Bhagavata Purana · Chapter 10.32

yat te sujāta-caraṇāmburuhaṃ staneṣu $ bhītāḥ śanaiḥ priya dadhīmahi karkaśeṣu &
tenāṭavīm aṭasi tad vyathate na kiṃ svit % kūrpādibhir bhramati dhīr bhavad-āyuṣāṃ naḥ // BhP_10.31.019*
0 śrī-śuka uvāca
iti gopyaḥ pragāyantyaḥ pralapantyaś ca citradhā /
ruruduḥ su-svaraṃ rājan kṛṣṇa-darśana-lālasāḥ

tāsām āvirabhūc chauriḥ smayamāna-mukhāmbujaḥ /
pītāmbara-dharaḥ sragvī sākṣān manmatha-manmathaḥ

taṃ vilokyāgataṃ preṣṭhaṃ prīty-utphulla-dṛśo 'balāḥ /
uttasthur yugapat sarvās tanvaḥ prāṇam ivāgatam

kācit karāmbujaṃ śaurer jagṛhe 'ñjalinā mudā /
kācid dadhāra tad-bāhum aṃse candana-bhūṣitam

kācid añjalināgṛhṇāt tanvī tāmbūla-carvitam /
ekā tad-aṅghri-kamalaṃ santaptā stanayor adhāt

ekā bhru-kuṭim ābadhya prema-saṃrambha-vihvalā /
ghnantīvaikṣat kaṭākṣepaiḥ sandaṣṭa-daśana-cchadā

aparānimiṣad-dṛgbhyāṃ juṣāṇā tan-mukhāmbujam /
āpītam api nātṛpyat santas tac-caraṇaṃ yathā

taṃ kācin netra-randhreṇa hṛdi kṛtvā nimīlya ca /
pulakāṅgy upaguhyāste yogīvānanda-samplutā

sarvās tāḥ keśavāloka- paramotsava-nirvṛtāḥ /
jahur viraha-jaṃ tāpaṃ prājñaṃ prāpya yathā janāḥ

tābhir vidhūta-śokābhir bhagavān acyuto vṛtaḥ /
vyarocatādhikaṃ tāta puruṣaḥ śaktibhir yathā

tāḥ samādāya kālindyā nirviśya pulinaṃ vibhuḥ /
vikasat-kunda-mandāra surabhy-anila-ṣaṭpadam

śarac-candrāṃśu-sandoha- dhvasta-doṣā-tamaḥ śivam /
kṛṣṇāyā hasta-taralā cita-komala-vālukam

tad-darśanāhlāda-vidhūta-hṛd-rujo manorathāntaṃ śrutayo yathā yayuḥ /
svair uttarīyaiḥ kuca-kuṅkumāṅkitair acīkḷpann āsanam ātma-bandhave

tatropaviṣṭo bhagavān sa īśvaro yogeśvarāntar-hṛdi kalpitāsanaḥ /
cakāsa gopī-pariṣad-gato 'rcitas trailokya-lakṣmy-eka-padaṃ vapur dadhat

sabhājayitvā tam anaṅga-dīpanaṃ sahāsa-līlekṣaṇa-vibhrama-bhruvā /
saṃsparśanenāṅka-kṛtāṅghri-hastayoḥ saṃstutya īṣat kupitā babhāṣire

BhP_10.32.016/0 śrī-gopya ūcuḥ
bhajato 'nubhajanty eka eka etad-viparyayam /
nobhayāṃś ca bhajanty eka etan no brūhi sādhu bhoḥ

BhP_10.32.017/0 śrī-bhagavān uvāca
mitho bhajanti ye sakhyaḥ svārthaikāntodyamā hi te /
na tatra sauhṛdaṃ dharmaḥ svārthārthaṃ tad dhi nānyathā

bhajanty abhajato ye vai karuṇāḥ pitarau yathā /
dharmo nirapavādo 'tra sauhṛdaṃ ca su-madhyamāḥ

bhajato 'pi na vai kecid bhajanty abhajataḥ kutaḥ /
ātmārāmā hy āpta-kāmā akṛta-jñā guru-druhaḥ

nāhaṃ tu sakhyo bhajato 'pi jantūn bhajāmy amīṣām anuvṛtti-vṛttaye /
yathādhano labdha-dhane vinaṣṭe tac-cintayānyan nibhṛto na veda

evaṃ mad-arthojjhita-loka-veda svānām hi vo mayy anuvṛttaye 'balāḥ /
mayāparokṣaṃ bhajatā tirohitaṃ māsūyituṃ mārhatha tat priyaṃ priyāḥ

na pāraye 'haṃ niravadya-saṃyujāṃ sva-sādhu-kṛtyaṃ vibudhāyuṣāpi vaḥ /
yā mābhajan durjara-geha-śṛṅkhalāḥ saṃvṛścya tad vaḥ pratiyātu sādhunā