બ્રહ્મવૈવર્ત પુરાણ · અધ્યાય 3.21

નારદ ઉવાચ ॥
તે દેવા બ્રહ્મશાપેન નિઃશ્રીકા કેન વા પ્રભો ॥
બભૂવુસ્તદ્રહસ્યં ચ ગોપનીયં સુદુર્લભમ્

કથં વા પ્રાપુરેતે તાં કમલાં જગતાં પ્રસૂમ્ ॥
કિં ચકાર મહેન્દ્રશ્ચ તદ્ભવાન્વક્તુમર્હતિ

નારાયણ ઉવાચ ॥
ગજેન્દ્રેણ પરાભૂતો રમ્ભયા ચ સુમન્દધીઃ ॥
ભ્રષ્ટશ્રીર્દૈન્યયુક્તશ્ચ સ જગામામરાવતીમ્ ॥

તાં દદર્શ નિરાનન્દો નિરાનન્દાં પુરીં મુને ॥
દૈન્યગ્રસ્તાં બન્ધુહીનાં વૈરિવર્ગૈઃ સમાકુલામ્

ઇતિ શ્રુત્વા દૂતમુખાજ્જગામ ગુરુમન્દિરમ્ ॥
તેન દેવગણૈઃ સાર્દ્ધં જગામ બ્રહ્મણઃ સભામ્

ગત્વા નનામ તં શક્રઃ સુરૈઃ સાર્દ્ધં તથા ગુરુઃ ॥
તુષ્ટાવ વેદવાક્યૈશ્ચ સ્તોત્રેણાપિ ચ સંયતઃ

પ્રવૃત્તિં કથયામાસ વાક્પતિસ્તં પ્રજાપતિમ્ ॥
શ્રુત્વા બ્રહ્મા નમ્રવક્ત્રઃ પ્રવક્તુમુપચક્રમે

બ્રહ્મોવાચ ॥ મત્પ્રપૌત્રોઽસિ દેવેન્દ્ર શશ્વદ્રાજઞ્છ્રિયા જ્વલન્ ॥
લક્ષ્મીસમશચીભર્ત્તા પરસ્ત્રીલોલુપઃ સદા

ગૌતમસ્યાભિશાપેન ભગાંગઃ સુરસંસદિ ॥
પુનર્લજ્જાવિહીનસ્ત્વં પરસ્ત્રીરતિલોલુપઃ

યઃ પરસ્ત્રીષુ નિરતસ્તસ્ય શ્રી વા કુતો યશઃ ॥
સ ચ નિન્દ્યઃ પાપયુક્તઃ શશ્વત્સર્વસભાસુ ચ

નૈવેદ્યં શ્રીહરેરેવ દત્તં દુર્વાસસા ચ તે ॥
ગજમૂર્ધ્નિ ત્વયા ન્યસ્તં રમ્ભયાઽઽહૃતચેતસા

ક્વ સા રમ્ભા સર્વભોગ્યા ક્વાધુના ત્વં શ્રિયા હતઃ ॥
સર્વસૌખ્યપ્રદાત્રી ત્વાં ગતા ત્યક્ત્વા ક્ષણેન સા

વેશ્યા સશ્રીકમિચ્છન્તી નિઃશ્રીકં ન ચ ચઞ્ચલા ॥
નવં નવં પ્રાર્થયન્તી પરિનિન્દ્ય પુરાતનમ્

યદ્ગતં તદ્ગતં વત્સ નિષ્પન્નં ન નિવર્ત્તતે ॥
ભજ નારાયણં ભક્ત્યા પદ્માયાઃ પ્રાપ્તિહેતવે

ઇત્યુક્ત્વા તં જગત્સ્રષ્ટુઃ સ્તોત્રં ચ કવચં દદૌ ॥
નારાયણસ્ય મન્ત્રં ચ નારાયણપરાયણઃ

સ તૈઃ સાર્દ્ધં ચ ગુરુણા હ્યજપન્મન્ત્રમીપ્સિતમ્ ॥
ગૃહીત્વા કવચં તેન પર્યષ્ટૌત્પુષ્કરે હરિમ્

વર્ષમેકં નિરાહારો ભારતે પુણ્યદે શુભે ॥
સિષેવે કમલાકાન્તં કમલાપ્રાપ્તિહેતવે

આગત્ય તં હરિસ્તસ્મૈ વાઞ્છિતં ચ વરં દદૌ ॥
લક્ષ્મીસ્તોત્રં ચ કવચં મન્ત્રમૈશ્વર્ય્યવર્દ્ધનમ્

દત્ત્વા જગામ વૈકુણ્ઠમિન્દ્રઃ ક્ષીરોદમેવ ચ ॥
ગૃહીત્વા કવચં સ્તુત્વા પ્રાપ પદ્માલયાં મુને

સુરેશ્વરોઽરિં જિત્વા વૈ હ્યલભચ્ચામરાવતીમ્ ॥
પ્રત્યેકં ચ સુરાઃ સર્વે સ્વાલયં પ્રાપુરીપ્સિતમ્

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે શક્રલક્ષ્મીપ્રાપ્તિર્નામૈકવિંશતિતમોઽધ્યાયઃ