બ્રહ્મવૈવર્ત પુરાણ · અધ્યાય 2.28

શ્રીનારાયણ ઉવાચ॥
હરેરુત્કીર્ત્તનં શ્રુત્વા સાવિત્રી યમવક્ત્રતઃ ॥
સાશ્રુનેત્રા સપુલકા યમં પુનરુવાચ સા

સાવિત્ર્યુવાચ ॥
હરેરુત્કીર્ત્તનં ધર્મ સ્વકુલોદ્ધારકારણમ્ ॥
શ્રોતૄણાં ચૈવ વક્તૄણાં જન્મમૃત્યુજરાહરમ્

દાનાનાં ચ વ્રતાનાં ચ સિદ્ધીનાં તપસાં પરમ્ ॥
યોગાનાં ચૈવ વેદાનાં સેવનં કીર્ત્તનં હરેઃ

મુક્તત્વમમરત્વં વા સર્વસિદ્ધિત્વમેવ વા ॥
શ્રીકૃષ્ણસેવનસ્યૈવ કલાં નાર્હન્તિ ષોડશીમ્

ભજામિ કેન વિધિના શ્રીકૃષ્ણં પ્રકૃતેઃ પરમ્ ॥
મૂઢાં મામબલાં તાત વદ વેદવિદાંવર

શુભકર્મ્મવિપાકં ચ શ્રુતં નૃણાં મનોહરમ્ ॥
કર્મ્માશુભવિપાકં ચ તન્મે વ્યાખ્યાતુમર્હસિ

ઇત્યુક્ત્વા સા સતી બ્રહ્મન્ભક્તિનમ્રાત્મકન્ધરા ॥
તુષ્ટાવ ધર્મ્મરાજં ચ વેદોક્તેન સ્તવેન ચ

સાવિત્ર્યુવાચ ॥
તપસા ધર્મમારાધ્ય પુષ્કરે ભાસ્કરઃ પુરા ॥
ધર્માંશં યં સુતં પ્રાપ ધર્મરાજં નમામ્યહમ્

સમતા સર્વભૂતેષુ યસ્ય સર્વસ્ય સાક્ષિણઃ ॥
અતો યન્નામ શમનમિતિ તં પ્રણમામ્યહમ્

યેનાન્તશ્ચ કૃતો વિશ્વે સર્વેષાં જીવિનાં પરમ્ ॥
કર્માનુરૂપકાલેન તં કૃતાન્તં નમામ્યહમ્

બિભર્તિ દણ્ડં દણ્ડ્યાય પાપિનાં શુદ્ધિહેતવે। ॥
નમામિ તં દણ્ડધરં યઃ શાસ્તા સર્વકર્મણામ્

વિશ્વે યઃ કલયત્યેવ સર્વાયુશ્ચાપિ સન્તતમ્ ॥
અતીવ દુર્નિવાર્ય્યઞ્ચ તં કાલં પ્રણમામ્યહમ્

તપસ્વી વૈષ્ણવો ધર્મ્મી સંયમી વિજિતેન્દ્રિયઃ ॥
જીવિનાં કર્મ્મફલદં તં યમં પ્રણમામ્યહમ્

સ્વાત્મારામઞ્ચ સર્વજ્ઞો મિત્રં પુણ્યકૃતાં ભવેત્ ॥
પાપિનાં ક્લેશદો યશ્ચ પુણ્યં મિત્રં નમામ્યહમ્

યજ્જન્મ બ્રહ્મણો વંશે જ્વલન્તં બ્રહ્મતેજસા॥
યો ધ્યાયતિ પરં બ્રહ્મ બ્રહ્મવંશં નમામ્યહમ્

ઇત્યુક્ત્વા સા ચ સાવિત્રી પ્રણનામ યમં મુને ॥
યમસ્તાં વિષ્ષુભજનં કર્મ્મપાકમુવાચ હ

ઇદં યમાષ્ટકં નિત્યં પ્રાતરુત્થાય યઃ પઠેત્ ॥
યમાત્તસ્ય ભયં નાસ્તિ સર્વપાપાત્પ્રમુચ્યતે

મહાપાપી યદિ પઠેન્નિત્યં ભક્ત્યા ચ નારદ ॥
યમઃ કરોતિ તં શુદ્ધં કાયવ્યૂહેન નિશ્ચિતમ્

ઇતિ શ્રીબ્રહ્મવૈવર્ત્તે મહાપુરાણે દ્વિતીયે પ્રકૃતિખણ્ડે નારદનારાયણસંવાદે સાવિત્રીકૃતયમસ્તોત્રં નામાષ્ટાવિંશોઽધ્યાયઃ