Bhagavata Purana · Chapter 09.19

BhP_09.19.001/0 śrīśuka uvāca
sa itthamācaran kāmān straiṇo 'pahnavamātmanaḥ /
buddhvā priyāyai nirviṇṇo gāthāmetāmagāyata

śṛṇu bhārgavyamūṃ gāthāṃ madvidhācaritāṃ bhuvi /
dhīrā yasyānuśocanti vane grāmanivāsinaḥ

basta eko vane kaścidvicinvan priyamātmanaḥ /
dadarśa kūpe patitāṃ svakarmavaśagāmajām

tasyā uddharaṇopāyaṃ bastaḥ kāmī vicintayan /
vyadhatta tīrthamuddhṛtya viṣāṇāgreṇa rodhasī

sottīrya kūpāt suśroṇī tameva cakame kila /
tayā vṛtaṃ samudvīkṣya bahvyo 'jāḥ kāntakāminīḥ

pīvānaṃ śmaśrulaṃ preṣṭhaṃ mīḍhvāṃsaṃ yābhakovidam /
sa eko 'javṛṣastāsāṃ bahvīnāṃ rativardhanaḥ /
reme kāmagrahagrasta ātmānaṃ nāvabudhyata

tameva preṣṭhatamayā ramamāṇamajānyayā /
vilokya kūpasaṃvignā nāmṛṣyadbastakarma tat

taṃ durhṛdaṃ suhṛdrūpaṃ kāminaṃ kṣaṇasauhṛdam /
indriyārāmamutsṛjya svāminaṃ duḥkhitā yayau

so 'pi cānugataḥ straiṇaḥ kṛpaṇastāṃ prasāditum /
kurvanniḍaviḍākāraṃ nāśaknot pathi sandhitum

tasya tatra dvijaḥ kaścidajāsvāmyacchinadruṣā /
lambantaṃ vṛṣaṇaṃ bhūyaḥ sandadhe 'rthāya yogavit

sambaddhavṛṣaṇaḥ so 'pi hyajayā kūpalabdhayā /
kālaṃ bahutithaṃ bhadre kāmairnādyāpi tuṣyati

tathāhaṃ kṛpaṇaḥ subhru bhavatyāḥ premayantritaḥ /
ātmānaṃ nābhijānāmi mohitastava māyayā

yat pṛthivyāṃ vrīhiyavaṃ hiraṇyaṃ paśavaḥ striyaḥ /
na duhyanti manaḥprītiṃ puṃsaḥ kāmahatasya te

na jātu kāmaḥ kāmānāmupabhogena śāṃyati /
haviṣā kṛṣṇavartmeva bhūya evābhivardhate

yadā na kurute bhāvaṃ sarvabhūteṣv amaṅgalam /
samadṛṣṭestadā puṃsaḥ sarvāḥ sukhamayā diśaḥ

yā dustyajā durmatibhirjīryato yā na jīryate /
tāṃ tṛṣṇāṃ duḥkhanivahāṃ śarmakāmo drutaṃ tyajet

mātrā svasrā duhitrā vā nāviviktāsano bhavet /
balavān indriyagrāmo vidvāṃsamapi karṣati

pūrṇaṃ varṣasahasraṃ me viṣayān sevato 'sakṛt /
tathāpi cānusavanaṃ tṛṣṇā teṣūpajāyate

tasmādetāmahaṃ tyaktvā brahmaṇyadhyāya mānasam /
nirdvandvo nirahaṅkāraścariṣyāmi mṛgaiḥ saha

dṛṣṭaṃ śrutamasadbuddhvā nānudhyāyen na sandiśet /
saṃsṛtiṃ cātmanāśaṃ ca tatra vidvān sa ātmadṛk

ityuktvā nāhuṣo jāyāṃ tadīyaṃ pūrave vayaḥ /
dattvā svajarasaṃ tasmādādade vigataspṛhaḥ

diśi dakṣiṇapūrvasyāṃ druhyuṃ dakṣiṇato yadum /
pratīcyāṃ turvasuṃ cakra udīcyāmanumīśvaram

bhūmaṇḍalasya sarvasya pūrumarhattamaṃ viśām /
abhiṣicyāgrajāṃstasya vaśe sthāpya vanaṃ yayau

āsevitaṃ varṣapūgān ṣaḍvargaṃ viṣayeṣu saḥ /
kṣaṇena mumuce nīḍaṃ jātapakṣa iva dvijaḥ

sa tatra nirmuktasamastasaṅga ātmānubhūtyā vidhutatriliṅgaḥ /
pare 'male brahmaṇi vāsudeve lebhe gatiṃ bhāgavatīṃ pratītaḥ

śrutvā gāthāṃ devayānī mene prastobhamātmanaḥ /
strīpuṃsoḥ snehavaiklavyāt parihāsamiveritam

sā sannivāsaṃ suhṛdāṃ prapāyāmiva gacchatām /
vijñāyeśvaratantrāṇāṃ māyāviracitaṃ prabhoḥ

sarvatra saṅgamutsṛjya svapnaupamyena bhārgavī /
kṛṣṇe manaḥ samāveśya vyadhunol liṅgamātmanaḥ

namastubhyaṃ bhagavate vāsudevāya vedhase /
sarvabhūtādhivāsāya śāntāya bṛhate namaḥ