Brihat Parashara Hora Shastra · Chapter 60

atha śukrāntardaśāphalādhyāyaḥ

atha svāntargate śukre lagnātkendratrikoṇage /
lābhe vā balasaṃyukte tadbhuktau ca śubhaṃ phalam

vipramūlāddhanaprāptirgomahiṣyādilābhakṛt /
putrotsavādisantoṣo gṛhe kalyāṇasambhavaḥ

sanmānaṃ rājasammānaṃ rājyalābho mahatsukham /
svocce vā svarkṣage vāpi tuṅgāṃśe vāṃśage'pi vā

nūtanālayanirmāṇaṃ nityaṃ miṣṭhānnabhojanam /
kalatraputravibhavaṃ mitrasaṃyuktabhojanam

annadānaṃ priyaṃ nityaṃ danadharmādisaṅgrahaḥ /
mahārājaprasādena vāhanāmbarabhūṣaṇam

vyavasāyātphalādhikyaṃ catuṣpājjīvalābhakṛt /
prayāṇaṃ paścime bhāge vāhanāmbaralābhakṛt

lagnādyupacaye śukre śubhagrahayutekṣite /
mitrāṃśe tuṅgalābheśayogalārakasaṃyute

rājyalābho mahotsāho rājaprītiḥ śubhāvahā /
gṛhe kalyāṇasampattirdāraputrādivarddhanam

ṣaṣṭhāṣṭamavyaye śukre pāpayukte'tha vīkṣite /
caurādivraṇabhītiśca sarvatra janapīḍanam

rājadvāre janadveṣa iṣṭabandhuvināśanam /
dāraputrādipīḍā ca sarvatra janapīḍanam

dvitīyadyūnanāthe tu sthite cenmaraṇaṃ bhavet /
tarta durgājapaṃ kuryāddhanudānaṃ ca kārayet

śukrasyāntargate sūrye santāpo rājavigrahaḥ /
dāyādakalahaścaiva svoccanīcavivarjite

(śukrasyāntargate sūrye santāpo rājabhiḥ kaliḥ /
dāyādāt kalahaścaiva śubhakṣetrātya rāśige

) /
svocce svakṣetrage sūrye mitrarkṣe kendrakoṇage /
dāyeśātkendrakoṇe vā lābhe vā dhanage'pi vā

tadbhuktau dhanalābhaḥ syādrājyastrīdhanasampadaḥ /
svaprabhośca mahatsaukhyamiṣṭabandhoḥ samāgamaḥ

pitṛmātroḥ sukhaprāptiṃ bhrātṛlābhaṃ sukhāvaham /
satkīrtiṃ sukhasaubhāgyaṃ putralābhaṃ ca vindati

tathāṣṭame vyaye sūrye ripurāśisthite'pi vā /
nīce vā pāpavargasthe dehatāpo manorujaḥ

svajanoparisaṃkleśo nityaṃ niṣṭhurabhāṣaṇam /
pitṛpīḍā bandhuhānī rājadvāre virodhakṛt

vraṇapīḍāhibādhā ca svagṛhe ca bhayaṃ tathā /
nānārogabhayaṃ caiva gṛhakṣetrādināśanam

saptamādhipatau sūrye grahabādhā bhaviṣyati /
taddoṣaparihārārthaṃ sūryaprītiṃ ca kārayet

śukrasyāntargate candre kendralābhatrikoṇage /
svocce svakṣetrage caiva bhāgyanāthenasaṃyute

śubhayukte pūrṇacandre rājyanāthena saṃyute /
tadbuktau vāhanādīnāṃ lābhaṃ gehe mahatsukham

mahārājaprasādena gajāntaiśvaryamādiśet /
mahānadīsnānapuṇyaṃ devabrāhmaṇapūjanam

gītavādyaprasaṅgādividvajjanavibhūṣaṇam /
gomahiṣyādivṛddhiśca vyavasāye'dhikaṃ phalam

bhojanāmbarasaukhyaṃ ca bandhusaṃyuktabhojanam /
nīce vātsaṅgate vāpi ṣaṣṭhāṣṭamavyayarāśige

dāyeśātṣaṣṭhage vāpi randhre vā vyayarāśige /
tatkāle dhananāśaḥ syātsañcareta mahadbhayam

dehāyāso manastāpo rājadvāre virodhakṛt /
videśagamanaṃ caiva tīrthayātrādikaṃ phalam

dāraputrādi pīḍā ca nijabandhuviyogakṛt /
dāyeśātkendralābhasthe trikoṇe sahaje'pi vā

rājaprītikarī caiva deśagrāmādhipatyatā /
dhairyaṃ yaśaḥ sukhaṃ kīrtirvāhanāmbarabhūṣaṇam

kūpārāmataḍāgadinirmāṇaṃ dhanasaṅgrahaḥ /
bhuktayādau dehasaukhyaṃ syādante kleśastathā bhavet

śukrasyāntargate bhaume lagnātkendratrikoṇage /
svocce vā svarkṣage bhaume lābhe vā balasaṃyute

lagnādhipena saṃyukte karmabhāgyeśasaṃyute /
tadbhuktau rājayogādisampadaṃ śobhanāṃ vadet

vastrābharaṇabhūmyāderiṣṭasiddhiḥ sukhāvahā /
tathā'ṣṭame vyaye vā'pi dāyeśādvā tathaiva ca

śītajvarādipīḍā ca pitṛmātṛbhayāvahā /
jvarādyadhikarogāśca sthānabhraṃśo manorujā

svabandhujanahāniśca kalaho rājavigrahaḥ /
rājadvārajanadveṣo dhanadhānyavyayo'dhikaḥ

vyavasāyātphalaṃ neṣṭaṃ grāmabhūmyādihānikṛt /
dvitīyadyūnanāthe tu dehavādhā bhaviṣyati

śukrasyāntargate rāhau kendralābhatrikoṇage /
svocce vā śubhasaṃdṛṣṭe yogakārakasaṃyute

tadbhuktau bahusaukhyaṃ ca dhanadhānyādilābhakṛt /
iṣṭabandhusamākīrṇaṃ bhavanaṃ ca samādiśet

yātuḥ kāryārthasiddhiḥ syāt paśukṣetrādisambhavaḥ /
lagnādyupacaye rāhau tadbhuktiḥ sukhadā bhavet

śatrunāśo mahotsāho rājaprītikarī śubhā /
bhuktyādau śaramāsāṃśca ante jvaramajīrṇakṛt

kāryavighnamavāpnoti sañcare ca manovyathā /
paraṃ sukhaṃ ca saubhāgyaṃ mahārāja ivā'śnute

naiṛtīṃ diśamāśritya prayāṇaṃ prabhudarśanam /
yātuḥ kāryārthasiddhiḥ syātsvadeśe punareṣyati

upakāro brāhmaṇānāṃ tīrthayātrāphalaṃ bhavet /
dāyeśādrandhrabhāvasthe vyaye vā pāpasaṃyute

aśubhaṃ labhate karma pitṛmātṛjanāvadhi /
sarvatra janavidveṣaṃ nānārūpaṃ dvijottama

dvitīye saptame vāpi dehālasya vinirdiśet /
taddoṣaparihārārthaṃ mṛtyuñjayajapaṃ caret

śukrasyāntargate jīve svocce svakṣetrakendrage /
dāyeśācchubharāśisthe bhāgye vā putrarāśige

naṣṭarājyāddhanaprāptimiṣṭārthāmbarasampadam /
mitraprabhośca sanmānaṃ dhanadhānyaṃ labhennaraḥ

rājasammānakīrtiṃ ca aśvāndolādilābhakṛt /
vidvatprabhusamākīrṇaṃ śāstrāpariśramam

putrotsavādisantoṣamiṣṭabandhusamāgamam /
pitṛmātṛsukhaprāptiṃ putrādisaukhyamādiśet

dāyeśātṣaṣṭharāśisthe vyaye vā pāpasaṃyute /
rājacaurādipīḍā ca dehapīḍā bhaviṣyati

ātmarugbandhukaṣṭaṃ syātkalahena manovyathā /
sthānacyutiṃ pravāsaṃ ca nānārogaṃ samāpnuyāt

dvitīyasaptamādhīśe dehabādhā bhaviṣyati /
taddoṣaparihārārthaṃ mahāmṛtyuñjayaṃ caret

śukrasyāntargate mande svocce tu paramoccage /
svarkṣakendratrikoṇasthe tuṅgāṃśe svāṃśage'pi vā

tadbhuktau bahusaukhyaṃ syādiṣṭabandhusamāgamaḥ /
rājadvāre ca sammānaṃ putrikājanmasambhavaḥ

puṇyatīrthaphalavāptirdānadharmādipuṇyakṛt /
svaprabhośca padāvāptiḥ nīcasthe kleśabhāgyabhavet

dehālasyamavāpnoti tathā'yādadhikavyayam /
tathāṣṭame vyaye mande dāyeśādvā tathaiva ca

bhuktyādau vividhā pīḍā pitṛmātṛjanāvadhi /
dāraputrādipīḍā ca paradeśādivibhramaḥ

vyavasāyātphalaṃ naṣṭaṃ gomahiṣyādihānikṛt /
dvitīyasaptamādhīśe dehabādhā bhaviṣyati

taddoṣaparihārārthaṃ tilahomaṃ ca kārayet /
mṛtyuñjayajapaṃ kuryāccaṇḍīpāṭhamāthapi vā

svayaṃ vā brāhmaṇadvārā yathāśakti yathāvidhi /
tataḥ śāntimavāpnoti śivāśambhuprasādataḥ

śukrasyāntargate saumye kendre lābhatrikoṇage /
svocce vā svarkṣage vāpi rājaprītikaraṃ śubham

saubhāgyaṃ putralābhaśca sanmārgeṇa dhanāgamaḥ /
purāṇadharmaśravaṇaṃ śṛṅgārijanasaṃgamaḥ

iṣṭabandhujanākīrṇaṃ śobhitaṃ tasya mandiram /
svaprabhośca mahatsaukhyaṃ nityaṃ miṣṭhānnabhojanam

dāyeśātṣaṣṭharandhre vā vyaye vā balavarjite /
pāpadṛṣṭe pāpayukte catuṣpājjīvahānikṛt

anyālayanivāsaśca manovaikalyasambhavaḥ /
vyāpāreṣu ca sarveṣu hānireva na saṃśayaḥ

bhuktyādau śobhanaṃ proktaṃ madhye madhyaphalaṃ diśet /
ante kleśakaraṃ caiva śītavātajvarādikam

saptamādhīśadoṣeṇa dehapīḍā bhaviṣyati /
taddoṣaparihārārthaṃ viṣṇusāhasrakaṃ japet

śukrasyāntargate ketau svocce vā svarkṣage'pi vā /
yogakārakasambandhe sthānavīryasamanvite

bhuktyādau śubhamādhikyānnityaṃ miṣṭhānnabhojanam /
vyavasāyātphalādhikyaṃ gomahoṣyādivṛddhikṛt

dhanadhānyasamṛddhiśca saṃgrāme vijayo bhavet /
bhuktyante hi sukhaṃ caiva bhuktyādau madhyamaṃ phalam

madhye madhye mahatkaṣṭaṃ paścādārogyamādiśet /
dāyeśādrandhrabhāvasthe vyaye vā pāpasaṃyute

caurāhivraṇapīḍā ca buddhināśo mahadbhayam /
śirorujaṃ manastāpamakarmakalahaṃ vadet

pramehabhavarogaṃ ca nānāmārge dhanavyayaḥ /
bhāryāputravirodhaśca gamanaṃ kāryanāśanam

dvitīyadyūnanāthe tu dehabādhā bhaviṣyati /
taddoṣaparihārārthaṃ mṛtyuñjayajapaṃ caret

chāgadānaṃ prakurvīta sarvasampatpradāyakam /
śukraprītikarīṃ śāntiṃ tataḥ sukhamavāpnuyāt