhaṃ svatantro'smi śaktyadhīno'smi sarvathā /
tāmeva śaktiṃ satataṃ dhyāyāmi ca nirantaram

nātaḥ parataraṃ kiñcijjānāmi kamalodbhava /
nārada uvāca
ityuktaṃ viṣṇunā tena padmayonestu sannidhau

tena cāpyahamukto'smi tathaiva munipuṅgava /
tasmāttvamapi kalyāṇa puruṣārthāptihetave

asaṃśayaṃ hṛdambhoje bhaja devīpadāmbujam /
sarvaṃ dāsyati sā devī yadyadiṣṭaṃ bhavettava

sūta uvāca
nāradenaivamuktastu vyāsaḥ satyavatīsutaḥ /
devīpādābjaniṣṇātastapase prayayau girau

iti śrīmaddevībhāgavate mahāpurāṇe'ṣṭādaśasāhasryāṃ sahitāyāṃ
prathamaskandhe devīsarvottametikathanaṃ nāma caturtho'dhyāyaḥ