બૃહત્પારાશરહોરાશાસ્ત્રમ્ · અધ્યાય 84

અથ ગ્રહશાન્ત્યધ્યાયઃ

ગ્રહાણાં દોષશાન્ત્યર્થં તેષાં પૂજાવિધિં વદ ।
માનવાનાં હિતાર્થાય સંક્ષેપાત્ કૃપયા મુને

ગ્રહા સૂર્યાદયઃ પૂર્વં મયા પ્રોક્તા દ્વિજોત્તમ ।
જગત્યાં સર્વજન્તૂનાં તદધીનં સુખાઽસુખમ્

તસ્માત્ સુશાન્તિકામો વા શ્રીકામો વા સુચેતસા ।
વૃષ્ટાયાયુઃ પુષ્ટિકામો વા તેષાં યજ્ઞં સમાચરેત્

તાભ્રાચ્ચ સ્ફટિકાદ્રક્તચન્દનાત્ સ્વર્ણકાદુભૌ ।
રજતાદયસઃ સીસાત્ કાંસ્યાત્ કાર્યાઃ ક્રામદ્ ગ્રહાઃ

પૂર્વોક્તૈઃ સ્વસ્વવર્ણૈર્વા પટે લેખ્યા દ્વિજોત્તમૈઃ ।
સ્વસ્વોક્તદિગ્વિભાગેષુ ગન્દ્યાદ્યૈર્મણ્ડનેષુ વા

પદ્માસનઃ પદ્મહસ્તઃ પદ્મપત્રસમદ્યુતિઃ ।
સપ્તાશ્વરથસંસ્થશ્ચ દ્વિભુજશ્ચ દિવાકરઃ

શ્વેતઃ શ્વેતામ્બરો દેવો દશાશ્વઃ શ્વેતભૂષણઃ ।
ગદાહસ્તો દ્વિબાહુશ્ચ વિધાતવ્યો વિધુર્દ્વિજ

રક્તમાલ્યામ્બરધરો શક્તિશૂલગદાધરઃ ।
વરદસ્તુ ચતુર્બાહુર્મઙ્ગલો મેષવાહનઃ

પીતમાલ્યામ્બરધરઃ કર્ણિકારસમદ્યુતિઃ ।
ખડ્ગચર્મગદાપાણિઃ સિંહસ્થો વરદો બુધઃ

ગુરુશુક્રૌ ક્રમાત્ પીતશ્વેતવર્ણૌ ચતુર્ભુજૌ ।
દણ્ડિનૌ વરદૌ કાર્યૌ સાક્ષસૂત્રકમણ્ડલૂ

ઇન્દ્રનીલદ્યુતિઃ શૂલી વરદો ગૃધ્રવાહનઃ ।
વાણવાણાસનધરો વિજ્ઞેયોઽર્કસુતો દ્વિજ

કરાલવદનઃ ખડ્ગચર્મશૂલી વરપ્રદઃ ।
સિંહસ્થો નીલવર્ણશ્ચ રાહુરેવં પ્રકલ્પ્યતે

ધૂમ્રા દ્વિબાહવઃ સર્વે ગદિનો વિકૃતાનનાઃ ।
ગૃધ્રાસના નિત્યં કેતવઃ સ્યુર્વરપ્રદા

સર્વે કિરીટિનઃ કાર્યા ગ્રહા લોકહિતપ્રદાઃ ।
સ્વાંગુલેનોચ્છ્રિતા વિજ્ઞૈઃ શતમષ્ટોત્તરં સદા

યથાવર્ણં પ્રદેયાનિ સુદ્ષ્પાણિ વસનાનિ ચ ।
ગન્ધો દીપો બલિશ્ચૈવ ધૂપો દેયશ્ચ ગુગ્ગુલુઃ

યસ્ય ગ્રહસ્ય યદ્દ્રવ્યમન્નં યસ્ય ચ યત્ પ્રિયમ્ ।
તચ્ચ તસ્યૈ પ્રદાતવ્યં ભક્તિયુક્તેન ચેતસા

આકૃષ્ણેન ઇમં દેવા અગ્નિર્મૂર્ધા દિવઃ કકુત્ ।
ઉદ્બુધ્યસ્વેતિ મન્ત્રાંશ્ચ જપેદથ બૃહસ્પતે

અન્નાત્ પરિશ્રુતશ્ચેતિ શન્નો દેવીરભીષ્ટયે ।
કયા નશ્ચિત્ર ઇત્યેવં કેતુ કૃણ્વન્નિમાંસ્તથા

સપ્ત રુદ્રા દિશો નન્દા નવચન્દ્રા નૃપાસ્તથા ।
ત્રિપક્ષા અષ્ટચન્દ્રાશ્ચ સપ્તચન્દ્રાસ્તથૈવ ચ

ઇમાઃ સંખ્યાઃ સહસ્રઘ્ના જપસંખ્યાઃ પ્રકીર્તિતાઃ ।
ક્રમાદર્કાદિખેટાનાં પ્રીત્યર્થં દ્વિજપુઙ્ગવ

અર્કઃ પલાશઃ ખદિરસ્ત્વપામાર્ગસ્તુ પિપ્પલઃ ।
ઉદુમ્બરઃ શમી દુર્વા કુશાશ્ચ સમિધઃ ક્રમાત્

હોતવ્યા મધુસર્પિભ્યાં દધ્ના ક્ષીરેણ વા યુતાઃ ।
એકૈકસ્ય ત્વષ્ટ શતમષ્ટાવિંશતિરેવ વા

ગુડૈદનં પાયસં ચ હવિષ્યં ક્ષીરષાષ્ટિકમ્ ।
દધ્યોદનં હવિશ્ચૂર્ણં માંસં ચિત્રાન્નમેવ ચ

દદ્યાદ્ ગ્રહક્રમાદેવં વિપ્રેભ્યો ભોજનં દ્વિજ ।
શક્તિતો વા યથાલાભં દેયં સત્કારપૂર્વકમ્

ધેનુઃ શઙ્ખસ્તથાઽનડ્વાન્ હેમ વાસો હયઃ ક્રમાત્ ।
કૃષ્ણા ગૌરાયસં છાગ એતા રવ્યાદિદક્ષિણાઃ

યસ્ય યશ્ચ યદા દુઃસ્થઃ સ તં યત્નેન પૂજયેત્ ।
એષાં ધાત્રા વરો દત્તઃ પૂજિતાઃ પૂજયિષ્યથ

માનવાનાં ગ્રહાધીના ઉઞ્છ્રાયાઃ પતનાનિ ચ ।
ભાવાઽભાવૌ ચ જગતાં તસ્માત્ પૂજ્યતમા ગ્રહાઃ