Brihat Parashara Hora Shastra · Chapter 37

atha candrayogādhyāyaḥ

sahasraraśmitacandre kaṇṭakādigate kramāt‌/
dhanadhīnaipuṇādīni nyūnamadhyottamāni hi

svāṃśe vā svādhimitrāṃśe sthitaśca divase śaśī/
guruṇā dṛśyate tatra jāto dhanasukhānvitaḥ

svāṃśe vā svādhimitrāṃśe sthitaśca śaśabhṛnniśi/
śukreṇa dṛśyate tatra jāto dhanasukhānvitaḥ

etad‌viparyayasthe ca śukrejyānavalokite/
jāyate'lpadhano bālo yoge'sminnirdhano'thavā

candrādrandhrārikāmasthai saumyaiḥ syādhiyogakaḥ/
tatra rājā ca mantrī ca senādhīśaśca balakramāt‌

candrād‌ vṛddhigataiḥ sarvaiḥ śubhairjāto mahādhanī/
dvābhyāṃ madhyadhano jāta ekenā'lpadhano bhavet‌

candrāt‌ svāntyobhayasthe hi grahe sūryaṃ binā kramāt‌/
sunaphākhto'naphākhyaśca yogo duradharāhvayaḥ

rājā vā rājatulyo vā dhīdhanakhyātimāñjanaḥ/
svabhujārjitavittaśca sunaphāyogasambhavaḥ

bhūpo'gadaśarīraśca śīlavān‌ khyātakīrtimān‌/
surūpaścā'naphājāto sukhaiḥ sarvaiḥ samanvitaḥ

utpannasukhabhug‌ dātā dhanavāhanasaṃyutaḥ/
sad‌bhṛtyo jāyate nūnaṃ jano duradharābhavaḥ

candrādādyadhanā'ntyastho vinā bhānuṃ na ced‌grahaḥ/
kaścit‌ syādvā vinā candraṃ lagnāt‌ kendragato'tha vā

yogaḥ kemadrumo nāma tatra jāto'tigarhitaḥ/
buddhividyāvihīnaśca daridrāpattisaṃyutaḥ

anyayogaphalaṃ hanti candrayogo viśeṣataḥ/
svaphalaṃ pradadātīti budho yatnād‌ vicintayet‌