Atharva Veda · Chapter 20.128

yaḥ sabheyo vidathyaḥ sutvā yajvātha pūruṣaḥ /
sūryaṃ cāmū riśādasastaddevāḥ prāgakalpayan

yo jāmyā aprathayastadyatsakhāyaṃ dudhūrṣati /
jyeṣṭho yadapracetāstadāhuradharāgiti

yadbhadrasya puruṣasya putro bhavati dādhṛṣiḥ /
tadvipro abravīdu tadgandharvaḥ kāmyaṃ vacaḥ

yaśca paṇi raghujiṣṭhyo yaśca devāmadāśuriḥ /
dhīrāṇāṃ śaśvatāmahaṃ tadapāgiti śuśruma

ye ca devā ayajantātho ye ca parādadiḥ /
sūryo divamiva gatvāya maghavā no vi rapśate

yo'nāktākṣo anabhyakto amaṇivo ahiraṇyavaḥ /
abrahmā brahmaṇaḥ putrastotā kalpeṣu saṃmitā

ya āktākṣaḥ subhyaktaḥ sumaṇiḥ suhiraṇyavaḥ /
subrahmā brahmaṇaḥ putrastotā kalpeṣu saṃmitā

prapāṇā ca veśantā revāmapratidiśyayaḥ /
ayabhyā kanyā kalyāṇī totā kalpeṣu saṃmitā

suprapāṇā ca veśantā revāntsupratidiśyayaḥ /
suyabhyā kanyā kalyāṇī totā kalpeṣu saṃmitā

parivṛktā ca mahiṣī svastyā ca yudhiṃ gamaḥ /
anāśuraścāyāmī totā kalpeṣu saṃmitā

vāvātā ca mahiṣī svastyā ca yudhiṃ gamaḥ /
śvāśuraścāyāmī totā kalpeṣu saṃmitā

yadindrādo dāśarājñe mānuṣaṃ vi gāhathāḥ /
virūpaḥ sarvasmā āsītsaha yakṣāya kalpate

tvaṃ vṛṣākṣuṃ maghavann amraṃ maryākaro raviḥ /
tvaṃ rauhiṇaṃ vyāsyo vi vṛtrasyābhinacchiraḥ

yaḥ parvatān vyadadhādyo apo vyagāhathāḥ /
indro yo vṛtrahānmahaṃ tasmādindra namo'stu te

pṛṣṭhaṃ dhāvantaṃ haryorauccaiḥ śravasamabruvan /
svastyaśva jaitrāyendramā vaha susrajam

ye tvā śvetā ajaiśravaso hāryo yuñjanti dakṣiṇam /
pūrvā namasya devānāṃ bibhradindra mahīyate

२०.१२८.१६
yuktvā śvetā auccaiḥśravasaṃ haryoryuñjanti dakṣiṇam /
pūrvatamaṃ sa devānāṃ bibhradindraṃ mahīyate