Brahmanda Purana · Chapter 2.58

iti śrībrahmāṇḍe mahāpurāṇe madhyamabhāge tṛtīye upoddhātapāde bhārgavaṃ prati varuṇāgamanaṃ nāma saptapañcaśattamo 'dhyāyaḥ // 57//
jaiminiruvāca
evaṃ bruvāṇaṃ varuṇaṃ vilokya patitaṃ bhuvi /
saṃjahāra punardhīmānastraṃ mṛgukulodvahaḥ

saṃtdṛtāstrastato rāmo varuṇaṃ purataḥ sthiram /
vilokya bigatakrodhastamuvāca hasanniva

gokarṇanilayāḥ pūrvamimemāṃ munipuṅgavāḥ /
samāyātā mahendrādrau nivasaṃtaṃ saritpate

tvattoye medinīṃ pūrvaṃ khanadbhiḥ sagarātmajaiḥ /
adho nipātitaṃ kṣetraṃ gokarṇamṛṣisevitam

upalabdhumime bhūyaḥ kṣetraṃ tadbhavavallabham /
adhāvanmāmupāgamya munayastīrthavāsinaḥ

eṣāmarthe tataḥ so 'haṃ mahendrādacalottamāt /
bhavantamāgato draṣṭuṃ sahaibhirmunipuṅgavaiḥ

tasmānmadarthe salilaṃ samutsāryātmano bhavān /
dātumarhati tatkṣetrameṣāṃ toye ca pūrvavat

jaiminiruvāca
iti tasya vacaḥ śrutvā varuṇo yādasāṃ patiḥ /
nirūpya manasā rāmamida bhūyo 'bravīdvacaḥ

varuṇa uvāca
na śakyamutsārayituṃ madaṃbhaḥ kenacidbhavet /
tathā hi me varo dattaḥ purānena viriñcinā

so 'haṃ tvattejasedārīṃ vihāya sahajāṃ dhṛtim /
kātaraṃ samupāyāto vaśatāṃ tava bhārgava

eṣāmarthe viśeṣaṇa bhavatā paricoditaḥ /
kathaṃ na kuryāṃ karmedamahaṃ kṣattrakulāntaka

tasmādyāvatpramāṇaṃ me bhavānsaṃkalpayiṣyati /
tāvatsaṃghārayiṣyāmi bhūmau salilamātmanaḥ

iti tasya vacaḥ śrutvā tathetyuktvā sa sāyakam /
yathāgataṃ pracikṣepa dhanurnirbhidya bhārgavaḥ

tato nirūpya sīmānaṃ darśayāno mahīpate /
sruvaṃ jagrāha matimānkṣaptukāmo jalāśaye

prasannacetasaṃ rāmaṃ gataroṣamathātmani /
antarhite sarinnāthe rāmaḥ suvamudaṅmukhaḥ

bhrāmayitvātivegena cikṣepa lavaṇārṇave /
kṣiptatvena samudre tu diśamuttarapaścimām

gatvā sruvopatadrājanyojanānāṃ śatadvayam /
tīrthaṃ śurpārakaṃ nāma sarvapāpavimocanam

viśrutaṃ yattrilokeṣu tīre nadanadīpateḥ /
tīrthaṃ tadantarīkṛtya sruvo rāmakarāccyutaḥ

nipapāta mahārāja sūcayanrāmavikramam /
yatrābhūdrāmasṛṣṭāyā bhuvo niṣṭhātha pārthiva

tīrthaṃ śūrpārakaṃ tattu śrīmallokapariśrutam /
utsārayitvā salilaṃ samudrastāvadātmanaḥ

atiṣṭhadapasṛtyorvīṃ dattvā rāmāya pārthiva /
anatikrāntamaryādo yathākālaṃ bhṛgūdvahaḥ

samayaṃ svāpayāmāsa tasyaivānumate bhuvi /
vijñāya pūrvasīmāntāṃ bhuvamabhyutsasarja ha

vyasmayanta surāḥ sarve dṛṣṭvā rāmasya vikramam /
nagaragramasīmānaḥ kiñcitkiñcitkvacitkvacit

sahye tu pūrvavattasminnabdherapasṛteṃ'bhasi /
tatra daivāttathā sthānānnimnatvātsa pralakṣya tu

tatasteṣāṃ bhṛguśreṣṭho munīnāṃ bhāvitātmanām /
yathābhilaṣitaṃ sthānaṃ pradadau prītipūrvakam

tataste munayaḥ sarve harṣeṇa mahātānvitāḥ /
kṛtakṛtyā bhṛśaṃ rāmamāśiṣā samapūjayan

athaitairabhyanujñāto yayau prāptamanorathaḥ /
gate munivare rāme deśāttasmānnijāśramam

saṃbhūya munayaḥ sarve prajagmustīramaṃbudheḥ /
paricaṅkramya tāṃ bhūmiṃ yatnena mahātānvitāḥ

dadṛśuḥ sarvato rājanhyarmavāntaḥ sthitāṃ mahīm /
nityatvā tsarvadevānāmadhiṣṭhānatayā tathā

kātamabdhau nipatitaṃ naṣṭatoyaṃ ciroṣitam /
api rudraprabhāvema prāyānnātyantaviplavam

tatteyaniḥsṛtaṃ kṣetramabhūtpūrvavadeva hi /
etaddhi devasāmarthyamacintyaṃ nṛpasattama

evaṃ rāmeṇa jaladheḥ punaḥ sṛṣṭā vasuṃdharā /
dakṣiṇottarato rājanayojanānāṃ catuḥśatam

nātikrāmati so 'dyāpi sīmānaṃ payasāṃ nidhiḥ /
kṛtaṃ rāmeṇa mahatā na tu sajjaṃ mahaddhanuḥ

evaṃ prabhāvo rāmo 'sau sagaraśca mahīpatiḥ /
yasya putrairayaṃ khaṇḍo bhārato 'bdhau nipatitaḥ

yojanānāṃ sahasrantu varddhitaśca mahodadhiḥ /
rāmeṇābhūtpunaḥ sṛṣṭaṃ yojanānāṃ tu ṣaṭśatam

sagarasya sutairyasmādvarddhito makarālayaḥ /
tataḥ prabhṛti lokeṣu sāgarākhyāmavāptavān

etatte 'bhihitaṃ samyaṅmahataścaritaṃ mayā /
rāmasya kārttavīryasya sagarasya mahīpateḥ