Brahmanda Purana · Chapter 2.18

iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde
śrāddhakalpe tithiśrāddhavarṇanaṃ nāma saptadaśo 'dhyāyaḥ // 17//
bṛhaspatiruvāca
yamastu yāni śrāddhāni provāca śaśabindave /
tāni me śṛṇu kāryāṇi nakṣatreṣu pṛthak pṛthak

śrāddhaṃ yaḥ kṛttikāyogaṃ kurute satataṃ naraḥ /
agnīnādhāya sa svarge rājate sudṛḍhavrataḥ

apatyakāmo rohiṇyāṃ saumye tejasvinā bhavet /
prāyaśaḥ krūrakarmāṇi ārdrāyāṃ śrāddhamācaran

kṣetrabhāgī bhavetputrī śrāddhaṃ kṛtvā punarvasau /
puṣṭikāmaḥ punastiṣye śrāddhaṃ kurvīta mānavaḥ

āśleṣāsu pitṝnarcanvīrānputrānavāpnuyāt /
jātīnāṃ bhavati śreṣṭho maghāsu śrāddhamācaran

phālgunīṣu pitṝnarcansaubhāgyaṃ labhate naraḥ /
pradānaśīlaḥ sāpatya uttarāsu karoti yaḥ

saṃsatsu mukhyo bhavati haste 'bhyarcya pitṝnapi /
citrāyāṃ caiva yaḥ kuryātpaśyedrūpavataḥ sutān

svātinā caiva yaḥ kuryādvāṇijye lābhamāpnuyāt /
putrārthī tu viśākhāsu śrāddhamīheta mālavaḥ

anurādhāsu kurvāṇo naraścakraṃ pravarttayet /
ādhipatyaṃ bhavecchreṣṭhaṃ jyeṣṭhāyāṃ satataṃ tu yaḥ

mūlenārogyamicchanti hyāṣāḍhāsu mahadyaśaḥ /
uttarāsu tu kurvāṇo vītaśoko bhavennaraḥ

śravaṇena tu lokeṣu prāpnuyātparamāṃ gatim /
rājyabhāgī dhaniṣṭhāsu prāpnuyā dvipulaṃ dhanam

śrāddhanirjitalokaśca vedān sāṃgānavāpnuyāt /
nakṣatrairvāruṇaiḥ kurvanbhiṣaksiddhimavāpnuyāt

pūrvaprauṣṭha pade kurvanvindetājīvikānbahūn /
uttarāsvanatikramya vindedgā vai sahasraśaḥ

bahukupyakṛtaṃ dravyaṃ vindetkurvansurevatīm /
aśvānaśvayujā bhakto bharaṇyāṃ sādhusattamaḥ

imaṃ śrāddhavidhiṃ kurvañchaśabindurmahīmimām /
kṛtsnāṃ balena so 'kliṣṭho labhdhvā ca praśaśāsa ha