Brahmavaivarta Purana · Chapter 2.28

śrīnārāyaṇa uvāca//
harerutkīrttanaṃ śrutvā sāvitrī yamavaktrataḥ //
sāśrunetrā sapulakā yamaṃ punaruvāca sā

sāvitryuvāca //
harerutkīrttanaṃ dharma svakuloddhārakāraṇam //
śrotṝṇāṃ caiva vaktṝṇāṃ janmamṛtyujarāharam

dānānāṃ ca vratānāṃ ca siddhīnāṃ tapasāṃ param //
yogānāṃ caiva vedānāṃ sevanaṃ kīrttanaṃ hareḥ

muktatvamamaratvaṃ vā sarvasiddhitvameva vā //
śrīkṛṣṇasevanasyaiva kalāṃ nārhanti ṣoḍaśīm

bhajāmi kena vidhinā śrīkṛṣṇaṃ prakṛteḥ param //
mūḍhāṃ māmabalāṃ tāta vada vedavidāṃvara

śubhakarmmavipākaṃ ca śrutaṃ nṛṇāṃ manoharam //
karmmāśubhavipākaṃ ca tanme vyākhyātumarhasi

ityuktvā sā satī brahmanbhaktinamrātmakandharā //
tuṣṭāva dharmmarājaṃ ca vedoktena stavena ca

sāvitryuvāca //
tapasā dharmamārādhya puṣkare bhāskaraḥ purā //
dharmāṃśaṃ yaṃ sutaṃ prāpa dharmarājaṃ namāmyaham

samatā sarvabhūteṣu yasya sarvasya sākṣiṇaḥ //
ato yannāma śamanamiti taṃ praṇamāmyaham

yenāntaśca kṛto viśve sarveṣāṃ jīvināṃ param //
karmānurūpakālena taṃ kṛtāntaṃ namāmyaham

bibharti daṇḍaṃ daṇḍyāya pāpināṃ śuddhihetave/ //
namāmi taṃ daṇḍadharaṃ yaḥ śāstā sarvakarmaṇām

viśve yaḥ kalayatyeva sarvāyuścāpi santatam //
atīva durnivāryyañca taṃ kālaṃ praṇamāmyaham

tapasvī vaiṣṇavo dharmmī saṃyamī vijitendriyaḥ //
jīvināṃ karmmaphaladaṃ taṃ yamaṃ praṇamāmyaham

svātmārāmañca sarvajño mitraṃ puṇyakṛtāṃ bhavet //
pāpināṃ kleśado yaśca puṇyaṃ mitraṃ namāmyaham

yajjanma brahmaṇo vaṃśe jvalantaṃ brahmatejasā//
yo dhyāyati paraṃ brahma brahmavaṃśaṃ namāmyaham

ityuktvā sā ca sāvitrī praṇanāma yamaṃ mune //
yamastāṃ viṣṣubhajanaṃ karmmapākamuvāca ha

idaṃ yamāṣṭakaṃ nityaṃ prātarutthāya yaḥ paṭhet //
yamāttasya bhayaṃ nāsti sarvapāpātpramucyate

mahāpāpī yadi paṭhennityaṃ bhaktyā ca nārada //
yamaḥ karoti taṃ śuddhaṃ kāyavyūhena niścitam

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvāde sāvitrīkṛtayamastotraṃ nāmāṣṭāviṃśo'dhyāyaḥ