Bhargava Tantra · Chapter 1

// bhārgavatantram //
// prathamo'dhyāyaḥ //
[ bhārgavatantrasya prayojanapratipādanādhyāyaḥ ]
[ maṅgalācaraṇam ]
jñānānandamayaṃ devaṃ nirmalasphaṭikākṛtim/
ādhāraṃ sarvavidyānāṃ hayagrīvamupāsmahe

(A.M.ādau adholikhitāṃ paktiṃ nirdiśati- "śrīmate lakṣmīhayavadanaparabrahmaṇe namaḥ/")
(c:A, bhūtānāma For vidyānāma, M.kośe prathamaślokānantaram adholikhitaḥ adhikaḥ pāṭhaḥ upalabhyate-
"vande lakṣmīpatiṃ devaṃ śaṅkhacakragadādharam/
vidyāmūrtiṃ hayagrīvaṃ śabdārthajñānalabdhaye//
amṛtādhmātameghābhamamṛtābharaṇaṃ vibhum/
pāñcarātragamācāryaṃ vande vaikuṇṭhabhūpatim// śrī bhārgavasaṃhitāprāraṃbhaḥ//")
[ prāstāvikam ]
agastyaṃ muniśārdūlaṃ mahendraśikhare sthitam/
praṇasya prayatāḥ bhūtvā papracchurmunipuṃgavāḥ

munayaḥ
bhagavan muniśārdūla sarvaśāstraviśārada/
kathamadya vayaṃ sarve tīrṇāssama bhavasāgarāt

adhītānyapi śāstrāṇi samadhītā trayī punaḥ/
tathāpi nirmalaṃ naiva mano'smākaṃ munīśvara

kathaṃ vayaṃ samuttīrṇā bhaviṣyāmo bhavāmbudheḥ/
upāyamadya no brūhi yena yāmo'kṣayaṃ padam

etacchrutvā mahātejāḥ svayaṃ svāyaṃbhuvo muniḥ/
ṛṣibhyo vaktumārebhe svadhītaṃ ca svanuṣṭhitam

agastyaḥ
purā khalu mayā rakṣo jīrṇitaṃ śrāddhabhojane/
vātāpirilvalaḥ paścāt kupitaḥ so'pi māritaḥ

aho rakṣodvayaṃ naṣṭaṃ mayā khalu tapasyatā/
tābhyāṃ naṣṭaṃ tapo'smākaṃ kiṃ kurma iti cintayan

himavantamupāsādya devagandharvasevitam/
visarpigāṅgasalilaṃ siddhavidyādharārcitam

śaṅkarajyotiṣāśliṣṭaṃ pārvatītoṣakāriṇam/
nārāyaṇamahāyogicaraṇāmbujamudritam

puṇyagandhavahopetaṃ puruhūtādivanditam/
puratrayopasaṃhāre cāparūpadharaṃ param

phalapuṣpabharānamravṛkṣaṣaṇḍasamākulam/
anekāśramasaṃkīrṇamamalaṃ harimandiram

[himālaye agastyatapaścaryā ākāśavāṇīśravaṇaṃ ca]
atyugraṃ tapa atiṣṭhaṃ nirāhāro jitendriyaḥ/
vardhamāne tadā ghore tapasyaghahare'd‌bhute

ākāśavāṇīmaśrauṣamatigambhīravādinīm/
svalpākṣarāṃ ca bahvarthāṃ pariṇāmasukhāvahām

[hareḥ ārādhanamahattvaṃ, muneḥ mahendragirigamanāya nirdeśaśca]
ārādhito yadi haristapasā kiṃ prayojanam/
nārādhito yadi haristapasā kiṃ prayojanam

(ślokādupari `ākāśavāṇī' ityayaṃ aṃśaḥ M.T.kośe adhikaḥ/)
(A.om. c: d:;)
antarbahiryadi haristapasā kiṃ prayojanam/
nāntarbahiryadi haristapasā kiṃ prayojanam

tapaso virama brahman marhendraṃ vraja parvatam/
tatra rāmaṃ samāsādya tasmāt sukhamavāpnuhi

[agastyasya mahendragirigamanam]
etacchrutvāmbarādvāṇīṃ manaḥśrutisukhapradām/
viramya tapaso bhūyo dakṣiṇāṃ diśamabhyagām

tato mahendramāsādya puṇyagandharvasevitam/
rāmaṃ kamalapatrākṣamadrākṣamṛṣibhiḥ saha

[paraśurāmasya varṇanam]
taptacāmīkaranibhaṃ piṅgaśmaśrujaṭādharam/
valkalājinasaṃvītaṃ jvalatparaśudhāriṇam

tapantamiva cādityaṃ śītayantaṃ mṛgāṅkavat/
bhāsayantaṃ jagatsarvaṃ vāsudevaprabhaughavat

bhāntaṃ brahma śriyātīva śriyā nārāyaṇo yathā/
bhāratyā parameṣṭhīva śarvo girijayā yathā

[agastyakṛtā paraśurāmastutiḥ]
jāmadagnyaṃ tamālokya rāmaṃ sarvāṅgasundaram/
mudā paramayopetaḥ śirasā samavandiṣam

kṛtto vanaspatiriva pātito dharaṇītale/
vigraho me muniśreṣṭhāḥ rāmasya padapadmayoḥ

anujñātaḥ samutthāya toṣayāmāsa taṃ prabhum/
uccaiḥ svaraṃ samāsādya puṇḍarīkākṣavidyayā

jitante puṇḍarīkākṣa namaste viśvabhāvana/
namaste'stu hṛṣīkeśa mahāpuruṣapūrvaja

namaste vāsudevāya śāntānandacidātmane/
ajitāya namastubhyaṃ ṣāḍguṇyanidhaye namaḥ

mahāvibhūtisaṃsthāya namaste puruṣottama/
sahasraśirase tubhyaṃ sahasracaraṇāya te

sahasrabāhave tubhyaṃ sahasranayanāya te/
amūrtāya namastubhyamekamūrtāya te namaḥ

anekamūrtaye tubhyamakṣarāya ca te namaḥ/
vyāpine vedavedyāya namaste paramātmane

cinmātrarūpiṇe tubhyaṃ namastraiyantamūrtaye/
aṇiṣṭhāya sthaviṣṭhāya mahiṣṭhāya ca te namaḥ

nediṣṭhāya daviṣṭhāya kṣepiṣṭhāya ca te namaḥ/
variṣṭhāya vasiṣṭhāya kaniṣṭhāya ca te namaḥ

pañcātmane namastubhyaṃ sarvāntaryāmiṇe namaḥ/
kalpanākroḍarūpāya sṛṣṭisthityantahetave

namaste guṇarūpāya guṇarūpānuvartine/
vyastāya ca samastāya samastavyastarūpiṇe

ādimadhyāntaśūnyāya tadvate ca namo namaḥ/
praṇavapratipādyāya namaḥ praṇavarūpiṇe

lokayātrāprasiddhyarthaṃ sraṣṭubrahmādirūpiṇe/
namastubhyaṃ nṛsiṃhādimūrtibhedāya viṣṇave

(A.om a:b:,)
vipākaiḥ karmaṇāṃ kleśairaspṛṣṭavapuṣe namaḥ/
namo brahmaṇyadevāya tejasāṃ nidhaye namaḥ

nityāsādhāraṇānekalokarakṣāparicchade/
saccidānandarūpāya vareṇyāya namo namaḥ

yajamānāya yajñāya yaṣṭavyāya namo namaḥ/
ijyāphalātmane tubhyaṃ namaḥ svādhyāyaśāline

namaḥ paramahaṃsāya namaḥ sarvaguṇāya te/
sthitāya parame vyomni bhūyo bhūyo namo namaḥ

[agastyasyāgamanahetukaḥ praśnaḥ abhayapradānaṃ ca]
evaṃ stuto jagannātho rāmaḥ kamalalocanaḥ/
avekṣya kṛpayā devo māmuvāca jagatprabhuḥ

rāmaḥ
kimarthaṃ kuṃbhatanaya mahendraṃ samupāgataḥ/
bhītivadbhāsi yogīndra kutaste bhayamāgatam

indrādvā varuṇādvāpi brahmaṇo vā trilocanāt/
sākṣānnārāyaṇādvāpi na te bhūyādito bhayam

vaivasvato vā rakṣāṃsi dānavā vā sapannagāḥ/
vipriyaṃ yadi kuryuste gatisteṣāṃ paraśvadhaḥ

tasmādabhītavatsthitvā brūhi kāryaṃ sasaṃbhramam/
sādhayāmyahamadyaiva darśanaṃ me śubhodayam

[agastyena svāgamanahetunivedanam]
ityukto jāmadagnyena bhītavat kuṃbhasaṃbhavaḥ/
yathāvadvaktumārebhe rāmāyāmitatejase

na bhītiḥ brahmaṇo deva na viṣṇorna ca śaṅkarāt/
nāpi jiṣṇorjana ca yamāt varuṇādvāpi rākṣasāt

rākṣasebhyo'pi na bhayaṃ na devebhyo na cāsurāt/
nānyebhyaśca bhayaṃ me'dya bhītaḥ pāpādihāgataḥ

vātāpirilvalaścobhau rākṣasau ṛṣikaṇṭakau/
tau hantumarthito devaiḥ ṛṣibhiśca mahātmabhiḥ

dattaṃ mayābhayaṃ tebhyo vadhe rākṣasayostayoḥ/
niścitaṃ me manaḥ paścādrakṣasāpi nimantritaḥ

rākṣasasya pituḥ śrāddhe sampannamapi pṛṣṭavān/
uktaṃ mayāstu sampannaṃ jaṭhare piṇḍatāṃ gataḥ

jīrṇo'bhūnmama vātāpistataḥ kupita ilvalaḥ/
muṣṭinā hantumārebhe māṃ mayā huṃkṛtiḥ kṛtā

tena dagdho'bhavadrakṣaḥ sarvaṃ tena hṛtaṃ tapaḥ/
tena khinno'gamaṃ śailaṃ tapase himabhūṣitam

atyugraṃ tapa ātiṣṭhaṃ vāṇī kāpyaśarīriṇī/
tapasānena kiṃ te syāt rāmeṇa bhava nirbharaḥ

tata utthāya tapasaḥ tvāmadya śaraṇaṃ gataḥ/
anāgasaṃ māṃ bhagavan kṛtvā samavalokaya

[bhagavadārādhanatantraśravaṇasya pāpanāśakatvam]
etacchrutvā vaco devo bhagavān bhārgavo muniḥ/
pratyuvāca tataḥ prīto maitrāvaruṇaye prabhuḥ

rāmaḥ
ṛṣīṇāmagnikalpānāṃ devānāṃ prītaye tvayā/
vātāpirilvalaścobhau nāśitau te tapo balāt

niśśalyā ṛṣayaścāpi devāścāsan tvayānagha/
tadarthaṃ ca tapastaptaṃ bhavatā himavattaṭe

asmādālokanenaiva pūto'bhūrmunipuṅgava/
tapodhanakṣayabhayaṃ na te bhavati dāruṇam

yā cāsīddhṛdaye śaṅkā rakṣo nāśanimittajā/
tāṃ ca haryarcanātantraṃ śrutvā nāśaya kumbhaja

[haryarcanātantraviṣaye agastyotthāpitajijñāsā]
agastyaḥ
kiṃ taddharyarcanātantraṃ tantraṃ tatkathamāgatam/
sarvaṃ niravaseṣeṇa upadeṣṭuṃ tvamarhasi

// iti śrībhārgavatantre prathamo'dhyāyaḥ //