Brahmavaivarta Purana · Chapter 3.20

nārada uvāca //
hareraṃśasamutpanno haritulyo bhavāndhiyā //
tejasā vikrameṇaiva matpraśnaṃ śrotumarhasi

vighnanighnasya yadvighnaṃ śrutaṃ tatparamādbhutam //
tadvighnakāraṇaṃ caiva viśvakāraṇavaktrataḥ

adhunā śrotumicchāmi paraṃ sandehabhañjanam //
trailokyanāthatanaye gajāsyāyojanārthakam

sthiteṣvanyeṣu bahuṣu jantuṣvabjabhuvaḥ pate //
suprāṇināṃ surūpeṣu nānārūpeṣu rūpiṇām

śrīnārāyaṇa uvāca //
gajāsyayojanāyāśca kāraṇaṃ śṛṇu nārada //
gopyaṃ sarvapurāṇeṣu vedeṣu ca sudurlabham

tāraṇaṃ sarvaduḥkhānāṃ kāraṇaṃ sarvasampadām //
hāraṇaṃ vipadāṃ caiva rahasyaṃ pāpamocanam

mahālakṣmyāśca caritaṃ sarvamaṅgalamaṅgalam //
sukhadaṃ mokṣadaṃ caiva caturvargaphalapradam

śṛṇu tāta pravakṣye'hamitihāsaṃ purātanam //
rahasyaṃ pādmakalpasya purā tātamukhācchrutam

ekadaiva mahendraśca puṣpabhadrāṃ nadīṃ yayau //
mahāsampanmadonmattaḥ kāmī rājaśriyā'nvitaḥ

tattīre'tirahaḥsthāne puṣpodyāne manohare //
atīva durgame'raṇye sarvajantuvivarjite

bhramaradhvanisaṃyukte puṃskokilarutaśrave //
sugandhipuṣpa saṃśliṣṭavāyunā surabhīkṛte

dadarśa rambhāṃ tatraiva candralokātsamāgatām //
surataśramaviśrāntikāmukīṃ kāmakāmukīm //

icchantīmīpsitāṃ krīḍāṃ gacchantīṃ madanāśramam //
ekākinīmunmanaskāṃ manmathodgatamānasām

suśroṇīṃ sudatīṃ śyāmāṃ bimbādharasaroruhām//
bṛhannitambabhārārttāṃ mattavāraṇagāminīm

sasmitāsyaśaraccandrāṃ sukaṭākṣaṃ ca bibhratīm//
bibhratīṃ kabarīṃ ramyāṃ mālatīmālyaśobhitām

vahniśuddhāṃśukadharāṃ ratnabhūṣaṇabhūṣitām //
kastūrībindunā sārddhaṃ sindūraṃ bibhratīṃ mudā //

nīlotpaladalaśyāmakajjalojjalalocanām //
maṇikuṇḍalayugmāḍhyagaṇḍasthalavirājitām

atyunnataṃ sukaṭhinaṃ patrarājivirājitam //
sukhadaṃ rasikānāṃ ca stanayugmaṃ ca bibhratīm

sarvaśobhāṃ suveṣāḍhyāṃ subhagāṃ suratotsukām //
prāṇādhikāṃ ca devānāṃ svacchāṃ svacchandagāminīm

varāmapsarasāṃ ramyāmatīva sthirayauvanām //
guṇarūpavatīṃ śāntāṃ munimānasamohinīm

dṛṣṭvā tāmativeṣāḍhyāṃ tatkaṭākṣeṇa pīḍitaḥ //
indro'tīndriyacāpalyātpravaktupacakrame

indra uvāca //
kva gacchasi varārohe kva gatā'si manohare //
mayā dṛṣṭā hi sucirātkalyāṇi subhage'dhunā

tavānveṣaṇakarttā'haṃ śrutvā vācikamagrataḥ //
tvadāsaktamanāścāsmi nānyāṃ vai gaṇayāmi ca

suvāsitajalārthī yaḥ kimicchetpaṅkilaṃ jalam //
paṅkaṃ neccheccandanārthī paṅkajārthī na cotpalam

sudhārthī na surāmiccheddugdhārthī nāvilaṃ jalam //
sugandhipuṣpaśāyī yo hyastratalpaṃ na cecchati

svargī ca narakaṃ necchetsubhogī duṣṭabhojanam //
paṇḍitaiḥ saha saṃvāsī necchetstrīsannidhiṃ naraḥ //
vihāya ratnābharaṇaṃ ko'pīcchellohabhūṣaṇam

tvāṃ nāśliṣya mahāvijñāṃ kāṃ mūḍho gantumicchati//
vihāya gaṅgāṃ ko vijño nadīmanyāṃ ca vāṃchati

indriyaiścendriyaratiṃ varddhayantīṃ pade pade //
varaṃ prārthayitāraśca prāṇinaśca sukhārthinaḥ

/
ityevamuktvā bhagavānavaruhya gajeśvarāt //
kāmayuktaśca puratastasthau tasyāśca nārada

śrutvā tadvacanaṃ rambhā mahāśṛṅgāralolupā //
jahāsānamravadanā pulakāñcitavigrahā

smerānanā kaṭākṣeṇa stanorvordarśanena ca //
narmoktigarbhavākyena cāharattasya cetanām

mitaṃ sāraṃ sumadhuraṃ susnigdhaṃ komalaṃ priyam //
puruṣāyattabījaṃ ca pravaktumupacakrame

rambhovāca //
yāsyāmi vāñchitaṃ yatra praśnena tava kiṃ phalam //
nāhaṃ santoṣajananī dhūrttānāṃ duṣṭamitratā

yathā madhukaro lobhātsarvapuṣpāsavaṃ labhet //
svādu yatrātiriktaṃ sa tatra tiṣṭhati santatam

tathaiva kāmukī loke bhramedbhramaravatsadā //
cāñcalyātsa hi kāsveva vāyuvadrasamāharet

supumānaṅgavatstrīṇāṃ yathā śākhāśca śākhiṣu //
kāmukī kākavallolaḥ phalaṃ bhuktvā prayāti ca

svakāryyamuddharedyāvattāvadvā sa prayojanam //
sthitiḥ kāryyānurodhena yathā kāṣṭhe hutāśanaḥ

yāvattaḍāge toyāni tāvadyādāṃsi teṣu ca //
śoṣārambhe ca toyānāṃ yānti sthānāntaraṃ punaḥ

tvaṃ devānāmīśvaro'si kāminīnāṃ ca vāñchitaḥ //
pumāṃsaṃ rasikaṃ śaśvadvāñchanti rasikāḥ sukhāt

yuvānaṃ rasikaṃ śāntaṃ suveṣaṃ sundaraṃ priyam //
guṇinaṃ dhaninaṃ svacchaṃ kāntamicchati kāminī

duśśīlaṃ rogiṇaṃ vṛddhaṃ ratiśaktiviyojitam //
adātāramavijñaṃ ca naiva vāñchanti yoṣitaḥ

kā mūḍhā na ca vāñchanti tvāmevaṃ guṇasāgaram //
tavājñākāriṇīṃ dāsīṃ gṛhāṇātra yathāsukham

ityuktvā sasmitā sā ca taṃ papau vakracakṣuṣā //
kāmāgnidagdhā vigalallajjā tasthau samīpataḥ

jñātvā bhāvaṃ smarārttāyāḥ smaraśāstraviśāradaḥ //
gṛhītvā tāṃ puṣpatalpe vijahāra tayā saha

cucumba rahasi prauḍhāṃ nagnāṃ ca subhagāṃ varām //
pakvabimbādharauṣṭhīṃ ca sudatyā cuṃbitastayā

nānāprakāraśṛṅgārādviparītādikānmune //
sukhī babhūva tasyāṃ vai śṛṃgāro mūrtimāniva

tau kāmāhitacittau no bubudhāte divāniśam //
anyonyagatacittau ca kāmārtau jñānavarjitau

sa ca kṛtvā sthale krīḍāṃ tayā saha sureśvaraḥ//
yayau jalavihārārthaṃ puṣpabhadrānadī jalam

sa cakāra jalakrīḍāṃ tayā saha mudā kṣaṇam //
jalātsthale sthalāttoye vijahāra punaḥ punaḥ

etasminnantare tena vartmanā munipuṃgavaḥ //
saśiṣyo yāti durvāsā vaikuṇṭhācchaṅkarālayam

taṃ ca dṛṣṭvā munīndraṃ ca devendraḥ stabdhamānasaḥ //
nanāmāgatya sahasā dadau tasmai sa cāśiṣaḥ

pārijātaprasūnaṃ yaddattaṃ nārāyaṇena vai //
tacca dattaṃ mahendrāya munīndreṇa mahātmanā

dattvā puṣpaṃ mahābhāgastamuvāca kṛpānidhiḥ//
māhātmyaṃ tasya yatkiṃcidapūrvaṃ munisattamaḥ

durvāsā uvāca //
sarvavighnaharaṃ puṣpaṃ nārāyaṇaniveditama //
mūrdhnīdaṃ yasya devendra jayastasyaiva sarvataḥ

puraḥpūjā ca sarveṣāṃ devānāmagraṇīrbhavet/
tacchāyeva mahālakṣmīrna jahāti kadā'pi tam

jñānena tejasā buddhyā vikrameṇa balena ca //
sarvadevādhikaḥ śrīmānharitulyaparākramaḥ

bhaktyā mūrdhni na gṛhṇāti yo'haṃkāreṇa pāmaraḥ //
naivedyaṃ ca harereva sa bhraṣṭaśrīḥ svajātibhiḥ //
ityuktvā śaṃkarāṃśaśca hyagamacchaṃkarālayam

tatsa rambhāṃtike tiṣṭhaṃścikṣepa gajamastake //
tena bhraṣṭaśriyaṃ dṛṣṭvā sā jagāma surālayam

puṃścalī yogyamicchantī nāparaṃ cañcalā'dhamā //
devarājaṃ parityajya gajarājo mahābalī

praviveśa mahāraṇyaṃ taṃ nikṣipya svatejasā //
tatraiva kariṇīṃ prāpya mattaḥ saṃbubhuje balāt

sā'to babhūva vaśagā yoṣijjātiḥ sukhārthinī //
tayorbabhūvāpatyānāṃ nivahastatra kānane

haristanmastakaṃ chittvā yojayāmāsa bālake //
ityevaṃ kathitaṃ vatsa kiṃ bhūyaḥ śrotumicchasi //
gajāsyayojanāyāśca kāraṇaṃ pāpanāśanam

iti śrībrahmavaivartte mahāpurāṇe tṛtīye gaṇapatikhaṇḍe nāradanārāyaṇasaṃvāde gaṇapatergajāsyayojanāhetukathanaṃ nāma viṃśatitamo'dhyāyaḥ