Bhagavata Purana · Chapter 10.34

vikrīḍitaṃ vraja-vadhūbhir idaṃ ca viṣṇoḥ $ śraddhānvito 'nuśṛṇuyād atha varṇayed yaḥ &
bhaktiṃ parāṃ bhagavati pratilabhya kāmaṃ % hṛd-rogam āśv apahinoty acireṇa dhīraḥ // BhP_10.33.039*
0 śrī-śuka uvāca
ekadā deva-yātrāyāṃ gopālā jāta-kautukāḥ /
anobhir anaḍud-yuktaiḥ prayayus te 'mbikā-vanam

tatra snātvā sarasvatyāṃ devaṃ paśu-patiṃ vibhum /
ānarcur arhaṇair bhaktyā devīṃ ca ṇṛpate 'mbikām

gāvo hiraṇyaṃ vāsāṃsi madhu madhv-annam ādṛtāḥ /
brāhmaṇebhyo daduḥ sarve devo naḥ prīyatām iti

ūṣuḥ sarasvatī-tīre jalaṃ prāśya yata-vratāḥ /
rajanīṃ tāṃ mahā-bhāgā nanda-sunandakādayaḥ

kaścin mahān ahis tasmin vipine 'ti-bubhukṣitaḥ /
yadṛcchayāgato nandaṃ śayānam ura-go 'grasīt

sa cukrośāhinā grastaḥ kṛṣṇa kṛṣṇa mahān ayam /
sarpo māṃ grasate tāta prapannaṃ parimocaya

tasya cākranditaṃ śrutvā gopālāḥ sahasotthitāḥ /
grastaṃ ca dṛṣṭvā vibhrāntāḥ sarpaṃ vivyadhur ulmukaiḥ

alātair dahyamāno 'pi nāmuñcat tam uraṅgamaḥ /
tam aspṛśat padābhyetya bhagavān sātvatāṃ patiḥ

sa vai bhagavataḥ śrīmat pāda-sparśa-hatāśubhaḥ /
bheje sarpa-vapur hitvā rūpaṃ vidyādharārcitam

tam apṛcchad dhṛṣīkeśaḥ praṇataṃ samavasthitam /
dīpyamānena vapuṣā puruṣaṃ hema-mālinam

ko bhavān parayā lakṣmyā rocate 'dbhuta-darśanaḥ /
kathaṃ jugupsitām etāṃ gatiṃ vā prāpito 'vaśaḥ

BhP_10.34.012/0 sarpa uvāca
ahaṃ vidyādharaḥ kaścit sudarśana iti śrutaḥ /
śriyā svarūpa-sampattyā vimānenācaran diśaḥ

ṛṣīn virūpāṅgirasaḥ prāhasaṃ rūpa-darpitaḥ /
tair imāṃ prāpito yoniṃ pralabdhaiḥ svena pāpmanā

śāpo me 'nugrahāyaiva kṛtas taiḥ karuṇātmabhiḥ /
yad ahaṃ loka-guruṇā padā spṛṣṭo hatāśubhaḥ

taṃ tvāhaṃ bhava-bhītānāṃ prapannānāṃ bhayāpaham /
āpṛcche śāpa-nirmuktaḥ pāda-sparśād amīva-han

prapanno 'smi mahā-yogin mahā-puruṣa sat-pate /
anujānīhi māṃ deva sarva-lokeśvareśvara

brahma-daṇḍād vimukto 'haṃ sadyas te 'cyuta darśanāt /
yan-nāma gṛhṇann akhilān śrotṝn ātmānam eva ca /
sadyaḥ punāti kiṃ bhūyas tasya spṛṣṭaḥ padā hi te

ity anujñāpya dāśārhaṃ parikramyābhivandya ca /
sudarśano divaṃ yātaḥ kṛcchrān nandaś ca mocitaḥ

niśāmya kṛṣṇasya tad ātma-vaibhavaṃ $ vrajaukaso vismita-cetasas tataḥ &
samāpya tasmin niyamaṃ punar vrajaṃ % ṇṛpāyayus tat kathayanta ādṛtāḥ // BhP_10.34.019* //
kadācid atha govindo rāmaś cādbhuta-vikramaḥ /
vijahratur vane rātryāṃ madhya-gau vraja-yoṣitām

upagīyamānau lalitaṃ strī-janair baddha-sauhṛdaiḥ /
sv-alaṅkṛtānuliptāṅgau sragvinau virajo-'mbarau

niśā-mukhaṃ mānayantāv uditoḍupa-tārakam /
mallikā-gandha-mattāli- juṣṭaṃ kumuda-vāyunā

jagatuḥ sarva-bhūtānāṃ manaḥ-śravaṇa-maṅgalam /
tau kalpayantau yugapat svara-maṇḍala-mūrcchitam

gopyas tad-gītam ākarṇya mūrcchitā nāvidan nṛpa /
sraṃsad-dukūlam ātmānaṃ srasta-keśa-srajaṃ tataḥ

evaṃ vikrīḍatoḥ svairaṃ gāyatoḥ sampramatta-vat /
śaṅkhacūḍa iti khyāto dhanadānucaro 'bhyagāt

tayor nirīkṣato rājaṃs tan-nāthaṃ pramadā-janam /
krośantaṃ kālayām āsa diśy udīcyām aśaṅkitaḥ

krośantaṃ kṛṣṇa rāmeti vilokya sva-parigraham /
yathā gā dasyunā grastā bhrātarāv anvadhāvatām

mā bhaiṣṭety abhayārāvau śāla-hastau tarasvinau /
āsedatus taṃ tarasā tvaritaṃ guhyakādhamam

sa vīkṣya tāv anuprāptau kāla-mṛtyū ivodvijan /
viṣṛjya strī-janaṃ mūḍhaḥ prādravaj jīvitecchayā

tam anvadhāvad govindo yatra yatra sa dhāvati /
jihīrṣus tac-chiro-ratnaṃ tasthau rakṣan striyo balaḥ

avidūra ivābhyetya śiras tasya durātmanaḥ /
jahāra muṣṭinaivāṅga saha-cūḍa-maṇiṃ vibhuḥ

śaṅkhacūḍaṃ nihatyaivaṃ maṇim ādāya bhāsvaram /
agrajāyādadāt prītyā paśyantīnāṃ ca yoṣitām