Bhagavata Purana · Chapter 08.18

BhP_08.18.001/0 śrīśuka uvāca
itthaṃ viriñcastutakarmavīryaḥ prādurbabhūvāmṛtabhūradityām /
caturbhujaḥ śaṅkhagadābjacakraḥ piśaṅgavāsā nalināyatekṣaṇaḥ

śyāmāvadāto jhaṣarājakuṇḍala tviṣollasacchrīvadanāmbujaḥ pumān /
śrīvatsavakṣā balayāṅgadollasat kirīṭakāñcīguṇacārunūpuraḥ

madhuvrātavratavighuṣṭayā svayā virājitaḥ śrīvanamālayā hariḥ /
prajāpaterveśmatamaḥ svarociṣā vināśayan kaṇṭhaniviṣṭakaustubhaḥ

diśaḥ praseduḥ salilāśayāstadā prajāḥ prahṛṣṭā ṛtavo guṇānvitāḥ /
dyaurantarīkṣaṃ kṣitiragnijihvā gāvo dvijāḥ sañjahṛṣurnagāśca

śroṇāyāṃ śravaṇadvādaśyāṃ muhūrte 'bhijiti prabhuḥ /
sarve nakṣatratārādyāś cakrustajjanma dakṣiṇam

dvādaśyāṃ savitātiṣṭhan madhyandinagato nṛpa /
vijayānāma sā proktā yasyāṃ janma vidurhareḥ

śaṅkhadundubhayo nedurmṛdaṅgapaṇavānakāḥ /
citravāditratūryāṇāṃ nirghoṣastumulo 'bhavat

prītāścāpsaraso 'nṛtyan gandharvapravarā jaguḥ /
tuṣṭuvurmunayo devā manavaḥ pitaro 'gnayaḥ

siddhavidyādharagaṇāḥ sakimpuruṣakinnarāḥ /
cāraṇā yakṣarakṣāṃsi suparṇā bhujagottamāḥ

gāyanto 'tipraśaṃsanto nṛtyanto vibudhānugāḥ /
adityā āśramapadaṃ kusumaiḥ samavākiran

dṛṣṭvāditistaṃ nijagarbhasambhavaṃ paraṃ pumāṃsaṃ mudamāpa vismitā /
gṛhītadehaṃ nijayogamāyayā prajāpatiścāha jayeti vismitaḥ

yat tadvapurbhāti vibhūṣaṇāyudhair avyaktacidvyaktamadhārayaddhariḥ /
babhūva tenaiva sa vāmano vaṭuḥ sampaśyatordivyagatiryathā naṭaḥ

taṃ vaṭuṃ vāmanaṃ dṛṣṭvā modamānā maharṣayaḥ /
karmāṇi kārayāmāsuḥ puraskṛtya prajāpatim

tasyopanīyamānasya sāvitrīṃ savitābravīt /
bṛhaspatirbrahmasūtraṃ mekhalāṃ kaśyapo 'dadāt

dadau kṛṣṇājinaṃ bhūmirdaṇḍaṃ somo vanaspatiḥ /
kaupīnācchādanaṃ mātā dyauśchatraṃ jagataḥ pateḥ

kamaṇḍaluṃ vedagarbhaḥ kuśān saptarṣayo daduḥ /
akṣamālāṃ mahārāja sarasvaty avyayātmanaḥ

tasmā ity upanītāya yakṣarāṭ pātrikāmadāt /
bhikṣāṃ bhagavatī sākṣādumādādambikā satī

sa brahmavarcasenaivaṃ sabhāṃ sambhāvito vaṭuḥ /
brahmarṣigaṇasañjuṣṭāmatyarocata māriṣaḥ

samiddhamāhitaṃ vahniṃ kṛtvā parisamūhanam /
paristīrya samabhyarcya samidbhirajuhoddvijaḥ

śrutvāśvamedhairyajamānamūrjitaṃ baliṃ bhṛgūṇāmupakalpitaistataḥ /
jagāma tatrākhilasārasambhṛto bhāreṇa gāṃ sannamayan pade pade

taṃ narmadāyāstaṭa uttare baler ya ṛtvijaste bhṛgukacchasaṃjñake /
pravartayanto bhṛgavaḥ kratūttamaṃ vyacakṣatārāduditaṃ yathā ravim

te ṛtvijo yajamānaḥ sadasyā hatatviṣo vāmanatejasā nṛpa /
sūryaḥ kilāyāty uta vā vibhāvasuḥ sanatkumāro 'tha didṛkṣayā kratoḥ

itthaṃ saśiṣyeṣu bhṛguṣvanekadhā vitarkyamāṇo bhagavān sa vāmanaḥ /
chatraṃ sadaṇḍaṃ sajalaṃ kamaṇḍaluṃ viveśa bibhraddhayamedhavāṭam

mauñjyā mekhalayā vītamupavītājinottaram /
jaṭilaṃ vāmanaṃ vipraṃ māyāmāṇavakaṃ harim

praviṣṭaṃ vīkṣya bhṛgavaḥ saśiṣyāste sahāgnibhiḥ /
pratyagṛhṇan samutthāya saṅkṣiptāstasya tejasā

yajamānaḥ pramudito darśanīyaṃ manoramam /
rūpānurūpāvayavaṃ tasmā āsanamāharat

svāgatenābhinandyātha pādau bhagavato baliḥ /
avanijyārcayāmāsa muktasaṅgamanoramam

tatpādaśaucaṃ janakalmaṣāpahaṃ sa dharmavin mūrdhny adadhāt sumaṅgalam /
yaddevadevo giriśaścandramaulir dadhāra mūrdhnā parayā ca bhaktyā

BhP_08.18.029/0 śrībaliruvāca
svāgataṃ te namastubhyaṃ brahman kiṃ karavāma te /
brahmarṣīṇāṃ tapaḥ sākṣān manye tvārya vapurdharam

adya naḥ pitarastṛptā adya naḥ pāvitaṃ kulam /
adya sviṣṭaḥ kraturayaṃ yadbhavān āgato gṛhān

adyāgnayo me suhutā yathāvidhi dvijātmaja tvaccaraṇāvanejanaiḥ /
hatāṃhaso vārbhiriyaṃ ca bhūraho tathā punītā tanubhiḥ padaistava

yadyadvaṭo vāñchasi tat pratīccha me tvāmarthinaṃ viprasutānutarkaye /
gāṃ kāñcanaṃ guṇavaddhāma mṛṣṭaṃ tathānnapeyamuta vā viprakanyām /
grāmān samṛddhāṃsturagān gajān vā rathāṃstathārhattama sampratīccha