Chandogya Upanishad (with commentary) · Chapter 4.8

ChUpBh_4,7.3,4 agniḥkalā sūryaḥ kalā candraḥ kalā vidyutkalaiṣa vai somyeti jyotirviṣayameva ca darśanaṃ provācāto haṃsasyā'dityatvaṃ pratīyate /
vidvatphalaṃ-jyotiṣmāndīptiyukto 'smiṃlloke bhavati /
candrādityādīnāṃ jyotiṣmata eva ca mṛtvā lokāñjayati /
samānamuttaram //3-4 //
iti cchāndogyopaniṣadi caturthādhyāyasya saptamaḥ khaṇḍaḥ
=======================================================================
START ChUp 4,8.1
madguṣṭe pādaṃ vakteti |
sa ha śvo bhūte gā abhiprasthāpayāṃ cakāra |
tā yatrābhisāyaṃ babhūvus tatrāgnim upasamādhāya gā uparudhya samidham ādhāya paścād agneḥ prāṅ upopaviveśa

ChUpBh_4,8.1 haṃso 'pi madguṣṭe pādaṃ vaktetyupararāma /
madgurudakacaraḥ pakṣī sa cāpsambandhātprāṇaḥ sa ha śvobhūta ityādi pūrvavat //1 //
START ChUp 4,8.2-3
taṃ madgur upanipatyābhyuvāda satyakāma 3 iti |
bhagava iti ha pratiśuśrāva

brahmaṇaḥ somya te pādaṃ bravāṇīti |
bravītu me bhagavān iti |
tasmai hovāca |
prāṇaḥ kalā |
cakṣuḥ kalā |
śrotraṃ kalā |
manaḥ kalā |
eṣa vai somya catuṣkalaḥ pādo brahmaṇa āyatanavān nāma

ChUpBh_4,8.2,3 sa ca madguḥ prāṇaḥ svaviṣayameva ca darśanamuvāca prāṇaḥ kaletyādi, āyatanavānityevaṃ nāma /
āyatanaṃ nāma manaḥ sarvakaraṇopahṛtānāṃ bhogānāṃ tadyasminpāde vidyata ityāyatanavānnāma pādaḥ //2-3 //
START ChUp 4,8.4
sa ya etam evaṃ vidvāṃś catuṣkalaṃ pādaṃ brahmaṇa āyatanavān ity upāsta āyatanavān asmiṃl loke bhavati |
āyatanavato ha lokāñ jayati ya etam evaṃ vidvāṃś catuṣkalaṃ pādaṃ brahmaṇa āyatanavān ity upāste