Brahmavaivarta Purana · Chapter 3.12

nārāyaṇa uvāca //
durgā tadvacanaṃ śrutvā sasmāra harimīśvaram //
īśvarecchāvaśībhūtaṃ jagadevetyuvāca ha

sā ca devī daivavaśā śaniṃ provāca kautukāt//
paśya māṃ macchiśumiti niṣekaḥ kena vāryyate

pārvatyā vacanaṃ śrutvā śanirmene hṛdā svayam //
paśyāmi kiṃ na paśyāmi pārvatīsutamityaho //
yadi bālo mayā dṛṣṭastasya vighno bhaveddhruvam

anyathā supraśastaṃ ca purataḥ svātmarakṣaṇam //
ityevamuktvā dharmiṣṭho dharmaṃ kṛtvā tu sākṣiṇam//
bālaṃ draṣṭuṃ manaścakre na tu tanmātaraṃ śaniḥ

viṣaṇṇamānasaḥ pūrvaṃ śuṣkakaṇṭhauṣṭhatālukaḥ//
savyalocanakoṇena dadarśa ca śiśormukham

śaneśca dṛṣṭimātreṇa cicchide mastakaṃ mune //
cakṣurnimīlayāmāsa tasthau namrānanaḥ śaniḥ

tasthau ca pārvatīkroḍe tatsarvāṅgaṃ salohitam//
viveśa mastakaṃ kṛṣṇe gatvā golokamīpsitam

mūrcchā saṃprāpa sā devī vilapya ca bhṛśaṃ muhuḥ//
matteva ca pṛthivyāṃ tu kṛtvā vakṣasi bālakam

vismitāste surāḥ sarve citraputtalikā yathā //
devyaśca śailā gandharvāḥ sarve kailāsavāsinaḥ

tānsarvānmūrcchitāndṛṣṭvaivāruhya garuḍaṃ hariḥ //
jagāma puṣpabhadrāṃ sa cottarasyāṃ diśi sthitām

puṣpabhadrānadītīre hyapaśyatkānane sthitam //
gajendraṃ nidritaṃ tatra śayānaṃ hastinīyutam

tathodakchirasaṃ ramyaṃ mūrcchitaṃ surataśramāt //
paritaḥ śāvakātkṛtvā paramānandamānasam

śīghraṃ sudarśanenaiva cicchide tacchiro mudā //
sthāpayāmāsa garuḍe rudhirāktaṃ manoharam

gajacchinnāṅgavikṣepātprabodhaṃ prāpya hastinī //
śāvakānbodhayāmāsa cāśubhaṃ vadatī tadā //
ruroda śāvakaiḥ sārddhaṃ sā vilapya śucāturā

tuṣṭāva kamalākāntaṃ śāntaṃ sasmitamīśvaram //
śaṃkhacakragadāpadmadharaṃ pītāmbaraṃ param //
garuḍasthaṃ jagatkāntaṃ bhrāmayantaṃ sudarśanam

niṣekaṃ khaṇḍituṃ śaktaṃ niṣekajanakaṃ vibhum //
niṣekabhogadātāraṃ bhoganistārakāraṇam

prabhustatstavanāttuṣṭastasyai vipra varaṃ dadau //
muṇḍātuṇḍaṃ pṛthakkṛtya yuyuje'nyagajasya ca

jīvayāmāsa taṃ tatra brahmajñānena sarvavit //
sarvāṃge yojayāmāsa gajasya caraṇāmbujam

tvaṃ jīvākalpaparyyantaṃ parivāraiḥ samaṃ gaja //
ityuktvā ca manoyāyī kailāsaṃ hyājagāma saḥ

āhṛtya pārvatīhastādbālaṃ kṛtvā svavakṣasi //
ruciraṃ tacchirassamyagyojayāmāsa bālake

brahmasvarūpo bhagavānbrahmajñānena līlayā //
jīvayāmāsa taṃ śīghraṃ huṃkāroccāraṇena ca

pārvatīṃ bodhayitvā tu kṛtvā kroḍe ca taṃ śiśum //
bodhayāmāsa tāṃ kṛṣṇa ādhyātmikavibodhanaiḥ

viṣṇuruvāca //
brahmādikīṭaparyyantaṃ phalaṃ bhuṅkte svakarmaṇaḥ //
jagadbuddhisvarūpā'si tvaṃ na jānāsi kiṃ śiva

kalpakoṭiśataṃ bhogī jīvināṃ tatsvakarmaṇā //
upasthito bhavennityaṃ pratiyonau śubhāśubhaiḥ

indraḥ svakarmaṇā kīṭayonau janma labhetsati //
kīṭaścāpi bhavedindraḥ pūrvakarmaphalena vai

siṃho'pi makṣikāṃ hantumakṣamaḥ prāktanaṃ vinā //
maśako hastinaṃ hantuṃ kṣamaḥ svaprāktanena ca

sukhaṃ duḥkha bhayaṃ śokamānandaṃ karmaṇaḥ phalam //
sukarmaṇaḥ sukhaṃ harṣamitare pāpakarmaṇaḥ

ihaiva karmaṇo bhogaḥ paratra ca śubhāśubhaiḥ //
karmopārjanayogyaṃ ca puṇyakṣetraṃ ca bhāratam

karmaṇaḥ phaladātā ca vidhātā ca vidherapi //
mṛtyormṛtyuḥ kālakālo niṣekasya niṣekakṛt

saṃharturapi saṃharttā pātuḥ pātā parātparaḥ //
golokanāthaḥ śrīkṛṣṇaḥ paripūrṇatamaḥ svayam

vayaṃ yasya kalāḥ puṃso brahmaviṣṇumaheśvarāḥ //
mahāvirāḍyadaṃśaśca yallomavivare jagat

kalāṃśāḥ ke'pi taddharme kalāśāṃśāśca kecana //
carācaraṃ jagatsarvaṃ tatra tasthau vināyakaḥ

śrīviṣṇorvacanaṃ śrutvā parituṣṭā ca pārvatī //
stanaṃ dadau ca śiśave taṃ praṇamya gadādharam

tuṣṭāva pārvatī tuṣṭā preritā śaṃkareṇa ca //
kṛtāñjalipuṭā bhaktyā viṣṇuṃ taṃ kamalāpatim

āśiṣaṃ yuyuje viṣṇuḥ śiśuṃ ca śiśumātaram //
dadau gale bālakasya kaustubhaṃ ca svabhūṣaṇam

brahmā dadau svamukuṭaṃ dharmo vai ratnabhūṣaṇam//
krameṇa devyo ratnāni daduḥ sarve yathocitam

tuṣṭāva taṃ mahādevaścātyantaṃ hṛṣṭamānasaḥ //
devāśca munayaḥ śailā gandharvāḥ sarvayoṣitaḥ

dṛṣṭvā śivāḥ śivā caiva bālakaṃ mṛtajīvitam //
brāhmaṇebhyo dadau tatra koṭiratnāni nārada

aśvānāṃ ca gajānāṃ ca sahasrāṇi śatāni ca //
bandibhyaḥ pradadau tatra bālake mṛtajīvite

himālayaśca saṃtuṣṭo hṛṣṭā devāśca tatra vai //
dadurdānāni viprebhyo bandibhyaḥ sarvayoṣita

brāhmaṇānbhojayāmāsa kārayāmāsa maṅgalam //
vedāṃśca pāṭhayāmāsa purāṇāni ramāpatiḥ

śaniṃ saṃlajjitaṃ dṛṣṭvā pārvatī kopaśālinī //
śaśāpa ca sabhāmadhye'pyaṅgahīno bhaveti ca

dṛṣṭvā śaptaṃ śaniṃ sūryyaḥ kaśyapaśca yamastathā //
te'tiruṣṭāḥ samuttasthurgāmukāḥ śaṅkarālayāt

raktākṣāste raktamukhāḥ kopaprasphuritādharāḥ //
tāṃ dharmasākṣiṇaṃ kṛtvā viṣṇuṃ saṃśaptumudyatāḥ

brahmā tānbodhayāmāsa viṣṇunā preritaḥ suraiḥ //
raktāsyāṃ pārvatīṃ caiva kopaprasphuritādharām

brahmāṇamūcuste tatra krameṇa samayocitam //
bhīravo devatāḥ sarve munayaḥ parvatāstathā

kaśyapa uvāca //
durdṛṣṭo'yaṃ prāktanena patnīśāpena sarvadā //
bālaṃ dadarśa yatnena tasya vai māturājñayā

śrīsūryya uvāca //
taṃ dharmaṃ sākṣiṇaṃ kṛtvā sūnorvai māturājñayā //
yatputro'tiprayatnena hyapaśyatpārvatīsutam

yathā niraparādhena matputraṃ sā śaśāpa ha //
tatputrasyāṃgabhaṃgaśca bhaviṣyati na saṃśayaḥ

yama uvāca //
pradāya svayamājñāṃ ca śaśāpeyaṃ svayaṃ katham //
vayaṃ śapāmaḥ ko'dharmo jighāṃsośca vihiṃsane

brahmovāca //
śaśāpa pārvatī ruṣṭā strīsvabhāvācca cāpalāt //
sarveṣāṃ vacanenaiva kṣantumarhantu sādhavaḥ

durge dattvā tvamājñāṃ ca putradarśanahetave //
kathaṃ śapasi nirdoṣamatithiṃ tvadgṛhāgatam

ityuktvā śanimādāya bodhayitvā ca pārvatīm //
tāṃ taṃ samarpaṇaṃ cakre śāpa mocanahetave

babhūva pārvatī tuṣṭā brahmaṇo vacanānmune//
śāntā babhūbuste tatra dineśayamakaśyapāḥ

uvāca pārvatī tatra santuṣṭā taṃ śanaiścaram //
prasāditā śivenaiva brahmaṇā parisevitā

pārvatyuvāca //
graharājo bhava śane madvareṇa haripriyaḥ //
cirajīvī ca yogīndro haribhaktasya kā vipat

adyaprabhṛti nirvighnā harau bhaktirdṛḍhā'stu te //
śāpo'moghastato me'dya kiñcitkhañjo bhaviṣyasi

ityuktvā pārvatī tuṣṭā bālaṃ dhṛtvā ca vakṣasi //
uvāsa yoṣitāṃ madhye tasmai dattvā śubhāśiṣaḥ

śanirjagāma devānāṃ samīpaṃ hṛṣṭamānasaḥ //
praṇamya bhaktyā tāṃ brahmannambikāṃ jagadambikām

iti śrībrahmavaivartte mahāpurāṇe tṛtīye gaṇapatikhaṇḍe nāradanārāyaṇasaṃvāde śanikṛtagaṇeśadarśana tajjātagaṇeśaśiraḥpatana viṣṇukṛtagaṇeśaśiroyojana śaniśāpādikathanaṃ nāma dvādaśo'dhyāyaḥ