Brahmavaivarta Purana · Chapter 3.31

nārada uvāca//
bhagavañchrotumicchāmi kiṃ mantraṃ bhagavānharaḥ //
kṛpayā'dātparaśurāmāya stotraṃ ca varma ca

ko vā'sya mantrasyārādhyaḥ kiṃ phalaṃ kavacasya ca //
stavanasya phalaṃ kiṃ vā tadbhavānvaktumarhati

nārāyaṇa uvāca //
mantrārādhyo hi bhagavānparipūrṇatamaḥ svayam //
golokanāthaḥ śrīkṛṣṇo gopagopīśvaraḥ prabhuḥ

trailokyavijayaṃ nāma kavacaṃ paramādbhutam //
stavarājaṃ mahāpuṇyaṃ bhūtiyogasamudbhavam

mantraṃ kalpataruṃ nāma sarvakāmaphalapradam //
dadau paraśurāmāya ratnaparvatasannidhau

svayaṃprabhānadītīre pārijātavanāntare //
āśrame lokadevasya mādhavasya ca sannidhau

mahādeva uvāca // vatsāgaccha mahābhāga bhṛguvaṃśasamudbhava //
putrādhiko'si premṇā me kavacagrahaṇaṃ kuru

śṛṇu rāma pravakṣyāmi brahmāṇḍe paramādbhutam //
trailokyavijayaṃ nāma śrīkṛṣṇasya jayāvaham

śrīkṛṣṇena purā dattaṃ goloke rādhikāśrame //
rāsamaṇḍalamadhye ca mahyaṃ vṛndāvane vane

atiguhyataraṃ tattvaṃ sarvamantraughavigraham //
puṇyātpuṇyataraṃ caiva paraṃ snehādvadāmi te

yaddhṛtvā paṭhanāddevī mūlaprakṛtirīśvarī //
śumbhaṃ niśumbhaṃ mahiṣaṃ raktabījaṃ jaghāna ha

yaddhṛtvā'haṃ ca jagatāṃ saṃharttā sarvatattvavit//
avadhyaṃ tripuraṃ pūrvaṃ durantamapi līlayā

yaddhṛtvā paṭhanādbrahmā sasṛje sṛṣṭimuttamām //
yaddhṛtvā bhagavāñcheṣo vidhatte viśvameva ca

yaddhṛtvā kūrmarājaśca śeṣaṃ dhatte hi līlayā //
yaddhṛtvā bhagavānvāyurviśvādhāro vibhuḥ svayam

yaddhṛtvā varuṇaḥ siddhaḥ kuberaśca dhaneśvaraḥ //
yaddhṛtvā paṭhanādindro devānāmadhipaḥ svayam //

yaddhṛtvā bhāti bhuvane tejorāśiḥ svayaṃ raviḥ //
yaddhṛtvā paṭhanāccandro mahābalaparākramaḥ

agastyaḥ sāgarānsapta yaddhṛtvā paṭhanātpapau //
cakāra tejasā jīrṇaṃ daityaṃ vātāpisaṃjñakam

yaddhṛtvā paṭhanāddevī sarvādhārā vasundharā //
yaddhṛtvā paṭhanātpūtā gaṅgā bhuvanapāvanī

yaddhṛtvā jagatāṃ sākṣī dharmo dharmabhṛtāṃ varaḥ//
sarvavidyādhidevī sā yacca dhṛtvā sarasvatī

yaddhṛtvā jagatāṃ lakṣmīrannadātrī parātparā //
yaddhṛtvā paṭhanādvedānsāvitrī sā suṣāva ca

vedāśca dharmmavaktāro yaddhṛtvā paṭhanād bhṛgo //
yaddhṛtvā paṭhanācchuddhastejasvī havyavāhanaḥ //
sanatkumāro bhagavānyaddhṛtvā jñānināṃ varaḥ

dātavyaṃ kṛṣṇabhaktāya sādhave ca mahātmane //
śaṭhāya paraśiṣyāya dattvā mṛtyumavāpnuyāt

trailokyavijayasyāsya kavacasya prajāpatiḥ //
ṛṣiśchandaśca gāyatrī devo rāseśvaraḥ svayam

trailokyavijayaprāptau viniyogaḥ prakīrttitaḥ //
parātparaṃ ca kavacaṃ triṣu lokeṣu durlabham

praṇavo me śiraḥ pātu śrīkṛṣṇāya namaḥ sadā //
pāyātkapālaṃ kṛṣṇāya svāhā pañcākṣaraḥ smṛtaḥ

kṛṣṇeti pātu netre ca kṛṣṇa svāheti tārakam //
haraye nama ityevaṃ bhrūlatāṃ pātu me sadā

ॐ goviṃdāya svāheti nāsikāṃ pātu santatam //
gopālāya namo gaṇḍau pātu me sarvataḥ sadā

ॐ namo gopāṅganeśāya karṇau pātu sadā mama //
ॐ kṛṣṇāya namaḥ śaśvatpātu me'dharayugmakam

ॐ govindāya svāheti dantaughaṃ me sadā'vatu //
pātu kṛṣṇāya dantādho dantordhvaṃ klīṃ sadā'vatu

ॐ śrīkṛṣṇāya svāheti jihvikāṃ pātu me sadā//
rāseśvarāya svāheti tālukaṃ pātu me sadā

rādhikeśāya svāheti kaṇṭhaṃ pātu sadā mama //
namo gopāṅganeśāya vakṣaḥ pātu sadā mama

ॐ gopeśāya svāheti skandhaṃ pātu sadā mama//
namaḥ kiśoraveṣāya svāhā pṛṣṭhaṃ sadā'vatu

udaraṃ pātu me nityaṃ mukundāya namaḥ sadā//
ॐ hrīṃ klīṃ kṛṣṇāya svāheti karau pātu sadā mama

ॐ viṣṇave namo bāhuyugmaṃ pātu sadā mama//
ॐ hrīṃ bhagavate svāhā nakharaṃ pātu me sadā

ॐ namo nārāyaṇāyeti nakharandhraṃ sadā'vatu//
ॐ hrīṃ hrīṃ padmanābhāya nābhiṃ pātu sadā mama

ॐ sarveśāya svāheti kaṅkālaṃ pātu me sadā //
ॐ gopīramaṇāya svāhā nitambaṃ pātu me sadā

ॐ gopīramaṇanāthāya pādau pātu sadā mama //
ॐ hrīṃ klīṃ rasikeśāya svāhā sarvaṃ sadā'vatu

ॐ keśavāya svāheti mama keśānsadā'vatu //
namaḥ kṛṣṇāya svāheti brahmarandhraṃ sadā'vatu

ॐ mādhavāya svāheti me lomāni sadā'vatu//
ॐ hrīṃ śrīṃ rasikeśāya svāhā sarvaṃ sadā'vatu

paripūrṇatamaḥ kṛṣṇaḥ prācyāṃ māṃ sarvadā'vatu //
svayaṃ golokanātho māmāgneyyāṃ diśi rakṣatu

pūrṇabrahmasvarūpaśca dakṣiṇe māṃ sadā'vatu //
nairṛtyāṃ pātu māṃ kṛṣṇaḥ paścime pātu māṃ hariḥ

govindaḥ pātu māṃ śaśvadvāyavyāṃ diśi nityaśaḥ //
uttare māṃ sadā pātu rasikānāṃ śiromaṇiḥ

aiśānyāṃ māṃ sadā pātu vṛndāvanavihārakṛt //
vṛndāvanīprāṇanāthaḥ pātu māmūrdhvadeśataḥ

sadaiva mādhavaḥ pātu balihārī mahābalaḥ //
jale sthale cāntarikṣe nṛsiṃhaḥ pātu māṃ sadā

svapne jāgaraṇe śaśvatpātu māṃ mādhavaḥ sadā //
sarvāntarātmā nirliptaḥ pātu māṃ sarvato vibhuḥ

iti te kathitaṃ vatsa sarvamantraughavigraham //
trailokyavijayaṃ nāma kavacaṃ paramādbhutam

|
mayā śrutaṃ kṛṣṇavaktrātpravaktavyaṃ na kasyacit //
gurumabhyarcya vidhivatkavacaṃ dhārayettu yaḥ

kaṇṭhe vā dakṣiṇe bāhau so'pi viṣṇurna saṃśayaḥ //
sa ca bhakto vasedyatra lakṣmīrvāṇī vasettataḥ

yadi syātsiddhakavaco jīvanmukto bhavettu saḥ //
niścitaṃ koṭivarṣāṇāṃ pūjāyāḥ phalamāpnuyāt

rājasūyasahasrāṇi vājapeyaśatāni ca//
aśvamedhāyutānyeva naramedhāyutāni ca

mahādānāni yānyeva prādakṣiṇyaṃ bhuvastathā //
trailokyavijayasyāsya kalāṃ nārhanti ṣoḍaśīm

vratopavāsaniyamaṃ svādhyāyādhyayanaṃ tapaḥ //
snānaṃ ca sarvatīrtheṣu nāsyārhanti kalāmapi // ५२ ///
siddhatvamamaratvaṃ ca dāsatvaṃ śrīharerapi //
yadi syātsiddhakavacaḥ sarvaṃ prāpnoti niścitam//
sa bhavetsiddhakavaco daśalakṣaṃ japettu yaḥ//
yo bhavetsiddhakavacaḥ sarvajñaḥ sa bhaveddhruvam

idaṃ kavacamajñātvā bhajetkṛṣṇaṃ sumandadhīḥ//
koṭikalpaṃ prajapto'pi na mantraḥ siddhidāyakaḥ

gṛhītvā kavacaṃ vatsa mahīṃ niḥkṣatriyāṃ kuru//
trissaptakṛtvo niśśaṃkaḥ sadānando hi līlayā

/
rājyaṃ deyaṃ śiro deyaṃ prāṇā deyāśca putraka //|
evaṃbhūtaṃ ca kavacaṃ na deyaṃ prāṇasaṃkaṭe

iti śrībrahmavaivarte mahāpurāṇe tṛtīye gaṇapatikhaṇḍe nāradanārāyaṇasaṃvāde paraśurāmāya śrīkṛṣṇakavacapradānaṃ nāmaikatriṃśattamo'dhyāyaḥ