બૃહત્પારાશરહોરાશાસ્ત્રમ્ · અધ્યાય 37

અથ ચન્દ્રયોગાધ્યાયઃ

સહસ્રરશ્મિતચન્દ્રે કણ્ટકાદિગતે ક્રમાત્‌।
ધનધીનૈપુણાદીનિ ન્યૂનમધ્યોત્તમાનિ હિ

સ્વાંશે વા સ્વાધિમિત્રાંશે સ્થિતશ્ચ દિવસે શશી।
ગુરુણા દૃશ્યતે તત્ર જાતો ધનસુખાન્વિતઃ

સ્વાંશે વા સ્વાધિમિત્રાંશે સ્થિતશ્ચ શશભૃન્નિશિ।
શુક્રેણ દૃશ્યતે તત્ર જાતો ધનસુખાન્વિતઃ

એતદ્‌વિપર્યયસ્થે ચ શુક્રેજ્યાનવલોકિતે।
જાયતેઽલ્પધનો બાલો યોગેઽસ્મિન્નિર્ધનોઽથવા

ચન્દ્રાદ્રન્ધ્રારિકામસ્થૈ સૌમ્યૈઃ સ્યાધિયોગકઃ।
તત્ર રાજા ચ મન્ત્રી ચ સેનાધીશશ્ચ બલક્રમાત્‌

ચન્દ્રાદ્‌ વૃદ્ધિગતૈઃ સર્વૈઃ શુભૈર્જાતો મહાધની।
દ્વાભ્યાં મધ્યધનો જાત એકેનાઽલ્પધનો ભવેત્‌

ચન્દ્રાત્‌ સ્વાન્ત્યોભયસ્થે હિ ગ્રહે સૂર્યં બિના ક્રમાત્‌।
સુનફાખ્તોઽનફાખ્યશ્ચ યોગો દુરધરાહ્વયઃ

રાજા વા રાજતુલ્યો વા ધીધનખ્યાતિમાઞ્જનઃ।
સ્વભુજાર્જિતવિત્તશ્ચ સુનફાયોગસમ્ભવઃ

ભૂપોઽગદશરીરશ્ચ શીલવાન્‌ ખ્યાતકીર્તિમાન્‌।
સુરૂપશ્ચાઽનફાજાતો સુખૈઃ સર્વૈઃ સમન્વિતઃ

ઉત્પન્નસુખભુગ્‌ દાતા ધનવાહનસંયુતઃ।
સદ્‌ભૃત્યો જાયતે નૂનં જનો દુરધરાભવઃ

ચન્દ્રાદાદ્યધનાઽન્ત્યસ્થો વિના ભાનું ન ચેદ્‌ગ્રહઃ।
કશ્ચિત્‌ સ્યાદ્વા વિના ચન્દ્રં લગ્નાત્‌ કેન્દ્રગતોઽથ વા

યોગઃ કેમદ્રુમો નામ તત્ર જાતોઽતિગર્હિતઃ।
બુદ્ધિવિદ્યાવિહીનશ્ચ દરિદ્રાપત્તિસંયુતઃ

અન્યયોગફલં હન્તિ ચન્દ્રયોગો વિશેષતઃ।
સ્વફલં પ્રદદાતીતિ બુધો યત્નાદ્‌ વિચિન્તયેત્‌