Brahmavaivarta Purana · Chapter 4.40

śrīrādhikovāca //
aho vicitraṃ caritamapūrvaṃ kiṃ śrutaṃ vibho //
sundaraṃ śrutipīyūṣaṃ nigūḍhaṃ jñānakāraṇam

na viśeṣaṃ samāsaṃ ca śrutaṃ na vyāsamīpsitam //
adhunā śrotumicchāmi vistīrṇaṃ kathaya prabho

kiṃ kiṃ tapaḥ kaṭhoraṃ ca cakāra pārvatī svayam //
kaṃ kaṃ varaṃ vā saṃprāpya kathamāpa maheśvaram

ratiḥ kena prakāreṇa jīvayāmāsa manmatham //
pārvatīśivayoḥ kṛṣṇa vivāhaṃ varṇaya prabho

tayo rahasi saṃbhogaṃ pāpināṃ pāpamocanam //
kathyatāṃ karuṇāsindho duḥkhināṃ duḥkhamocanam

dampatīvirahoktiśca karṇajvālā ca yoṣitaḥ //
śrotuṃ kautūhalaṃ kṛṣṇa punaḥ saṃmelanaṃ tayoḥ

agnijvālā viṣajvālā kṣamā soḍhuṃ ca yoṣitaḥ //
dampatīvirahajvālā na śrotuṃ ca kṣaṇaṃ kṣamā

rādhikāvacanaṃ śrutvā vismitaścakitānanaḥ //
vistīrṇaṃ vaktumārebhe hṛdayena vidūyatā

dampatīvirahoktiṃ ca yāṃ rādhā śrotumakṣamā //
vicchede śatavarṣīye kimasyā bhavitā mama

ityevaṃ mānase kṛtvā māyeśo māyayā'nvitaḥ //
kṛpāsindhuśca kṛpayā kathāṃ kathitumudyataḥ

śrīkṛṣṇa uvāca //
prāṇādhike rādhike tvaṃ śrūyatāṃ prāṇavallabhe //
prāṇādhidevi prāṇeśi prāṇādhāre manohare

vaṭamūlādgate rudre pārvatī tapase yayau //
punaḥ punaḥ svamātrā ca pitrā ca vinivāritā

gatvā sā svarṇadītīraṃ snātvā triṣavaṇaṃ mudā //
saṃdeśe ca mayā dattaṃ jajāpa taṃ manuṃ mudā

varṣamekaṃ ca saṃpūrṇamanāhārā svabhaktitaḥ//
taptvā tapaḥ kaṭhoraṃ ca cakāra jagadambikā

grīṣme ca parito vahniṃ prajvalantaṃ divāniśam// //
kṛtvā pratasthau tanmadhye saṃtataṃ japatī manum

śaśvatsmaśāne varṣāsu kṛtvā yogāsanaṃ śivā//
śilāṃ dṛṣṭvā ca saṃsiktā babhūva jaladhārayā

śīte jalāntare śaśvatpratasthau bhaktipūrvakam //
anāhārā śaradraudranīhārāsu diśāsu ca

evaṃ kṛtvā paraṃ varṣamaprāpya śaṃkaraṃ satī//
śucā kṛtvā'gnikuṇḍaṃ ca praveṣṭuṃ sā samudyatā

tāmagnikuṇḍaṃ viśatīṃ tapasā'tikṛśāṃ satīm//
dṛṣṭvā śivaḥ kṛpāsindhuḥ kṛpayā tāṃ jagāma ha

atīva vāmano bālo viprarūpī svatejasā //
prajvalanmanasā hṛṣṭo daṇḍī chatrī jaṭādharaḥ

śuklayajñopavītī ca śuklavāsāśca sasmitaḥ //
śvetābjabījamālāṃ ca bibhrattilakamujjvalam

nirjane bālakaṃ dṛṣṭvā snigdhā sāpi jagāda ha //
tattejasā'tipracchannā tatyāja ca tapaḥ svayam

ko bhavāniti papraccha taṃ śiśuṃ purataḥ sthitam //
manasā'liṅganaṃ kartumicchantī paramādaram

śrutvā śailasutā praśnaṃ prahasya parameśvaraḥ //
uvācātīva madhuraṃ karṇapīyūṣamīśvarīm

śaṃkara uvāca //
icchāgāmī baṭurahaṃ tapasvī viprabālakaḥ //
kā tvaṃ kāntā'tikāntāre tapaścarasi sundari

vada kasya kule jātā kasya kanyā ca kā'bhidhā //
tapasaḥ phaladātrī tvaṃ kasmāddhetostapastava

aho vā tapasāṃ rāśiḥ svayaṃ mūrtimatī satī/ //
tapo vā lokaśikṣārthaṃ karoṣi kamalekṣaṇe

svayaṃ tejaḥsvarūpā vā mūlaprakṛtirīśvarī //
vidhāya bhaktadhyānārthaṃ vigrahaṃ bhārate januḥ

kiṃ vā triloke lakṣmīstvaṃ saṃpadrūpā sanātanī //
rakṣāṃ vidhātuṃ jagatāmāgatā dhāturantike

kiṃ vāmbikā tvaṃ devānāṃ svayaṃ mūrtimatī satī //
sāvitrī bhārate janma svecchayā labdhumāgatā

rāgādhiṣṭhātṛdevī vā svayaṃ sākṣātsarasvatī //
sarvavidyāḥ prakaṭituṃ svecchayā janma bhārate

etāsu madhye kā vā tvaṃ nāhaṃ tarkitumīśvaraḥ //
yā sā bhavati kalyāṇi parituṣṭā ca māṃ bhava

sati tvayi prasannāyāṃ prasannaḥ parameśvaraḥ //
pativratāyāṃ tuṣṭāyāṃ tuṣṭo nārāyaṇaḥ svayam

tuṣṭe nārāyaṇe deve śaśvattuṣṭaṃ jagattrayam //
tarumūleṣu sikteṣu śākhāḥ siktā yathā priye

śiśostadvacanaṃ śrutvā prahasya parameśvarī //
uvāca vacanaṃ cāru karṇapīyūṣamīśvarī

pārvatyuvāca // nāhaṃ vedaprasūrlakṣmīrvāgadhiṣṭhātṛdevatā //
janma me bhārate varṣe sāmprataṃ śailakanyakā

pūrvaṃ janma dakṣagehe satī śaṃkarakāminī //
yogena tyaktadehā'haṃ tātabhartṛvinindayā

atra janmani puṇyena samprāpte śaṃkare dvija //
māṃ tyaktvā bhasmasātkṛtvā manmathaṃ sa jagāma ha

prayāte śaṃkare tāpādvrīḍayā'haṃ piturgṛhāt //
āgamattapase cittaṃ mamedaṃ svarṇadītaṭe

tapaḥ kṛtvā kaṭhoraṃ ca suciraṃ prāṇavallabham //
aprāpyāgniṃ praveṣṭuṃ ca tvāṃ ca dṛṣṭvā kṣaṇaṃ sthitā

gaccha tvaṃ praviśāmyagnau pralayāgniśikhopame //
kṛtvā svakāmanāṃ vipra haraprāptimanīṣitam

yatra yatra janurlabdhvā labhiṣyāmi śivaṃ param //
prāṇādhikaṃ priyaṃ kāntaṃ vibhuṃ janmani janmani

sarvā hi svapriyaṃ labdhuṃ labhanti janma vāñchitam //
tajjanma patilābhārthaṃ sarvāsāṃ ca śrutau śrutam

prāktanīyo hi yo bhartā sa tāsāṃ pratijanmani //
yā strī yeṣāṃ suniyatā sā teṣāṃ janmajanmani

taddehamiha na prāpya kṛtvā ghorataraṃ tapaḥ //
kṛtvā'gnikuṇḍe kāmyaṃ ca labhiṣyāmi paratra tam

ityuktvā pārvatī tatra tatpuraḥ praviveśa ha //
niṣidhyamānā purato brāhmaṇena punaḥ punaḥ

vahnipraveśaṃ kurvantyāḥ pārvatyāḥ parameśvari //
babhūva tapasā sadyo vahniścandanavaddhruvam//

kṣaṇaṃ tadantare sthitvā cotpatantīṃ śivāṃ śivaḥ //
punaḥ prapaccha sahasā vṛndāvanavinodini

śrīmahādeva uvāca //
aho tapaste kiṃ bhadre na buddhaṃ kiṃcideva hi //
na dagdho vahninā deho na ca prāpto manīṣitaḥ

śivaṃ kalyāṇarūpaṃ ca bhartāraṃ kartumicchasi//
avigrahaṃ patiṃ kṛtvā kiṃ vā te vāñchitaṃ bhavet

saṃhartāraṃ ca bhartāraṃ yadīcchasi śucismite //
kāntamicchati kā vā strī sarvasaṃhārakāraṇam

mokṣaṃ vāñchasi ceddevi kṛtvā kāntaṃ svarūpiṇam //
sarvamuktipradā tvaṃ ca tapasyā viphalā tava//

śivaśca maṅgale mokṣe saṃhartā na ca dṛśyate //
śivaśabdasya cānyo'rtho na hi vede nirūpitaḥ

taṃ ca saṃhārakartāraṃ yadi vāñchasi sundari //
labhiṣyase rataṃ rudraṃ sarvalokabhayaṃkaram

na bhaviṣyati mokṣaste svābhīṣṭaṃ devasevanam //
harismṛtiramoghā ca sarvamaṃgaladā sadā

śīghraṃ piturgṛhaṃ gaccha tatra drakṣyasi śaṃkaram //
mamāśiṣā svatapasāṃ phalena ca sudurlabham

ityuktvā pārvatīṃ viprastatraivāntaradhīyata //
durgā yayau piturgehaṃ mahādeveti vādinī

pārvatyāgamanaṃ śrutvā menakā ca himālayaḥ //
divyaṃ yānaṃ puraskṛtya prayayau harṣavihvalaḥ

saṃsthāpya maṃgalaghaṭānrājavartmani rādhike //
candanāgurukastūrīphalaśākhāsamanvitān

paṭṭasūtrasannibaddharasālapallavānvitaiḥ //
paritaḥ parito rambhāstambhavṛndasamanvite

patiputravatīyoṣitsamūhairdīpahastakaiḥ //
pūrṇairlājādhānyadūrvāphalapuṣpasamanvitaiḥ

supuṇyairbrāhmaṇaiścāpi munibhirbrahmacāribhiḥ //
naṭībhirnartakībhiśca gajendraiḥ pariśobhite

purohitaiśca saṃyuktaiḥ kurvadbhirmaṅgaladhvanim //
sucārumālatīmālāhastaiḥ śastaiḥ praśaṃsitaiḥ ६३ //
nānāprakāravādyaiśca śaṃkhadhvanisunāditaiḥ//
sindūrareṇubhiścārucandanadravapaṅkilam

praviśya nagaraṃ durgā dadarśa pitarau puraḥ //
suprasannau pradhāvantau harṣāśrupulakānvitau

prasannavadanā devī cālibhiḥ praṇanāma tau //
saṃyujyāthāśiṣaṃ tau ca cakratustāṃ ca vakṣasi //

he vatse vatsetyuccārya rudantau premavihvalau//
tadā tāṃ ca rathe kṛtvā jagmaturnijamandiram

striyo nirmaṃcchanaṃ cakrurviprā yuyujurāśiṣam//
brāhmaṇebhyaśca bandibhyaḥ parvatendro dhanaṃ dadau

maṅgalaṃ kārayāmāsa pāṭhayāmāsa chāndasam //
evaṃ svakanyayā sārddhaṃ tasthatustau svamandire

sukhena vasatau tau hi harṣanirbharamānasau //
ekadā ca tapaḥ kartuṃ jagāma svarṇadīṃ giriḥ

menakākanyayā sārddhamuvāsa prāṅgaṇe mudā //
etasminnantare bhikṣurnartakaśca sugāyanaḥ

sahasaika ājagāma menakāsannidhiṃ mudā //
śṛṅgavādyaṃ vāmahaste ḍamaruṃ dakṣiṇe tathā

kṛtvā vibhūtigātro'tivṛddho'tīva jarāturaḥ //
pṛṣṭhakantho raktavāsāḥ sukaṇṭho'timanoharaḥ

jagau mama guṇākhyānaṃ kṛtvā nṛtyaṃ manoharam //
vādayāmāsa śṛṅgaṃ ca kṣaṇaṃ ḍamarukaṃ tathā

ājagmurnāgarā bālā bālikā harṣavihvalāḥ //
vṛddhā yuvāno yuvatīsamūho vṛddhayoṣitaḥ

śrutvā tu sundaraṃ gītaṃ sutānasvarasaṃyutam //
sahasā mumuhuḥ sarve tena mūrcchāmavāpnuvan

mūrchāṃ saṃprāpa sā durgā dadarśa hṛdi śaṅkaram //
triśūlapaṭṭiśakaraṃ vyāghracarmadharaṃ param

vibhūtibhūṣaṇaṃ ramyamasthimālāṃ sunirmalām //
īṣaddhāsyaprasannāsyaṃ suprasannaṃ trilocanam

mālāhastaṃ paṃcavaktraṃ nāgayajñopavītakam//
varaṃ vṛṇvityuktavantaṃ sundaraṃ candraśekharam

hṛdayasthaṃ haraṃ dṛṣṭvā manasā taṃ nanāma sā //
varaṃ vavre mānase sā tvaṃ patirme bhaveti ca

evaṃ dattvā śivastasya cāntardhānaṃ cakāra saḥ //
na dṛṣṭvā hṛdi taṃ durgā saṃprāpya cetanāṃ punaḥ

dadarśa cakṣurunmīlya bhikṣukaṃ gāyakaṃ puraḥ //
nṛtyasaṃgītataḥ sā tu bhikṣukasya ca menakā

dātuṃ yayau sā ratnāni svarṇapātrasthitāni ca //
bhikṣāṃ yayāce bhikṣustāṃ durgāṃ nānyāṃ gṛhītavān

punaśca nartanaṃ kartumudyataḥ kautukena ca //
menā tadvacanaṃ śrutvā cukopa vismayaṃ yayau

bhikṣukaṃ bhartsayāmāsa bahiḥ kartumuvāca tam //
patnī trilokanāthasya śivasya paramātmanaḥ

yāñcāmimāṃ prakurvantaṃ dūraṃ kuru subhāṣiṇam//
etasminnantare taptvā giriḥ svālayamāyayau

dadarśa purato bhikṣuṃ prāṅgaṇasthaṃ manoharam//
kṛtvā nārāyaṇārcāṃ ca gaṅgātīre manohare

tanmūrtidhyānaviśleṣaśokādudvignamānasaḥ //
śrutvā menāmukhādvārtāṃ jahāsa ca cukopa saḥ

ājñāṃ cakāra svacaraṃ bahiḥ kartuṃ ca bhikṣukam //
ākāśāmiva duḥsparśaṃ prajvalantaṃ svatejasā /

na śaśāka bahiḥ kartuṃ samīpaṃ gantumakṣamaḥ//
dadarśa bhikṣukaṃ śailaḥ kṣaṇaṃ cārucaturbhujam

kirīṭinaṃ kuṇḍalinaṃ pītāmbaradharaṃ param//
suveṣaṃ sundaraśyāmamīṣaddhāsyaṃ manoharam

candanokṣitasarvāṅgaṃ bhaktānugrahakātaram //
yadyatpuṣpaṃ pradattaṃ ca pūjākāle gadābhṛte

gātre śirasi tatsarvaṃ bhikṣukasya dadarśa ha //
dhūpaḥ pradīpo yo datto naivedyaṃ vā manoharam

dadarśa śailastatsarvaṃ bhikṣukasya puraḥ sthitam//
kṣaṇaṃ dadarśa dvibhujaṃ vinodamuralīkaram

gopaveṣaṃ kiśoraṃ ca sasmitaṃ śyāmasundaram //
mayūrapicchacūḍaṃ ca ratnālaṃkārabhūṣitam //

candanokṣitasarvāṅgaṃ vanamālāvibhūṣitam //
kṣaṇaṃ dadarśa svacchaṃ ca śaṃkaraṃ caṃdraśekharam

triśūlapaṭṭiśakaraṃ vyāghracarmāmbaraṃ param //
vibhūtigātramamalamasthimālāvibhūṣitam

nāgayajñopavītaṃ ca taptasvarṇajaṭādharam //
ḍamaruśṛṃgahastaṃ ca supraśastaṃ manoharam

prajapantaṃ harernāma śvetābjabījamālayā //
īṣaddhāsyaprasannāsyaṃ bhaktānugrahakātaram

svatejasā prajvalantaṃ pañcavaktraṃ trilocanam //
kṣaṇaṃ dadarśa jagatāṃ sraṣṭāraṃ ca caturmukham

japantaṃ śrīharernāma svacchasphaṭikamālayā //
kṣaṇaṃ sūrya svarūpaṃ ca dadarśa triguṇātmakam

dadarśa tamatīvraṃ tu jvalantaṃ brahmatejasā //
kṣaṇamagnisvarūpaṃ ca jvalantamatitejasā

kṣaṇamāhlādajanakaṃ candrarūpaṃ dadarśa ha //
kṣaṇaṃ tejaḥsvarūpaṃ ca nirākāraṃ nirañjanam

nirliptaṃ ca nirīhaṃ ca paramātmasvarūpiṇam //
evaṃ svecchāmayaṃ dṛṣṭvā nānārūpadharaṃ param

harṣāśrupulakaḥ śailo daṇḍavatpraṇanāma tam //
bhaktyā pradakṣiṇīkṛtya praṇamya ca punaḥ punaḥ

samutpatya harṣayukto dadarśa punareva tam//
vāstavaṃ bhikṣukaṃ dṛṣṭvā śailendro viṣṇumāyayā

visasmāra ca tatsarvaṃ nānārūpadharaṃ param //
bhikṣāṃ yayāce bhikṣustaṃ bhikṣāsthālīsvapārśvakam

raktāmbaraḥ śṛṅgavādyavicitraḍamaruḥ kare //
ādātumutsuko durgāṃ nānyāṃ bhikṣuḥ kadācana

na svīcakāra śailendro mohito viṣṇumāyayā //
bhikṣuḥ kiṃcinna jagrāha tatraivāntaradhīyata

tadā babhūva jñānaṃ ca menakāśailayoḥ priye //
aho dṛṣṭo jagannātha āvābhyāṃ svapnavaddine

āvāṃ śivau vañcayitvā svasthānaṃ gatavānvibhuḥ //
tayorbhaktiṃ śive dṛṣṭvā sarve devāśca cintitāḥ

cakruḥ śakrādayo yuktiṃ sumero rakṣaṇe bharāt //
ekāntabhaktyā śailaścetkanyāṃ tasmai pradāsyati

dhruvaṃ nirvāṇatāṃ sadyaḥ saṃprāpnotyeva bhārate //
anantaratnādhāraścetpṛthvī tyaktvā prayāsyati

ratnagarbhābhidhā bhūmermithyaiva bhavitā dhruvam //
sthāvaratvaṃ parityajya divyarūpaṃ vidhāya saḥ

kanyāṃ śūlabhṛte dattvā viṣṇulokaṃ gamiṣyati //
nārāyaṇasya sārūpyaṃ bhaviṣyatyeva līlayā

saṃprāpya pārṣadatvaṃ ca haridāso bhaviṣyati //
daśavāpīsamā kanyā dīyate brāhmaṇāya tām

vedajñāya pavitrāya cāpratigrahaśāline //
saṃdhyāyajñavedapāṭhakāriṇe satyavādine

asyai pradattā kanyā ca daśavāpīphalapradā //
trisaṃdhyākāriṇe satyavādine gṛhaśāline

vedajñāya suviprāya dattvā suphaladāyinī //
paradāragṛhītāya yājakāya dvijātaye

śaṭhāya saṃdhyāhīnāya vāpyaikaphaladā sutā //
sarvasaṃdhyāsvagāyatrīvihīnāya śaṭhāya ca

vaiśyodbhavāya dattā yā vāpyarddhaphaladā smṛtā //
pāpine śūdrajātāya viprakṣatrodbhavāya ca

dattvā cāṇḍālatulyāya kanyā sā narakapradā //
viṣṇubhaktāya viduṣe viprāya satyavādine

jitendriyāya dattā yā viṃśadvāpīphalapradā //
ṣaṣṭi varṣasahasrāṇi divyarūpaṃ vidhāya ca

evaṃbhūtāya dattā cenmodate viṣṇumaṃdire //
dattvā kanyāṃ suśīlāṃ ca harāya haraye'tha vā

nārāyaṇasvarūpaṃ ca bhavedeva śrutau śrutam //
viṣṇubhakto yadā kanyāṃ dadāti viṣṇuprītaye

sa labheddharidāsyaṃ ca dhruvaṃ viprodbhavāya ca //
ityālocya surāḥ sarve kṛtvā ca mantraṇāṃ priye

guruṃ prasthāpituṃ jagmurhimālayagṛhaṃ prati //
gatvā praṇamya ca guruṃ sarve cakrurnivedanam

himālayagṛhaṃ gatvā kuru nindāṃ ca śūlinaḥ //
pinākinaṃ vinā durgā varaṃ nānyaṃ variṣyati

anicchayā sutāṃ dattvā phalaṃ tūrṇaṃ labhiṣyati //
kālena yātu śailendraścedānīṃ bhuvi tiṣṭhatu

anantaratnādhāraṃ ca tvameva rakṣa bhārate //
devānāṃ vacanaṃ śrutvā pradadau karṇayoḥ karau

na svīcakāra svaguruḥ smarannārāyaṇeti ca //
uvāca devavargāṃśca saṃbhartsya ca punaḥ punaḥ

vedavedāntavijñātā mahābhakto harau hare //
bṛhaspatiruvāca //
śrūyatāṃ madvacaḥ satyaṃ he devāḥ svārthasādhakāḥ

nītisāraṃ ca vedoktaṃ pariṇāmasukhāvaham //
harakeśavayorbhaktaṃ ye ca nindanti pāpinaḥ

bhūdevānbrāhmaṇāṃścaiva svaguruṃ ca pativratāḥ//
patibhikṣubrahmacārisṛṣṭibījānsurāṃstathā

pacyante kālasūtre te yāvaccandradivākarau //
śleṣmamūtrapurīṣeṣu śerate te divāniśam

bhakṣitāḥ kīṭanikaraiḥ śabdaṃ kurvaṃti kātarāḥ //
ye nindanti ca brahmāṇaṃ sraṣṭāraṃ jagatāṃ gurum

śivaṃ surāṇāṃ pravaraṃ durgāṃ lakṣmīṃ sarasvatīm //
gītāṃ ca tulasīṃ gaṅgāṃ vedāṃśca vedamātaram

vrataṃ tapasyāṃ pūjāṃ ca mantraṃ maṃtrapradaṃ gurum//
te pacyante'ndhakūpe vai cāyuṣo'rdhaṃ vidheraho

bhakṣitāḥ sarpasaṃghaiśca śabdaṃ kurvanti saṃtatam //
ye nindanti hṛṣīkeśaṃ devasāmyaṃ vidhāya ca

viṣṇubhaktipradaṃ caiva purāṇaṃ ca śruteḥ param //
rādhā tadaṅgajā gopī brāhmaṇāṃśca sadārcitān

te pacyante'vaṭe devā vidhāturāyuṣā samam //
adhomukhā ūrdhvajaṅghāḥ sarpasaṃghaiśca veṣṭitāḥ

bhakṣitā vikṛtākāraiḥ kīṭaiḥ sarpasamākṛtaiḥ //
atīva kātarā bhītāḥ śabdaṃ kurvanti saṃtatam

śleṣmamūtrapurīṣāṇi dhruvaṃ bhakṣanti kṣobhitāḥ //
ulkāṃ dadati ruṣṭāśca tanmukhe yamakiṃkarāḥ

trisandhyaṃ tarjanaṃ kṛtvā kurvanti daṇḍatāḍanam //
kurvanti mūtrapānaṃ ca prahāraistṛṣitānbhiyā

tadā kalpāntare sraṣṭuṃ sṛṣṭiṃ ca prathame punaḥ //
teṣāṃ bhavetpratīkāra ityāha kamalodbhavaḥ

kṛtvā hi śivanindāṃ ca yāsyanti narakaṃ surāḥ //
imamevopakāraṃ ca kartumicchatha putrakāḥ

brahmaṇā prerito dakṣo dattvā śūlabhṛte sutām //
na pāpaṃ paramaiśvaryaṃ saṃprāpa haranindakaḥ

anicchayā sutāṃ dattvā turyapuṇyaṃ lalābha saḥ //
aho vihāya sārūpyaṃ tucchaṃ svargaṃ lalābha saḥ

kaścinmadhye ca yuṣmākaṃ gatvā śailagṛhaṃ surāḥ //
saṃpādayatu svamataṃ śailendrasya prayatnataḥ

anicchayā sutāṃ dattvā sukhaṃ tiṣṭhatu bhārate //
tasmai bhaktyā sutāṃ dattvā mokṣaṃ prāpsyati niścitam

paścātsaptarṣayaḥ sarve gṛhītvā tāmarundhatīm //
dhruvaṃ tasya gṛhaṃ gatvā bodhayiṣyanti parvatam

vinā pinākinaṃ durgā varaṃ nānyaṃ variṣyati //
anicchayā sutāṃ tasmai pradāsyati sutājñayā

ityevaṃ kathitaṃ sarvaṃ devā gacchantu mandiram //
ityuktvā vākpatiḥ śīghraṃ tapase svarṇadīṃ gataḥ

iti śrībrahmavaivarte mahāpurāṇe śrīkṛṣṇajanmakhaṇḍe nārāyaṇanāradasaṃvāde catvāriṃśo'dhyāyaḥ