Brahmavaivarta Purana · Chapter 2.37

nārada uvāca //
harerguṇaṃ samākarṇya jñānaṃ prāpya purandaraḥ //
kiṃ cakāra gṛhaṃ gatvā tanme vyākhyātumarhasi

nārāyaṇa uvāca //
śrīkṛṣṇasya guṇaṃ śrutvā vītarāgo babhūva sa //
vairāgyaṃ varddhayāmāsa tadā brahmandine dine

munisthānādgṛhaṃ gatvā sa dadarśāmarāvatīm //
daityairasurasaṃghaiśca samākīrṇāṃ bhayākulām

viṣaṇṇabāndhavāṃ caiva bandhuhīnāṃ ca kutracit //
pitṛmātṛkalatrādivihīnāmaticañcalām

śatrugrastāṃ ca dṛṣṭvā tāmagamadvākpatiṃ prati //
śakro mandākinītīre dadarśa gurumīśvaram

dhyāyamānaṃ paraṃ brahma gaṅgātoye sthitaṃ param //
sūryyābhisaṃmukhaṃ pūrvamukhaṃ vai viśvato mukham

sāśrunetraṃ pulakitaṃ paramānandasaṃyutam //
variṣṭhaṃ ca gariṣṭhaṃ ca dharmiṣṭhaṃ ceṣṭasevinam

śreṣṭhaṃ ca vandhuvargāṇāmatiśreṣṭhaṃ ca māninām //
jyeṣṭhaṃ ca bandhuvargāṇāṃ neṣṭaṃ ca suravairiṇām

dṛṣṭvā guruṃ japantaṃ ca tatra tasthau sureśvaraḥ //
praharānte guruṃ dṛṣṭvā cotthitaṃ praṇanāma saḥ

praṇamya caraṇāmbhoje rurodoccairmuhurmurhuḥ //
vṛttāntaṃ kathayāmāsa brahmaśāpādikaṃ tathā

punarvaro mayā labdho jñānināmapi durlabhām //
vairigrastāṃ svīyapurīṃ krameṇaiva sureśvaraḥ

śiṣyasya vacanaṃ śrutvā satāṃ buddhimatāṃ varaḥ //
bṛhaspatiruvācedaṃ koparaktāntalocanaḥ

bṛhaspatiruvāca //
śrutaṃ sarvaṃ suraśreṣṭha mā rodīrvacanaṃ śṛṇu //
na kātaro hi nītijño vipattau syātkadācana

sampattirvā vipattirvā naśvarā svapnarūpiṇī //
pūrvasvakarmāyattā ca svayaṃ karttā tayorapi //

sarveṣāṃ ca bhramatyeva śaśvajjanmani janmani //
cakranemikrameṇaiva tatra kā paridevanā

bhuṅkte hi svakṛtaṃ karma sarvatrāpi ca bhārate //
śubhāśubhaṃ ca yatkiṃcitsvakarmaphalabhukpumān

nābhuktaṃ kṣīyate karma kalpakoṭiśatairapi //
avaśyameva bhoktavyaṃ kṛtaṃ karma śubhāśubham

ityevamuktaṃ vede ca kṛṣṇena paramātmanā //
sāmni kauthumaśākhāyāṃ saṃbodhya svakulodbhavam //

janma bhogāvaśeṣe ca sarveṣāṃ kṛtakarmaṇām //
anurūpaṃ ca teṣāṃ vai bhārate'nyatra caiva hi

karmaṇā brahmaśāpaṃ ca karmaṇā ca śubhāśiṣam //
karmaṇā ca mahālakṣmīṃ labheddainyaṃ ca karmaṇā

koṭijanmārjitaṃ karma jīvināmanugacchati //
nahi tyajedvinā bhogāttaṃ chāyeva purandara

kālabhede deśabhede pātrabhede ca karmaṇām //
nyūnatā'dhikatā vā'pi bhavedeva hi karmaṇām //

vastudāne ca vastūnāṃ samaṃ puṇyaṃ same dine //
dinabhede koṭiguṇamasaṃkhyaṃ vā'dhikaṃ tataḥ

samadeśe ca vastūnāṃ dāne puṇyaṃ samaṃ vṛṣan //
deśabhede koṭiguṇamasaṃkhyaṃ vā'dhikaṃ tataḥ

same pātre samaṃ puṇyaṃ vastūnāṃ kartureva ca //
pātrabhede śataguṇamasaṃkhyaṃ vā tato'dhikam

yathā phalanti sasyāni nyūnānyapyadhikāni ca //
karṣakāṇāṃ kṣetrabhede pātrabhede phalaṃ tathā

sāmānyadivase vipre dānaṃ samaphalaṃ bhavet //
amāyāṃ ravisaṃkrāntyāṃ phalaṃ śataguṇaṃ bhavet //
cāturmāsyāṃ paurṇamāsyāmanantaphalameva ca

grahaṇe śaśinaḥ koṭiguṇaṃ ca phalameva ca //
sūryyasya grahaṇe cāpi tato daśaguṇaṃ phalam

akṣayāyāmakṣayaṃ cāpyasaṃkhyaphalamucyate //
evamanyatra puṇyāhe phalādhikyaṃ bhavediha

yathā dāne tathā snāne jape vai puṇyakarmasu //
evaṃ sarvatra boddhavyaṃ narāṇāṃ karmaṇāṃ phalam

sāmānyadeśe dānaṃ ca vipre samaphalaṃ bhavet //
tīrthe devagṛhe caiva phalaṃ śataguṇaṃ smṛtam

gaṅgāyāṃ vai koṭiguṇaṃ kṣetre nārāyaṇe'vyayam //
kurukṣetre badaryyāṃ ca kāśyāṃ koṭiguṇaṃ tathā

yathā ca vai koṭiguṇaṃ tathā vai viṣṇumandire //
kedāre vai lakṣaguṇaṃ haridvāre tathā phalam

puṣkare bhāskarakṣetre daśalakṣaguṇaṃ phalam //
evaṃ sarvatra boddhavyaṃ phalādhikyaṃ krameṇa ca

sāmānyabrāhmaṇe dānaṃ samameva phalaṃ labhet //
lakṣaṃ trisandhyaṃ pūte ca paṇḍite ca jitendriye

viṣṇumantropāsake ca budhe koṭiguṇaṃ phalam//
evaṃ sarvatra boddhavyaṃ phalādhikyaṃ guṇādhikaṃ

yathā daṇḍena sūtreṇa śarāveṇa jalena ca //
kumbhaṃ nirmāti cakreṇa kumbhakāro mṛdā bhuvi

tathaiva karmasūtreṇa phalaṃ dhātā dadāti ca //
yasyājñayā sṛṣṭividhau taṃ ca nārāyaṇaṃ bhaja

sa vidhātā vidhātuśca pātuḥ pātā jagattraye //
sraṣṭuḥ sraṣṭā ca saṃharttuḥ saṃharttā kālakālakaḥ

mahāvipattau saṃsāre yaḥ smarenmadhusūdanam //
vipattau tasya sampattirbhavedityāha śaṅkaraḥ

ityevamuktvā jīvaśca samāliṅgya sureśvaram //
dattvā śubhāśiṣaṃ ceṣṭaṃ bodhayāmāsa nārada

iti śrībrahmavaivarte mahāpurāṇe dvitīye prakṛtikhaṇḍe nāradanārāyaṇasaṃvāde bṛhaspatimahendrasaṃvāde mahālakṣmyupākhyāne karmaphalanirūpaṇaṃ nāma saptatriṃśattamo'dhyāyaḥ