Brahmavaivarta Purana · Chapter 2.27

sāvitryuvāca //
prayāṃti svargamanyaṃ ca yena yenaiva karmmaṇā//
mānavāḥ puṇyavantaśca tanme vyākhyātumarhasi

yama uvāca //
annadānaṃ ca viprāya yaḥ karoti ca bhārate //
annapramāṇavarṣa ca śakraloke mahīyate

annadānātparaṃ dānaṃ na bhūtaṃ na bhaviṣyati //
nātra pātraparīkṣā syānna kālaniyamaḥ kvacit

devebhyo brāhmaṇebhyo vā dadāti cāsanaṃ yadi //
mahīyate vahniloke varṣāṇāmayutaṃ dhruvam

yo dadāti ca viprāya divyāṃ dhenuṃ payasvinīm //
tallomamānavarṇaṃ ca vaikuṇṭhe ca mahīyate

caturguṇaṃ puṇyadine tīrthe śataguṇaṃ phalam //
dānaṃ nārāyaṇakṣetre phalaṃ koṭiguṇaṃ bhavet

gāṃ yo dadāti viprāya bhārate bhaktipūrvakam //
varṣāṇāmayutaṃ caiva candraloke mahīyate

yaścobhayamukhīdānaṃ karoti brāhmaṇāya ca //
tallomamānavarṣaṃ ca vaikuṇṭhe ca mahīyate

yo dadāti brāhmaṇāya śāligrāmaṃ savastrakam //
mahīyate sa vaikuṇṭhe yāvaccandradivākarau

yo dadāti brāhmaṇāya chatraṃ ca sumanoharam //
varṣāṇāmayutaṃ so'pi modate varuṇālaye

viprāya pādukāyugmaṃ yo dadāti ca bhārate //
mahīyate vāyuloke varṣāṇāmayutaṃ sati

yo dadāti brāhmaṇāya śayyāṃ divyāṃ manoharām//
mahīyate candraloke yāvaccandradivākarau

yo dadāti pradīpaṃ ca devāya brāhmaṇāya ca //
yāvanmanvantaraṃ so'pi brahmaloke mahīyate

samprāpya mānavīṃ yoniṃ cakṣuṣmāṃśca bhaveddhruvam //
na yāti yamalokaṃ ca tena puṇyena sundari

karoti gajadānaṃ ca yo hi viprāya bhārate//
yāvadindrādidevasya loke cārdhāsane vaset

bhārate yo'śvadānaṃ ca karoti brāhmaṇāya ca //
modate vāruṇe loke yāvadindrāścaturdaśa

prakṛṣṭāṃ śibikāṃ yo hi dadāti brāhmaṇāya ca //
mahīyate viṣṇuloke yāvanmanvantaraṃ sati

yo dadāti ca viprāya vyajanaṃ śvetacāmaram //
mahīyate vāyuloke varṣāṇāmayutaṃ dhruvam

dhānyācalaṃ yo dadāti brāhmaṇāya ca bhārate //
sa ca dhānyapramāṇābdaṃ viṣṇuloke mahīyate

tataḥ svayoniṃ saṃprāpya cirajīvī bhavetsukhī //
dātā grahītā tau dvau ca dhruvaṃ vaikuṇṭhagāminau

satataṃ śrīharernāma bhārate yo japennaraḥ //
sa eva cirajīvī ca tato mṛtyuḥ palāyate

yo naro bhārate varṣe dolanaṃ kārayeddhareḥ //
pūrṇimārajanīśeṣe jīvanmukto bhavennaraḥ

iha loke sukhaṃ bhuktvā yātyante viṣṇumandiram//
niścitaṃ nivasettatra śatamanvantarāvadhi

phalamuttaraphālgunyāṃ tato'pi dviguṇaṃ bhavet //
kalpāntajīvī sa bhavedityāha kamalodbhavaḥ

tiladānaṃ brāhmaṇāya yaḥ karoti ca bhārate //
tilapramāṇavarṣaṃ ca modate viṣṇumandire

tataḥ svayoniṃ saṃprāpya cirajīvī bhavetsukhī//
tāmrapātrasthadānena dviguṇaṃ ca phalaṃ labhet

sālaṃkṛtāṃ ca bhogyāṃ ca savastrāṃ sundarīṃ priyām//
yo dadāti brāhmaṇā ya bhārate ca pativratām

mahīyate candraloke yāvadindrāścaturdaśa //
tatra svarveśyayā sārddhaṃ modate ca divāniśam

tato gandharvaloke ca varṣāṇāmayutaṃ sati //
divāniśaṃ kautukena corvaśyā saha modate

tato janmasahasraṃ ca prāpnoti sundarīṃ priyām //
satīṃ saubhāgyayuktāṃ ca komalāṃ priyavādinīm

dadāti saphalaṃ vṛkṣaṃ brāhmaṇāya ca yo naraḥ //
phalapramāṇavarṣaṃ ca śakraloke mahīyate

punaḥ svayoniṃ saṃprāpya labhate sutamuttamam //
saphalānāṃ ca vṛkṣāṇāṃ sahasraṃ ca praśaṃsitam

kevalaṃ phaladānaṃ ca brāhmaṇāya dadāti yaḥ //
suciraṃ svargavāsaṃ ca kṛtvā yāti ca bhāratam

nānādravyasamāyuktaṃ nānāsasyasamanvitam //
dadāti yaśca viprāya bhārate vipulaṃ gṛham

kuberaloke vasati sa ca manvantarāvadhi //
tataḥ svayoniṃ saṃprāpya mahāṃśca dhanavānbhavet

yo janaḥ sasyasaṃyuktāṃ bhūmiṃ ca rucirāṃ sati //
dadāti bhaktyā viprāya puṇyakṣetre ca vā sati//

mahīyate sa vaikuṇṭhe manvantaraśataṃ dhruvam //
punaḥ svayoniṃ saṃprāpya mahāṃśca bhūmivānbhavet

taṃ na tyajati bhūmiśca janmanāṃ śatakaṃ param //
śrīmāṃśca dhanavāṃścaiva putravāṃśca prajeśvaraḥ

saprajaṃ ca prakṛṣṭaṃ ca grāmaṃ dadyāddvijātaye //
lakṣamanvantaraṃ caiva vaikuṇṭhe sa mahīyate

punaḥ svayoniṃ saṃprāpya grāmalakṣaṃ labheddhruvam //
na jahāti ca taṃ pṛthvī janmanāṃ lakṣameva ca

saprajaṃ suprakṛṣṭaṃ ca pañcasasyasamanvitam //
nānāpuṣkariṇīvṛkṣaphalabhogasamanvitam

nagaraṃ yaśca viprāya dadāti bhārate bhuvi //
mahīyate sa vaikuṇṭhe daśalakṣendrakālakam

punaḥ svayoniṃ saṃprāpya rājendro bhārate bhavet//
nagarāṇāṃ ca niyutaṃ labhate nātra saṃśayaḥ//

dharā taṃ na jahātyeva janmanāṃ niyutaṃ dhruvam //
paramaiśvarya saṃyukto bhavedeva mahītale

nagarāṇāṃ ca śatakaṃ deśaṃ yo hi dvijātaye //
suprakṛṣṭaprajāyuktaṃ dadāti bhaktipūrvakam

vāpītaḍāgasaṃyuktaṃ nānāvṛkṣasamanvitam //
mahīyate sa vaikuṇṭhe koṭimanvantarāvadhi

punaḥ svayoniṃ saṃprāpya jambūdvīpapatirbhavet //
paramaiśvaryyasaṃyukto yathā śakrastathā bhuvi

mahī taṃ na jahātyeva janmanāṃ koṭimeva ca //
kalpāntajīvī sa bhavedrājarājeśvaro mahān

svādhikāraṃ samagraṃ ca yo dadāti dvijātaye//
caturguṇa phalaṃ cāto bhavettasya na saṃśayaḥ

jambūdvīpaṃ yo dadāti brāhmaṇāya pativrate //
phalaṃ śataguṇaṃ cāto bhavettasya na saṃśayaḥ

saptadvīpamahīdātuḥ sarvatīrthānusevinaḥ//
sarveṣāṃ tapasāṃ karttuḥ sarvopavāsakāriṇaḥ

sarvadānapradātuśca sarvasiddheśvarasya ca //
astyeva punarāvṛttirna bhaktasya hareraho

asaṃkhyabrahmaṇā pātaṃ paśyanti vaiṣṇavāḥ sati //
nivasanti hi goloke vaikuṇṭhe vā hareḥ pade

viṣṇumantropāsakaśca vihāya mānavīṃ tanum//
bibhartti divyarūpaṃ ca janmamṛtyujarāpaham

labdhvā viṣṇośca sārūpyaṃ viṣṇusevāṃ karoti ca//
sa ca paśyati goloke hyasaṃkhyaṃ prākṛtaṃ layam

naśyanti devāḥ siddhāśca viśvāni nikhilāni ca//
kṛṣṇabhaktā na naśyanti janmamṛtyujarāharāḥ

kārttike tulasīdānaṃ karoti haraye ca yaḥ //
yugaṃ patrapramāṇaṃ ca modate harimandire

punaḥ svayoniṃ saṃprāpya haribhaktiṃ labheddhruvam //
sukhī ca cirajīvī ca sa bhavedbhārate bhuvi

ghṛtapradīpaṃ haraye kārttike yo dadāti ca //
palapramāṇaṃ varṣaṃ ca modate harimandire

punaḥ svayoniṃ saṃprāpya viṣṇubhaktiṃ labheddhruvam //
mahādhanāḍhyaḥ sa bhaveccakṣuṣmāṃścaiva dīptimān

māghe yaḥ snāti gaṅgāyāmaruṇodayakālataḥ //
yugaṣaṣṭisahasrāṇi modate harimandire

punaḥ svayoniṃ saṃprāpya viṣṇubhaktiṃ labheddhruvam //
jitendriyāṇāṃ pravaraḥ sa bhavedbhārate bhuvi

māghe yaḥ snāti gaṃgāyāṃ prayāge cāruṇodaye //
vaikuṇṭhe modate so'pi lakṣamanvantarāvadhi

punaḥ svayoniṃ saṃprāpya viṣṇumantraṃ labheddhruvam //
tyaktvā ca mānuṣaṃ dehaṃ punaryāti hareḥ padam

nāsti tatpunarāvṛttirvaikuṇṭhācca mahītale //
karoti haridāsyaṃ ca labdhvā sārūpyameva ca

nityasnāyī ca gaṅgāyāṃ sa pūtaḥ sūryyavadbhuvi //
pade pade'śvamedhasya labhate niścitaṃ phalam

tasyaiva pādarajasā sadyaḥ pūtā vasundharā //
modate sa ca vaikuṇṭhe yāvaccandradivākarau

punaḥ svayoniṃ saṃprāpya tapasvipravaro bhavet //
svadharmanirataḥ śuddho vidvāṃśca sujitendriyaḥ

mīnakarkaṭayormadhye gāḍhaṃ tapati bhāskare //
bhārate yo dadātyeva jalameva suvāsitam

modate sa ca vaikuṇṭhe yāvadindrāścaturdaśa //
punaḥ svayoniṃ saṃprāpya sukhī niṣkapaṭo bhavet

vaiśākhe haraye bhaktyā yo dadāti ca candanam //
yugaṣaṣṭisahasrāṇi modate viṣṇumandire //
punaḥ svayoniṃ saṃprāpya rūpavāṃśca sukhī bhavet

vaiśākhe saktudānaṃ ca yaḥ karoti dvijātaye //
saktureṇupramāṇābdaṃ modate viṣṇumandire

karoti bhārate yo hi kṛṣṇajanmāṣṭamīvratam //
śatajanmakṛtātpāpānmucyate nātra saṃśayaḥ

vaikuṇṭhe modate so'pi yāvadindrāścaturdaśa //
punaḥ svayoniṃ saṃprāpya kṛṣṇabhaktiṃ labheddhruvam

ihaiva bhārate varṣe śivarātriṃ karoti yaḥ //
modate śivaloke ca saptamanvantarāvadhi

śivāya śivarātrau ca bilvapatraṃ dadāti yaḥ //
patrapramāṇaṃ ca yugaṃ modate śivamandire

punaḥ svayoniṃ saṃprāpya śivabhaktiṃ labheddhruvam //
vidyāvānputravāñchrīmānprajāvānbhūmivānbhavet

caitramāse'thavā māghe śaṅkaraṃ yo'rcayedvratī //
karoti narttanaṃ bhaktyā vetrapāṇirdivāniśam

māsaṃ vāpyarddhamāsaṃ vā daśa saptadināni vā //
dinamānaṃ yugaṃ so'pi śivaloke mahīyate

śrīrāmanavamīṃ yo hi karoti bhārate naraḥ//
saptamanvantaraṃ yāvanmodate viṣṇumandire

punaḥ svayoniṃ saṃprāpya rāmabhaktiṃ labheddhruvam //
jitendriyāṇāṃ pravaro mahāṃśca dhārmiko bhavet

śāradīyāṃ mahāpūjāṃ prakṛteryaḥ karoti ca //
mahiṣaiśchāgalairmeṣairikṣukūṣmāṇḍakaistathā

naivedyairupahāraiśca dhūpadīpādibhistathā //
nṛtyagītādibhirvādyairnānākautukamaṅgalaiḥ //

śivaloke vasetso'pi saptamanvantarāvadhi //
punaḥ svayoniṃ saṃprāpya buddhiṃ ca nirmalāṃ labhet

acalāṃ śriyamāpnoti putrapautrādivarddhinīm //
mahāprabhāvayuktaśca gajavājisamanvitaḥ

rājarājeśvaraḥ so'pi bhavedeva na saṃśayaḥ //
bhādraśuklāṣṭamīṃ prāpya mahālakṣmīṃ ca yo'rcayet

nityaṃ bhaktyā pakṣamekaṃ puṇyakṣetre ca bhārate //
dattvā tasyai prakṛṣṭāni copacārāṇi ṣoḍaśa

vaikuṇṭhe modate so'pi yāvaccandradivākarau//
punaḥ svayoniṃ saṃprāpya rājarājeśvaro bhavet

kārtikīpūrṇimāyāṃ ca kṛtvā tu rāsamaṇḍalam //
gopānāṃ śatakaṃ kṛtvā gopīnāṃ śatakaṃ tathā

śilāyāṃ pratimāyāṃ vā śrīkṛṣṇaṃ rādhayā saha //
bhārate pūjayeddattvā copacārāṇi ṣoḍaśa

goloke ca vasetso'pi yāvadvai brahmaṇo vayaḥ //
bhārataṃ punarāgatya haribhaktiṃ labheddhruvam

krameṇa sudṛḍhāṃ bhaktiṃ labdhvā mantraṃ harerapi //
dehaṃ tyaktvā ca golokaṃ punareva prayāti saḥ

tatra kṛṣṇasya sārūpyaṃ saṃprāpya pārṣado bhavet //
punastatpatanaṃ nāsti jarāmṛtyuharo mahān

śuklāṃ vā'pyathavā kṛṣṇāṃ karotyekādaśīṃ ca yaḥ //
vaikuṇṭhe modate so'pi yāvadvai brahmaṇo vayaḥ

bhārataṃ punarāgatya haribhaktiṃ labheddhruvam //
punaryāti ca vaikuṇṭhaṃ na tasya patanaṃ bhavet

bhādre śukle ca dvādaśyāṃ yaḥ śakraṃ pūjayennaraḥ //
ṣaṣṭivarṣasahasrāṇi śakraloke mahīyate

ravivāre'rkasaṃkrāntyāṃ saptamyāṃ śuklapakṣataḥ //
sampūjyārkaṃ haviṣyānnaṃ yaḥ karoti ca bhārate

mahīyate so'rkaloke yāvaccandradivākarau //
bhārataṃ punarāgatya cārogī śrīyuto bhavet

jyeṣṭhaśuklacaturdaśyāṃ sāvitrīṃ yo hi pūjayet //
mahīyate brahmaloke saptamanvantarāvadhi

punarmahīṃ samāgatya śrīmānatulavikramaḥ //
cirajīvī bhavetso'pi jñānavānsampadā yutaḥ

māghasya śuklapañcamyāṃ pūjayedyaḥ sarasvatīm //
saṃyato bhaktito dattvā copacārāṇi ṣoḍaśa

mahīyate sa vaikuṇṭhe yāvadbrahmadivāniśam //
saṃprāpya ca punarjanma sa bhavetkavipaṇḍitaḥ

gāṃ suvarṇādikaṃ yo hi brāhmaṇāya dadāti ca //
nityaṃ jīvanaparyantaṃ bhaktiyuktaśca bhārate

gavāṃ lomapramāṇābdaṃ dviguṇaṃ viṣṇumandire //
modate hariṇā sārddhaṃ krīḍākautukamaṅgalaiḥ

tataḥ punarihāgatya viṣṇubhaktiṃ labheddhruvam //
tataḥ punarihāgatya rājarājeśvaro bhavet //
gomāṃśca putravānvidvāñjñānavānsarvataḥ sukhī

bhojayedyo hi miṣṭānnaṃ brāhmaṇebhyaśca bhārate //
vipralomapramāṇābdaṃ modate viṣṇumandire

tataḥ punarihāgatya sa sukhī dhanavānbhavet //
vidvānsucirajīvī ca śrīmānatulavikramaḥ

yo vakti vā dadātyeva harernāmāni bhārate //
yuganāmapramāṇaṃ ca viṣṇuloke mahīyate

tataḥ punarihāgatya viṣṇubhaktiṃ labheddhruvam //
yadi nārāyaṇakṣetre phalaṃ koṭiguṇaṃ labhet

nāmnāṃ koṭiṃ hareryo hi kṣetre nārāyaṇe japet //
sarvapāpavinirmukto jīvanmukto bhaveddhruvam

labhate na punarjanma vaikuṇṭhe sa mahīyate //
labhedviṣṇośca sārūpyaṃ na tasya patanaṃ bhavet

yaḥ śivaṃ pūjayennityaṃ kṛtvā liṅgaṃ ca pārthivam //
yāvajjīvanaparyyantaṃ sa yāti śivamandiram

mṛdāṃ reṇupramāṇābdaṃ śivaloke mahīyate //
tataḥ punarihāgatya rājendro bhārate bhavet //

śilāṃ ca yo'rcayennityaṃ śilātoyaṃ ca bhakṣati //
mahīyate sa vaikuṇṭhe yāvadvai brahmaṇaḥ śatam

tato labdhvā punarjanma haribhaktiṃ sudurlabhām //
mahīyate viṣṇuloke na tasya patanaṃ bhavet

tapāṃsi caiva sarvāṇi vratāni nikhilāni ca//
kṛtvā tiṣṭhati vaikuṇḍe yāvadindrāścaturdaśa

tato labdhvā punarjanma rājendro bhārate bhavet //
tato mukto bhavetpaścātpunarjanma na vidyate

yaḥ snāti sarvartīrtheṣu bhuvi kṛtvā pradakṣiṇam //
sa ca nirvāṇatāṃ yāti na tajjanma bhavedbhuvi

puṇyakṣetre bhārate ca yo'śvamedhaṃ karoti ca //
aśvalomapramāṇābdaṃ śakrasyārddhāsane vaset

caturguṇaṃ rājasūye phalamāpnoti mānavaḥ //
naramedhe'śvamedhārddhaṃ gomedhe ca tadeva ca

putreṣṭau ca tadardhaṃ ca suputraṃ ca labheddhruvam//
labhate lāṅgaleṣṭau ca gomedhasadṛśaṃ phalam

tatsamānaṃ ca vipreṣṭau vṛddhiyāge ca tatphalam //
padmayajñe tadarddhaṃ ca phalamāpnoti mānavaḥ

viśoke ca viśokaṃ ca padmārddhaṃ svargamaśnute //
vijaye vijayī rājā svarge padmasamaṃ bhavet

prājāpatye prajālābho bhūvṛddhirbhūbhṛtāṃ bhavet //
iha rājaśriyaṃ labdhvā padmārddhaṃ svargamaśnute //
ṛddhiyāge mahaiśvaryaṃ svargaṃ padmasamaṃ bhavet

viṣṇuyajñaḥ pradhānaṃ ca sarvayajñeṣu sundari //
brahmaṇā ca kṛtaḥ pūrvaṃ mahāsambhārasaṃyutaḥ

babhūva kalaho yatra dakṣaśaṅkarayoḥ sati //
śepuśca nandinaṃ viprā nandī viprāṃśca kopataḥ

/
yato hetordakṣayajñaṃ babhañja candraśekharaḥ //
cakāra viṣṇuyajñaṃ ca purā dakṣaprajāpatiḥ

dharmaśca kaśyapaścaiva śeṣaścāpi ca kardamaḥ ///
svāyambhuvo manuścaiva tatputraśca priyavrataḥ

śivaḥ sanatkumāraśca kapilaśca dhruvastathā //
rājasūyasahasrāṇāṃ samṛddhyā ca kraturbhavet

rājasūyasahasrāṇāṃ phalamāpnoti niścitam //
viṣṇuyajñātparo yajño nāsti vede phalapradaḥ

bahukalpāntajīvī ca jīvanmukto bhaveddhruvam //
jñānena tejasā caiva viṣṇutulyo bhavediha

devānāṃ ca yathā viṣṇurvaiṣṇavānāṃ yathā śivaḥ //
śāstrāṇāṃ ca yathā vedā āśramāṇāṃ ca brāhmaṇāḥ

tīrthānāṃ ca yathā gaṅgā pavitrāṇāṃ ca vaiṣṇavāḥ //
ekādaśī vratānāṃ ca puṣpāṇāṃ tulasī yathā

nakṣatrāṇāṃ yathā candraḥ pakṣiṇāṃ garuḍo yathā //
yathā strīṇāṃ ca prakṛtirādhārāṇāṃ vasundharā//

śīghragānāṃ cendriyāṇāṃ cañcalānāṃ yathā manaḥ //
prajāpatīnāṃ brahmā ca prajeśānāṃ prajāpatiḥ

vṛndāvanaṃ vanānāṃ ca varṣāṇāṃ bhārataṃ yathā //
śrīmatāṃ ca yathā śrīśca viduṣāṃ ca sarasvatī

pativratānāṃ durgā ca saubhāgyānāṃ ca rādhikā //
viṣṇuyajñastathā vatse yajñeṣu ca mahāniti

aśvamedhaśatenaiva śakratvaṃ labhate dhruvam //
sahasreṇa viṣṇupadaṃ saṃprāpa pṛthureva ca //

snānaṃ ca sarvatīrtheṣu sarvayajñeṣu dakṣiṇam //
sarveṣāṃ ca vratānāṃ ca tapasāṃ phalameva ca

pāṭhaścaturṇāṃ vedānāṃ prādakṣiṇyaṃ bhuvastathā //
phalaṃ bījamidaṃ sarvaṃ muktidaṃ kṛṣṇasevanam

purāṇeṣu ca vedeṣu cetihāseṣu sarvataḥ //
nirūpitaṃ sārabhūtaṃ kṛṣṇapādāmbujārcanam

tadvarṇanaṃ ca taddhyānaṃ tannāmaguṇakīrttanam //
tatstotraṃ smaraṇaṃ caiva vandanaṃ japa eva ca

tatpādodakanaivedyabhakṣaṇaṃ nityameva ca //
sarvasammatamityevaṃ sarvepsitamidaṃ sati

bhaja kṛṣṇaṃ paraṃ brahma nirguṇaṃ prakṛteḥ param //
gṛhāṇa svāminaṃ vatse sukhaṃ gaccha svamandiram

etatte kathitaṃ sarvaṃ vipākaṃ karmaṇāṃ nṛṇām //
sarvepsitaṃ sarvamataṃ paraṃ tattvapradaṃ nṛṇām

iti śrībrahmavaivartte mahāpurāṇe dvitīye prakṛtikhaṇḍe nārada nārāyaṇasaṃvāde sāvitrīyamasaṃvāde sāvitryupākhyāne śubhakarmavipākaprakathanaṃ nāma saptaviṃśo'dhyāyaḥ