Brahmavaivarta Purana · Chapter 2.43

nārada uvāca //
anekāsāṃ ca devīnāṃ śrutamākhyānamuttamam //
anyāsāṃ caritaṃ brahmanvada vedavidāṃ vara

nārāyaṇa uvāca //
sarvāsāṃ caritaṃ vipra vedeṣvasti pṛthakpṛthak //
pūrvoktānāṃ ca devīnāṃ tvaṃ kāsāṃ śrotumicchasi

nārada uvāca //
ṣaṣṭhī maṅgalacaṇḍī ca manasā prakṛteḥ kalā //
utpattimāsāṃ caritaṃ śrotumicchāmi tattvataḥ

nārāyaṇa uvāca //
ṣaṣṭhāṃśā prakṛteryā ca sā ca ṣaṣṭhī prakīrtitā//
bālakādhiṣṭhātṛdevī viṣṇumāyā ca bāladā

mātṛkāsu ca vikhyātā devasenābhidhā ca sā //
prāṇādhikapriyā sādhvī skandabhāryyā ca suvratā

āyuḥpradā ca bālānāṃ pātrī rakṣaṇakāriṇī //
satataṃ śiśupārśvasthā yogādvai siddhiyoginī

tasyāḥ pūjāvidhau brahmannitihāsavidhiṃ śṛṇu //
yacchrutaṃ dharmamukhataḥ sukhadaṃ putradaṃ param

rājā priyavrataścāsītsvāyambhuva manoḥ sutaḥ //
yogīndro nodvahedbhāryyāṃ tapasyāsu rataḥ sadā

brahmājñayā ca yatnena kṛtadāro babhūva saḥ //
suciraṃ kṛtadāraśca na lebhe tanayaṃ mune

putreṣṭiyajñaṃ taṃ cāpi kārayāmāsa kaśyapaḥ //
mālinyai tasya kāntāyai muniryajñacaruṃ dadau

bhuktvā caruṃ ca tasyāśca sadyo garbho babhūva ha //
dadhāra taṃ ca sā devī daivaṃ dvādaśavatsaram

tataḥ suṣāva sā brahmankumāraṃ kanakaprabham//
sarvāvayavasampannaṃ mṛtamuttāralocanam

taṃ dṛṣṭvā ruruduḥ sarvā nāryyo vai bāndhavastriyaḥ //
mūrcchāmavāpa tanmātā putraśokena suvratā

śmaśānaṃ ca yayau rājā gṛhītvā bālakaṃ mune //
ruroda tatra kāntāre putraṃ kṛtvā svavakṣasi

notsṛjya bālakaṃ rājā prāṇāṃstyaktuṃ samudyataḥ //
jñānayogaṃ visasmāra putraśokātsudāruṇāt

etasminnantare tatra vimānaṃ ca dadarśa ha //
śuddhasphaṭikasaṅkāśaṃ maṇirājavirājitam

tejasā jvalitaṃ śaśvacchobhitaṃ kṣaumavāsasā //
nānācitravicitrāḍhathaṃ puṣpamālā virājitam

dadarśa tatra devīṃ ca kamanīyāṃ manoharām//
śvetacampakavarṇābhāṃ ramyasusthirayauvanām

īṣaddhāsyaprasannāsyāṃ ratnabhūṣaṇabhūṣitām //
kṛpāmayīṃ yogasiddhāṃ bhaktānugrahakāriṇīm

dṛṣṭvā tāṃ purato rājā tuṣṭāva paramādarāt //
cakāra pūjanaṃ tasyā vihāya bhuvi bālakam

papraccha rājā tāṃ dṛṣṭvā grīṣmasūryyasamaprabhām //
tejasā jvalitāṃ śāntāṃ kāntāṃ skandasya nārada

priyavrata uvāca //
kā tvaṃ suśobhane kānte kasya kāntā'si suvrate //
kasya kanyā varārohe dhanyā mānyā ca yoṣitām

nṛpendrasya vacaḥ śrutvā jaganmaṅgaladāyinī //
uvāca devasenā sā devarakṣaṇakāriṇī

devānāṃ daityabhītānāṃ purā senā babhūva sā //
jayaṃ dadau ca tebhyaśca devasenā ca tena sā

devasenovāca/
brahmaṇo mānasī kanyā devasenā'hamīśvarī //
sṛṣṭvā māṃ manaso dhātā dadau skandāya bhūmipa

mātṛkāsu ca vikhyātā skandasenā ca suvratā //
viśve ṣaṣṭhīti vikhyātā ṣaṣṭhāṃśā prakṛteryataḥ

putradā'hamaputrāya priyadātrī priyāya ca //
dhanadā ca daridrebhyaḥ kartṛbhyaḥ śubhakarmadā

sukhaṃ duḥkhaṃ bhayaṃ śokaṃ harṣaṃ maṃgalameva ca //
sampattiśca vipattiśca sarvaṃ bhavati karmaṇā

karmaṇā bahuputrī ca vaṃśahīnaśca karmaṇā //
karmaṇā rūpavāṃścaiva rogī śaśvatsvakarmaṇā

karmaṇā mṛtaputraśca karmaṇā cirajīvinaḥ //
karmaṇā guṇavantaśca karmaṇā cāṃgahīnakāḥ

tasmātkarma paraṃ rājansarvebhyaśca śrutau śrutam //
karmarūpī ca bhagavāṃstaddvārā phalado hariḥ //

ityevamuktvā sā devī gṛhītvā bālakaṃ mune //
mahājñānena sahasā jīvayāmāsa līlayā

rājā dadarśa taṃ bālaṃ sasmitaṃ kanakaprabham //
devasenā ca paśyantaṃ nṛpamambarameva ca

gṛhītvā bālakaṃ devī gaganaṃ gantumudyatā //
punastuṣṭāva tāṃ rājā śuṣkakaṇṭhauṣṭhatālukaḥ

nṛpastotreṇa sā devī parituṣṭā babhūva ha //
uvāca taṃ nṛpaṃ brahmanvedoktaṃ karma nirmitam

devasenovāca //
triṣu lokeṣu rājā tvaṃ svāyambhuvamanoḥ sutaḥ //
mama pūjāṃ ca sarvatra kārayitvā svayaṃ kuru

tadā dāsyāmi putraṃ te kulapadmaṃ manoharam //
suvrataṃ nāma vikhyātaṃ guṇavantaṃ supaṇḍitam

jātismaraṃ ca yogīndraṃ nārāyaṇaparāyaṇam //
śatakratukaraṃ śreṣṭhaṃ kṣattriyāṇāṃ ca vanditam

mattamātaṅgalakṣāṇāṃ dhṛtavantaṃ balaṃ śubham //
dhanvinaṃ guṇinaṃ śuddhaṃ viduṣāṃ priyameva ca //

yoginaṃ jñāninaṃ caiva siddharūpaṃ tapasvinam //
yaśasvinaṃ ca lokeṣu dātāraṃ sarvasampadām

ityevamuktvā sā devī tasmai tadbālakaṃ dadau //
rājā ca taṃ svīcakāra tatpūjārthaṃ ca suvrataḥ

jagāma devī svargaṃ ca dattvā tasmai śubhaṃ varam //
ājagāma mahārājaḥ svagṛhaṃ hṛṣṭamānasaḥ //
āgatya kathayāmāsa vṛttāntaṃ putrahetukam

tuṣṭā babhūvuḥ santuṣṭā narā nāryaśca nārada ///
maṅgalaṃ kārayāmāsa sarvatra sutahetukam //
devīṃ ca pūjayāmāsa brāhmaṇebhyo dhanaṃ dadau

rājā ca pratimāseṣu śuklaṣaṣṭhyāṃ mahotsavam //
ṣaṣṭhyā devyāśca yatnena kārayāmāsa sarvataḥ

bālānāṃ sūtikāgāre ṣaṣṭhāhe yatnapūrvakam //
tatpūjāṃ kārayāmāsa caikaviṃśativāsare

bālānāṃ śubhakārye ca śubhānnaprāśane tathā //
sarvatra varddhayāmāsa svayameva cakāra ha

dhyānaṃ pūjāvidhānaṃ ca stotraṃ matto niśāmaya //
yacchrutaṃ dharmavaktreṇa kauthumoktaṃ ca suvrata

śālagrāme ghaṭe vā'tha vaṭamūle'thavā mune//
bhittyāṃ puttalikāṃ kṛtvā pūjayedvā vicakṣaṇaḥ

ṣaṣṭhāṃśāṃ prakṛteḥ śuddhāṃ supratiṣṭhāṃ ca suvratām //
suputradāṃ ca śubhadāṃ dayārūpāṃ jagatprasūm

śvetacampakavarṇābhāṃ ratnabhūṣaṇabhūṣitām //
pavitrarūpāṃ paramāṃ devasenāṃ parāṃ bhaje

iti dhyātvā svaśirasi puṣpaṃ dattvā vicakṣaṇaḥ //
punardhyātvā ca mūlena pūjayetsuvrataḥ satīm

pādyārghyācamanīyaiśca gandhadhūpapradīpakaiḥ //
naivedyairvividhaiścāpi phalena ca śubhena ca

mūlamoṃ hrīṃ ṣaṣṭhīdevye svāheti vidhipūrvakam //
aṣṭākṣaraṃ mahāmantraṃ yathāśakti japennaraḥ //

tatra stutvā ca namate bhaktiyuktaḥ samāhitaḥ //
stotraṃ ca sāmavedoktaṃ dhanaputraphalapradam

aṣṭākṣaraṃ mahāmantraṃ lakṣadhā yo japenmune //
sa putraṃ labhate nūnamityāha kamalodbhavaḥ

stotraṃ śṛṇu muniśreṣṭha sarveṣāṃ ca śubhāvaham //
vāñchāpradaṃ ca sarveṣāṃ gūḍhaṃ vede ca nārada

priyavrata uvāca //
namo devyai mahādevyai siddhyai śāntyai namo namaḥ //
sukhādāyai mokṣadāyai ṣaṣṭhīdevyai namo namaḥ

varadāyai putradāyai dhanadāyai namo namaḥ //
sukhadāyai mokṣadāyai ṣaṣṭhīdevyai namo namaḥ

śakteḥ ṣaṣṭhāṃśarūpāyai siddhāyai ca namo namaḥ //
māyāyai siddhayoginyai ṣaṣṭhīdevyai namo namaḥ

pārāyai pāradāyai ca ṣaṣṭhīdevyai namo namaḥ //
sārāyai sāradāyai ca pārāyai sarvakarmaṇām

bālādhiṣṭhātṛdevyai ca ṣaṣṭhī devyai namo namaḥ //
kalyāṇadāyai kalyāṇyai phaladāyai ca karmaṇām

pratyakṣāyai ca bhaktānāṃ ṣaṣṭhīdevyai namo namaḥ //
pūjyāyai skandakāntāyai sarveṣāṃ sarvakarmasu/६२//
devarakṣaṇakāriṇyai ṣaṣṭhīdevyai namo namaḥ//
śuddhasattvasvarūpāyai vanditāyai nṛṇāṃ sadā

hiṃsākrodhairvarjitāyai ṣaṣṭhīdevyai namo namaḥ//
dhanaṃ dehi priyāṃ dehi putraṃ dehi sureśvari

dharmaṃ dehi yaśo dehi ṣaṣṭhīdevyai namo namaḥ //
bhūmiṃ dehi prajāṃ dehi dehi vidyāṃ supūjite

kalyāṇaṃ ca jayaṃ dehi ṣaṣṭhīdevyai namo namaḥ //
iti devīṃ ca saṃstūya lebhe putraṃ priyavrataḥ

yaśasvinaṃ ca rājendraṃ ṣaṣṭhīdevīprasādataḥ //
ṣaṣṭhīstotramidaṃ brahmanyaḥ śṛṇoti ca vatsaram

aputro labhate putraṃ varaṃ sucirajīvinam //
varṣamekaṃ ca yā bhaktyā saṃyattedaṃ śṛṇoti ca

sarvapāpādvinirmuktā mahāvandhyā prasūyate //
vīraputraṃ ca guṇinaṃ vidyāvantaṃ yaśasvinam

sucirāyuṣmantameva ṣaṣṭhīmātṛprasādataḥ //
kākavandhyā ca yā nārī mṛtāpatyā ca yā bhavet

varṣaṃ śrutvā labhetputraṃ ṣaṣṭhīdevīprasādataḥ //
rogayukte ca bāle ca pitā mātā śṛṇoti ca

māsaṃ ca mucyate bālaḥ ṣaṣṭhīdevīprasādataḥ //
iti śrībrahma०ma०dvi०pra०nāradanārāyaṇasaṃ०ṣaṣṭhyupākhyāne ṣaṣṭhīdevyutpattitatpūjāstotrādikathanaṃ nāma tricatvāriṃśattamo'dhyāyaḥ