Brahmavaivarta Purana · Chapter 3.21

nārada uvāca //
te devā brahmaśāpena niḥśrīkā kena vā prabho //
babhūvustadrahasyaṃ ca gopanīyaṃ sudurlabham

kathaṃ vā prāpurete tāṃ kamalāṃ jagatāṃ prasūm //
kiṃ cakāra mahendraśca tadbhavānvaktumarhati

nārāyaṇa uvāca //
gajendreṇa parābhūto rambhayā ca sumandadhīḥ //
bhraṣṭaśrīrdainyayuktaśca sa jagāmāmarāvatīm //

tāṃ dadarśa nirānando nirānandāṃ purīṃ mune //
dainyagrastāṃ bandhuhīnāṃ vairivargaiḥ samākulām

iti śrutvā dūtamukhājjagāma gurumandiram //
tena devagaṇaiḥ sārddhaṃ jagāma brahmaṇaḥ sabhām

gatvā nanāma taṃ śakraḥ suraiḥ sārddhaṃ tathā guruḥ //
tuṣṭāva vedavākyaiśca stotreṇāpi ca saṃyataḥ

pravṛttiṃ kathayāmāsa vākpatistaṃ prajāpatim //
śrutvā brahmā namravaktraḥ pravaktumupacakrame

brahmovāca // matprapautro'si devendra śaśvadrājañchriyā jvalan //
lakṣmīsamaśacībharttā parastrīlolupaḥ sadā

gautamasyābhiśāpena bhagāṃgaḥ surasaṃsadi //
punarlajjāvihīnastvaṃ parastrīratilolupaḥ

yaḥ parastrīṣu niratastasya śrī vā kuto yaśaḥ //
sa ca nindyaḥ pāpayuktaḥ śaśvatsarvasabhāsu ca

naivedyaṃ śrīharereva dattaṃ durvāsasā ca te //
gajamūrdhni tvayā nyastaṃ rambhayā''hṛtacetasā

kva sā rambhā sarvabhogyā kvādhunā tvaṃ śriyā hataḥ //
sarvasaukhyapradātrī tvāṃ gatā tyaktvā kṣaṇena sā

veśyā saśrīkamicchantī niḥśrīkaṃ na ca cañcalā //
navaṃ navaṃ prārthayantī parinindya purātanam

yadgataṃ tadgataṃ vatsa niṣpannaṃ na nivarttate //
bhaja nārāyaṇaṃ bhaktyā padmāyāḥ prāptihetave

ityuktvā taṃ jagatsraṣṭuḥ stotraṃ ca kavacaṃ dadau //
nārāyaṇasya mantraṃ ca nārāyaṇaparāyaṇaḥ

sa taiḥ sārddhaṃ ca guruṇā hyajapanmantramīpsitam //
gṛhītvā kavacaṃ tena paryaṣṭautpuṣkare harim

varṣamekaṃ nirāhāro bhārate puṇyade śubhe //
siṣeve kamalākāntaṃ kamalāprāptihetave

āgatya taṃ haristasmai vāñchitaṃ ca varaṃ dadau //
lakṣmīstotraṃ ca kavacaṃ mantramaiśvaryyavarddhanam

dattvā jagāma vaikuṇṭhamindraḥ kṣīrodameva ca //
gṛhītvā kavacaṃ stutvā prāpa padmālayāṃ mune

sureśvaro'riṃ jitvā vai hyalabhaccāmarāvatīm //
pratyekaṃ ca surāḥ sarve svālayaṃ prāpurīpsitam

iti śrībrahmavaivartte mahāpurāṇe tṛtīye gaṇapatikhaṇḍe nāradanārāyaṇasaṃvāde śakralakṣmīprāptirnāmaikaviṃśatitamo'dhyāyaḥ