બૃહત્પારાશરહોરાશાસ્ત્રમ્ · અધ્યાય 97

અથોપસંહારાધ્યાયઃ

યચ્છાસ્ત્રં બ્રહ્મણા પ્રોક્તં નારદાય મહાત્મને ।
તદેવ શૌનકાદિભ્યો નારદઃ પ્રાહ સાદરમ્

તતો મયા યથા જ્ઞાતં તુભ્યમુક્તં તથા દ્વિજ ।
નાસૂયકાય દાતવ્યં પરનિન્દારતાય વા

જડાય દુર્વિનીતાય નાજ્ઞાતાય કદાચન ।
દેયમેતત્સુરિલાય ભક્તાય સત્યવાદિને

મેધાવિને વિનીતાય સમ્યગ્ જ્ઞાતકુલાય ચ ।
પુણ્યદં જ્યૌતિષં શાસ્ત્રમગ્ર્યં વેદાઙ્ગમુત્તમમ્

જાનાતિ કાલમાનં યો ગ્રહર્ક્ષાણાં ચ સંસ્થિતિમ્ ।
હોરાશાસ્ત્રમિદં સમ્યક્ સ વિજાનાતિ નાઽપરઃ

હોરાશાસ્ત્રાર્થતત્ત્વજ્ઞઃ સત્યવાગ્ વિજિતેન્દ્રિયઃ ।
શુભાઽશુભં ફલં વક્તિ સત્યં તદ્વચનં ભવેત્

યે સુશાસ્ત્રં પઠન્તીદં યે વા શૃણ્વન્તિ ભક્તિતઃ ।
તેષાંમાયુર્બલં વિત્તં વૃદ્ધિમેતિ યશઃ સદા

ઇત્થં પરાશરેણોક્તં હોરાશાસ્ત્રં ચમત્કૃતમ્ ।
નવં નવજનપ્રીત્યૈ વિવિધાધ્યાયસંયુતમ્

શ્રેષ્ઠં જગદ્ધિતાયેદં મૈત્રેયાય દ્વિજન્મને ।
તતઃ પ્રચરિતં પૃથ્વ્યામાદૃતં સાદરં જનૈઃ

ગ્રન્થેઽસ્મિન્ પૃથગધ્યાયૈર્વિષયા વિનિવેશિતાઃ ।
સૃષ્ટિક્રમોઽવતારાશ્ચ ગુણાઃ ખેટસ્ય ભસ્ય ચ

વિશેષલગ્નં વર્ગાશ્ચ તદ્વિવેકશ્ચ રાશિદૃક્ ।
અરિષ્ટં તદ્વિભઙ્ગશ્ચ વિવેકો ભાવજસ્તથા

ભાવાનાં ચ ફલાધ્યાયો ભાવેશોત્થફલં તથા ।
અપ્રકાશફલં સ્પષ્ટખેટદૃષ્ટિપ્રસાધનમ્

તતઃ સ્પષ્ટબલાધ્યાયઃ ઇષ્ટકષ્ટપ્રસાધનમ્ ।
પદં ચોપપદં તદ્વદર્ગલા ત્વથ કારકાઃ

કારકાંશફલં યોગકારકાધ્યાય એવ ચ ।
નાભસા વિવિધા યોગાશ્ચન્દ્રયોગોઽર્કયોગકઃ

રાજયોગસ્તતઃ પ્રોક્તો રાજસમ્બન્ધયોગકઃ ।
વિશેષધનયોગાશ્ચ યોગા દારિદ્ર્યકારકાઃ

આયુર્મારકભેદાશ્ચ ગ્રહાવસ્થાઃ ફલાન્વિતાઃ ।
નાનાવિધદશાધ્યાયાસ્તત્ફલાધ્યાયઃ સંયુતાઃ

અન્તઃપ્રત્યન્તરપ્રાણસૂક્ષ્મસંજ્ઞાશ્ચ તદ્ભિદાઃ ।
સૂર્યાદ્યષ્ટકવર્ગશ્ચ ત્રિકોણપરિશોધનમ્

એકાધિપત્યસંશુદ્ધિસ્તતઃ પિણ્ડપ્રસાધનમ્ ।
તતશ્ચાઽષ્ટકવર્ગાણાં પ્રસ્ફુટાનિ ફલાનિ ચ

તતોઽપ્યષ્ટકવર્ગાયુઃસાધનં ચ તતઃ પરમ્ ।
સમુદાયાષ્ટવર્ગોત્થફલાધ્યાયઃ પરિસ્ફુટઃ

ગ્રહરશ્મિફલાધ્યાયઃ સુદર્શનફલં તથા ।
મહાપુરુષચિહ્નાનિ મહાભૂતફલાનિ ચ

ગુણત્રયફલાધ્યાયસ્તતોઽપ્યજ્ઞાતજન્મનામ્ ।
જન્મલગ્નાદિવિજ્ઞાનં પ્રવ્રજ્યાલક્ષણાનિ ચ

સ્ત્રીણાં ચ ફલવૈષ્ટ્યમઙ્ગલક્ષ્મફલાનિ ચ ।
પૂર્વપાપોત્થશાપોત્થયોગા વૈપુત્ર્યકારકાઃ

સત્પુત્રપ્રાપ્ત્યુપાયાશ્ચ સહૈવ પ્રતિપાદિતાઃ ।
જન્મન્યનિષ્ટલગ્નર્ક્ષતિથ્યાદિપ્રતિપાદનમ્

તત્તચ્છાન્તિવિધિશ્ચૈવ સંક્ષેપેણ પ્રદર્શિતઃ ।
પ્રસવસ્ય વિકારાશ્ચ કથિતાઃ શાન્તિસંયુતાઃ

એવં જાતકવર્યેઽત્ર નિવિષ્ટા વિષયાઃ શતમ્ ।
વિજ્ઞાય વિબુધાસ્ત્વેતાન્ પ્રાપ્નુવન્તુ યશઃ શ્રિયમ્