Brahmavaivarta Purana · Chapter 1.21

sautiruvāca //
babhūva kāle bālaśca krameṇa pañcahāyanaḥ //
jātismaro jñānayuktaḥ pūrvamantrasmṛtaḥ sadā

gīyate satataṃ kṛṣṇayaśonāmaguṇādikam //
kṣaṇaṃ roditi nṛtyena pulakāñcitavigrahaḥ

kṛṣṇasambandhinīṃ gāthāṃ śṛṇoti yatra tatra vai //
tatsambandhi purāṇaṃ ca tatra tiṣṭhati bālakaḥ

dhūlidhūsarasarvāṅgo dhūlinaivedyamīpsitam //
dhūliṣu pratimāṃ kṛtvā dhūlinā pūjayeddharim

putramāhvayate mātā prātarāśāya cenmune //
hariṃ saṃpūjayāmīti mātaraṃ saṃvadetpunaḥ

śaunaka uvāca //
kiṃ nāma bālakasyāsya janmanyatra babhūva ha //
vyutpattyā saṃjñayā vā'pi tadbhavānvaktumarhati

sautiruvāca //
anāvṛṣṭyavaśeṣe ca kāle bālo babhūva ha //
nāraṃ dadau janmakāle tenāyaṃ nāradābhidhaḥ

dadāti nāraṃ jñānaṃ ca bālakebhyaśca bālakaḥ //
jātismaro mahājñānī tenāyaṃ nāradābhidhaḥ

vīryeṇa nāradasyaiva babhūva bālako mune //
munīndrasya vareṇaiva tenāyaṃ nāradābhidhaḥ

śaunaka uvāca //
śiśunāma ca vijñātaṃ vyutpattyā ca yathocitam //
munīndrasya kathaṃ nāma nāradaśceti maṃgalam

sautiruvāca //
aputrakāya viprāya dharmaputro naro muniḥ //
dadau putra kaśyapāya tenāyaṃ nāradābhidhaḥ

śaunaka uvāca //
adhunā nāmavyutpattiḥ śrutā saute śiśorapi //
śūdrayonau brahmaputraḥ kathaṃ sa nāradābhidhaḥ

sautiruvāca //
kalpāntare brahmakaṇṭhādbabhūvurbahavo narāḥ //
narāndadau tatkaṇṭhaṃ ca tena tannāradaṃ smṛtam

tato babhūva bālaśca nāradātkaṇṭhadeśataḥ //
ato brahmā nāma cakre nāradaśceti maṅgalam

sāmprataṃ śiśuvṛttāntaṃ sāvadhānaṃ niśāmaya //
upālambharahasyena viśiṣṭaṃ kiṃ prayojanam

vavṛdhe gopikābālo vipragehe dinedine //
saputrāṃ pālitāṃ cakre brāhmaṇaḥ svasutāṃ yathā

etasminnantare viprā āyayurvipramandiram //
śiśavaḥ pañcavarṣīyā mahātejasvino yathā

pracchannaṃ hṛtavantaśca grīṣmamadhyāhnabhāskaram //
madhuparkādikaṃ dattvā tānnanāma gṛhī dvija

phalamūlādikaṃ kāle catvāro munipuṅgavāḥ //
vipradattaṃ bubhujire taccheśaṃ bubhuje śiśuḥ

caturthako munistasmai kṛṣṇamantraṃ dadau mudā //
teṣāṃ babhūva dāsaḥ sa dvijasya māturājñayā

ekadā śiśumātā ca gacchantī niśi vartmani //
mamāra sarpadaṣṭā ca tatkṣaṇaṃ smaratī harim

sadyo jagāma vaikuṇṭhaṃ viṣṇuyānena sā satī //
viṣṇupārṣadasaṃyuktā sadratnanirmitena ca

prātarbālo dvijaiḥ sārdhaṃ prayayau vipramandirāt //
tattvajñānaṃ dadustasmai brāhmaṇāśca kṛpālavaḥ

brahmaputrāḥ śiśuṃ tyaktvā svasthānaṃ prayayuḥ kila //
mahājñānī śiśustasthau gaṅgātīre manohare

tatra snātvā vipradattaṃ viṣṇumantraṃ jajāpa saḥ //
kṣutpipāsārogaśokaharaṃ vedeṣu durlabham

mahāraṇye ca ghore ca aśvatthamūlasannidhau //
kṛtvā yogāsanaṃ tasthau suciraṃ tatra bālakaḥ

śaunaka uvāca //
kaṃ mantraṃ bālakaḥ prāpa kumāreṇa ca dhīmatā //
dattaṃ paraṃ śrīṃhareśca tadbhavānvaktu marhati

sautiruvāca //
kṛṣṇena datto goloke kṛpayā brahmaṇe purā //
dvāviṃśatyakṣaro mantro vedeṣu ca sudurlabhaḥ

taṃ ca brahmā dadau bhaktyā kumārāya ca dhīmate //
kumāreṇa sa dattaśca mantraśca śiśave dvija

ॐ śrīṃ namo bhagavate rāsa maṇḍaleśvarāya //
śrīkṛṣṇāya svāheti ca mantro'yaṃ kalpapādapaḥ

mahāpuruṣastotraṃ ca pūrvoktaṃ kavacaṃ ca yat //
asyaupayaugikaṃ dhyānaṃ sāmavedoktameva ca

tejomaṇḍalarūpe ca sūryyakoṭisamaprabhe //
yogibhirvāñchitaṃ dhyāne yogaiḥ siddhagaṇaiḥ suraiḥ

dhyāyante vaiṣṇavā rūpaṃ tadabhyantarasannidhau //
atīva kamanīyānirvacanīyaṃ manoharam

navīnajaladaśyāmaṃ śaratpaṅkajalocanam //
śaratpārvaṇacandrāsyaṃ pakvabimbādhikādharam

muktāpaṅktivinindaikadantapaṃktimanoharam //
sasmitaṃ muralīnyastahastāvalambanena ca

koṭikandarpalāvaṇyaṃ līlādhāma manoharam //
candralakṣaprabhājuṣṭaṃ puṣṭaśrīyuktavigraham

tribhaṅgasaṅgi vā yuktaṃ dvibhujaṃ pītavāsasam //
ratnakeyūravalayaratnanūpurabhūṣi tam

ratnakuṇḍalayugmena gaṇḍasthalavirājitam //
mayūrapucchacūḍaṃ ca ratnamālāvibhūṣitam

śobhitaṃ jānuparyyantaṃ mālatīvanamālayā //
candanokṣitasarvāṅgaṃ bhaktānugrahakārakam

maṇinā kaustubhendreṇa vakṣasthalasamujjvalam //
vīkṣitaṃ gopikābhiśca śaśvadvrīḍitalocanaiḥ

sthirayauvanayuktābhirveṣṭitābhiśca santatam //
bhūṣaṇairbhūṣitābhiśca rādhāvakṣaḥsthalasthitam //

brahmaviṣṇuśivādyaiśca pūjitaṃ vanditaṃ stutam //
kiśoraṃ rādhikākāntaṃ śāntarūpaṃ parātparam

nirliptaṃ sākṣirūpaṃ ca nirguṇaṃ prakṛteḥ param //
dhyāyetsarveśvaraṃ taṃ ca paramātmānamīśvaram

idaṃ te kathitaṃ dhyānaṃ stotraṃ ca kavacaṃ mune //
mantropayaugikaṃ satyaṃ mantraśca kalpapādapaḥ

sāmprataṃ bālakastasthau dhyānasthastatra śaunaka //
divyaṃ varṣasahasraṃ ca nirāhāraḥ kṛśodaraḥ//

śaktimānparipuṣṭaśca siddhamantraprabhāvata//
dadarśa bālako dhyāne divyaṃ lokaṃ ca bālakam

ratnasiṃhāsanasthaṃ ca ratnabhūṣaṇabhūṣitam //
kiśoravayasaṃ śyāmaṃ gopaveṣaṃ ca sasmitam

gopairgopāṅganābhiśca veṣṭitaṃ pītavāsasam //
dvibhujaṃ muralīhastaṃ candanena vicarcitam

brahmaviṣṇuśivādyaiśca stūyamānaṃ parātparam //
dṛṣṭvā ca suciraṃ śāntaṃ śāntaśca gopikāsutaḥ

virarāma ca śokārto yadā taddraṣṭumakṣamaḥ //
rurodāśvatthamūle ca na dṛṣṭvā bālakaṃ śiśuḥ

babhūvākāśavāṇīti rudantaṃ bālakaṃ prati //
satyaṃ prabodhayuktaṃ ca hitameva mitākṣaram

sakṛdyaddarśitaṃ rūpaṃ tadeva nādhunā punaḥ //
api pakvakaṣāyāṇāṃ durdarśaṃ ca kuyoginām

etasminvigrahe'tīte saṃprāpte divyavigrahe //
punardrakṣyasi govindaṃ janmamṛtyuharaṃ harim

iti śrutvā bālakaśca virarāma mudā'nvitaḥ //
kāle tatyāja tīrthe ca tanuṃ kṛṣṇaṃ hṛdi smaran

nedurdundubhayaḥ svarge puṣpavṛṣṭirbabhūva ha //
babhūva śāpamuktaśca nāradaśca mahāmuniḥ

tanuṃ tvakvā sa jīvaśca vilīno brahmavigrahe //
babhūva prāktanānnityaḥ kālabhede tirohitaḥ

āvirbhāvastirobhāvaḥ svecchayā nityadehinām //
janmamṛtyujarāvyādhirbhaktānāṃ nāsti śaunaka

iti śrībrahmavaivartte mahāpurāṇe brahmakhaṇḍe sautiśaunakasaṃvāde nāradaśāpavimocanaṃ nāmaikaviṃśo'dhyāyaḥ