Brahmavaivarta Purana · Chapter 4.50

// śrīkṛṣṇa uvāca //
durvāsaso darpabhaṅgaṃ kathayāmi śṛṇu priye //
mahāmuneryogataśca rudrāṃśasyātitejasaḥ

ekadā cāmbarīṣaśca kṛtvā ca dvādaśīvratam //
pāraṇaṃ kartumārebhe bhojayitvā dvijānbahūn

etasminnantare tatra cājagāma muniḥ svayam //
kṣudhārtaśca tṛṣārttaśca viṣṇuvrataparāyaṇaḥ

māṃ bhojaya mahābhāgetyevaṃ sa nṛpamuktavān //
rājā bhaktyā dadau tasmai paramānnaṃ sudhopamam

sakeśaṃ pāyasaṃ dṛṣṭvā rājānaṃ śaptumudyataḥ //
jaṭāṃ nikṛtya śirasaḥ sthāpayāmāsa bhūtale

jaṭāmadhyātsamudbhūto jvaladagniśikhopamaḥ //
saptatālapramāṇaśca puruṣaḥ pralayāṃtakaḥ

nṛpaśreṣṭhaṃ sa rājānaṃ kopena hantumudyataḥ //
bhayena kampitāḥ sarve śuṣkakaṇṭhoṣṭhatālukāḥ

sasmāra ca mahābhīto rājā mama padāmbujam //
sarvavighrasyopaśamaḥ smṛtimātrādbabhūva ha

etasminnantare cakraṃ durnivāryaṃ sudarśanam //
tejasā mama tulyaṃ ca koṭisūryaprabhopamam

āvirbabhūva sahasā sabhāmadhye ca ghūrṇitam //
nikṛtya kṛtyāpuruṣaṃ dudrāva munipuṅgavam

saśaila sāgarāṃ pṛthvīṃ kāñcanīṃ bhūmimuttamām //
bhrāmayitvā mahīṃ sarvāṃ punardudrāva taṃ munim

dhāvantaṃ muktakeśaṃ taṃ bhītaṃ kātaramāturam//
tejasā''cchādya sūryaṃ taṃ dīptiṃ kurvantamuttamām

kailāsaṃ saptavargaṃ ca brahmalokamanāmayam //
viprendro bhramaṇaṃ kṛtvā vaikuṇṭhaṃ śaraṇaṃ yayau

pādapadme patantaṃ ca dadarśa viprapuṅgavam //
kṛpayā ca kṛpāsindhurdadau viprāya nirbhayam

nārāyaṇavareṇaiva babhūva vijvaro dvijaḥ//
punaryayau hariṃ stutvā nṛpagehaṃ tadājñayā

rājā munīndraṃ saṃprāpya bhojayāmāsa pāyasam //
svayaṃ ca pāraṇaṃ cakre sastrīkaḥ sahabāndhavaḥ

rājānamāśiṣaṃ kṛtvā bhuktvā vipro gṛhaṃ yayau //
mayā niyojitaṃ cakraṃ bhaktānāṃ rakṣaṇāya ca

naśyanti sarve pralaye na me bhaktaḥ praṇaśyati//
sarve devā mama prāṇā bhaktāḥ prāṇādhikā mama

tvaṃ ca lakṣmīrmahāmāyā sāvitrī vā sarasvatī//
brahmā śaṃbhuranantaśca dharmaśca brāhmaṇāstathā

gopāṅganāśca gopāśca sarve priyatamā mama//
tebhyaḥ priyāḥ parā bhaktāḥ priyo bhaktānna kaścana

dattvā sudarśanaṃ cakraṃ bhaktānāṃ rakṣaṇāya ca//
tathāpi na pratītirme svayaṃ draṣṭuṃ prayāmi tān

durvāsaso darpabhaṅgaḥ śruto mattaḥ sureśvari //
ājñāpaya mahābhāge kiṃ bhūyaḥ śrotumicchasi

śrīrādhikovāca //
dhanvantarerdarpabhaṅgaṃ kathayasva jagadguro //
purāṇe gopanīyaṃ ca śrotuṃ kautūhalaṃ mama

śrīnārāyaṇa uvāca //
rādhikāvacanaṃ śrutvā jahāsa madhusūdanaḥ //
kathāṃ kathitumārebhe śrutiramyāṃ purātanīm

iti śrībrahmavaivarte mahāpurāṇe śrīkṛṣṇajanmakhaṇḍe nārāyaṇanāradasaṃvāde durvāsaso darpabhaṅgo nāma pañcāśattamo'dhyāyaḥ