Devi Bhagavata Purana · Chapter 1

śrīdurgādevyai namaḥ
śrīmaddevībhāgavatamāhātmyam
sṛṣṭī yā sargarūpā jagadavanavidhau pālinī yā ca raudrī
saṃhāre cāpi yasyā jagadidamakhilaṃ krīḍanaṃ yā'parākhyā /
paśyantī madhyamā'tho tadanu bhagavatī vaikharīvarṇarūpā
sā'smadvācaṃ prasannā vidhiharigiriśārādhitā'laṅkarotu

nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet

ṛṣaya ūcuḥ/
sūta jīva samā bahvīryastvaṃ śrāvayasīha naḥ /
kathā manoharāḥ puṇyā vyāsaśiṣya mahāmate

sarvapāpaharaṃ puṇyaṃ viṣṇoścaritamadbhutam /
avatāra kathopetamasmābhirbhaktitaḥ śrutam

śivasya caritaṃ divyaṃ bhasmarudrākṣayostathā /
setihāsaṃ ca māhātmyaṃ śrutaṃ tava mukhāmbujāt

adhunā śrotumicchāmaḥ pāvanātpāvanaṃ param /
bhuktimuktipradaṃ nṝṇāmanāyāsena sarvaśaḥ

tattvaṃ brūhi mahābhāga yena siddhyanti mānavāḥ /
kalāvapi varaṃ tvatto na vidyaḥ saṃśayacchidam // ७ /
sūta uvāca/
sādhu pṛṣṭaṃ mahābhāgā lokānāṃ hitakāmyayā /
sarvaśāstrasya yatsāraṃ to vakṣyāmyaśeṣataḥ

tāvadgarjanti tīrthāni purāṇāni vratāni ca /
yāvanna śrūyate samyagdevībhāgavataṃ naraiḥ

tāvatpāpāṭavī nṝṇāṃ kleśadā'dabhrakaṇṭakā /
yāvanna paraśuḥ prāpto devībhāgavatābhidhaḥ

tāvatkleśāvahaṃ nṝṇāmupasargamahātamaḥ /
yāvannaivodayaṃ prāpto devībhāgavatoṣṇaguḥ

ṛṣaya ūcuḥ/
sūta sūta mahābhāga vada no vadatāṃvara /
kīdṛśaṃ tatpurāyaṇaṃ hi vidhistacchravaṇe ca kaḥ

katibhirvāsarairetacchrotavyaṃ kiṃ ca pūjanam /
kairmānavaiḥ śrutaṃ pūrvaṃ kānkānkāmānavāpnuyuḥ

sūta uvāca/
viṣṇoraṃśo munirjātaḥ satyavatyāṃ parāśarāt /
vibhajya vedāṃścaturaḥ śiṣyānadhyāpayatpurā

vrātyānāṃ dvijabandhūnāṃ vedeṣvanadhikāriṇām /
strīṇāṃ durmedhasāṃ nṝṇāṃ dharmajñānaṃ kathaṃ bhavet

vicāryaitattu manasā bhagavānbādarāyaṇaḥ /
purāṇaṃ saṃhitāṃ dadhyau teṣāṃ dharmavidhitsayā

aṣṭādaśa purāṇāni sa kṛtvā bhagavānmuniḥ /
māmevādhyāpayāmāsa bhāratākhyānameva ca

devībhāgavataṃ tatra purāṇaṃ bhogamokṣadam /
svayaṃ tu śrāvayāmāsa janamejayabhūpatim

pūrvaṃ yasya pitā rājā parīkṣittakṣakāhinā /
saṃdaṣṭastasya saṃśuddhyai rājñā bhāgavataṃ śrutam

navabhirdivasai: śrīmadvedavyāsamukhāmbujāt /
trailokyamātaraṃ devīṃ pūjayitvā vidhānataḥ // २० /
navāha yajñe sampūrṇe parīkṣidapi bhūpatiḥ /
divyarūpadharo devyāḥ sālokyaṃ tatkṣaṇādagāt

piturdivyāṃ gati rājā vilokya janamejayaḥ /
vyāsaṃ muniṃ samabhyarcya parāṃ mudamavāpa ha

aṣṭādaśapurāṇānāṃ madhye sarvottamaṃ param /
devībhāgavataṃ nāma dharmakāmārthamokṣadam

ye śṛṇvanti sadā bhaktyā devyā bhāgavatīṃ kathām /
teṣāṃ siddhirna dūrasthā tasmātsevyā sadā nṛbhiḥ

dinamarddhaṃ tadardhaṃ vā muhūrtaṃ kṣaṇameva vā /
ye śṛṇvanti narā bhaktyā na teṣāṃ durgatiḥ kvacit //
sarvayajñeṣu tīrtheṣu sarvadāneṣu yatphalam /
sakṛtpurāṇaśravaṇāttatphalaṃ labhate naraḥ

kṛtā do bahavo dharmāḥ kalau dharmastu kevalam /
purāṇaśravaṇādanyo vidyate nāparo nṛṇām

/
dharmācāravihīnānāṃ kalāvalpāyuṣāṃ nṛṇām /
vyāso hitāya vidadhe purāṇākhyaṃ sudhārasam

sudhāṃ pibanneka eva naraḥ syādajarāmaraḥ /
devyāḥ kathāmṛtaṃ kuryātkulamevājarāmaram

māsānāṃ niyamo nātra dinānāṃ niyamo'pi na /
sadā sevyaṃ sadā sevyaṃ devībhāgavataṃ naraiḥ

āśvine madhumāse vā tapomāse śucau tathā /
caturṣu navarātreṣu viśeṣātphaladāyakam

ato navāhayajño'yaṃ sarvasmātpuṇyakarmaṇaḥ /
phalādhikapradānena proktaḥ puṇyaprado nṛṇām

ye durhṛdaḥ pāparatā vimūḍhā mitradruho vedaviniṃdakāśca /
hiṃsāratā nāstikamārgasaktā navāhayajñena punaṃti te kalau

parasvadārāhaṇeti'lubdhā ye vai narāḥ kalmaṣabhārabhājaḥ /
godevatā brāhmaṇabhaktihīnā navāhajñena bhavanti śuddhāḥ

tapobhirugrairvratatīrthasevanairdānairanekairniyamairmakhaiśca /
hutairjapairyacca phalena labhyate navāhayajñena tadāpyate nṛṇām

tathā na gaṅgā na gayā na kāśī na naimiṣaṃ no mathurā na puṣkaram /
punāti sadyo badarīvanaṃ no yathā hi devīmakha eṣa viprāḥ

ato bhāgavataṃ devyāḥ purāṇaṃ parataḥ param /
dharmārthakāmamokṣāṇāmuttamaṃ sādhanaṃ matam

āśvinasya site pakṣe kanyārāśigate ravau /
mahāṣṭamyāṃ samabhyarcya haikasiṃhāsanasthitam

devīprītipadaṃ bhaktyā śrībhāgavatapustakam /
dadyādviprāya yogyāya sa devyāḥ padavīṃ labhet

devī bhāgavatasyāpi ślokaṃ ślokārddhameva vā /
bhaktyā yaśca paṭhennityaṃ sa devyāḥ prītibhāgbhavet //
upasargabhavaṃ ghoraṃ mahāmārīsamudbhavam /
utpātānakhilāṃścāpi haṃti śravaṇamātrataḥ

bālagrahakṛtaṃ yacca bhūtapretakṛtaṃ bhayam /
devībhāgavatasyāsya śravaṇādyāti dūrataḥ

yastu bhāgavataṃ devyāḥ paṭhedbhaktyā śṛṇoti vā /
dharmamarthaṃ ca kāmaṃ ca mokṣaṃ ca labhate naraḥ

śravaṇādvasudevo'sya prasenānveṣaṇe gatam /
cirāyitaṃ priyaṃ putraṃ kṛṣṇaṃ labdhvā mumoda ha

ya etāṃ śṛṇuyādbhaktyā śrīmadbhāgavatīṃ kathām /
bhuktiṃ muktiṃ sa labhate bhaktyā yaśca paṭhedimām //
aputro labhate putraṃ daridro dhanavānbhavet /
rogī rogātpramucyeta śrutvā bhāgavatāmṛtam

vaṃdhyā vā kākavaṃdhyā vā mṛtavatsā ca yāṅganā /
devībhāgavataṃ śrutvā labhetputraṃ cirāyuṣam

pūjitaṃ yadgṛhe nityaṃ śrībhāgavatapustakam /
tadgṛhaṃ tīrthaṃbhūtaṃ hi vasatāṃ pāpanāśakam

aṣṭamyāṃ vā caturdaśyāṃ navamyāṃ bhaktisaṃyutaḥ /
yaḥ paṭhecchṛṇuyādvāpi sa siddhiṃ labhate parām

paṭhandvijo vedavidagraṇīrbhavedvāhuprajāto dharaṇīpatiḥ syāt /
vaiśyaḥ paṭhanvittasamṛddhimeti śūdro'pi śṛṇvansvakṛtottamaḥ syāt

iti śrīskanda purāṇe mānasakhaṇḍe devībhāgavatamāhātmye prathamo'dhyāyaḥ