Brahma Purana · Chapter 246

evaṃ purā munīn vyāsaḥ purāṇaṃ ślakṣṇayā girā
daśāṣṭadoṣarahitair vākyaiḥ sāratarair dvijāḥ //

pūrṇam astamalaiḥ śuddhair nānāśāstrasamuccayaiḥ
jātiśuddhasamāyuktaṃ sādhuśabdopaśobhitam //

pūrvapakṣoktisiddhānta pariniṣṭhāsamanvitam
śrāvayitvā yathānyāyaṃ virarāma mahāmatiḥ //

te 'pi śrutvā muniśreṣṭhāḥ purāṇaṃ vedasaṃmitam
ādyaṃ brāhmābhidhānaṃ ca sarvavāñchāphalapradam //

hṛṣṭā babhūvuḥ suprītā vismitāś ca punaḥ punaḥ
praśaśaṃsus tadā vyāsaṃ kṛṣṇadvaipāyanaṃ munim //

aho tvayā muniśreṣṭha purāṇaṃ śrutisaṃmitam
sarvābhipretaphaladaṃ sarvapāpaharaṃ param //

proktaṃ śrutaṃ tathāsmābhir vicitrapadam akṣaram
na te 'sty aviditaṃ kiṃcit triṣu lokeṣu vai prabho //

sarvajñas tvaṃ mahābhāga deveṣv iva bṛhaspatiḥ
namasyāmo mahāprājñaṃ brahmiṣṭhaṃ tvāṃ mahāmunim //

yena tvayā tu vedārthā bhārate prakaṭīkṛtāḥ
kaḥ śaknoti guṇān vaktuṃ tava sarvān mahāmune //

adhītya caturo vedān sāṅgān vyākaraṇāni ca
kṛtavān bhārataṃ śāstraṃ tasmai jñānātmane namaḥ //

namo 'stu te vyāsa viśālabuddhe phullāravindāyatapattranetra
yena tvayā bhāratatailapūrṇaḥ prajvālito jñānamayaḥ pradīpaḥ

ajñānatimirāndhānāṃ bhrāmitānāṃ kudṛṣṭibhiḥ
jñānāñjanaśalākena tvayā conmīlitā dṛśaḥ //

evam uktvā samabhyarcya vyāsaṃ te caiva pūjitāḥ
jagmur yathāgataṃ sarve kṛtakṛtyāḥ svam āśramam //

tathā mayā muniśreṣṭhā kathitaṃ hi sanātanam
purāṇaṃ sumahāpuṇyaṃ sarvapāpapraṇāśanam //

yathā bhavadbhiḥ pṛṣṭo 'haṃ saṃpraśnaṃ dvijasattamāḥ
vyāsaprasādāt tat sarvaṃ mayā saṃparikīrtitam //

idaṃ gṛhasthaiḥ śrotavyaṃ yatibhir brahmacāribhiḥ
dhanasaukhyapradaṃ nṝṇāṃ pavitraṃ pāpanāśanam //

tathā brahmaparair viprair brāhmaṇādyaiḥ susaṃyataiḥ
śrotavyaṃ suprayatnena samyak śreyobhikāṅkṣibhiḥ //

prāpnoti brāhmaṇo vidyāṃ kṣatriyo vijayaṃ raṇe
vaiśyas tu dhanam akṣayyaṃ śūdraḥ sukham avāpnuyāt //

yaṃ yaṃ kāmam abhidhyāyañ śṛṇoti puruṣaḥ śuciḥ
taṃ taṃ kāmam avāpnoti naro nāsty atra saṃśayaḥ //

purāṇaṃ vaiṣṇavaṃ tv etat sarvakilbiṣanāśanam
viśiṣṭaṃ sarvaśāstrebhyaḥ puruṣārthopapādakam //

etad vo yan mayākhyātaṃ purāṇaṃ vedasaṃmitam
śrute 'smin sarvadoṣotthaḥ pāparāśiḥ praṇaśyati //

prayāge puṣkare caiva kurukṣetre tathārbude
upoṣya yad avāpnoti tad asya śravaṇān naraḥ //

yad agnihotre suhute varṣe nāpnoti vai phalam
mahāpuṇyamayaṃ viprās tad asya śravaṇāt sakṛt //

yaj jyeṣṭhaśukladvādaśyāṃ snātvā vai yamunājale
mathurāyāṃ hariṃ dṛṣṭvā prāpnoti puruṣaḥ phalam //

tad āpnoti phalaṃ samyak samādhānena kīrtanāt
purāṇe 'sya hito viprāḥ keśavārpitamānasaḥ //

yat phalaṃ kriyam ālokya puruṣo 'tha labhen naraḥ
tat phalaṃ samavāpnoti yaḥ paṭhec chṛṇuyād api //

idaṃ yaḥ śraddhayā nityaṃ purāṇaṃ vedasaṃmitam
yaḥ paṭhec chṛṇuyān martyaḥ sa yāti bhuvanaṃ hareḥ //

śrāvayed brāhmaṇo yas tu sadā parvasu saṃyataḥ
ekādaśyāṃ dvādaśyāṃ ca viṣṇulokaṃ sa gacchati //

idaṃ yaśasyam āyuṣyaṃ sukhadaṃ kīrtivardhanam
balapuṣṭipradaṃ nṝṇāṃ dhanyaṃ duḥsvapnanāśanam //

trisaṃdhyaṃ yaḥ paṭhed vidvāñ śraddhayā susamāhitaḥ
idaṃ variṣṭham ākhyānaṃ sa sarvam īpsitaṃ labhet //

rogārto mucyate rogād baddho mucyeta bandhanāt
bhayād vimucyate bhīta āpadāpanna āpadaḥ //

jātismaratvaṃ vidyāṃ ca putrān medhāṃ paśūn dhṛtim
dharmaṃ cārthaṃ ca kāmaṃ ca mokṣaṃ tu labhate naraḥ //

yān yān kāmān abhipretya paṭhet prayatamānasaḥ
tāṃs tān sarvān avāpnoti puruṣo nātra saṃśayaḥ //

yaś cedaṃ satataṃ śṛṇoti manujaḥ svargāpavargapradaṃ viṣṇuṃ lokaguruṃ praṇamya varadaṃ bhaktyekacittaḥ śuciḥ
bhuktvā cātra sukhaṃ vimuktakaluṣaḥ svarge ca divyaṃ sukhaṃ paścād yāti hareḥ padaṃ suvimalaṃ mukto guṇaiḥ prākṛtaiḥ

tasmād vipravaraiḥ svadharmaniratair muktyekamārgepsubhis tadvat kṣatriyapuṃgavais tu niyataiḥ śreyorthibhiḥ sarvadā
vaiśyaiś cānudinaṃ viśuddhakulajaiḥ śūdrais tathā dhārmikaiḥ śrotavyaṃ tv idam uttamaṃ bahuphalaṃ dharmārthamokṣapradam

dharme matir bhavatu vaḥ puruṣottamānāṃ sa hy eka eva paralokagatasya bandhuḥ
arthāḥ striyaś ca nipuṇair api sevyamānā naiva prabhāvam upayānti na ca sthiratvam

dharmeṇa rājyaṃ labhate manuṣyaḥ svargaṃ ca dharmeṇa naraḥ prayāti
āyuś ca kīrtiṃ ca tapaś ca dharmaṃ dharmeṇa mokṣaṃ labhate manuṣyaḥ

dharmo 'tra mātāpitarau narasya dharmaḥ sakhā cātra pare ca loke
trātā ca dharmas tv iha mokṣadaś ca dharmād ṛte nāsti tu kiṃcid eva

idaṃ rahasyaṃ śreṣṭhaṃ ca purāṇaṃ vedasaṃmitam
na deyaṃ duṣṭamataye nāstikāya viśeṣataḥ //

idaṃ mayoktaṃ pravaraṃ purāṇaṃ pāpāpahaṃ dharmavivardhanaṃ ca
śrutaṃ bhavadbhiḥ paramaṃ rahasyam ājñāpayadhvaṃ munayo vrajāmi