બૃહત્પારાશરહોરાશાસ્ત્રમ્ · અધ્યાય 60

અથ શુક્રાન્તર્દશાફલાધ્યાયઃ

અથ સ્વાન્તર્ગતે શુક્રે લગ્નાત્કેન્દ્રત્રિકોણગે ।
લાભે વા બલસંયુક્તે તદ્ભુક્તૌ ચ શુભં ફલમ્

વિપ્રમૂલાદ્ધનપ્રાપ્તિર્ગોમહિષ્યાદિલાભકૃત્ ।
પુત્રોત્સવાદિસન્તોષો ગૃહે કલ્યાણસમ્ભવઃ

સન્માનં રાજસમ્માનં રાજ્યલાભો મહત્સુખમ્ ।
સ્વોચ્ચે વા સ્વર્ક્ષગે વાપિ તુઙ્ગાંશે વાંશગેઽપિ વા

નૂતનાલયનિર્માણં નિત્યં મિષ્ઠાન્નભોજનમ્ ।
કલત્રપુત્રવિભવં મિત્રસંયુક્તભોજનમ્

અન્નદાનં પ્રિયં નિત્યં દનધર્માદિસઙ્ગ્રહઃ ।
મહારાજપ્રસાદેન વાહનામ્બરભૂષણમ્

વ્યવસાયાત્ફલાધિક્યં ચતુષ્પાજ્જીવલાભકૃત્ ।
પ્રયાણં પશ્ચિમે ભાગે વાહનામ્બરલાભકૃત્

લગ્નાદ્યુપચયે શુક્રે શુભગ્રહયુતેક્ષિતે ।
મિત્રાંશે તુઙ્ગલાભેશયોગલારકસંયુતે

રાજ્યલાભો મહોત્સાહો રાજપ્રીતિઃ શુભાવહા ।
ગૃહે કલ્યાણસમ્પત્તિર્દારપુત્રાદિવર્દ્ધનમ્

ષષ્ઠાષ્ટમવ્યયે શુક્રે પાપયુક્તેઽથ વીક્ષિતે ।
ચૌરાદિવ્રણભીતિશ્ચ સર્વત્ર જનપીડનમ્

રાજદ્વારે જનદ્વેષ ઇષ્ટબન્ધુવિનાશનમ્ ।
દારપુત્રાદિપીડા ચ સર્વત્ર જનપીડનમ્

દ્વિતીયદ્યૂનનાથે તુ સ્થિતે ચેન્મરણં ભવેત્ ।
તર્ત દુર્ગાજપં કુર્યાદ્ધનુદાનં ચ કારયેત્

શુક્રસ્યાન્તર્ગતે સૂર્યે સન્તાપો રાજવિગ્રહઃ ।
દાયાદકલહશ્ચૈવ સ્વોચ્ચનીચવિવર્જિતે

(શુક્રસ્યાન્તર્ગતે સૂર્યે સન્તાપો રાજભિઃ કલિઃ ।
દાયાદાત્ કલહશ્ચૈવ શુભક્ષેત્રાત્ય રાશિગે

) ।
સ્વોચ્ચે સ્વક્ષેત્રગે સૂર્યે મિત્રર્ક્ષે કેન્દ્રકોણગે ।
દાયેશાત્કેન્દ્રકોણે વા લાભે વા ધનગેઽપિ વા

તદ્ભુક્તૌ ધનલાભઃ સ્યાદ્રાજ્યસ્ત્રીધનસમ્પદઃ ।
સ્વપ્રભોશ્ચ મહત્સૌખ્યમિષ્ટબન્ધોઃ સમાગમઃ

પિતૃમાત્રોઃ સુખપ્રાપ્તિં ભ્રાતૃલાભં સુખાવહમ્ ।
સત્કીર્તિં સુખસૌભાગ્યં પુત્રલાભં ચ વિન્દતિ

તથાષ્ટમે વ્યયે સૂર્યે રિપુરાશિસ્થિતેઽપિ વા ।
નીચે વા પાપવર્ગસ્થે દેહતાપો મનોરુજઃ

સ્વજનોપરિસંક્લેશો નિત્યં નિષ્ઠુરભાષણમ્ ।
પિતૃપીડા બન્ધુહાની રાજદ્વારે વિરોધકૃત્

વ્રણપીડાહિબાધા ચ સ્વગૃહે ચ ભયં તથા ।
નાનારોગભયં ચૈવ ગૃહક્ષેત્રાદિનાશનમ્

સપ્તમાધિપતૌ સૂર્યે ગ્રહબાધા ભવિષ્યતિ ।
તદ્દોષપરિહારાર્થં સૂર્યપ્રીતિં ચ કારયેત્

શુક્રસ્યાન્તર્ગતે ચન્દ્રે કેન્દ્રલાભત્રિકોણગે ।
સ્વોચ્ચે સ્વક્ષેત્રગે ચૈવ ભાગ્યનાથેનસંયુતે

શુભયુક્તે પૂર્ણચન્દ્રે રાજ્યનાથેન સંયુતે ।
તદ્બુક્તૌ વાહનાદીનાં લાભં ગેહે મહત્સુખમ્

મહારાજપ્રસાદેન ગજાન્તૈશ્વર્યમાદિશેત્ ।
મહાનદીસ્નાનપુણ્યં દેવબ્રાહ્મણપૂજનમ્

ગીતવાદ્યપ્રસઙ્ગાદિવિદ્વજ્જનવિભૂષણમ્ ।
ગોમહિષ્યાદિવૃદ્ધિશ્ચ વ્યવસાયેઽધિકં ફલમ્

ભોજનામ્બરસૌખ્યં ચ બન્ધુસંયુક્તભોજનમ્ ।
નીચે વાત્સઙ્ગતે વાપિ ષષ્ઠાષ્ટમવ્યયરાશિગે

દાયેશાત્ષષ્ઠગે વાપિ રન્ધ્રે વા વ્યયરાશિગે ।
તત્કાલે ધનનાશઃ સ્યાત્સઞ્ચરેત મહદ્ભયમ્

દેહાયાસો મનસ્તાપો રાજદ્વારે વિરોધકૃત્ ।
વિદેશગમનં ચૈવ તીર્થયાત્રાદિકં ફલમ્

દારપુત્રાદિ પીડા ચ નિજબન્ધુવિયોગકૃત્ ।
દાયેશાત્કેન્દ્રલાભસ્થે ત્રિકોણે સહજેઽપિ વા

રાજપ્રીતિકરી ચૈવ દેશગ્રામાધિપત્યતા ।
ધૈર્યં યશઃ સુખં કીર્તિર્વાહનામ્બરભૂષણમ્

કૂપારામતડાગદિનિર્માણં ધનસઙ્ગ્રહઃ ।
ભુક્તયાદૌ દેહસૌખ્યં સ્યાદન્તે ક્લેશસ્તથા ભવેત્

શુક્રસ્યાન્તર્ગતે ભૌમે લગ્નાત્કેન્દ્રત્રિકોણગે ।
સ્વોચ્ચે વા સ્વર્ક્ષગે ભૌમે લાભે વા બલસંયુતે

લગ્નાધિપેન સંયુક્તે કર્મભાગ્યેશસંયુતે ।
તદ્ભુક્તૌ રાજયોગાદિસમ્પદં શોભનાં વદેત્

વસ્ત્રાભરણભૂમ્યાદેરિષ્ટસિદ્ધિઃ સુખાવહા ।
તથાઽષ્ટમે વ્યયે વાઽપિ દાયેશાદ્વા તથૈવ ચ

શીતજ્વરાદિપીડા ચ પિતૃમાતૃભયાવહા ।
જ્વરાદ્યધિકરોગાશ્ચ સ્થાનભ્રંશો મનોરુજા

સ્વબન્ધુજનહાનિશ્ચ કલહો રાજવિગ્રહઃ ।
રાજદ્વારજનદ્વેષો ધનધાન્યવ્યયોઽધિકઃ

વ્યવસાયાત્ફલં નેષ્ટં ગ્રામભૂમ્યાદિહાનિકૃત્ ।
દ્વિતીયદ્યૂનનાથે તુ દેહવાધા ભવિષ્યતિ

શુક્રસ્યાન્તર્ગતે રાહૌ કેન્દ્રલાભત્રિકોણગે ।
સ્વોચ્ચે વા શુભસંદૃષ્ટે યોગકારકસંયુતે

તદ્ભુક્તૌ બહુસૌખ્યં ચ ધનધાન્યાદિલાભકૃત્ ।
ઇષ્ટબન્ધુસમાકીર્ણં ભવનં ચ સમાદિશેત્

યાતુઃ કાર્યાર્થસિદ્ધિઃ સ્યાત્ પશુક્ષેત્રાદિસમ્ભવઃ ।
લગ્નાદ્યુપચયે રાહૌ તદ્ભુક્તિઃ સુખદા ભવેત્

શત્રુનાશો મહોત્સાહો રાજપ્રીતિકરી શુભા ।
ભુક્ત્યાદૌ શરમાસાંશ્ચ અન્તે જ્વરમજીર્ણકૃત્

કાર્યવિઘ્નમવાપ્નોતિ સઞ્ચરે ચ મનોવ્યથા ।
પરં સુખં ચ સૌભાગ્યં મહારાજ ઇવાઽશ્નુતે

નૈઋતીં દિશમાશ્રિત્ય પ્રયાણં પ્રભુદર્શનમ્ ।
યાતુઃ કાર્યાર્થસિદ્ધિઃ સ્યાત્સ્વદેશે પુનરેષ્યતિ

ઉપકારો બ્રાહ્મણાનાં તીર્થયાત્રાફલં ભવેત્ ।
દાયેશાદ્રન્ધ્રભાવસ્થે વ્યયે વા પાપસંયુતે

અશુભં લભતે કર્મ પિતૃમાતૃજનાવધિ ।
સર્વત્ર જનવિદ્વેષં નાનારૂપં દ્વિજોત્તમ

દ્વિતીયે સપ્તમે વાપિ દેહાલસ્ય વિનિર્દિશેત્ ।
તદ્દોષપરિહારાર્થં મૃત્યુઞ્જયજપં ચરેત્

શુક્રસ્યાન્તર્ગતે જીવે સ્વોચ્ચે સ્વક્ષેત્રકેન્દ્રગે ।
દાયેશાચ્છુભરાશિસ્થે ભાગ્યે વા પુત્રરાશિગે

નષ્ટરાજ્યાદ્ધનપ્રાપ્તિમિષ્ટાર્થામ્બરસમ્પદમ્ ।
મિત્રપ્રભોશ્ચ સન્માનં ધનધાન્યં લભેન્નરઃ

રાજસમ્માનકીર્તિં ચ અશ્વાન્દોલાદિલાભકૃત્ ।
વિદ્વત્પ્રભુસમાકીર્ણં શાસ્ત્રાપરિશ્રમમ્

પુત્રોત્સવાદિસન્તોષમિષ્ટબન્ધુસમાગમમ્ ।
પિતૃમાતૃસુખપ્રાપ્તિં પુત્રાદિસૌખ્યમાદિશેત્

દાયેશાત્ષષ્ઠરાશિસ્થે વ્યયે વા પાપસંયુતે ।
રાજચૌરાદિપીડા ચ દેહપીડા ભવિષ્યતિ

આત્મરુગ્બન્ધુકષ્ટં સ્યાત્કલહેન મનોવ્યથા ।
સ્થાનચ્યુતિં પ્રવાસં ચ નાનારોગં સમાપ્નુયાત્

દ્વિતીયસપ્તમાધીશે દેહબાધા ભવિષ્યતિ ।
તદ્દોષપરિહારાર્થં મહામૃત્યુઞ્જયં ચરેત્

શુક્રસ્યાન્તર્ગતે મન્દે સ્વોચ્ચે તુ પરમોચ્ચગે ।
સ્વર્ક્ષકેન્દ્રત્રિકોણસ્થે તુઙ્ગાંશે સ્વાંશગેઽપિ વા

તદ્ભુક્તૌ બહુસૌખ્યં સ્યાદિષ્ટબન્ધુસમાગમઃ ।
રાજદ્વારે ચ સમ્માનં પુત્રિકાજન્મસમ્ભવઃ

પુણ્યતીર્થફલવાપ્તિર્દાનધર્માદિપુણ્યકૃત્ ।
સ્વપ્રભોશ્ચ પદાવાપ્તિઃ નીચસ્થે ક્લેશભાગ્યભવેત્

દેહાલસ્યમવાપ્નોતિ તથાઽયાદધિકવ્યયમ્ ।
તથાષ્ટમે વ્યયે મન્દે દાયેશાદ્વા તથૈવ ચ

ભુક્ત્યાદૌ વિવિધા પીડા પિતૃમાતૃજનાવધિ ।
દારપુત્રાદિપીડા ચ પરદેશાદિવિભ્રમઃ

વ્યવસાયાત્ફલં નષ્ટં ગોમહિષ્યાદિહાનિકૃત્ ।
દ્વિતીયસપ્તમાધીશે દેહબાધા ભવિષ્યતિ

તદ્દોષપરિહારાર્થં તિલહોમં ચ કારયેત્ ।
મૃત્યુઞ્જયજપં કુર્યાચ્ચણ્ડીપાઠમાથપિ વા

સ્વયં વા બ્રાહ્મણદ્વારા યથાશક્તિ યથાવિધિ ।
તતઃ શાન્તિમવાપ્નોતિ શિવાશમ્ભુપ્રસાદતઃ

શુક્રસ્યાન્તર્ગતે સૌમ્યે કેન્દ્રે લાભત્રિકોણગે ।
સ્વોચ્ચે વા સ્વર્ક્ષગે વાપિ રાજપ્રીતિકરં શુભમ્

સૌભાગ્યં પુત્રલાભશ્ચ સન્માર્ગેણ ધનાગમઃ ।
પુરાણધર્મશ્રવણં શૃઙ્ગારિજનસંગમઃ

ઇષ્ટબન્ધુજનાકીર્ણં શોભિતં તસ્ય મન્દિરમ્ ।
સ્વપ્રભોશ્ચ મહત્સૌખ્યં નિત્યં મિષ્ઠાન્નભોજનમ્

દાયેશાત્ષષ્ઠરન્ધ્રે વા વ્યયે વા બલવર્જિતે ।
પાપદૃષ્ટે પાપયુક્તે ચતુષ્પાજ્જીવહાનિકૃત્

અન્યાલયનિવાસશ્ચ મનોવૈકલ્યસમ્ભવઃ ।
વ્યાપારેષુ ચ સર્વેષુ હાનિરેવ ન સંશયઃ

ભુક્ત્યાદૌ શોભનં પ્રોક્તં મધ્યે મધ્યફલં દિશેત્ ।
અન્તે ક્લેશકરં ચૈવ શીતવાતજ્વરાદિકમ્

સપ્તમાધીશદોષેણ દેહપીડા ભવિષ્યતિ ।
તદ્દોષપરિહારાર્થં વિષ્ણુસાહસ્રકં જપેત્

શુક્રસ્યાન્તર્ગતે કેતૌ સ્વોચ્ચે વા સ્વર્ક્ષગેઽપિ વા ।
યોગકારકસમ્બન્ધે સ્થાનવીર્યસમન્વિતે

ભુક્ત્યાદૌ શુભમાધિક્યાન્નિત્યં મિષ્ઠાન્નભોજનમ્ ।
વ્યવસાયાત્ફલાધિક્યં ગોમહોષ્યાદિવૃદ્ધિકૃત્

ધનધાન્યસમૃદ્ધિશ્ચ સંગ્રામે વિજયો ભવેત્ ।
ભુક્ત્યન્તે હિ સુખં ચૈવ ભુક્ત્યાદૌ મધ્યમં ફલમ્

મધ્યે મધ્યે મહત્કષ્ટં પશ્ચાદારોગ્યમાદિશેત્ ।
દાયેશાદ્રન્ધ્રભાવસ્થે વ્યયે વા પાપસંયુતે

ચૌરાહિવ્રણપીડા ચ બુદ્ધિનાશો મહદ્ભયમ્ ।
શિરોરુજં મનસ્તાપમકર્મકલહં વદેત્

પ્રમેહભવરોગં ચ નાનામાર્ગે ધનવ્યયઃ ।
ભાર્યાપુત્રવિરોધશ્ચ ગમનં કાર્યનાશનમ્

દ્વિતીયદ્યૂનનાથે તુ દેહબાધા ભવિષ્યતિ ।
તદ્દોષપરિહારાર્થં મૃત્યુઞ્જયજપં ચરેત્

છાગદાનં પ્રકુર્વીત સર્વસમ્પત્પ્રદાયકમ્ ।
શુક્રપ્રીતિકરીં શાન્તિં તતઃ સુખમવાપ્નુયાત્