Brahmavaivarta Purana · Chapter 4.97

atha saptanavatitamo'dhyāyaḥ
nārāyaṇa uvāca
gacchantamuddhavaṃ dṛṣṭvā saṃtrastā śrīhareḥ priyā /
samutthāyā''sanācchīghraṃ hṛdayena vidūyatā

gopībhiḥ sahitā śīghraṃ samudvignā sahāsatī /
dadau śubhāśiṣaṃ tasmai tasya mūrdhni karaṃ tathā

stigdhadūrvākṣataṃ śukladhānyaṃ puṣpaṃ ca maṅgalam /
prerayāmāsa lājāṃśca phalaṃ parṇaṃ tathā dadhi

darmaṇaṃ darśayāmāsa pūrṇakumbha sapallavam /
saphalaṃ gandhasindhūrakastūrīcandanānvitam

puṣpamālyaṃ pradīpaṃ ca ratnaṃ gandhaṃ dvijottama /
patiputravatī sādhvī kāñcanaṃ rajataṃ tathā

tamuvāca mahāsādhvī hitaṃ satyaṃ ca maṅgalam /
saṃgopyaṃ sāśrunetraṃ ca patitaṃ duḥkhitā hṛdi

rādhikovāca
śubhaṃ bhavatu mārgaste kalyāṇamastu saṃtatam /
jñānaṃ labha hareḥ sthānātkṛṣṇasya supriyo bhava

kṛṣṇabhaktiḥ kṛṣṇadāsyaṃ daleṣu ca varaṃ varam /
śreṣṭhā pañcavidhā mukterharibhaktirgarīyasī

brahmatvādapi devatvādindratvādamarādapi /
amṛtātsiddhilābhācca haridāsyaṃ sudurlabham

anekananmatapasā saṃbhūya bhārate dvijaḥ /
haribhaktiṃ yadi labhettasya janma sudurlabham

saphalaṃ jīvanaṃ tasya kurvataḥ karmaṇaḥ kṣayam /
pitṝṇāṃ ca sahasrāṇi svasya mātuśca niścitam

mātāmahānāṃ puṃsāṃ ca śatānāṃ sodarasya ca /
bāndhavasyāpi patnyāśca gurūṇāṃ śiṣyabhṛtyayoḥ

tatkarma śobharaṃ vatsa yacca kṛṣṇo samarpaṇam /
tatkarma śobhanaṃ śuddhaṃ kuṣṇasaṃtoṣaṇaṃ yataḥ

saṃkalpasādhanaṃ karma saṃprītividhipūrvakam /
tadeva maṅgalaṃ dhanyaṃ pariṇāmasukhāvaham

tadvrataṃ tattapaḥ satyaṃ tadbhaktiḥ pūjanaṃ tathā /
taduddeśyamanaśanaṃ kevalaṃ dāsyakālaṇam

samastapṛthivīdānaṃ pradakṣiṇyaṃ bhuvastathā /
samastatīrthasnānaṃ ca samastaṃ ca vrataṃ tapaḥ

samastayajñakaraṇaṃ sarvadānaphalaṃ tathā /
samastavedavedāṅgapaṭhanaṃ pāṭhanaṃ tathā

bhītasthaṃ rakṣaṇaṃ caiva jñānadānaṃ sudurlabham /
atithīnāṃ pūjanaṃ ca śaraṇāgatarakṣaṇam

sarvadevārcanaṃ caiva vandanaṃ japanaṃ manoḥ /
bhojanaṃ vipradevānāṃ puraścaraṇapūrvakam

guruśuśrūṣaṇaṃ caiva pitrorbhaktiśca poṣaṇam /
sarvaṃ śrīkṛṣṇadāsyasya kalāṃ nārhati ṣoḍaśīm

tasmāduddhava yatnena bhaja kṛṣṇaṃ parātparam /
nirguṇaṃ ca nirīhaṃ ca paramātmānamīśvaram

nityaṃ satyaṃ paraṃ brahma prakṛteḥ paramīśvaram /
paripūrṇatamaṃ śuddhaṃ bhaktānugrahavigraham

karmiṇāṃ karmaṇāṃ sākṣyapradaṃ nirliptameva ca /
jyotiḥ svarūpaṃ paramaṃ kāraṇānāṃ ca kāraṇam

sarvasvarūpaṃ sarveśaṃ sarvasaṃpatpradaṃ śubham /
bhaktidaṃ dāsyadaṃ svasya nijasaṃpatpadapradam

visṛjya jñātibuddhiṃ ca mātsaryamaśubhapradam /
bhaja taṃ paramānandaṃ sānandaṃ nandanandanam

vede kauthumiśākhāyāṃ tasya nāmnāṃ sahasrakam /
nandanandananāmoktaṃ kṛtau vighnaṃ sudurlabham

uddhavaḥ sarvamākarṇya paramaṃ vismayaṃ yayau /
jñānaṃ saṃprāpya saṃpūrṇa paribūrṇe bhabhūva ha

svavastraṃ ca gale baddhvā daṇḍavatpraṇanām tām /
murdhnaḥ keśaiśca tatpādaṃ nibadhya ca punāḥ punaḥ

pulakāñcitasarvāṅgaḥ sāśrunetraśca bhaktitaḥ /
tadvicchedaśucā premṇa rurodoccaiśca nārada

ruroda rādhā tatpremṇā ruroda ballavīgaṇaḥ /
uddhavasya galaṃ dhṛtvā sathāpayāmāsa lobhataḥ

udvavaṃ mūrcchitaṃ dṛṣṭvā jṛmbhitaṃ tyaktacetanam /
śīghrasutthāpayāmāsa rādhikā kṛṣṇamānasam

cetanaṃ kārayāmāsa jalaṃ dattvā mukhāmbuje /
śubhāśiṣaṃ ca pradadau vatsa jīveti nārada

uddhavaścetanāṃ prāpya tamuvāca susaṃsadi /
rudatīnāṃ ca gopīnāṃ purataḥ paramārthadam

uddhava uvāca
dhanyo yaśasyo dvīpānāṃ jambudvīpaḥ sudurlabhaḥ /
yatra bhāratavarṣa tu sarvaiṣāmīpsitaṃ varam

aho bhāratavarṣe tu puṇyaṃ vṛndāvanaṃ vanam /
rādhāpādābjasaṃsparśarajaḥ pūtaṃ surepsitam

dhanyā mānyā ca pṛthivī treṣu lokeṣu pūjitā /
rādhāyāstīrthapūtāyāḥ pādābjarajasā varā

ṣaṣṭivarṣasahasrāṇi divyāni puṣkare purā /
brahmaṇā ca tapastaptaṃ vedoktaṃ bhaktipūrvakam

goloke rādhikākṛṣṇadarśanārthaṃ manorathāt /
goloke rādhikākṛṣṇo na dṛṣṭaḥ svapnatastadā

śrutā tenā''kāśavāṇī satyarūpā ca līlayā /
vārāhe bhārate varṣe puṇye vṛndāvane vane

rāsotsave mahārāmye tatraiva rāsamaṇḍale /
drakṣyasīti ca devānāṃ madhye sustho na saṃśayaḥ

śrutvā ca virato brahmā tapasaḥ svagṛhaṃ gataḥ /kṛṣṇo dṛṣṭaśca hṛṣṭaśca paripūrṇamanorathaḥ

gopānāṃ gopikānāṃ ca saphalaṃ janma jīvanam /
nityaṃ paśyanti te pādapadmaṃ brahmādidurlabham

māninīṃ rādhikāṃ santaḥ sadā sevanti nityaśaḥ /
yogīndrāśca munīndrāśca siddhendrā vaiṣṇavāstathā

satīṃ puṇyāṃ tīrthapūtāṃ svataḥ śuddhāṃ sudurlabhām /
sulabhaṃ yatvadāmbhojaṃ brahmādīnāṃ sudurlabham

yatpādapadmanakharaṃ kṛtaṃ yāvakacihnitam /
sarveśvareśvareṇaiva kṛṣṇena paramātmanā

cakāra yasyāḥ pūjāṃ ca stotrarājaṃ sudurlabham /
śataśṛṅge svayaṃ kṛṣṇo goloke rāsamaṇḍale

pārijātaprasūnānāmañjaliṃ gandhayandanam /
dadau dūrvākṣataṃ snigdhaṃ yasyāḥ pādāravindayoḥ

triṃśatsahasrakoṭīnāṃ gopīnāmīśvarī ca yā /
tatṣaṭtriṃśatsakhīnāṃ ca īśvarī rādhikābhidhā

ye vā dviṣanti nindanti pāpinaśca hasanti ca /
kṛṣṇaprāṇādhikādevadevīṃ ca rādhikāṃ varām

brahmahatyāśataṃ te ca labhante nātra saṃśayaḥ /
tatpāpena ca pacyante kumbhīpāke ca raurave

taptataile mahāghore dhvānte kīṭe ca yantrake /
caturdaśendrāvacchinnaṃ pitṛbhiḥ saptabhiḥ saha

tataḥ paraṃ ca jāyante janmaikaṃ lokajanmataḥ /
divyaṃ varṣasahasraṃ ca viṣṭhākīṭāśca pāpataḥ

puṃścalīnāṃ yonikīṭāstadraktamalabhakṣakāḥ /
malakīṭāśca tanmānavarṣaṃ ca pūyabhakṣakāḥ

vede ca kāṇvaśākhāyāmityāha kamalodbhavaḥ /
ityuktavantaṃ taṃ yāntamuvāca rādhikā punaḥ
rudantaṃ ca rudantī sā kṛṣṇavicchedakātarā

rādhikovāca
gaccha vatsa madhupurīṃ sarvaṃ bodhaya mādhavam /
yathā paśyāmi govindaṃ prayatnena tathā kuru

niṣphalaṃ ca gataṃ janma gaccha mithyādurāśayā /
āśā hi paramaṃ duḥkhaṃ nairāśyaṃ paramaṃ sukham

paścādvicintya govindaṃ jīvanmuktā babhūva sā /
ityuktvā rādhikā tatra ruroda ca bhṛśaṃ punaḥ

praṇamya tāṃ rudantīṃ ca yaśodābhavanaṃ yayau /
athoddhave gate rādhā mūrcchāṃ maṃprāpa nārada

tatyāja cetanāṃ śaśvadbabhūva dhyānatatparā /
paṅkasthe paṅkajadake sajale śayane mune

gopyastāṃ sthāpayāmāsuḥ sāśrunetrotpalā varāḥ /
tatsparśamātrācchayanaṃ bhasmībhūtaṃ babhūva ha

punaḥ snigdhasthale sthigdhanicole candanāṅkite /
punastāṃ sthāpayāmāsurvirahajvarakātarām

sahasā śuṣkatāṃ prāpa sugandhi candanodakam /
nimeṣeṇa śatayugaṃ tadbabhūvoddhavaṃ vinā

hā hoddhavoddhava hariṃ śīghraṃ gatvā vadeti ca /
samānaya hariṃ śīghraṃ matprāṇeśvaramityapi

ityuktavacanāṃ dīnāṃ saṃtāpahṛtacetanām /
rurudurgopikāḥ sarvā rādhāṃ kṛtvā svavakṣasi
cetanāṃ kārayāmāsurbodhayāmāsuraupsitam

iti śrībrahmao mahāo śrīkṛṣṇajanmakhao uttao nāradanāo rādhoddhavasaṃo
saptanavatitamo'dhyāyaḥ