Brihat Parashara Hora Shastra · Chapter 97

athopasaṃhārādhyāyaḥ

yacchāstraṃ brahmaṇā proktaṃ nāradāya mahātmane /
tadeva śaunakādibhyo nāradaḥ prāha sādaram

tato mayā yathā jñātaṃ tubhyamuktaṃ tathā dvija /
nāsūyakāya dātavyaṃ paranindāratāya vā

jaḍāya durvinītāya nājñātāya kadācana /
deyametatsurilāya bhaktāya satyavādine

medhāvine vinītāya samyag jñātakulāya ca /
puṇyadaṃ jyautiṣaṃ śāstramagryaṃ vedāṅgamuttamam

jānāti kālamānaṃ yo graharkṣāṇāṃ ca saṃsthitim /
horāśāstramidaṃ samyak sa vijānāti nā'paraḥ

horāśāstrārthatattvajñaḥ satyavāg vijitendriyaḥ /
śubhā'śubhaṃ phalaṃ vakti satyaṃ tadvacanaṃ bhavet

ye suśāstraṃ paṭhantīdaṃ ye vā śṛṇvanti bhaktitaḥ /
teṣāṃmāyurbalaṃ vittaṃ vṛddhimeti yaśaḥ sadā

itthaṃ parāśareṇoktaṃ horāśāstraṃ camatkṛtam /
navaṃ navajanaprītyai vividhādhyāyasaṃyutam

śreṣṭhaṃ jagaddhitāyedaṃ maitreyāya dvijanmane /
tataḥ pracaritaṃ pṛthvyāmādṛtaṃ sādaraṃ janaiḥ

granthe'smin pṛthagadhyāyairviṣayā viniveśitāḥ /
sṛṣṭikramo'vatārāśca guṇāḥ kheṭasya bhasya ca

viśeṣalagnaṃ vargāśca tadvivekaśca rāśidṛk /
ariṣṭaṃ tadvibhaṅgaśca viveko bhāvajastathā

bhāvānāṃ ca phalādhyāyo bhāveśotthaphalaṃ tathā /
aprakāśaphalaṃ spaṣṭakheṭadṛṣṭiprasādhanam

tataḥ spaṣṭabalādhyāyaḥ iṣṭakaṣṭaprasādhanam /
padaṃ copapadaṃ tadvadargalā tvatha kārakāḥ

kārakāṃśaphalaṃ yogakārakādhyāya eva ca /
nābhasā vividhā yogāścandrayogo'rkayogakaḥ

rājayogastataḥ prokto rājasambandhayogakaḥ /
viśeṣadhanayogāśca yogā dāridryakārakāḥ

āyurmārakabhedāśca grahāvasthāḥ phalānvitāḥ /
nānāvidhadaśādhyāyāstatphalādhyāyaḥ saṃyutāḥ

antaḥpratyantaraprāṇasūkṣmasaṃjñāśca tadbhidāḥ /
sūryādyaṣṭakavargaśca trikoṇapariśodhanam

ekādhipatyasaṃśuddhistataḥ piṇḍaprasādhanam /
tataścā'ṣṭakavargāṇāṃ prasphuṭāni phalāni ca

tato'pyaṣṭakavargāyuḥsādhanaṃ ca tataḥ param /
samudāyāṣṭavargotthaphalādhyāyaḥ parisphuṭaḥ

graharaśmiphalādhyāyaḥ sudarśanaphalaṃ tathā /
mahāpuruṣacihnāni mahābhūtaphalāni ca

guṇatrayaphalādhyāyastato'pyajñātajanmanām /
janmalagnādivijñānaṃ pravrajyālakṣaṇāni ca

strīṇāṃ ca phalavaiṣṭyamaṅgalakṣmaphalāni ca /
pūrvapāpotthaśāpotthayogā vaiputryakārakāḥ

satputraprāptyupāyāśca sahaiva pratipāditāḥ /
janmanyaniṣṭalagnarkṣatithyādipratipādanam

tattacchāntividhiścaiva saṃkṣepeṇa pradarśitaḥ /
prasavasya vikārāśca kathitāḥ śāntisaṃyutāḥ

evaṃ jātakavarye'tra niviṣṭā viṣayāḥ śatam /
vijñāya vibudhāstvetān prāpnuvantu yaśaḥ śriyam