બ્રહ્મવૈવર્ત પુરાણ · અધ્યાય 2.9

નારદ ઉવાચ॥
ભૂમિદાનકૃતં પુણ્યં પાપં તદ્ધરણેન યત્ ॥
પરભૂમૌ શ્રાદ્ધરૂપં કૂપે કુપદજં તથા

અમ્બુવીચીભૂખનનબીજત્યાગજમેવ ચ ॥
દીપાદિસ્થાપનાત્પાપં શ્રોતુમિચ્છામિ યત્નતઃ

અન્યદ્વા પૃથિવીજન્યં પાપં યત્પ્રશ્નતઃ પરમ્ ॥
યદસ્તિ તત્પ્રતીકારં વદ વેદવિદાં વર

નારાયણ ઉવાચ॥
વિતસ્તિમાત્રં ભૂમિં ચ યો દદાતિ ચ ભારતે॥
સન્ધ્યાપૂતાય વિપ્રાય સ યાયાદ્વિષ્ણુમન્દિરમ્

ભૂમિં ચ સર્વસસ્યાઢ્યા બ્રાહ્મણાય દદાતિ યઃ॥
ભૂમિરેણુપ્રમાણે ચ વર્ષે વિષ્ણુપદે વસેત્

ગ્રામં ભૂમિં ચ ધાન્યં ચ યો દદાત્યાદદાતિ યઃ ॥
સર્વપાપાદ્વિનિર્મુક્તૌ ચોભૌ વૈકુણ્ઠવાસિનૌ

ભૂમિદાનં ચ તત્કાલે યઃ સાધુશ્ચાનુમોદતે ॥
સ પ્રયાતિ ચ વૈકુણ્ઠં મિત્રગોત્રસમન્વિતઃ

સ્વદત્તાં પરદત્તાં વા બ્રહ્મવૃત્તિં હરેત્તુ યઃ ॥
કાલસૂત્રે તિષ્ઠતિ સ યાવચ્ચન્દ્રદિવાકરૌ

તત્પુત્રપૌત્રપ્રભૃતિર્ભૂમિહીનઃ શ્રિયા હતઃ ॥
સુખહીનો દરિદ્રઃ સ્યાદન્તે યાતિ ચ રૌરવમ્

ગવાં માર્ગં વિનિષ્કૃષ્ય યશ્ચ સસ્યં દદાતિ સઃ ॥
દિવ્યં વર્ષશતં ચૈવ કુમ્ભીપાકે ચ તિષ્ઠતિ

ગોષ્ઠં તડાગં નિષ્કૃષ્ય માર્ગં સસ્યં દદાતિ યઃ ॥
સ ચ તિષ્ઠત્યસીપત્રે યાવદિન્દ્રાશ્ચતુર્દશ

ન પઞ્ચપિણ્ડમુદ્ધૃત્ય સ્નાતિ કૂપે પરસ્ય યઃ॥
પ્રાપ્નોતિ નરકં ચૈવ ન સ્નાનફલમેવ ચ

કામી ભૂમૌ ચ રહસિ બીજત્યાગં કરોતિ યઃ ॥
સ્નિગ્ધરેણુપ્રમાણં ચ વર્ષં તિષ્ઠતિ રૌરવે

અમ્બુવીચ્યમ્બુખનનં યઃ કરોતિ ચ માનવઃ ॥
સ યાતિ કૃમિદંશં ચ સ્થિતિસ્તત્ર ચતુર્યુગમ્

પરકીયે લુપ્તકૂપે કૂપં મૂઢઃ કરોતિ યઃ ॥
પુષ્કરિણ્યાં ચ લુપ્તાયાં તાં દદાતિ ચ યો નરઃ

સર્વં ફલં પરસ્યૈવ તપ્તસૂર્મિં વ્રજેત્તુ સઃ ॥
તત્ર તિષ્ઠતિ સંતપ્તો યાવદિદ્રાશ્ચતુર્દશ

પરકીયતડાગે ચ પઙ્કમુદ્ધૃત્ય ચોત્સૃજેત્ ॥
રેણુપ્રમાણવર્ષં ચ બ્રહ્મલોકે વસેન્નરઃ

પિણ્ડં પિત્રે ભૂતિભર્ત્તુર્ન પ્રદાય ચ માનવઃ ॥
શ્રાદ્ધં કરોતિ યો મૂઢો નરકં યાતિ નિશ્ચિતમ્

ભૂમૌ દીપં યોઽર્પયતિ સોઽન્ધઃ સપ્તસુ જન્મસુ ॥
ભૂમૌ શંખં ચ સંસ્થાપ્ય કુષ્ઠં જન્માન્તરે લભેત્

મુક્તામાણિક્યહીરં ચ સુવર્ણં ચ મણિં તથા ॥
યશ્ચ સંસ્થાપયેદ્ભૂમૌ દરિદ્રઃ સપ્તજન્મસુ

શિવલિઙ્ગં શિલામર્ચ્યાં યશ્ચાર્પયતિ ભૂતલે ॥
શતમન્વન્તરં યાવત્કૃમિભક્ષે સ તિષ્ઠતિ

સૂક્તં મન્ત્રં શિલાતોયં પુષ્પં ચ તુલસીદલમ્ ॥
યશ્ચાર્પયતિ ભૂમૌ ચ સ તિષ્ઠેન્નરકે યુગમ્

જપમાલાં પુષ્પમાલાં કર્પૂરં રોચનાં તથા ॥
યો મૂઢશ્ચાર્પયેદ્ભૂમૌ સ યાતિ નરકં ધ્રુવમ્

મુને ચન્દનકાષ્ઠં ચ રુદ્રાક્ષં કુશમૂલકમ્ ॥
સંસ્થાપ્ય ભૂમૌ નરકે વસેન્મન્વન્તરાવધિ

પુસ્તકં યજ્ઞસૂત્રં ચ ભૂમૌ સંસ્થાપયેત્તુ યઃ॥
ન ભવેદ્વિપ્રયોનૌ ચ તસ્ય જન્માન્તરે જનિઃ

બ્રહ્મહત્યાસમં પાપમિહ વૈ લભતે ધ્રુવમ્॥
ગ્રન્થિયુક્તં યજ્ઞસૂત્રં પૂજ્યં સ્યાત્સર્વવર્ણકૈઃ

યજ્ઞં કૃત્વા તુ યો ભૂમિં ક્ષીરેણ નહિ સિઞ્ચતિ॥
સ યાતિ તપ્તસૂર્મિં ચ સંતપ્તઃ સર્વજન્મસુ

ભૂકમ્પે ગ્રહણે યો હિ કરોતિ ખનનં ભુવઃ ॥
જન્માન્તરે મહાપાપી સોઽઙ્ગહીનો ભવેદ્ધ્રુવમ્

ભવનં યત્ર સર્વેષાં ભૂમિસ્તેન પ્રકીર્ત્તિતા॥।
વસુરત્નં યા દધાતિ વસુધા ચ વસુન્ધરા

હરેરૂરૌ ચ યા જાતા સા ચોર્વી પરિકીર્ત્તિતા ॥
ધરા ધરિત્રી ધરણી સર્વેષાં ધરણાત્તુ યા

ઇજ્યા ચ યાગભરણાત્ક્ષોણી ક્ષીણા લયે ચ યા ॥
મહાલયે ક્ષયં યાતિ ક્ષિતિસ્તેન પ્રકીર્તિતા

કાશ્યપી કશ્યપસ્યેયમચલા સ્થિતિરૂપતઃ ॥
વિશ્વમ્ભરા તદ્ધરણાચ્ચાનન્તાઽનન્તરૂપતઃ

પૃથ્વી પૃધુકકન્યાત્વાદ્વિસ્તૃતત્વાન્મહી મુને

ઇતિ શ્રીબ્રહ્મવૈવર્ત્તે મહાપુરાણે દ્વિતીયે પ્રકૃતિખણ્ડે નારદનારાણયસંવાદે પૃથિવ્યુપાખ્યાનં નામ નવમોઽધ્યાયઃ